৩. দসবলৰগ্গো

১. দসবলসুত্তৰণ্ণনা

২১. দসবলৰগ্গস্স পঠমং দুতিযস্সেৰ সঙ্খেপো.

২. দুতিযদসবলসুত্তৰণ্ণনা

২২. দুতিযং ভগৰতা অত্তনো অজ্ঝাসযস্স ৰসেন ৰুত্তং. তত্থ দসবলসমন্নাগতোতি দসহি বলেহি সমন্নাগতো. বলঞ্চ নামেতং দুৰিধং কাযবলঞ্চ ঞাণবলঞ্চ. তেসু তথাগতস্স কাযবলং হত্থিকুলানুসারেন ৰেদিতব্বং. ৰুত্তঞ্হেতং পোরাণেহি –

‘‘কাল়াৰকঞ্চ গঙ্গেয্যং, পণ্ডরং তম্বপিঙ্গলং;

গন্ধমঙ্গলহেমঞ্চ, উপোসথছদ্দন্তিমে দসা’’তি.(ম. নি. অট্ঠ. ১.১৪৮; ৰিভ. অট্ঠ. ৭৬০); –

ইমানি দস হত্থিকুলানি. তত্থ কাল়াৰকন্তি পকতিহত্থিকুলং দট্ঠব্বং. যং দসন্নং পুরিসানং কাযবলং, তং একস্স কাল়াৰকস্স হত্থিনো. যং দসন্নং কাল়াৰকানং বলং, তং একস্স গঙ্গেয্যস্স. যং দসন্নং গঙ্গেয্যানং, তং একস্স পণ্ডরস্স. যং দসন্নং পণ্ডরানং, তং একস্স তম্বস্স. যং দসন্নং তম্বানং, তং একস্স পিঙ্গলস্স. যং দসন্নং পিঙ্গলানং, তং একস্স গন্ধহত্থিনো. যং দসন্নং গন্ধহত্থীনং, তং একস্স মঙ্গলস্স. যং দসন্নং মঙ্গলানং, তং একস্স হেমৰতস্স. যং দসন্নং হেমৰতানং, তং একস্স উপোসথস্স. যং দসন্নং উপোসথানং, তং একস্স ছদ্দন্তস্স. যং দসন্নং ছদ্দন্তানং, তং একস্স তথাগতস্স. নারাযনসঙ্ঘাতবলন্তিপি ইদমেৰ ৰুচ্চতি. তদেতং পকতিহত্থিগণনায হত্থীনং কোটিসহস্সানং, পুরিসগণনায দসন্নং পুরিসকোটিসহস্সানং বলং হোতি. ইদং তাৰ তথাগতস্স কাযবলং. ‘‘দসবলসমন্নাগতো’’তি এত্থ পন এতং সঙ্গহং ন গচ্ছতি. এতঞ্হি বাহিরকং লামকং তিরচ্ছানগতানং সীহাদীনম্পি হোতি. এতঞ্হি নিস্সায দুক্খপরিঞ্ঞা ৰা সমুদযপ্পহানং ৰা মগ্গভাৰনা ৰা ফলসচ্ছিকিরিযা ৰা নত্থি. অঞ্ঞং পন দসসু ঠানেসু অকম্পনত্থেন উপত্থম্ভনত্থেন চ দসৰিধং ঞাণবলং নাম অত্থি. তং সন্ধায ৰুত্তং ‘‘দসবলসমন্নাগতো’’তি.

কতমং পন তন্তি? ঠানাট্ঠানাদীনং যথাভূতং জাননং. সেয্যথিদং – ঠানঞ্চ ঠানতো অট্ঠানঞ্চ অট্ঠানতো জাননং একং, অতীতানাগতপচ্চুপ্পন্নানং কম্মসমাদানানং ঠানসো হেতুসো যথাভূতং ৰিপাকজাননং একং, সব্বত্থগামিনিপটিপদাজাননং একং, অনেকধাতুনানাধাতুলোকজাননং একং, পরসত্তানং পরপুগ্গলানং নানাধিমুত্তিকতাজাননং একং, তেসংযেৰ ইন্দ্রিযপরোপরিযত্তজাননং একং, ঝানৰিমোক্খসমাধিসমাপত্তীনং সংকিলেসৰোদানৰুট্ঠানজাননং একং, পুব্বেনিৰাসজাননং একং, সত্তানং চুতূপপাতজাননং একং, আসৰক্খযজাননং একন্তি. অভিধম্মে পন –

‘‘ইধ তথাগতো ঠানঞ্চ ঠানতো অট্ঠানঞ্চ অট্ঠানতো যথাভূতং পজানাতি. যম্পি তথাগতো ঠানঞ্চ ঠানতো অট্ঠানঞ্চ অট্ঠানতো যথাভূতং পজানাতি. ইদম্পি তথাগতস্স তথাগতবলং হোতি, যং বলং আগম্ম তথাগতো আসভং ঠানং পটিজানাতি, পরিসাসু সীহনাদং নদতি, ব্রহ্মচক্কং পৰত্তেতী’’তি.

আদিনা (ৰিভ. ৭৬০) নযেন ৰিত্থারতো আগতানেৰ. অত্থৰণ্ণনাপি নেসং ৰিভঙ্গট্ঠকথাযঞ্চেৰ (ৰিভ. অট্ঠ. ৭৬০) পপঞ্চসূদনিযা চ মজ্ঝিমট্ঠকথায (ম. নি. অট্ঠ. ১.১৪৮) সব্বাকারতো ৰুত্তা. সা তত্থ ৰুত্তনযেনেৰ গহেতব্বা.

চতূহি চ ৰেসারজ্জেহীতি এত্থ সারজ্জপটিপক্খং ৰেসারজ্জং, চতূসু ঠানেসু ৰেসারজ্জভাৰং পচ্চৰেক্খন্তস্স উপ্পন্নসোমনস্সমযঞাণস্সেতং নামং. কতমেসু চতূসু? ‘‘সম্মাসম্বুদ্ধস্স তে পটিজানতো ইমে ধম্মা অনভিসম্বুদ্ধা’’তিআদীসু চোদনাৰত্থূসু. তত্রাযং পাল়ি –

‘‘চত্তারিমানি, ভিক্খৰে, তথাগতস্স ৰেসারজ্জানি…পে…. কতমানি চত্তারি? ‘সম্মাসম্বুদ্ধস্স তে পটিজানতো ইমে ধম্মা অনভিসম্বুদ্ধা’তি তত্র ৰত মং সমণো ৰা ব্রাহ্মণো ৰা দেৰো ৰা মারো ৰা ব্রহ্মা ৰা কোচি ৰা লোকস্মিং সহ ধম্মেন পটিচোদেস্সতীতি নিমিত্তমেতং, ভিক্খৰে, ন সমনুপস্সামি. এতমহং, ভিক্খৰে, নিমিত্তং অসমনুপস্সন্তো খেমপ্পত্তো অভযপ্পত্তো ৰেসারজ্জপ্পত্তো ৰিহরামি. ‘খীণাসৰস্স তে পটিজানতো ইমে আসৰা অপরিক্খীণা’তি তত্র ৰত মং…পে… ‘যে খো পন তে অন্তরাযিকা ধম্মা ৰুত্তা, তে পটিসেৰতো নালং অন্তরাযাযা’তি তত্র ৰত মং…পে… ‘যস্স খো পন তে অত্থায ধম্মো দেসিতো, সো ন নিয্যাতি তক্করস্স সম্মা দুক্খক্খযাযা’তি তত্র ৰত মং সমণো ৰা ব্রাহ্মণো ৰা…পে… ৰেসারজ্জপ্পত্তো ৰিহরামী’’তি (অ. নি. ৪.৮).

