১০. উদকসুত্তৰণ্ণনা

১০৩. দসমে উদকো সুদন্তি এত্থ সুদন্তি নিপাতমত্তং. উদকোতি তস্স নামং. ইদং জাতু ৰেদগূতি এত্থ ইদন্তি নিপাতমত্তং. অথ ৰা ইদং মম ৰচনং সুণাথাতি দীপেন্তো এৰমাহ. জাতু ৰেদগূতি অহং একংসেনেৰ ৰেদগূ, ৰেদসঙ্খাতেন ঞাণেন নেয্যেসু গতো, ৰেদং ৰা গতো অধিগতো, পণ্ডিতোহমস্মীতি অত্থো. সব্বজীতি একংসেন সব্বৰট্টং জিনিত্ৰা অভিভৰিত্ৰা ঠিতোস্মীতি ৰদতি. অপলিখতং গণ্ডমূলন্তি অপলিখতং দুক্খমূলং. পলিখণিন্তি পলিখতং মযা, খনিত্ৰা ঠিতোস্মীতি দীপেতি.

মাতাপেত্তিকসম্ভৰস্সাতি মাতিতো চ পিতিতো চ নিব্বত্তেন মাতাপেত্তিকেন সুক্কসোণিতেন সম্ভূতস্স. ওদনকুম্মাসূপচযস্সাতি ওদনেন চেৰ কুম্মাসেন চ উপচিতস্স ৰড্ঢিতস্স. অনিচ্চুচ্ছাদনপরিমদ্দনভেদনৰিদ্ধংসনধম্মস্সাতি এত্থ অযং কাযো হুত্ৰা অভাৰট্ঠেন অনিচ্চধম্মো, দুগ্গন্ধৰিঘাতত্থায তনুৰিলেপনেন উচ্ছাদনধম্মো, অঙ্গপচ্চঙ্গাবাধৰিনোদনত্থায খুদ্দকসম্বাহনেন পরিমদ্দনধম্মো, দহরকালে ৰা ঊরূসু সযাপেত্ৰা গব্ভৰাসেন দুস্সণ্ঠিতানং তেসং তেসং অঙ্গানং সণ্ঠানসম্পাদনত্থং অঞ্ছনপীল়নাদীনং ৰসেন পরিমদ্দনধম্মো, এৰং পরিহরিতোপি চ ভেদনৰিদ্ধংসনধম্মো ভিজ্জতি চেৰ ৰিকিরতি চ, এৰং সভাৰোতি অত্থো.

তত্থ মাতাপেত্তিকসম্ভৰওদনকুম্মাসূপচযপরিমদ্দনপদেহি ৰড্ঢি কথিতা, অনিচ্চভেদনৰিদ্ধংসনপদেহি পরিহানি. পুরিমেহি ৰা তীহি সমুদযো, পচ্ছিমেহি অত্থঙ্গমোতি. এৰং চাতুমহাভূতিকস্স কাযস্স ৰড্ঢিপরিহানিনিব্বত্তিভেদা দস্সিতা. সেসং উত্তানত্থমেৰাতি.

সল়ৰগ্গো দসমো.

দুতিযো পণ্ণাসকো.