১. অনাথপিণ্ডিকোৰাদসুত্তৰণ্ণনা

৩৮৩. এৰং মে সুতন্তি অনাথপিণ্ডিকোৰাদসুত্তং. তত্থ বাল়্হগিলানোতি অধিমত্তগিলানো মরণসেয্যং উপগতো. আমন্তেসীতি গহপতিস্স কির যাৰ পাদা ৰহিংসু, তাৰ দিৰসে সকিং ৰা দ্ৰিক্খত্তুং ৰা তিক্খত্তুং ৰা বুদ্ধুপট্ঠানং অখণ্ডং অকাসি. যত্তকঞ্চস্স সত্থু উপট্ঠানং অহোসি, তত্তকংযেৰ মহাথেরানং. সো অজ্জ গমনপাদস্স পচ্ছিন্নত্তা অনুট্ঠানসেয্যং উপগতো সাসনং পেসেতুকামো অঞ্ঞতরং পুরিসং আমন্তেসি. তেনুপসঙ্কমীতি ভগৰন্তং আপুচ্ছিত্ৰা সূরিযত্থঙ্গমনৰেলায উপসঙ্কমি.

৩৮৪. পটিক্কমন্তীতি ওসক্কন্তি, তনুকা ভৰন্তি. অভিক্কমন্তীতি অভিৰড্ঢন্তি ওত্থরন্তি, বলৰতিযো হোন্তি.

অভিক্কমোসানং পঞ্ঞাযতি নো পটিক্কমোতি যস্মিঞ্হি সমযে মারণন্তিকা ৰেদনা উপ্পজ্জতি, উপরিৰাতে জলিতগ্গি ৰিয হোতি, যাৰ উস্মা ন পরিযাদিযতি, তাৰ মহতাপি উপক্কমেন ন সক্কা ৰূপসমেতুং, উস্মায পন পরিযাদিন্নায ৰূপসম্মতি.

৩৮৫. অথাযস্মা সারিপুত্তো চিন্তেসি – ‘‘অযং মহাসেট্ঠিস্স ৰেদনা মারণন্তিকা, ন সক্কা পটিবাহিতুং, অৰসেসা কথা নিরত্থকা, ধম্মকথমস্স কথেস্সামী’’তি. অথ নং তং কথেন্তো তস্মাতিহাতিআদিমাহ. তত্থ তস্মাতি যস্মা চক্খুং তীহি গাহেহি গণ্হন্তো উপ্পন্নং মারণন্তিকং ৰেদনং পটিবাহিতুং সমত্থো নাম নত্থি, তস্মা. ন চক্খুং উপাদিযিস্সামীতি চক্খুং তীহি গাহেহি ন গণ্হিস্সামি. ন চ মে চক্খুনিস্সিতং ৰিঞ্ঞাণন্তি ৰিঞ্ঞাণঞ্চাপি মে চক্খুনিস্সিতং ন ভৰিস্সতি. ন রূপন্তি হেট্ঠা আযতনরূপং কথিতং, ইমস্মিং ঠানে সব্বম্পি কামভৰরূপং কথেন্তো এৰমাহ.

৩৮৬. ন ইধলোকন্তি ৰসনট্ঠানং ৰা ঘাসচ্ছাদনং ৰা ন উপাদিযিস্সামীতি অত্থো. ইদঞ্হি পচ্চযেসু অপরিতস্সনত্থং কথিতং. ন পরলোকন্তি এত্থ পন মনুস্সলোকং ঠপেত্ৰা সেসা পরলোকা নাম. ইদং – ‘‘অসুকদেৰলোকে নিব্বত্তিত্ৰা অসুকট্ঠানে ভৰিস্সামি, ইদং নাম খাদিস্সামি ভুঞ্জিস্সামি নিৰাসেস্সামি পারুপিস্সামী’’তি এৰরূপায পরিতস্সনায পহানত্থং ৰুত্তং. তম্পি ন উপাদিযিস্সামি, ন চ মে তন্নিস্সিতং ৰিঞ্ঞাণং ভৰিস্সতীতি এৰং তীহি গাহেহি পরিমোচেত্ৰা থেরো দেসনং অরহত্তনিকূটেন নিট্ঠপেসি.