আসভং ঠানন্তি সেট্ঠট্ঠানং উত্তমট্ঠানং. আসভা ৰা পুব্ববুদ্ধা, তেসং ঠানন্তি অত্থো. অপিচ গৰসতজেট্ঠকো উসভো, গৰসহস্সজেট্ঠকো ৰসভো, ৰজসতজেট্ঠকো ৰা উসভো, ৰজসহস্সজেট্ঠকো ৰসভো, সব্বগৰসেট্ঠো সব্বপরিস্সযসহো সেতো পাসাদিকো মহাভারৰহো অসনিসতসদ্দেহিপি অসম্পকম্পিযো নিসভো, সো ইধ উসভোতি অধিপ্পেতো. ইদম্পি হি তস্স পরিযাযৰচনং. উসভস্স ইদন্তি আসভং. ঠানন্তি চতূহি পাদেহি পথৰিং উপ্পীল়েত্ৰা অৰট্ঠানং (ম. নি. ১.১৫০). ইদং পন আসভং ৰিযাতি আসভং. যথেৰ হি নিসভসঙ্খাতো উসভো উসভবলেন সমন্নাগতো চতূহি পাদেহি পথৰিং উপ্পীল়েত্ৰা অচলট্ঠানেন তিট্ঠতি, এৰং তথাগতোপি দসহি তথাগতবলেহি সমন্নাগতো চতূহি ৰেসারজ্জপাদেহি অট্ঠপরিসপথৰিং উপ্পীল়েত্ৰা সদেৰকে লোকে কেনচি পচ্চত্থিকেন পচ্চামিত্তেন অকম্পিযো অচলট্ঠানেন তিট্ঠতি. এৰং তিট্ঠমানো চ তং আসভং ঠানং পটিজানাতি উপগচ্ছতি ন পচ্চক্খাতি, অত্তনি আরোপেতি. তেন ৰুত্তং ‘‘আসভং ঠানং পটিজানাতী’’তি.

পরিসাসূতি ‘‘অট্ঠ খো ইমা, সারিপুত্ত, পরিসা. কতমা অট্ঠ? খত্তিযপরিসা ব্রাহ্মণপরিসা গহপতিপরিসা সমণপরিসা চাতুমহারাজিকপরিসা তাৰতিংসপরিসা মারপরিসা ব্রহ্মপরিসা’’তি, ইমাসু অট্ঠসু পরিসাসু. সীহনাদং নদতীতি সেট্ঠনাদং অভীতনাদং নদতি, সীহনাদসদিসং ৰা নাদং নদতি. অযমত্থো সীহনাদসুত্তেন দীপেতব্বো. যথা ৰা সীহো সহনতো চেৰ হননতো চ সীহোতি ৰুচ্চতি, এৰং তথাগতো লোকধম্মানং সহনতো পরপ্পৰাদানঞ্চ হননতো সীহোতি ৰুচ্চতি. এৰং ৰুত্তস্স সীহস্স নাদং সীহনাদং. তত্থ যথা সীহো সীহবলেন সমন্নাগতো সব্বত্থ ৰিসারদো ৰিগতলোমহংসো সীহনাদং নদতি, এৰং তথাগতসীহোপি তথাগতবলেহি সমন্নাগতো অট্ঠসু পরিসাসু ৰিসারদো ৰিগতলোমহংসো, ‘‘ইতি রূপ’’ন্তিআদিনা নযেন নানাৰিধদেসনাৰিলাসসম্পন্নং সীহনাদং নদতি. তেন ৰুত্তং ‘‘পরিসাসু সীহনাদং নদতী’’তি.

ব্রহ্মচক্কং পৰত্তেতীতি এত্থ ব্রহ্মন্তি সেট্ঠং উত্তমং, ৰিসুদ্ধস্স ধম্মচক্কস্সেতং অধিৰচনং. তং পন ধম্মচক্কং দুৰিধং হোতি পটিৰেধঞাণঞ্চ দেসনাঞাণঞ্চ. তত্থ পঞ্ঞাপভাৰিতং অত্তনো অরিযফলাৰহং পটিৰেধঞাণং, করুণাপভাৰিতং সাৰকানং অরিযফলাৰহং দেসনাঞাণং. তত্থ পটিৰেধঞাণং উপ্পজ্জমানং উপ্পন্নন্তি দুৰিধং. তঞ্হি অভিনিক্খমনতো পট্ঠায যাৰ অরহত্তমগ্গা উপ্পজ্জমানং, ফলক্খণে উপ্পন্নং নাম. তুসিতভৰনতো ৰা যাৰ মহাবোধিপল্লঙ্কে অরহত্তমগ্গা উপ্পজ্জমানং, ফলক্খণে উপ্পন্নং নাম. দীপঙ্করতো ৰা পট্ঠায যাৰ অরহত্তমগ্গা উপ্পজ্জমানং, ফলক্খণে উপ্পন্নং নাম. দেসনাঞাণম্পি পৰত্তমানং পৰত্তন্তি দুৰিধং. তঞ্হি যাৰ অঞ্ঞাসিকোণ্ডঞ্ঞস্স সোতাপত্তিমগ্গা পৰত্তমানং, ফলক্খণে পৰত্তং নাম. তেসু পটিৰেধঞাণং লোকুত্তরং, দেসনাঞাণং লোকিযং. উভযম্পি পনেতং অঞ্ঞেহি অসাধারণং বুদ্ধানংযেৰ ওরসঞাণং.

ইদানি যং ইমিনা ঞাণেন সমন্নাগতো সীহনাদং নদতি, তং দস্সেতুং ইতি রূপন্তিআদিমাহ. তত্থ ইতি রূপন্তি ইদং রূপং এত্তকং রূপং, ইতো উদ্ধং রূপং নত্থীতি রুপ্পনসভাৰঞ্চেৰ ভূতুপাদাযভেদঞ্চ আদিং কত্ৰা লক্খণরসপচ্চুপট্ঠানপদট্ঠানৰসেন অনৰসেসরূপপরিগ্গহো ৰুত্তো. ইতি রূপস্স সমুদযোতি ইমিনা এৰং পরিগ্গহিতস্স রূপস্স সমুদযো ৰুত্তো. তত্থ ইতীতি এৰং সমুদযো হোতীতি অত্থো. তস্স ৰিত্থারো ‘‘অৰিজ্জাসমুদযা রূপসমুদযো তণ্হাসমুদযা, কম্মসমুদযা আহারসমুদযা রূপসমুদযোতি নিব্বত্তিলক্খণং পস্সন্তোপি রূপক্খন্ধস্স উদযং পস্সতী’’তি (পটি. ম. ১.৫০) এৰং ৰেদিতব্বো. অত্থঙ্গমেপি ‘‘অৰিজ্জানিরোধা রূপনিরোধো…পে… ৰিপরিণামলক্খণং পস্সন্তোপি রূপক্খন্ধস্স নিরোধং পস্সতী’’তি অযং ৰিত্থারো.

