৬. পত্তসুত্তৰণ্ণনা

১৫২. ছট্ঠে পঞ্চন্নং উপাদানক্খন্ধানং উপাদাযাতি পঞ্চ উপাদানক্খন্ধে আদিযিত্ৰা, সভাৰসামঞ্ঞলক্খণৰসেন নানপ্পকারতো ৰিভজিত্ৰা দস্সেন্তো. সন্দস্সেতীতি খন্ধানং সভাৰলক্খণাদীনি দস্সেতি. সমাদপেতীতি গণ্হাপেতি. সমুত্তেজেতীতি সমাদানম্হি উস্সাহং জনেতি. সম্পহংসেতীতি পটিৰিদ্ধগুণেন ৰোদাপেতি জোতাপেতি. অট্ঠিং কত্ৰাতি অত্থিকং কত্ৰা, ‘‘অযং নো অধিগন্তব্বো অত্থো’’তি এৰং সল্লক্খেত্ৰা তায দেসনায অত্থিকা হুত্ৰা. মনসি কত্ৰাতি চিত্তে ঠপেত্ৰা. সব্বচেতসো সমন্নাহরিত্ৰাতি সব্বেন তেন কম্মকারকচিত্তেন সমন্নাহরিত্ৰা. ওহিতসোতাতি ঠপিতাসোতা. অব্ভোকাসে নিক্খিত্তাতি ওতাপনত্থায ঠপিতা.

রূপং ৰেদযিতং সঞ্ঞান্তি, এতে রূপাদযো তযো খন্ধা. যঞ্চ সঙ্খতন্তি ইমিনা সঙ্খারক্খন্ধো গহিতো. এৰং তত্থ ৰিরজ্জতীতি ‘‘এসো অহং ন হোমি, এতং ময্হং ন হোতী’’তি পস্সন্তো এৰং তেসু খন্ধেসু ৰিরজ্জতি. খেমত্তন্তি খেমীভূতং অত্তভাৰং. ইমিনা ফলক্খণং দস্সেতি. অন্ৰেসন্তি ভৰযোনিগতিঠিতিসত্তাৰাসসঙ্খাতেসু সব্বট্ঠানেসু পরিযেসমানা. নাজ্ঝগাতি ন পস্সীতি. ছট্ঠং.