৩৮৭. ওলীযসীতি অত্তনো সম্পত্তিং দিস্ৰা আরম্মণেসু বজ্ঝসি অল্লীযসীতি. ইতি আযস্মা আনন্দো – ‘‘অযম্পি নাম গহপতি এৰং সদ্ধো পসন্নো মরণভযস্স ভাযতি, অঞ্ঞো কো ন ভাযিস্সতী’’তি মঞ্ঞমানো তস্স গাল়্হং কত্ৰা ওৰাদং দেন্তো এৰমাহ. ন চ মে এৰরূপী ধম্মীকথা সুতপুব্বাতি অযং উপাসকো – ‘‘সত্থু সন্তিকাপি মে এৰরূপী ধম্মকথা ন সুতপুব্বা’’তি ৰদতি, কিং সত্থা এৰরূপি সুখুমং গম্ভীরকথং ন কথেতীতি? নো ন কথেতি. এৰং পন ছ অজ্ঝত্তিকানি আযতনানি ছ বাহিরানি ছ ৰিঞ্ঞাণকাযে ছ ফস্সকাযে ছ ৰেদনাকাযে ছ ধাতুযো পঞ্চক্খন্ধে চত্তারো অরূপে ইধলোকঞ্চ পরলোকঞ্চ দস্সেত্ৰা দিট্ঠসুতমুতৰিঞ্ঞাতৰসেন অরহত্তে পক্খিপিত্ৰা কথিতকথা এতেন ন সুতপুব্বা, তস্মা এৰং ৰদতি.

অপিচাযং উপাসকো দানাধিমুত্তো দানাভিরতো বুদ্ধানং সন্তিকং গচ্ছন্তো তুচ্ছহত্থো ন গতপুব্বো. পুরেভত্তং গচ্ছন্তো যাগুখজ্জকাদীনি গাহাপেত্ৰা গচ্ছতি, পচ্ছাভত্তং সপ্পিমধুফাণিতাদীনি. তস্মিং অসতি ৰালিকং গাহাপেত্ৰা গন্ধকুটিপরিৰেণে ওকিরাপেতি, দানং দত্ৰা সীলং রক্খিত্ৰা গেহং গতো. বোধিসত্তগতিকো কিরেস উপাসকো, তস্মা ভগৰা চতুৰীসতি সংৰচ্ছরানি উপাসকস্স যেভুয্যেন দানকথমেৰ কথেসি – ‘‘উপাসক, ইদং দানং নাম বোধিসত্তানং গতমগ্গো, ময্হম্পি গতমগ্গো, মযা সতসহস্সকপ্পাধিকানি চত্তারি অসঙ্খ্যেয্যানি দানং দিন্নং, ত্ৰং মযা গতমগ্গমেৰ অনুগচ্ছসী’’তি. ধম্মসেনাপতিআদযো মহাসাৰকাপি অত্তনো অত্তনো সন্তিকং আগতকালে দানকথমেৰস্স কথেন্তি. তেনেৰাহ ন খো গহপতি গিহীনং ওদাতৰসনানং এৰরূপী ধম্মীকথা পটিভাতীতি. ইদং ৰুত্তং হোতি – গহপতি গিহীনং নাম খেত্তৰত্থুহিরঞ্ঞসুৰণ্ণদাসীদাসপুত্তভরিযাদীসু তিব্বো আলযো তিব্বং নিকন্তিপরিযুট্ঠানং, তেসং – ‘‘এত্থ আলযো ন কাতব্বো, নিকন্তি ন কাতব্বা’’তি কথা ন পটিভাতি ন রুচ্চতীতি.

