১. সনঙ্কুমারসুত্তৰণ্ণনা

১৮২. দুতিযৰগ্গস্স পঠমে সপ্পিনীতীরেতি সপ্পিনীনামিকায নদিযা তীরে. সনঙ্কুমারোতি সো কির পঞ্চসিখকুমারককালে ঝানং ভাৰেত্ৰা ব্রহ্মলোকে নিব্বত্তো কুমারকৰণ্ণেনেৰ ৰিচরতি. তেন নং ‘‘কুমারো’’তি সঞ্জানন্তি, পোরাণকত্তা পন ‘‘সনঙ্কুমারো’’তি ৰুচ্চতি. জনেতস্মিন্তি জনিতস্মিং, পজাযাতি অত্থো. যে গোত্তপটিসারিনোতি যে জনেতস্মিং গোত্তং পটিসরন্তি তেসু লোকে গোত্তপটিসারীসু খত্তিযো সেট্ঠো. ৰিজ্জাচরণসম্পন্নোতি ভযভেরৰসুত্তপরিযাযেন (ম. নি. ১.৩৪ আদযো) পুব্বেনিৰাসাদীহি ৰা তীহি, অম্বট্ঠসুত্তপরিযাযেন (দী. নি. ১.২৭৮ আদযো) ৰিপস্সনাঞাণং মনোমযিদ্ধি ছ অভিঞ্ঞাযোতি ইমাহি ৰা অট্ঠহি ৰিজ্জাহি, সীলেসু পরিপূরকারিতা ইন্দ্রিযেসু গুত্তদ্ৰারতা ভোজনে মত্তঞ্ঞুতা জাগরিযানুযোগো সত্ত সদ্ধম্মা চত্তারি রূপাৰচরজ্ঝানানীতি এৰং পন্নরসধম্মভেদেন চরণেন চ সমন্নাগতো. সো সেট্ঠো দেৰমানুসেতি সো খীণাসৰব্রাহ্মণো দেৰেসু চ মনুস্সেসু চ সেট্ঠো উত্তমোতি. পঠমং.