৯. কাযগতাসতিসুত্তৰণ্ণনা

১৫৩-৪. এৰং মে সুতন্তি কাযগতাসতিসুত্তং. তত্থ গেহসিতাতি পঞ্চকামগুণনিস্সিতা. সরসঙ্কপ্পাতি ধাৰনসঙ্কপ্পা. সরন্তীতি হি সরা, ধাৰন্তীতি অত্থো. অজ্ঝত্তমেৰাতি গোচরজ্ঝত্তস্মিংযেৰ. কাযগতাসতিন্তি কাযপরিগ্গাহিকম্পি কাযারম্মণম্পি সতিং. কাযপরিগ্গাহিকন্তি ৰুত্তে সমথো কথিতো হোতি, কাযারম্মণন্তি ৰুত্তে ৰিপস্সনা. উভযেন সমথৰিপস্সনা কথিতা হোন্তি.

পুন চপরং…পে… এৰম্পি, ভিক্খৰে, ভিক্খু কাযগতাসতিং ভাৰেতীতি সতিপট্ঠানে চুদ্দসৰিধেন কাযানুপস্সনা কথিতা.

১৫৬. অন্তোগধাৰাস্সাতি তস্স ভিক্খুনো ভাৰনায অব্ভন্তরগতাৰ হোন্তি. ৰিজ্জাভাগিযাতি এত্থ সম্পযোগৰসেন ৰিজ্জং ভজন্তীতি ৰিজ্জাভাগিযা. ৰিজ্জাভাগে ৰিজ্জাকোট্ঠাসে ৰত্তন্তীতিপি ৰিজ্জাভাগিযা. তত্থ ৰিপস্সনাঞাণং, মনোমযিদ্ধি, ছ অভিঞ্ঞাতি অট্ঠ ৰিজ্জা. পুরিমেন অত্থেন তাহি সম্পযুত্তধম্মাপি ৰিজ্জাভাগিযা. পচ্ছিমেন অত্থেন তাসু যা কাচি একা ৰিজ্জা ৰিজ্জা, সেসা ৰিজ্জাভাগিযাতি এৰং ৰিজ্জাপি ৰিজ্জায সম্পযুত্তা ধম্মাপি ৰিজ্জাভাগিযাতেৰ ৰেদিতব্বা. চেতসা ফুটোতি এত্থ দুৰিধং ফরণং আপোফরণঞ্চ, দিব্বচক্খুফরণঞ্চ, তত্থ আপোকসিণং সমাপজ্জিত্ৰা আপেন ফরণং আপোফরণং নাম. এৰং ফুটেপি মহাসমুদ্দে সব্বা সমুদ্দঙ্গমা কুন্নদিযো অন্তোগধাৰ হোন্তি, আলোকং পন ৰড্ঢেত্ৰা দিব্বচক্খুনা সকলসমুদ্দস্স দস্সনং দিব্বচক্খুফরণং নাম. এৰং ফরণেপি মহাসমুদ্দে সব্বা সমুদ্দঙ্গমা কুন্নদিযো অন্তোগধাৰ হোন্তি.

ওতারন্তি ৰিৰরং ছিদ্দং. আরম্মণন্তি কিলেসুপ্পত্তিপচ্চযং. লভেথ ওতারন্তি লভেয্য পৰেসনং, ৰিনিৰিজ্ঝিত্ৰা যাৰ পরিযোসানা গচ্ছেয্যাতি অত্থো. নিক্খেপনন্তি নিক্খিপনট্ঠানং.

১৫৭. এৰং অভাৰিতকাযগতাসতিং পুগ্গলং অল্লমত্তিকপুঞ্জাদীহি উপমেত্ৰা ইদানি ভাৰিতকাযগতাসতিং সারফলকাদীহি উপমেতুং সেয্যথাপীতিআদিমাহ. তত্থ অগ্গল়ফলকন্তি কৰাটং.

১৫৮. কাকপেয্যোতি মুখৰট্টিযং নিসীদিত্ৰা কাকেন গীৰং অনামেত্ৰাৰ পাতব্বো. অভিঞ্ঞাসচ্ছিকরণীযস্সাতি অভিঞ্ঞায সচ্ছিকাতব্বস্স. সক্খিভব্বতং পাপুণাতীতি পচ্চক্খভাৰং পাপুণাতি. সতি সতি আযতনেতি সতিসতি কারণে. কিং পনেত্থ কারণন্তি? অভিঞ্ঞাৰ কারণং. আল়িবন্ধাতি মরিযাদবদ্ধা.

যানীকতাযাতি যুত্তযানং ৰিয কতায. ৰত্থুকতাযাতি পতিট্ঠাকতায. অনুট্ঠিতাযাতি অনুপ্পৰত্তিতায. পরিচিতাযাতি পরিচযকতায. সুসমারদ্ধাযাতি সুট্ঠু সমারদ্ধায সুসম্পগ্গহিতায. সেসং সব্বত্থ উত্তানমেৰাতি.

পপঞ্চসূদনিযা মজ্ঝিমনিকাযট্ঠকথায

কাযগতাসতিসুত্তৰণ্ণনা নিট্ঠিতা.