যেন ভগৰা তেনুপসঙ্কমীতি কস্মা উপসঙ্কমি? তুসিতভৰনে কিরস্স নিব্বত্তমত্তস্সেৰ তিগাৰুতপ্পমাণং সুৰণ্ণক্খন্ধং ৰিয ৰিজ্জোতমানং অত্তভাৰং উয্যানৰিমানাদিসম্পত্তিঞ্চ দিস্ৰা – ‘‘মহতী অযং ময্হং সম্পত্তি, কিং নু খো মে মনুস্সপথে কম্মং কত’’ন্তি ওলোকেন্তো তীসু রতনেসু অধিকারং দিস্ৰা চিন্তেসি ‘‘পমাদট্ঠানমিদং দেৰত্তং নাম, ইমায হি মে সম্পত্তিযা মোদমানস্স সতিসম্মোসোপি সিযা, হন্দাহং গন্ত্ৰা মম জেতৰনস্স চেৰ ভিক্খুসঙ্ঘস্স চ তথাগতস্স চ অরিযমগ্গস্স চ সারিপুত্তত্থেরস্স চ ৰণ্ণং কথেত্ৰা ততো আগন্ত্ৰা সম্পত্তিং অনুভৰিস্সামী’’তি. সো তথা অকাসি. তং দস্সেতুং অথ খো অনাথপিণ্ডিকোতিআদি ৰুত্তং.

তত্থ ইসিসঙ্ঘনিসেৰিতন্তি ভিক্খুসঙ্ঘনিসেৰিতং. এৰং পঠমগাথায জেতৰনস্স ৰণ্ণং কথেত্ৰা ইদানি অরিযমগ্গস্স ৰণ্ণং কথেন্তো কম্মং ৰিজ্জা চাতিআদিমাহ. তত্থ কম্মন্তি মগ্গচেতনা. ৰিজ্জাতি মগ্গপঞ্ঞা. ধম্মোতি সমাধিপক্খিকো ধম্মো. সীলং জীৰিতমুত্তমন্তি সীলে পতিট্ঠিতস্স জীৰিতং উত্তমন্তি দস্সেতি. অথ ৰা ৰিজ্জাতি দিট্ঠিসঙ্কপ্পো. ধম্মোতি ৰাযামসতিসমাধযো. সীলন্তি ৰাচাকম্মন্তাজীৰা. জীৰিতমুত্তমন্তি এতস্মিং সীলে পতিট্ঠিতস্স জীৰিতং নাম উত্তমং. এতেন মচ্চা সুজ্ঝন্তীতি এতেন অট্ঠঙ্গিকেন মগ্গেন সত্তা ৰিসুজ্ঝন্তি.

তস্মাতি যস্মা মগ্গেন সুজ্ঝন্তি, ন গোত্তধনেহি, তস্মা. যোনিসো ৰিচিনে ধম্মন্তি উপাযেন সমাধিপক্খিযং ধম্মং ৰিচিনেয্য. এৰং তত্থ ৰিসুজ্ঝতীতি এৰং তস্মিং অরিযমগ্গে ৰিসুজ্ঝতি. অথ ৰা যোনিসো ৰিচিনে ধম্মন্তি উপাযেন পঞ্চক্খন্ধধম্মং ৰিচিনেয্য. এৰং তত্থ ৰিসুজ্ঝতীতি এৰং তেসু চতূসু সচ্চেসু ৰিসুজ্ঝতি.

ইদানি সারিপুত্তত্থেরস্স ৰণ্ণং কথেন্তো সারিপুত্তো ৰাতিআদিমাহ. তত্থ সারিপুত্তো ৰাতি অৰধারণৰচনং. এতেহি পঞ্ঞাদীহি সারিপুত্তোৰ সেয্যোতি ৰদতি. উপসমেনাতি কিলেসউপসমেন. পারঙ্গতোতি নিব্বানং গতো. যো কোচি নিব্বানং পত্তো ভিক্খু, সো এতাৰপরমো সিযা, ন থেরেন উত্তরিতরো নাম অত্থীতি ৰদতি. সেসং সব্বত্থ উত্তানমেৰাতি.

পপঞ্চসূদনিযা মজ্ঝিমনিকাযট্ঠকথায

অনাথপিণ্ডিকোৰাদসুত্তৰণ্ণনা নিট্ঠিতা.