ইতি ৰেদনাতিআদীসুপি অযং ৰেদনা এত্তকা ৰেদনা, ইতো উদ্ধং ৰেদনা নত্থি, অযং সঞ্ঞা, ইমে সঙ্খারা, ইদং ৰিঞ্ঞাণং এত্তকং ৰিঞ্ঞাণং, ইতো উদ্ধং ৰিঞ্ঞাণং নত্থীতি ৰেদযিতসঞ্জাননঅভিসঙ্খরণৰিজাননসভাৰঞ্চেৰ সুখাদিরূপসঞ্ঞাদিফস্সাদিচক্খুৰিঞ্ঞাণাদিভেদঞ্চ আদিং কত্ৰা লক্খণরসপচ্চুপট্ঠানপদট্ঠানৰসেন অনৰসেসৰেদনাসঞ্ঞাসঙ্খারৰিঞ্ঞাণপরিগ্গহো ৰুত্তো. ইতি ৰেদনায সমুদযোতিআদীহি পন এৰং পরিগ্গহিতানং ৰেদনাসঞ্ঞাসঙ্খারৰিঞ্ঞাণানং সমুদযো ৰুত্তো. তত্রাপি ইতীতি এৰং সমুদযো হোতীতি অত্থো. তেসম্পি ৰিত্থারো ‘‘অৰিজ্জাসমুদযা ৰেদনাসমুদযো’’তি (পটি. ম. ১.৫০) রূপে ৰুত্তনযেনেৰ ৰেদিতব্বো. অযং পন ৰিসেসো – তীসু খন্ধেসু ‘‘আহারসমুদযা’’তি অৰত্ৰা ‘‘ফস্সসমুদযা’’তি ৰত্তব্বং, ৰিঞ্ঞাণক্খন্ধে ‘‘নামরূপসমুদযা’’তি. অত্থঙ্গমপদম্পি তেসংযেৰ ৰসেন যোজেতব্বং. অযমেত্থ সঙ্খেপো. ৰিত্থারতো পন উদযব্বযৰিনিচ্ছযো সব্বাকারপরিপূরো ৰিসুদ্ধিমগ্গে ৰুত্তো.

ইমস্মিং সতি ইদং হোতীতি অযম্পি অপরো সীহনাদো. তস্সত্থো – ইমস্মিং অৰিজ্জাদিকে পচ্চযে সতি ইদং সঙ্খারাদিকং ফলং হোতি. ইমস্সুপ্পাদা ইদং উপ্পজ্জতীতি ইমস্স অৰিজ্জাদিকস্স পচ্চযস্স উপ্পাদা ইদং সঙ্খারাদিকং ফলং উপ্পজ্জতি. ইমস্মিং অসতি ইদং ন হোতীতি ইমস্মিং অৰিজ্জাদিকে পচ্চযে অসতি ইদং সঙ্খারাদিকং ফলং ন হোতি. ইমস্স নিরোধা ইদং নিরুজ্ঝতীতি ইমস্স অৰিজ্জাদিকস্স পচ্চযস্স নিরোধা ইদং সঙ্খারাদিকং ফলং নিরুজ্ঝতি. ইদানি যথা তং হোতি চেৰ নিরুজ্ঝতি চ, তং ৰিত্থারতো দস্সেতুং যদিদং অৰিজ্জাপচ্চযা সঙ্খারাতিআদিমাহ.

এৰং স্ৰাক্খাতোতি এৰং পঞ্চক্খন্ধৰিভজনাদিৰসেন সুট্ঠু অক্খাতো কথিতো. ধম্মোতি পঞ্চক্খন্ধপচ্চযাকারধম্মো. উত্তানোতি অনিকুজ্জিতো. ৰিৰটোতি ৰিৰরিত্ৰা ঠপিতো. পকাসিতোতি দীপিতো জোতিতো. ছিন্নপিলোতিকোতি পিলোতিকা ৰুচ্চতি ছিন্নং ভিন্নং তত্থ তত্থ সিব্বিতগণ্ঠিতং জিণ্ণৰত্থং, তং যস্স নত্থীতি অট্ঠহত্থং নৰহত্থং ৰা অহতসাটকং নিৰত্থো, সো ছিন্নপিলোতিকো নাম. অযম্পি ধম্মো তাদিসো. ন হেত্থ কোহঞ্ঞাদিৰসেন ছিন্নভিন্নসিব্বিতগণ্ঠিতভাৰো অত্থি. অপিচ খুদ্দকসাটকোপি পিলোতিকাতি ৰুচ্চতি, সা যস্স নত্থি, অট্ঠনৰহত্থো মহাপটো অত্থি, সোপি ছিন্নপিলোতিকো, অপগতপিলোতিকোতি অত্থো. তাদিসো অযং ধম্মো. যথা হি চতুহত্থং সাটকং গহেত্ৰা পরিগ্গহণং করোন্তো পুরিসো ইতো চিতো চ অঞ্ছন্তো কিলমতি, এৰং বাহিরকসমযে পব্বজিতা অত্তনো পরিত্তকং ধম্মং ‘‘এৰং সতি এৰং ভৰিস্সতী’’তি কপ্পেত্ৰা কপ্পেত্ৰা ৰড্ঢেন্তা কিলমন্তি. যথা পন অট্ঠহত্থনৰহত্থেন পরিগ্গহণং করোন্তো যথারুচি পারুপতি ন কিলমতি, নত্থি তত্থ অঞ্ছিত্ৰা ৰড্ঢনকিচ্চং; এৰং ইমস্মিম্পি ধম্মে কপ্পেত্ৰা কপ্পেত্ৰা ৰিভজনকিচ্চং নত্থি, তেহি তেহি কারণেহি মযাৰ অযং ধম্মো সুৰিভত্তো সুৰিত্থারিতোতি ইদম্পি সন্ধায ‘‘ছিন্নপিলোতিকো’’তি আহ. অপিচ কচৰরোপি পিলোতিকাতি ৰুচ্চতি, ইমস্মিঞ্চ সাসনে সমণকচৰরং নাম পতিট্ঠাতুং ন লভতি. তেনেৰাহ –

‘‘কারণ্ডৰং নিদ্ধমথ, কসম্বুং অপকস্সথ;

ততো পলাপে ৰাহেথ, অস্সমণে সমণমানিনে.

‘‘নিদ্ধমিত্ৰান পাপিচ্ছে, পাপআচারগোচরে;

সুদ্ধা সুদ্ধেহি সংৰাসং, কপ্পযৰ্হো পতিস্সতা;

ততো সমগ্গা নিপকা, দুক্খস্সন্তং করিস্সথা’’তি. (অ. নি. ৮.১০);

ইতি সমণকচৰরস্স ছিন্নত্তাপি অযং ধম্মো ছিন্নপিলোতিকো নাম হোতি.

