৫. রাহুলোৰাদসুত্তৰণ্ণনা

৪১৬. এৰং মে সুতন্তি রাহুলোৰাদসুত্তং. তত্থ ৰিমুত্তিপরিপাচনীযাতি ৰিমুত্তিং পরিপাচেন্তীতি ৰিমুত্তিপরিপাচনীযা. ধম্মাতি পন্নরস ধম্মা. তে সদ্ধিন্দ্রিযাদীনং ৰিসুদ্ধিকারণৰসেন ৰেদিতব্বা. ৰুত্তঞ্হেতং –

‘‘অস্সদ্ধে পুগ্গলে পরিৰজ্জযতো, সদ্ধে পুগ্গলে সেৰতো ভজতো পযিরুপাসতো পসাদনীযে সুত্তন্তে পচ্চৰেক্খতো ইমেহি তীহাকারেহি সদ্ধিন্দ্রিযং ৰিসুজ্ঝতি. কুসীতে পুগ্গলে পরিৰজ্জযতো আরদ্ধৰীরিযে পুগ্গলে সেৰতো ভজতো পযিরুপাসতো সম্মপ্পধানে পচ্চৰেক্খতো ইমেহি তীহাকারেহি ৰীরিযিন্দ্রিযং ৰিসুজ্ঝতি. মুট্ঠস্সতী পুগ্গলে পরিৰজ্জযতো উপট্ঠিতস্সতী পুগ্গলে সেৰতো ভজতো পযিরুপাসতো সতিপট্ঠানে পচ্চৰেক্খতো ইমেহি তীহাকারেহি সতিন্দ্রিযং ৰিসুজ্ঝতি. অসমাহিতে পুগ্গলে পরিৰজ্জযতো সমাহিতে পুগ্গলে সেৰতো ভজতো পযিরুপাসতো ঝানৰিমোক্খে পচ্চৰেক্খতো ইমেহি তীহাকারেহি সমাধিন্দ্রিযং ৰিসুজ্ঝতি. দুপ্পঞ্ঞে পুগ্গলে পরিৰজ্জযতো পঞ্ঞৰন্তে পুগ্গলে সেৰতো ভজতো পযিরুপাসতো গম্ভীরঞাণচরিযং পচ্চৰেক্খতো ইমেহি তীহাকারেহি পঞ্ঞিন্দ্রিযং ৰিসুজ্ঝতি. ইতি ইমে পঞ্চ পুগ্গলে পরিৰজ্জযতো পঞ্চ পুগ্গলে সেৰতো ভজতো পযিরুপাসতো পঞ্চ সুত্তন্তক্খন্ধে পচ্চৰেক্খতো ইমেহি পন্নরসহি আকারেহি ইমানি পঞ্চিন্দ্রিযানি ৰিসুজ্ঝন্তী’’তি (পটি. ম. ১.১৮৫).

অপরেপি পন্নরস ধম্মা ৰিমুত্তিপরিপাচনীযা – সদ্ধাদীনি পঞ্চিমানি ইন্দ্রিযানি, অনিচ্চসঞ্ঞা, অনিচ্চে দুক্খসঞ্ঞা, দুক্খে অনত্তসঞ্ঞা, পহানসঞ্ঞা, ৰিরাগসঞ্ঞাতি, ইমা পঞ্চ নিব্বেধভাগিযা সঞ্ঞা, মেঘিযত্থেরস্স কথিতা কল্যাণমিত্ততাদযো পঞ্চধম্মাতি. কায পন ৰেলায ভগৰতো এতদহোসীতি. পচ্চূসসমযে লোকং ৰোলোকেন্তস্স.

৪১৯. অনেকানং দেৰতাসহস্সানন্তি আযস্মতা রাহুলেন পদুমুত্তরস্স ভগৰতো পাদমূলে পালিতনাগরাজকালে পত্থনং পট্ঠপেন্তেন সদ্ধিং পত্থনং পট্ঠপিতদেৰতাযেৰ. তাসু পন কাচি ভূমট্ঠকা দেৰতা, কাচি অন্তলিক্খকা, কাচি চাতুমহারাজিকা, কাচি দেৰলোকে, কাচি ব্রহ্মলোকে নিব্বত্তা. ইমস্মিং পন দিৰসে সব্বা একট্ঠানে অন্ধৰনস্মিংযেৰ সন্নিপতিতা. ধম্মচক্খুন্তি উপালিওৰাদ- (ম. নি. ২.৬৯) দীঘনখসুত্তেসু (ম. নি. ২.২০৬) পঠমমগ্গো ধম্মচক্খুন্তি ৰুত্তো, ব্রহ্মাযুসুত্তে (ম. নি. ২.৩৯৫) তীণি ফলানি, ইমস্মিং সুত্তে চত্তারো মগ্গা, চত্তারি চ ফলানি ধম্মচক্খুন্তি ৰেদিতব্বানি. তত্থ হি কাচি দেৰতা সোতাপন্না অহেসুং, কাচি সকদাগামী, অনাগামী, খীণাসৰা. তাসঞ্চ পন দেৰতানং এত্তকাতি গণনৰসেন পরিচ্ছেদো নত্থি. সেসং সব্বত্থ উত্তানমেৰাতি.

পপঞ্চসূদনিযা মজ্ঝিমনিকাযট্ঠকথায

রাহুলোৰাদসুত্তৰণ্ণনা নিট্ঠিতা.