১.ধাতুনানত্তসুত্তৰণ্ণনা

৮৫. ধাতুসংযুত্তস্স পঠমে নিস্সত্তট্ঠসুঞ্ঞতট্ঠসঙ্খাতেন সভাৰট্ঠেন ধাতূতি লদ্ধনামানং ধম্মানং নানাসভাৰো ধাতুনানত্তং. চক্খুধাতূতিআদীসু চক্খুপসাদো চক্খুধাতু, রূপারম্মণং রূপধাতু, চক্খুপসাদৰত্থুকং চিত্তং চক্খুৰিঞ্ঞাণধাতু. সোতপসাদো সোতধাতু, সদ্দারম্মণং সদ্দধাতু, সোতপসাদৰত্থুকং চিত্তং সোতৰিঞ্ঞাণধাতু. ঘানপসাদো ঘানধাতু, গন্ধারম্মণং গন্ধধাতু, ঘানপসাদৰত্থুকং চিত্তং ঘানৰিঞ্ঞাণধাতু. জিৰ্হাপসাদো জিৰ্হাধাতু, রসারম্মণং রসধাতু, জিৰ্হাপসাদৰত্থুকং চিত্তং জিৰ্হাৰিঞ্ঞাণধাতু. কাযপসাদো কাযধাতু, ফোট্ঠব্বারম্মণং ফোট্ঠব্বধাতু, কাযপসাদৰত্থুকং চিত্তং কাযৰিঞ্ঞাণধাতু. তিস্সো মনোধাতুযো মনোধাতু, ৰেদনাদযো তযো খন্ধা সুখুমরূপানি নিব্বানঞ্চ ধম্মধাতু, সব্বম্পি মনোৰিঞ্ঞাণং মনোৰিঞ্ঞাণধাতূতি. এত্থ চ সোল়স ধাতুযো কামাৰচরা, অৰসানে দ্ৰে চতুভূমিকাতি. পঠমং.