অলমেৰাতি যুত্তমেৰ. সদ্ধাপব্বজিতেনাতি সদ্ধায পব্বজিতেন. কুলপুত্তেনাতি দ্ৰে কুলপুত্তা আচারকুলপুত্তো জাতিকুলপুত্তো চ. তত্থ যো যতো কুতোচি কুলা পব্বজিত্ৰা সীলাদযো পঞ্চ ধম্মক্খন্ধে পূরেতি, অযং আচারকুলপুত্তো নাম. যো পন যসকুলপুত্তাদযো ৰিয জাতিসম্পন্নকুলা পব্বজিতো, অযং জাতিকুলপুত্তো নাম. তেসু ইধ আচারকুলপুত্তো অধিপ্পেতো. সচে পন জাতিকুলপুত্তো আচারৰা হোতি, অযং উত্তমোযেৰ. এৰরূপেন কুলপুত্তেন. ৰীরিযং আরভিতুন্তি চতুরঙ্গসমন্নাগতং ৰীরিযং কাতুং. ইদানিস্স চতুরঙ্গং দস্সেন্তো কামং তচো চাতিআদিমাহ. এত্থ হি তচো একং অঙ্গং, ন্হারু একং, অট্ঠি একং, মংসলোহিতং একন্তি. ইদঞ্চ পন চতুরঙ্গসমন্নাগতং ৰীরিযং অধিট্ঠহন্তেন নৰসু ঠানেসু সমাধাতব্বং পুরেভত্তে পচ্ছাভত্তে পুরিমযামে মজ্ঝিমযামে পচ্ছিমযামে গমনে ঠানে নিসজ্জায সযনেতি.

দুক্খং, ভিক্খৰে, কুসীতো ৰিহরতীতি ইমস্মিং সাসনে যো কুসীতো পুগ্গলো, সো দুক্খং ৰিহরতি. বাহিরসমযে পন যো কুসীতো, সো সুখং ৰিহরতি. ৰোকিণ্ণোতি মিস্সীভূতো. সদত্থন্তি সোভনং ৰা অত্থং সকং ৰা অত্থং, উভযেনাপি অরহত্তমেৰ অধিপ্পেতং. পরিহাপেতীতি হাপেতি ন পাপুণাতি. কুসীতপুগ্গলস্স হি ছ দ্ৰারানি অগুত্তানি হোন্তি, তীণি কম্মানি অপরিসুদ্ধানি, আজীৰট্ঠমকং সীলং অপরিযোদাতং, ভিন্নাজীৰো কুলূপকো হোতি. সো সব্রহ্মচারীনং অক্খিম্হি পতিতরজং ৰিয উপঘাতকরো হুত্ৰা দুক্খং ৰিহরতি, পীঠমদ্দনো চেৰ হোতি লণ্ডপূরকো চ, সত্থু অজ্ঝাসযং গহেতুং ন সক্কোতি, দুল্লভং খণং ৰিরাধেতি, তেন ভুত্তো রট্ঠপিণ্ডোপি ন মহপ্ফলো হোতি.

আরদ্ধৰীরিযো চ খো, ভিক্খৰেতি আরদ্ধৰীরিযো পুগ্গলো ইমস্মিংযেৰ সাসনে সুখং ৰিহরতি. বাহিরসমযে পন যো আরদ্ধৰীরিযো, সো দুক্খং ৰিহরতি. পৰিৰিত্তোতি ৰিৰিত্তো ৰিযুত্তো হুত্ৰা. সদত্থং পরিপূরেতীতি অরহত্তং পাপুণাতি. আরদ্ধৰীরিযস্স হি ছ দ্ৰারানি সুগুত্তানি হোন্তি, তীণি কম্মানি পরিসুদ্ধানি, আজীৰট্ঠমকং সীলং পরিযোদাতং সব্রহ্মচারীনং অক্খিম্হি সুসীতলঞ্জনং ৰিয ধাতুগতচন্দনং ৰিয চ মনাপো হুত্ৰা সুখং ৰিহরতি, সত্থু অজ্ঝাসযং গহেতুং সক্কোতি. সত্থা হি –

‘‘চিরং জীৰ মহাৰীর, কপ্পং তিট্ঠ মহামুনী’’তি –

এৰং গোতমিযা ৰন্দিতো, ‘‘ন খো, গোতমি, তথাগতা এৰং ৰন্দিতব্বা’’তি পটিক্খিপিত্ৰা তায যাচিতো ৰন্দিতব্বাকারং আচিক্খন্তো এৰমাহ –

‘‘আরদ্ধৰীরিযে পহিতত্তে, নিচ্চং দল়্হপরক্কমে;

সমগ্গে সাৰকে পস্স, এসা বুদ্ধান ৰন্দনা’’তি. (অপ. থেরী ২.২.১৭১);

এৰং আরদ্ধৰীরিযো সত্থু অজ্ঝাসযং গহেতুং সক্কোতি, দুল্লভং খণং ন ৰিরাধেতি. তস্স হি বুদ্ধুপ্পাদো ধম্মদেসনা সঙ্ঘসুপ্পটিপত্তি সফলা হোতি সউদ্রযা, রট্ঠপিণ্ডোপি তেন ভুত্তো মহপ্ফলো হোতি.

হীনেন অগ্গস্সাতি হীনায সদ্ধায হীনেন ৰীরিযেন হীনায সতিযা হীনেন সমাধিনা হীনায পঞ্ঞায অগ্গসঙ্খাতস্স অরহত্তস্স পত্তি নাম ন হোতি. অগ্গেন চ খোতি অগ্গেহি সদ্ধাদীহি অগ্গস্স অরহত্তস্স পত্তি হোতি. মণ্ডপেয্যন্তি পসন্নট্ঠেন মণ্ডং, পাতব্বট্ঠেন পেয্যং. যঞ্হি পিৰিত্ৰা অন্তরৰীথিযং পতিতো ৰিসঞ্ঞী অত্তনো সাটকাদীনম্পি অস্সামিকো হোতি, তং পসন্নম্পি ন পাতব্বং, ময্হং পন সাসনং এৰং পসন্নঞ্চ পাতব্বঞ্চাতি দস্সেন্তো ‘‘মণ্ডপেয্য’’ন্তি আহ.

