৭. সঞ্ঞানানত্তসুত্তৰণ্ণনা

৯১. সত্তমে রূপধাতূতি আপাথে পতিতং অত্তনো ৰা পরস্স ৰা সাটকৰেঠনাদিৰত্থুকং রূপারম্মণং. রূপসঞ্ঞাতি চক্খুৰিঞ্ঞাণসম্পযুত্তা সঞ্ঞা. রূপসঙ্কপ্পোতি সম্পটিচ্ছনাদীহি তীহি চিত্তেহি সম্পযুত্তো সঙ্কপ্পো. রূপচ্ছন্দোতি রূপে ছন্দিকতট্ঠেন ছন্দো. রূপপরিল়াহোতি রূপে অনুডহনট্ঠেন পরিল়াহো. রূপপরিযেসনাতি পরিল়াহে উপ্পন্নে সন্দিট্ঠসম্ভত্তে গহেত্ৰা তস্স রূপস্স পটিলাভত্থায পরিযেসনা. এত্থ চ সঞ্ঞাসঙ্কপ্পছন্দা একজৰনৰারেপি নানাজৰনৰারেপি লব্ভন্তি, পরিল়াহপরিযেসনা পন নানাজৰনৰারেযেৰ লব্ভন্তীতি. এৰং খো, ভিক্খৰে, ধাতুনানত্তন্তি এত্থ চ এৰং রূপাদিনানাসভাৰং ধাতুং পটিচ্চ রূপসঞ্ঞাদিনানাসভাৰসঞ্ঞা উপ্পজ্জতীতি ইমিনা নযেন অত্থো ৰেদিতব্বো. সত্তমং.