১. পঠমসমুদ্দসুত্তৰণ্ণনা

২২৮. সমুদ্দৰগ্গস্স পঠমে চক্খু, ভিক্খৰে, পুরিসস্স সমুদ্দোতি যদি দুপ্পূরণট্ঠেন যদি ৰা সমুদ্দনট্ঠেন সমুদ্দো, চক্খুমেৰ সমুদ্দো. তস্স হি পথৰিতো যাৰ অকনিট্ঠব্রহ্মলোকা নীলাদিআরম্মণং সমোসরন্তং পরিপুণ্ণভাৰং কাতুং ন সক্কোতি, এৰং দুপ্পূরণট্ঠেনপি সমুদ্দো. চক্খু চ তেসু তেসু নীলাদীসু আরম্মণেসু সমুদ্দতি, অসংৰুতং হুত্ৰা ওসরমানং কিলেসুপ্পত্তিযা কারণভাৰেন সদোসগমনেন গচ্ছতীতি সমুদ্দনট্ঠেনপি সমুদ্দো. তস্স রূপমযো ৰেগোতি সমুদ্দস্স অপ্পমাণো ঊমিমযো ৰেগো ৰিয তস্সাপি চক্খুসমুদ্দস্স সমোসরন্তস্স নীলাদিভেদস্স আরম্মণস্স ৰসেন অপ্পমেয্যো রূপমযো ৰেগো ৰেদিতব্বো. যো তং রূপমযং ৰেগং সহতীতি যো তং চক্খুসমুদ্দে সমোসটং রূপমযং ৰেগং, মনাপে রূপে রাগং, অমনাপে দোসং, অসমপেক্খিতে মোহন্তি এৰং রাগাদিকিলেসে অনুপ্পাদেন্তো উপেক্খকভাৰেন সহতি.

সঊমিন্তিআদীসু কিলেসঊমীহি সঊমিং. কিলেসাৰট্টেহি সাৰট্টং. কিলেসগাহেহি সগাহং. কিলেসরক্খসেহি সরক্খসং. কোধূপাযাসস্স চ ৰসেন সঊমিং. ৰুতঞ্হেতং ‘‘ঊমিভযন্তি খো, ভিক্খৰে, কোধূপাযাসস্সেতং অধিৰচন’’ন্তি (ইতিৰু. ১০৯; ম. নি. ২.১৬২; অ. নি. ৪.১২২). কামগুণৰসেন সাৰট্টং. ৰুতঞ্হেতং ‘‘আৰট্টগ্গাহোতি খো, ভিক্খৰে, পঞ্চন্নেতং কামগুণানং অধিৰচন’’ন্তি (সং. নি. ৪.২৪১). মাতুগামৰসেন সগাহং সরক্খসং. ৰুত্তঞ্হেতং ‘‘গাহরক্খসোতি খো, ভিক্খৰে, মাতুগামস্সেতং অধিৰচন’’ন্তি (ইতিৰু. ১০৯). সেসৰারেসুপি এসেৰ নযো. সভযং দুত্তরং অচ্চতরীতি ঊমিভযেন সভযং দুরতিক্কমং অতিক্কমি. লোকন্তগূতি সঙ্খারলোকস্স অন্তং গতো. পারগতোতি ৰুচ্চতীতি নিব্বানং গতোতি কথীযতি.