৬. ঘোসিতসুত্তৰণ্ণনা

১২৯. ছট্ঠে রূপা চ মনাপাতি রূপা চ মনাপা সংৰিজ্জন্তি. চক্খুৰিঞ্ঞাণঞ্চাতি চক্খুৰিঞ্ঞাণঞ্চ সংৰিজ্জতি. সুখৰেদনিযং ফস্সন্তি চক্খুৰিঞ্ঞাণসম্পযুত্তং উপনিস্সযৰসেন জৰনকালে সুখৰেদনায পচ্চযভূতং ফস্সং. সুখা ৰেদনাতি একং ফস্সং পটিচ্চ জৰনৰসেন সুখৰেদনা উপ্পজ্জতি. সেসপদেসুপি এসেৰ নযো.

ইতি ইমস্মিং সুত্তে তেৰীসতি ধাতুযো কথিতা. কথং? এত্থ হি চক্খুপসাদো চক্খুধাতু, তস্স আরম্মণং রূপধাতু, চক্খুৰিঞ্ঞাণং ৰিঞ্ঞাণধাতু, চক্খুৰিঞ্ঞাণধাতুযা সহজাতা তযো খন্ধা ধম্মধাতু, এৰং পঞ্চসু দ্ৰারেসু চতুন্নং চতুন্নং ৰসেন ৰীসতি. মনোদ্ৰারে ‘‘মনোধাতূ’’তি আৰজ্জনচিত্তং গহিতং, আরম্মণঞ্চেৰ হদযৰত্থু চ ধম্মধাতু, ৰত্থুনিস্সিতং মনোৰিঞ্ঞাণধাতূতি এৰং তেৰীসতি হোন্তি. এৰং তেৰীসতিযা ধাতূনং ৰসেন ধাতুনানত্তং ৰুত্তং ভগৰতাতি দস্সেতি.