তত্থ তিৰিধো মণ্ডো – দেসনামণ্ডো, পটিগ্গহমণ্ডো, ব্রহ্মচরিযমণ্ডোতি. কতমো দেসনামণ্ডো? চতুন্নং অরিযসচ্চানং আচিক্খনা দেসনা পঞ্ঞাপনা পট্ঠপনা ৰিৰরণা ৰিভজনা উত্তানীকম্মং, চতুন্নং সতিপট্ঠানানং…পে… অরিযস্স অট্ঠঙ্গিকস্স মগ্গস্স আচিক্খনা…পে… উত্তানীকম্মং, অযং দেসনামণ্ডো. কতমো পটিগ্গহমণ্ডো? ভিক্খূ ভিক্খুনিযো উপাসকা উপাসিকাযো দেৰা মনুস্সা যে ৰা পনঞ্ঞেপি কেচি ৰিঞ্ঞাতারো, অযং পটিগ্গহমণ্ডো. কতমো ব্রহ্মচরিযমণ্ডো? অযমেৰ অরিযো অট্ঠঙ্গিকো মগ্গো, সেয্যথিদং – সম্মাদিট্ঠি…পে… সম্মাসমাধি, অযং ব্রহ্মচরিযমণ্ডো. অপিচ অধিমোক্খমণ্ডো সদ্ধিন্দ্রিযং, অস্সদ্ধিযং কসটো, অস্সদ্ধিযং কসটং ছড্ডেত্ৰা সদ্ধিন্দ্রিযস্স অধিমোক্খমণ্ডং পিৰতীতি মণ্ডপেয্যন্তিআদিনাপি (পটি. ম. ১.২৩৮) নযেনেত্থ অত্থো ৰেদিতব্বো. সত্থা সম্মুখীভূতোতি ইদমেত্থ কারণৰচনং. যস্মা সত্থা সম্মুখীভূতো, তস্মা ৰীরিযসম্পযোগং কত্ৰা পিৰথ এতং মণ্ডং. বাহিরকঞ্হি ভেসজ্জমণ্ডম্পি ৰেজ্জস্স অসম্মুখা পিৰন্তানং পমাণং ৰা উগ্গমনং ৰা নিগ্গমনং ৰা ন জানামাতি আসঙ্কা হোতি. ৰেজ্জসম্মুখা পন ‘‘ৰেজ্জো জানিস্সতী’’তি নিরাসঙ্কা পিৰন্তি. এৰমেৰ অম্হাকং ধম্মস্সামি সত্থা সম্মুখীভূতোতি ৰীরিযং কত্ৰা পিৰথাতি মণ্ডপানে নেসং নিযোজেন্তো তস্মাতিহ, ভিক্খৰেতিআদিমাহ. তত্থ সফলাতি সানিসংসা. সউদ্রযাতি সৰড্ঢি. ইদানি নিযোজনানুরূপং সিক্খিতব্বতং নিদ্দিসন্তো অত্তত্থং ৰা হি, ভিক্খৰেতিআদিমাহ. তত্থ অত্তত্থন্তি অত্তনো অত্থভূতং অরহত্তং. অপ্পমাদেন সম্পাদেতুন্তি অপ্পমাদেন সব্বকিচ্চানি কাতুং. পরত্থন্তি পচ্চযদাযকানং মহপ্ফলানিসংসং. সেসং সব্বত্থ উত্তানমেৰাতি. দুতিযং.

৩. উপনিসসুত্তৰণ্ণনা

২৩. ততিযে ‘‘জানতো অহ’’ন্তিআদীসু জানতোতি জানন্তস্স. পস্সতোতি পস্সন্তস্স. দ্ৰেপি পদানি একত্থানি, ব্যঞ্জনমেৰ নানং. এৰং সন্তেপি ‘‘জানতো’’তি ঞাণলক্খণং উপাদায পুগ্গলং নিদ্দিসতি. জাননলক্খণঞ্হি ঞাণং. ‘‘পস্সতো’’তি ঞাণপ্পভাৰং উপাদায. পস্সনপ্পভাৰঞ্হি ঞাণং, ঞাণসমঙ্গীপুগ্গলো চক্খুমা ৰিয চক্খুনা রূপানি, ঞাণেন ৰিৰটে ধম্মে পস্সতি. আসৰানং খযন্তি এত্থ আসৰানং পহানং অসমুপ্পাদো খীণাকারো নত্থিভাৰোতি অযম্পি আসৰক্খযোতি ৰুচ্চতি, ভঙ্গোপি মগ্গফলনিব্বানানিপি. ‘‘আসৰানং খযা অনাসৰং চেতোৰিমুত্তি’’ন্তিআদীসু (ম. নি. ১.৪৩৮; ৰিভ. ৮৩১) হি খীণাকারো আসৰক্খযোতি ৰুচ্চতি. ‘‘যো আসৰানং খযো ৰযো ভেদো পরিভেদো অনিচ্চতা অন্তরধান’’ন্তি (ৰিভ. ৩৫৪) এত্থ ভঙ্গো.

‘‘সেক্খস্স সিক্খমানস্স, উজুমগ্গানুসারিনো;

খযস্মিং পঠমং ঞাণং, ততো অঞ্ঞা অনন্তরা’’তি. (ইতিৰু. ৬২); –

এত্থ মগ্গো. সো হি আসৰে খেপেন্তো ৰূপসমেন্তো উপ্পজ্জতি, তস্মা আসৰানং খযোতি ৰুত্তো. ‘‘আসৰানং খযা সমণো হোতী’’তি এত্থ ফলং. তঞ্হি আসৰানং খীণন্তে উপ্পজ্জতি, তস্মা আসৰানং খযোতি ৰুত্তং.

‘‘আসৰা তস্স ৰড্ঢন্তি, আরা সো আসৰক্খযা’’তি; (ধ. প. ২৫৩) –

এত্থ নিব্বানং. তঞ্হি আগম্ম আসৰা খীযন্তি, তস্মা আসৰানং খযোতি ৰুত্তং. ইধ পন মগ্গফলানি অধিপ্পেতানি. নো অজানতো নো অপস্সতোতি যো পন ন জানাতি ন পস্সতি, তস্স নো ৰদামীতি অত্থো. এতেন যে অজানতো অপস্সতোপি সংসারাদীহিযেৰ সুদ্ধিং ৰদন্তি, তে পটিক্খিত্তা হোন্তি. পুরিমেন পদদ্ৰযেন উপাযো ৰুত্তো, ইমিনা অনুপাযং পটিসেধেতি.

ইদানি যং জানতো আসৰানং খযো হোতি, তং দস্সেতুকামো কিঞ্চ, ভিক্খৰে, জানতোতি পুচ্ছং আরভি. তত্থ জাননা বহুৰিধা. দব্বজাতিকো এৰ হি কোচি ভিক্খু ছত্তং কাতুং জানাতি, কোচি চীৰরাদীনং অঞ্ঞতরং, তস্স ঈদিসানি কম্মানি ৰত্তসীসে ঠত্ৰা করোন্তস্স সা জাননা সগ্গমগ্গফলানং পদট্ঠানং ন হোতীতি ন ৰত্তব্বং. যো পন সাসনে পব্বজিত্ৰা ৰেজ্জকম্মাদীনি কাতুং জানাতি, তস্সেৰং জানতো আসৰা ৰড্ঢন্তিযেৰ. তস্মা যং জানতো পস্সতো চ আসৰানং খযো হোতি, তদেৰ দস্সেন্তো ইতি রূপন্তিআদিমাহ. এৰং খো, ভিক্খৰে, জানতোতি এৰং পঞ্চন্নং খন্ধানং উদযব্বযং জানন্তস্স. আসৰানং খযো হোতীতি আসৰানং খযন্তে জাতত্তা ‘‘আসৰানং খযো’’তি লদ্ধনামং অরহত্তং হোতি.

এৰং অরহত্তনিকূটেন দেসনং নিট্ঠপেত্ৰা ইদানি খীণাসৰস্স আগমনীযং পুব্বভাগপটিপদং দস্সেতুং যম্পিস্স তং, ভিক্খৰেতিআদিমাহ. তত্থ খযস্মিং খযেঞাণন্তি আসৰক্খযসঙ্খাতে অরহত্তফলে পটিলদ্ধে সতি পচ্চৰেক্খণঞাণং. তঞ্হি অরহত্তফলসঙ্খাতে খযস্মিং পঠমৰারং উপ্পন্নে পচ্ছা উপ্পন্নত্তা খযেঞাণন্তি ৰুচ্চতি. সউপনিসন্তি সকারণং সপ্পচ্চযং. ৰিমুত্তীতি অরহত্তফলৰিমুত্তি. সা হিস্স উপনিস্সযপচ্চযেন পচ্চযো হোতি. এৰং ইতো পরেসুপি লব্ভমানৰসেন পচ্চযভাৰো ৰেদিতব্বো.

