৭. মহাসল়াযতনিকসুত্তৰণ্ণনা

৪২৮. এৰং মে সুতন্তি মহাসল়াযতনিকসুত্তং. তত্থ মহাসল়াযতনিকন্তি মহন্তানং ছন্নং আযতনানং জোতকং ধম্মপরিযাযং.

৪২৯. অজানন্তি সহৰিপস্সনেন মগ্গেন অজানন্তো. উপচযং গচ্ছন্তীতি ৰুড্ঢিং গচ্ছন্তি, ৰসিভাৰং গচ্ছন্তীতি অত্থো. কাযিকাতি পঞ্চদ্ৰারিকদরথা. চেতসিকাতি মনোদ্ৰারিকদরথা. সন্তাপাদীসুপি এসেৰ নযো.

৪৩০. কাযসুখন্তি পঞ্চদ্ৰারিকসুখং. চেতোসুখন্তি মনোদ্ৰারিকসুখং. এত্থ চ পঞ্চদ্ৰারিকজৰনেন সমাপজ্জনং ৰা ৰুট্ঠানং ৰা নত্থি, উপ্পন্নমত্তকমেৰ হোতি. মনোদ্ৰারিকেন সব্বং হোতি. অযঞ্চ মগ্গৰুট্ঠানস্স পচ্চযভূতা বলৰৰিপস্সনা, সাপি মনোদ্ৰারিকেনেৰ হোতি.

৪৩১. তথাভূতস্সাতি কুসলচিত্তসম্পযুত্তচেতোসুখসমঙ্গীভূতস্স. পুব্বেৰ খো পনস্সাতি অস্স ভিক্খুনো ৰাচাকম্মন্তাজীৰা পুব্বসুদ্ধিকা নাম আদিতো পট্ঠায পরিসুদ্ধাৰ হোন্তি. দিট্ঠিসঙ্কপ্পৰাযামসতিসমাধিসঙ্খাতানি পন পঞ্চঙ্গানি সব্বত্থককারাপকঙ্গানি নাম. এৰং লোকুত্তরমগ্গো অট্ঠঙ্গিকো ৰা সত্তঙ্গিকো ৰা হোতি.

ৰিতণ্ডৰাদী পন ‘‘যা যথাভূতস্স দিট্ঠী’’তি ইমমেৰ সুত্তপদেসং গহেত্ৰা ‘‘লোকুত্তরমগ্গো পঞ্চঙ্গিকো’’তি ৰদতি. সো – ‘‘এৰমস্সাযং অরিযো অট্ঠঙ্গিকো মগ্গো ভাৰনাপারিপূরিং গচ্ছতী’’তি ইমিনা অনন্তরৰচনেনেৰ পটিসেধিতব্বো. উত্তরি চ এৰং সঞ্ঞাপেতব্বো – লোকুত্তরমগ্গো পঞ্চঙ্গিকো নাম নত্থি, ইমানি পন পঞ্চ সব্বত্থককারাপকঙ্গানি মগ্গক্খণে ৰিরতিৰসেন পূরেন্তি. ‘‘যা চতূহি ৰচীদুচ্চরিতেহি আরতি ৰিরতী’’তি এৰং ৰুত্তৰিরতীসু হি মিচ্ছাৰাচং পজহতি, সম্মাৰাচং ভাৰেতি, এৰং সম্মাৰাচং ভাৰেন্তস্স ইমানি পঞ্চঙ্গিকানি ন ৰিনা, সহেৰ ৰিরতিযা পূরেন্তি. সম্মাকম্মন্তাজীৰেসুপি এসেৰ নযো. ইতি ৰচীকম্মাদীনি আদিতো পট্ঠায পরিসুদ্ধানেৰ ৰট্টন্তি. ইমানি পন পঞ্চ সব্বত্থককারাপকঙ্গানি ৰিরতিৰসেন পরিপূরেন্তীতি পঞ্চঙ্গিকো মগ্গো নাম নত্থি. সুভদ্দসুত্তেপি (দী. নি. ২.২১৪) চেতং ৰুত্তং – ‘‘যস্মিং খো, সুভদ্দ, ধম্মৰিনযে অরিযো অট্ঠঙ্গিকো মগ্গো’’তি. অঞ্ঞেসু চ অনেকেসু সুত্তসতেসু অট্ঠঙ্গিকোৰ মগ্গো আগতোতি.

৪৩৩. চত্তারোপি সতিপট্ঠানাতি মগ্গসম্পযুত্তাৰ চত্তারো সতিপট্ঠানা. সম্মপ্পধানাদীসুপি এসেৰ নযো. যুগনন্ধাতি একক্খণিকযুগনন্ধা. এতেহি অঞ্ঞস্মিং খণে সমাপত্তি, অঞ্ঞস্মিং ৰিপস্সনাতি. এৰং নানাখণিকাপি হোন্তি, অরিযমগ্গে পন একক্খণিকা.

ৰিজ্জা চ ৰিমুত্তি চাতি অরহত্তমগ্গৰিজ্জা চ ফলৰিমুত্তি চ. সেসং সব্বত্থ উত্তানমেৰাতি.

পপঞ্চসূদনিযা মজ্ঝিমনিকাযট্ঠকথায

মহাসল়াযতনিকসুত্তৰণ্ণনা নিট্ঠিতা.