১. সম্বহুলসুত্তৰণ্ণনা

১৫৭. ততিযৰগ্গস্স পঠমে জটণ্ডুৰেনাতি জটাচুম্বটকেন. অজিনক্খিপনিৰত্থোতি সখুরং অজিনচম্মং একং নিৰত্থো একং পারুতো. উদুম্বরদণ্ডন্তি অপ্পিচ্ছভাৰপ্পকাসনত্থং ঈসকং ৰঙ্কং উদুম্বরদণ্ডং গহেত্ৰা. এতদৰোচাতি লোকে ব্রাহ্মণস্স ৰচনং নাম সুস্সূসন্তি, ব্রাহ্মণেসুপি পব্বজিতস্স, পব্বজিতেসুপি মহল্লকস্সাতি মহল্লকব্রাহ্মণস্স পব্বজিতৰেসং গহেত্ৰা পধানভূমিযং কম্মং করোন্তে তে ভিক্খূ উপসঙ্কমিত্ৰা হত্থং উক্খিপিত্ৰা এতং ‘‘দহরা ভৰন্তো’’তিআদিৰচনং অৰোচ. ওকম্পেত্ৰাতি হনুকেন উরং পহরন্তো অধোনতং কত্ৰা. জিৰ্হং নিল্লালেত্ৰাতি কবরমহাজিৰ্হং নীহরিত্ৰা উদ্ধমধো উভযপস্সেসু চ লালেত্ৰা. তিৰিসাখন্তি তিসাখং. নলাটিকন্তি ভকুটিং, নলাটে উট্ঠিতং ৰলিত্তযন্তি অত্থো. পক্কামীতি তুম্হে জানন্তানং ৰচনং অকত্ৰা অত্তনোৰ তেলে পচ্চিস্সথাতি ৰত্ৰা একং মগ্গং গহেত্ৰা গতো. পঠমং.