ৰিরাগোতি মগ্গো. সো হি কিলেসে ৰিরাজেন্তো খেপেন্তো উপ্পন্নো, তস্মা ৰিরাগোতি ৰুচ্চতি. নিব্বিদাতি নিব্বিদাঞাণং. এতেন বলৰৰিপস্সনং দস্সেতি. বলৰৰিপস্সনাতি ভযতূপট্ঠানে ঞাণং আদীনৰানুপস্সনে ঞাণং মুঞ্চিতুকম্যতাঞাণং সঙ্খারুপেক্খাঞাণন্তি চতুন্নং ঞাণানং অধিৰচনং. যথাভূতঞাণদস্সনন্তি যথাসভাৰজাননসঙ্খাতং দস্সনং. এতেন তরুণৰিপস্সনং দস্সেতি. তরুণৰিপস্সনা হি বলৰৰিপস্সনায পচ্চযো হোতি. তরুণৰিপস্সনাতি সঙ্খারপরিচ্ছেদে ঞাণং কঙ্খাৰিতরণে ঞাণং সম্মসনে ঞাণং মগ্গামগ্গে ঞাণন্তি চতুন্নং ঞাণানং অধিৰচনং. সমাধীতি পাদকজ্ঝানসমাধি. সো হি তরুণৰিপস্সনায পচ্চযো হোতি. সুখন্তি অপ্পনায পুব্বভাগসুখং. তঞ্হি পাদকজ্ঝানস্স পচ্চযো হোতি. পস্সদ্ধীতি দরথপটিপ্পস্সদ্ধি. সা হি অপ্পনাপুব্বভাগস্স সুখস্স পচ্চযো হোতি. পীতীতি বলৰপীতি. সা হি দরথপটিপ্পস্সদ্ধিযা পচ্চযো হোতি. পামোজ্জন্তি দুব্বলপীতি. সা হি বলৰপীতিযা পচ্চযো হোতি. সদ্ধাতি অপরাপরং উপ্পজ্জনসদ্ধা. সা হি দুব্বলপীতিযা পচ্চযো হোতি. দুক্খন্তি ৰট্টদুক্খং. তঞ্হি অপরাপরসদ্ধায পচ্চযো হোতি. জাতীতি সৰিকারা খন্ধজাতি. সা হি ৰট্টদুক্খস্স পচ্চযো হোতি. ভৰোতি কম্মভৰো. (সো হি সৰিকারায জাতিযা পচ্চযো হোতি.) এতেনুপাযেন সেসপদানিপি ৰেদিতব্বানি.

থুল্লফুসিতকেতি মহাফুসিতকে. পব্বতকন্দরপদরসাখাতি এত্থ কন্দরং নাম ‘ক’ন্তিলদ্ধনামেন উদকেন দারিতো উদকভিন্নো পব্বতপদেসো, যো ‘‘নিতম্বো’’তিপি ‘‘নদীকুঞ্ছো’’তিপি ৰুচ্চতি. পদরং নাম অট্ঠমাসে দেৰে অৰস্সন্তে ফলিতো ভূমিপ্পদেসো. সাখাতি কুসুম্ভগামিনিযো খুদ্দকমাতিকাযো. কুসোব্ভাতি খুদ্দকআৰাটা. মহাসোব্ভাতি মহাআৰাটা. কুন্নদিযোতি খুদ্দকনদিযো. মহানদিযোতি গঙ্গাযমুনাদিকা মহাসরিতা. এৰমেৰ খো, ভিক্খৰে, অৰিজ্জূপনিসা সঙ্খারাতিআদীসু অৰিজ্জা পব্বতোতি দট্ঠব্বা. অভিসঙ্খারা মেঘোতি, ৰিঞ্ঞাণাদিৰট্টং কন্দরাদযোতি, ৰিমুত্তি সাগরোতি.

যথা পব্বতমত্থকে দেৰো ৰস্সিত্ৰা পব্বতকন্দরাদীনি পূরেন্তো অনুপুব্বেন মহাসমুদ্দং সাগরং পূরেতি, এৰং অৰিজ্জাপব্বতমত্থকে তাৰ অভিসঙ্খারমেঘস্স ৰস্সনং ৰেদিতব্বং. অস্সুতৰা হি বালপুথুজ্জনো অৰিজ্জায অঞ্ঞাণী হুত্ৰা তণ্হায অভিলাসং কত্ৰা কুসলাকুসলকম্মং আযূহতি, তং কুসলাকুসলকম্মং পটিসন্ধিৰিঞ্ঞাণস্স পচ্চযো হোতি, পটিসন্ধিৰিঞ্ঞাণাদীনি নামরূপাদীনং. ইতি পব্বতমত্থকে ৰুট্ঠদেৰস্স কন্দরাদযো পূরেত্ৰা মহাসমুদ্দং আহচ্চ ঠিতকালো ৰিয অৰিজ্জাপব্বতমত্থকে ৰুট্ঠস্স অভিসঙ্খারমেঘস্স পরম্পরপচ্চযতায অনুপুব্বেন ৰিঞ্ঞাণাদিৰট্টং পূরেত্ৰা ঠিতকালো. বুদ্ধৰচনং পন পাল়িযং অগহিতম্পি ‘‘ইধ তথাগতো লোকে উপ্পজ্জতি, অগারস্মা অনগারিযং পব্বজতী’’তি ইমায পাল়িযা ৰসেন গহিতমেৰাতি ৰেদিতব্বং. যা হি তস্স কুলগেহে নিব্বত্তি, সা কম্মভৰপচ্চযা সৰিকারা জাতি নাম. সো বুদ্ধানং ৰা বুদ্ধসাৰকানং ৰা সম্মুখীভাৰং আগম্ম ৰট্টদোসদীপকং লক্খণাহটং ধম্মকথং সুত্ৰা ৰট্টৰসেন পীল়িতো হোতি, এৰমস্স সৰিকারা খন্ধজাতি ৰট্টদুক্খস্স পচ্চযো হোতি. সো ৰট্টদুক্খেন পীল়িতো অপরাপরং সদ্ধং জনেত্ৰা অগারস্মা অনগারিযং পব্বজতি, এৰমস্স ৰট্টদুক্খং অপরাপরসদ্ধায পচ্চযো হোতি. সো পব্বজ্জামত্তেনেৰ অসন্তুট্ঠো ঊনপঞ্চৰস্সকালে নিস্সযং গহেত্ৰা ৰত্তপটিপত্তিং পূরেন্তো দ্ৰেমাতিকা পগুণং কত্ৰা কম্মাকম্মং উগ্গহেত্ৰা যাৰ অরহত্তা নিজ্জটং কত্ৰা কম্মট্ঠানং গহেত্ৰা অরঞ্ঞে ৰসন্তো পথৰীকসিণাদীসু কম্মং আরভতি, তস্স কম্মট্ঠানং নিস্সায দুব্বলপীতি উপ্পজ্জতি. তদস্স সদ্ধূপনিসং পামোজ্জং, তং বলৰপীতিযা পচ্চযো হোতি. বলৰপীতি দরথপটিপ্পস্সদ্ধিযা, সা অপ্পনাপুব্বভাগসুখস্স, তং সুখং পাদকজ্ঝানসমাধিস্স. সো সমাধিনা চিত্তকল্লতং জনেত্ৰা তরুণৰিপস্সনায কম্মং করোতি. ইচ্চস্স পাদকজ্ঝানসমাধি তরুণৰিপস্সনায পচ্চযো হোতি, তরুণৰিপস্সনা বলৰৰিপস্সনায, বলৰৰিপস্সনা মগ্গস্স, মগ্গো ফলৰিমুত্তিযা, ফলৰিমুত্তি পচ্চৰেক্খণঞাণস্সাতি. এৰং দেৰস্স অনুপুব্বেন সাগরং পূরেত্ৰা ঠিতকালো ৰিয খীণাসৰস্স ৰিমুত্তিসাগরং পূরেত্ৰা ঠিতকালো ৰেদিতব্বোতি. ততিযং.

