২. খণসুত্তৰণ্ণনা

১৩৫. দুতিযে ছফস্সাযতনিকা নামাতি ৰিসুং ছফস্সাযতনিকা নাম নিরযা নত্থি. সব্বেসুপি হি একতিংসমহানিরযেসু ছদ্ৰারফস্সাযতনপঞ্ঞত্তি হোতিযেৰ. ইদং পন অৰীচিমহানিরযং সন্ধায ৰুত্তং. সগ্গাতি ইধাপি তাৰতিংসপুরমেৰ অধিপ্পেতং. কামাৰচরদেৰলোকে পন একস্মিম্পি ছফস্সাযতনপঞ্ঞত্তিযা অভাৰো নাম নত্থি. ইমিনা কিং দীপেতি? নিরযে একন্তদুক্খসমপ্পিতভাৰেন, দেৰলোকে চ একন্তসুখসমপ্পিতত্তা একন্তখিড্ডারতিৰসেন উপ্পন্নপমাদেন মগ্গব্রহ্মচরিযৰাসং ৰসিতুং ন সক্কা. মনুস্সলোকো পন ৰোকিণ্ণসুখদুক্খো, ইধেৰ অপাযোপি সগ্গোপি পঞ্ঞাযতি. অযং মগ্গব্রহ্মচরিযস্স কম্মভূমি নাম, সা তুম্হেহি লদ্ধা. তস্মা যে ৰো ইমে মানুস্সকা খন্ধা লদ্ধা, তে ৰো লাভা. যঞ্চ ৰো ইদং মনুস্সত্তং লদ্ধং, পটিলদ্ধো ৰো ব্রহ্মচরিযৰাসস্স খণো সমযোতি. ৰুত্তম্পি হেতং পোরাণেহি –

‘‘অযং কম্মভূমি ইধ মগ্গভাৰনা,

ঠানানি সংৰেজনিযা বহূ ইধ;

সংৰেগসংৰেজনিযেসু ৰত্থুসু,

সংৰেগজাতোৰ পযুঞ্চ যোনিসো’’তি.