৭. অপ্পমাদসুত্তৰণ্ণনা

১২৮. সত্তমে সমধিগ্গয্হাতি সমধিগ্গণ্হিত্ৰা, আদিযিত্ৰাতি অত্থো. অপ্পমাদোতি কারাপকঅপ্পমাদো. সমোধানন্তি সমৰধানং উপক্খেপং. এৰমেৰ খোতি হত্থিপদং ৰিয হি কারাপকঅপ্পমাদো, সেসপদজাতানি ৰিয অৰসেসা চতুভূমকা কুসলধম্মা. তে হত্থিপদে সেসপদানি ৰিয অপ্পমাদে সমোধানং গচ্ছন্তি, অপ্পমাদস্স অন্তো পরিৰত্তন্তি. যথা চ হত্থিপদং সেসপদানং অগ্গং সেট্ঠং, এৰং অপ্পমাদো সেসধম্মানন্তি দস্সেতি. মহগ্গতলোকুত্তরধম্মানম্পি হেস পটিলাভকট্ঠেন লোকিযোপি সমানো অগ্গোৰ হোতি.

অপ্পমাদং পসংসন্তীতি ‘‘এতানি আযুআদীনি পত্থযন্তেন অপ্পমাদোৰ কাতব্বো’’তি অপ্পমাদমেৰ পসংসন্তি. যস্মা ৰা পুঞ্ঞকিরিযাসু পণ্ডিতা অপ্পমাদং পসংসন্তি, তস্মা আযুআদীনি পত্থযন্তেন অপ্পমাদোৰ কাতব্বোতি অত্থো. অত্থাভিসমযাতি অত্থপটিলাভা. সত্তমং.