৪. অঞ্ঞতিত্থিযসুত্তৰণ্ণনা

২৪. চতুত্থে পাৰিসীতি পৰিট্ঠো. সো চ ন তাৰ পৰিট্ঠো, ‘‘পৰিসিস্সামী’’তি নিক্খন্তত্তা পন এৰং ৰুত্তো. যথা কিং? যথা ‘‘গামং গমিস্সামী’’তি নিক্খন্তপুরিসো তং গামং অপ্পত্তোপি ‘‘কহং ইত্থন্নামো’’তি ৰুত্তে ‘‘গামং গতো’’তি ৰুচ্চতি, এৰং. অতিপ্পগোতি তদা কির থেরস্স অতিপ্পগোযেৰ নিক্খন্তদিৰসো অহোসি, অতিপ্পগোযেৰ নিক্খন্তভিক্খূ বোধিযঙ্গণে চেতিযঙ্গণে নিৰাসনপারুপনট্ঠানেতি ইমেসু ঠানেসু যাৰ ভিক্খাচারৰেলা হোতি, তাৰ পপঞ্চং করোন্তি. থেরস্স পন ‘‘যাৰ ভিক্খাচারৰেলা হোতি, তাৰ পরিব্বাজকেহি সদ্ধিং একদ্ৰেকথাৰারে করিস্সামী’’তি চিন্তযতো যংনূনাহন্তি এতদহোসি. পরিব্বাজকানং আরামোতি সো কির আরামো দক্খিণদ্ৰারস্স চ ৰেল়ুৰনস্স চ অন্তরা অহোসি. ইধাতি ইমেসু চতূসু ৰাদেসু. কিংৰাদী কিমক্খাযীতি কিং ৰদতি কিং আচিক্খতি, কিং এত্থ সমণস্স গোতমস্স দস্সনন্তি পুচ্ছন্তি. ধম্মস্স চানুধম্মং ব্যাকরেয্যামাতি, ভোতা গোতমেন যং ৰুত্তং কারণং, তস্স অনুকারণং কথেয্যাম. সহধম্মিকো ৰাদানুপাতোতি পরেহি ৰুত্তকারণেন সকারণো হুত্ৰা সমণস্স গোতমস্স ৰাদানুপাতো ৰাদপ্পৰত্তি ৰিঞ্ঞূহি গরহিতব্বং কারণং কোচি অপ্পমত্তকোপি কথং নাগচ্ছেয্য? ইদং ৰুত্তং হোতি – কথং সব্বাকারেনপি সমণস্স গোতমস্স ৰাদে গারয্হং কারণং ন ভৰেয্যাতি?

ইতি ৰদন্তি ফস্সপচ্চযা দুক্খন্তি এৰং ৰদন্তোতি অত্থো. তত্রাতি তেসু চতূসু ৰাদেসু. তে ৰত অঞ্ঞত্র ফস্সাতি ইদং ‘‘তদপি ফস্সপচ্চযা’’তি পটিঞ্ঞায সাধকৰচনং. যস্মা হি ন ৰিনা ফস্সেন দুক্খপটিসংৰেদনা অত্থি, তস্মা জানিতব্বমেতং যথা ‘‘তদপি ফস্সপচ্চযা’’তি অযমেত্থ অধিপ্পাযো.

সাধু, সাধু, আনন্দাতি অযং সাধুকারো সারিপুত্তত্থেরস্স দিন্নো, আনন্দত্থেরেন পন সদ্ধিং ভগৰা আমন্তেসি. একমিদাহন্তি এত্থ ইধাতি নিপাতমত্তং, একং সমযন্তি অত্থো. ইদং ৰচনং ‘‘ন কেৰলং সারিপুত্তোৰ রাজগহং পৰিট্ঠো, অহম্পি পাৰিসিং. ন কেৰলঞ্চ তস্সেৰাযং ৰিতক্কো উপ্পন্নো, ময্হম্পি উপ্পজ্জি. ন কেৰলঞ্চ তস্সেৰ সা তিত্থিযেহি সদ্ধিং কথা জাতা, ময্হম্পি জাতপুব্বা’’তি দস্সনত্থং ৰুত্তং.

অচ্ছরিযং অব্ভুতন্তি উভযম্পেতং ৰিম্হযদীপনমেৰ. ৰচনত্থো পনেত্থ অচ্ছরং পহরিতুং যুত্তন্তি অচ্ছরিযং. অভূতপুব্বং ভূতন্তি অব্ভুতং. একেন পদেনাতি ‘‘ফস্সপচ্চযা দুক্খ’’ন্তি ইমিনা একেন পদেন. এতেন হি সব্বৰাদানং পটিক্খেপত্থো ৰুত্তো. এসেৰত্থোতি এসোযেৰ ফস্সপচ্চযা দুক্খন্তি পটিচ্চসমুপ্পাদত্থো. তঞ্ঞেৰেত্থ পটিভাতূতি তঞ্ঞেৰেত্থ উপট্ঠাতু. ইদানি থেরো জরামরণাদিকায পটিচ্চসমুপ্পাদকথায তং অত্থগম্ভীরঞ্চেৰ গম্ভীরাৰভাসঞ্চ করোন্তো সচে মং, ভন্তেতিআদিং ৰত্ৰা যংমূলকা কথা উপ্পন্না, তদেৰ পদং গহেত্ৰা ৰিৰট্টং দস্সেন্তো ছন্নংত্ৰেৰাতিআদিমাহ. সেসং উত্তানমেৰাতি. চতুত্থং.

৫. ভূমিজসুত্তৰণ্ণনা

২৫-২৬. পঞ্চমে ভূমিজোতি তস্স থেরস্স নামং. সেসমিধাপি পুরিমসুত্তে ৰুত্তনযেনেৰ ৰেদিতব্বং. অযং পন ৰিসেসো – যস্মা ইদং সুখদুক্খং ন কেৰলং ফস্সপচ্চযা উপ্পজ্জতি, কাযেনপি করিযমানং করীযতি, ৰাচাযপি মনসাপি, অত্তনাপি করিযমানং করীযতি, পরেনপি করিযমানং করীযতি, সম্পজানেনপি করিযমানং করীযতি, অসম্পজানেনপি, তস্মা তস্স অপরম্পি পচ্চযৰিসেসং দস্সেতুং কাযে ৰা হানন্দ, সতীতিআদিমাহ. কাযসঞ্চেতনাহেতূতি কাযদ্ৰারে উপ্পন্নচেতনাহেতু. ৰচীসঞ্চেতনামনোসঞ্চেতনাসুপি এসেৰ নযো. এত্থ চ কাযদ্ৰারে কামাৰচরকুসলাকুসলৰসেন ৰীসতি চেতনা লব্ভন্তি, তথা ৰচীদ্ৰারে. মনোদ্ৰারে নৰহি রূপারূপচেতনাহি সদ্ধিং একূনতিংসাতি তীসু দ্ৰারেসু একূনসত্ততি চেতনা হোন্তি, তপ্পচ্চযং ৰিপাকসুখদুক্খং দস্সিতং. অৰিজ্জাপচ্চযা চাতি ইদং তাপি চেতনা অৰিজ্জাপচ্চযা হোন্তীতি দস্সনত্থং ৰুত্তং. যস্মা পন তং যথাৰুত্তচেতনাভেদং কাযসঙ্খারঞ্চেৰ ৰচীসঙ্খারঞ্চ মনোসঙ্খারঞ্চ পরেহি অনুস্সাহিতো সামং অসঙ্খারিকচিত্তেন করোতি, পরেহি কারিযমানো সসঙ্খারিকচিত্তেনাপি করোতি, ‘‘ইদং নাম কম্মং করোতি, তস্স এৰরূপো নাম ৰিপাকো ভৰিস্সতী’’তি, এৰং কম্মঞ্চ ৰিপাকঞ্চ জানন্তোপি করোতি, মাতাপিতূসু চেতিযৰন্দনাদীনি করোন্তেসু অনুকরোন্তা দারকা ৰিয কেৰলং কম্মমেৰ জানন্তো ‘‘ইমস্স পন কম্মস্স অযং ৰিপাকো’’তি ৰিপাকং অজানন্তোপি করোতি, তস্মা তং দস্সেতুং সামং ৰা তং, আনন্দ, কাযসঙ্খারং অভিসঙ্খরোতীতিআদি ৰুত্তং.

ইমেসু, আনন্দ, ধম্মেসূতি যে ইমে ‘‘সামং ৰা তং, আনন্দ, কাযসঙ্খার’’ন্তিআদীসু চতূসু ঠানেসু ৰুত্তা ছসত্ততি দ্ৰেসতা চেতনাধম্মা, ইমেসু ধম্মেসু অৰিজ্জা উপনিস্সযকোটিযা অনুপতিতা. সব্বেপি হি তে ‘‘অৰিজ্জাপচ্চযা সঙ্খারা’’তি এত্থেৰ সঙ্গহং গচ্ছন্তি. ইদানি ৰিৰট্টং দস্সেন্তো অৰিজ্জায ত্ৰেৰাতিআদিমাহ. সো কাযো ন হোতীতি যস্মিং কাযে সতি কাযসঞ্চেতনাপচ্চযং অজ্ঝত্তং সুখদুক্খং উপ্পজ্জতি, সো কাযো ন হোতি. ৰাচামনেসুপি এসেৰ নযো. অপিচ কাযোতি চেতনাকাযো, ৰাচাপি চেতনাৰাচা, মনোপি কম্মমনোযেৰ. দ্ৰারকাযো ৰা কাযো. ৰাচামনেসুপি এসেৰ নযো. খীণাসৰো চেতিযং ৰন্দতি, ধম্মং ভণতি, কম্মট্ঠানং মনসি করোতি, কথমস্স কাযাদযো ন হোন্তীতি? অৰিপাকত্তা. খীণাসৰেন হি কতং কম্মং নেৰ কুসলং হোতি নাকুসলং. অৰিপাকং হুত্ৰা কিরিযামত্তে তিট্ঠতি, তেনস্স তে কাযাদযো ন হোন্তীতি ৰুত্তং.

খেত্তং তং ন হোতীতিআদীসুপি ৰিরুহনট্ঠেন তং খেত্তং ন হোতি, পতিট্ঠানট্ঠেন ৰত্থু ন হোতি, পচ্চযট্ঠেন আযতনং ন হোতি, কারণট্ঠেন অধিকরণং ন হোতি. সঞ্চেতনামূলকঞ্হি অজ্ঝত্তং সুখদুক্খং উপ্পজ্জেয্য, সা সঞ্চেতনা এতেসং ৰিরুহনাদীনং অত্থানং অভাৰেন তস্স সুখদুক্খস্স নেৰ খেত্তং, ন ৰত্থু ন আযতনং, ন অধিকরণং হোতীতি. ইমস্মিং সুত্তে ৰেদনাদীসু সুখদুক্খমেৰ কথিতং, তঞ্চ খো ৰিপাকমেৰাতি. পঞ্চমং.

ছট্ঠং উপৰাণসুত্তং উত্তানমেৰ. এত্থ পন ৰট্টদুক্খমেৰ কথিতন্তি. ছট্ঠং.

৭. পচ্চযসুত্তৰণ্ণনা

২৭-২৮. সত্তমে পটিপাটিযা ৰুত্তেসু পরিযোসানপদং গহেত্ৰা কতমঞ্চ, ভিক্খৰে, জরামরণন্তিআদি ৰুত্তং. এৰং পচ্চযং পজানাতীতি এৰং দুক্খসচ্চৰসেন পচ্চযং জানাতি. পচ্চযসমুদযাদযোপি সমুদযসচ্চাদীনংযেৰ ৰসেন ৰেদিতব্বা. দিট্ঠিসম্পন্নোতি মগ্গদিট্ঠিযা সম্পন্নো. দস্সনসম্পন্নোতি তস্সেৰ ৰেৰচনং. আগতো ইমং সদ্ধম্মন্তি মগ্গসদ্ধম্মং আগতো. পস্সতীতি মগ্গসদ্ধম্মমেৰ পস্সতি. সেক্খেন ঞাণেনাতি মগ্গঞাণেনেৰ. সেক্খায ৰিজ্জাযাতি মগ্গৰিজ্জায এৰ. ধম্মসোতং সমাপন্নোতি মগ্গসঙ্খাতমেৰ ধম্মসোতং সমাপন্নো. অরিযোতি পুথুজ্জনভূমিং অতিক্কন্তো. নিব্বেধিকপঞ্ঞোতি নিব্বেধিকপঞ্ঞায সমন্নাগতো. অমতদ্ৰারং আহচ্চ তিট্ঠতীতি অমতং নাম নিব্বানং, তস্স দ্ৰারং অরিযমগ্গং আহচ্চ তিট্ঠতীতি. অট্ঠমং উত্তানমেৰ. সত্তমঅট্ঠমানি.

৯. সমণব্রাহ্মণসুত্তৰণ্ণনা

২৯-৩০. নৰমং অক্খরভাণকানং ভিক্খূনং অজ্ঝাসযেন ৰুত্তং. তে হি পরীতি উপসগ্গং পক্খিপিত্ৰা ৰুচ্চমানে পটিৰিজ্ঝিতুং সক্কোন্তি. নৰমং.

দসমে সব্বং উত্তানমেৰ. ইমেসু দ্ৰীসু সুত্তেসু চতুসচ্চপটিৰেধোৰ কথিতো. দসমং.

দসবলৰগ্গো ততিযো.