৮. গোপকমোগ্গল্লানসুত্তৰণ্ণনা

৭৯. এৰং মে সুতন্তি গোপকমোগ্গল্লানসুত্তং. তত্থ অচিরপরিনিব্বুতে ভগৰতীতি ভগৰতি অচিরপরিনিব্বুতে, ধাতুভাজনীযং কত্ৰা ধম্মসঙ্গীতিং কাতুং রাজগহং আগতকালে. রঞ্ঞো পজ্জোতস্স আসঙ্কমানোতি চণ্ডপজ্জোতো নামেস রাজা বিম্বিসারমহারাজস্স সহাযো অহোসি, জীৰকং পেসেত্ৰা ভেসজ্জকারিতকালতো পট্ঠায পন দল়্হমিত্তোৰ জাতো, সো ‘‘অজাতসত্তুনা দেৰদত্তস্স ৰচনং গহেত্ৰা পিতা ঘাতিতো’’তি সুত্ৰা ‘‘মম পিযমিত্তং ঘাতেত্ৰা এস রজ্জং করিস্সামীতি মঞ্ঞতি, ময্হং সহাযস্স সহাযানং অত্থিকভাৰং জানাপেস্সামী’’তি পরিসতি ৰাচং অভাসি. তং সুত্ৰা তস্স আসঙ্কা উপ্পন্না. তেন ৰুত্তং ‘‘রঞ্ঞো পজ্জোতস্স আসঙ্কমানো’’তি. কম্মন্তোতি বহিনগরে নগরপটিসঙ্খারাপনত্থায কম্মন্তট্ঠানং.

উপসঙ্কমীতি মযং ধম্মৰিনযসঙ্গীতিং কারেস্সামাতি ৰিচরাম, অযঞ্চ মহেসক্খো রাজৰল্লভো সঙ্গহে কতে ৰেল়ুৰনস্স আরক্খং করেয্যাতি মঞ্ঞমানো উপসঙ্কমি. তেহি ধম্মেহীতি তেহি সব্বঞ্ঞুতঞ্ঞাণধম্মেহি. সব্বেন সব্বন্তি সব্বাকারেন সব্বং. সব্বথা সব্বন্তি সব্বকোট্ঠাসেহি সব্বং. কিং পুচ্ছামীতি পুচ্ছতি? ছ হি সত্থারো পঠমতরং অপ্পঞ্ঞাতকুলেহি নিক্খমিত্ৰা পব্বজিতা, তে তথাগতে ধরমানেযেৰ কালংকতা, সাৰকাপি নেসং অপ্পঞ্ঞাতকুলেহেৰ পব্বজিতা. তে তেসং অচ্চযেন মহাৰিৰাদং অকংসু. সমণো পন গোতমো মহাকুলা পব্বজিতো, তস্স অচ্চযেন সাৰকানং মহাৰিৰাদো ভৰিস্সতীতি অযং কথা সকলজম্বুদীপং পত্থরমানা উদপাদি. সম্মাসম্বুদ্ধে চ ধরন্তে ভিক্খূনং ৰিৰাদো নাহোসি. যোপি অহোসি, সোপি তত্থেৰ ৰূপসমিতো. পরিনিব্বুতকালে পনস্স – ‘‘অট্ঠসট্ঠিযোজনসতসহস্সুব্বেধং সিনেরুং অপৰাহিতুং সমত্থস্স ৰাতস্স পুরতো পুরাণপণ্ণং কিং ঠস্সতি, দস পারমিযো পূরেত্ৰা সব্বঞ্ঞুতঞ্ঞাণং পত্তস্স সত্থু অলজ্জমানো মচ্চুরাজা কস্স লজ্জিস্সতী’’তি মহাসংৰেগং জনেত্ৰা ভিয্যোসোমত্তায ভিক্খূ সমগ্গা জাতা অতিৰিয উপসন্তুপসন্তা, কিং নু খো এতন্তি ইদং পুচ্ছামীতি পুচ্ছতি. অনুসঞ্ঞাযমানোতি অনুসঞ্জাযমানো, কতাকতং জনন্তোতি অত্থো. অনুৰিচরমানো ৰা.

৮০. অত্থি নু খোতি অযম্পি হেট্ঠিমপুচ্ছমেৰ পুচ্ছতি. অপ্পটিসরণেতি অপ্পটিসরণে ধম্মৰিনযে. কো হেতু সামগ্গিযাতি তুম্হাকং সমগ্গভাৰস্স কো হেতু কো পচ্চযো. ধম্মপ্পটিসরণাতি ধম্মো অম্হাকং পটিসরণং, ধম্মো অৰস্সযোতি দীপেতি.

৮১. পৰত্ততীতি পগুণং হুত্ৰা আগচ্ছতি. আপত্তি হোতি ৰীতিক্কমোতি উভযমেতং বুদ্ধস্স আণাতিক্কমনমেৰ. যথাধম্মং যথানুসিট্ঠং কারেমাতি যথা ধম্মো চ অনুসিট্ঠি চ ঠিতা, এৰং কারেমাতি অত্থো.

ন কির নো ভৰন্তো কারেন্তি ধম্মো নো কারেতীতি পদদ্ৰযেপি নো কারো নিপাতমত্তং. এৰং সন্তে ন কির ভৰন্তো কারেন্তি, ধম্মোৰ কারেতীতি অযমেত্থ অত্থো.

৮৩. তগ্ঘাতি একংসে নিপাতো. কহং পন ভৰং আনন্দোতি কিং থেরস্স ৰেল়ুৰনে ৰসনভাৰং ন জানাতীতি? জানাতি. ৰেল়ুৰনস্স পন অনেন আরক্খা দিন্না, তস্মা অত্তানং উক্কংসাপেতুকামো পুচ্ছতি. কস্মা পন তেন তত্থ আরক্খা দিন্না? সো কির একদিৰসং মহাকচ্চাযনত্থেরং গিজ্ঝকূটা ওতরন্তং দিস্ৰা – ‘‘মক্কটো ৰিয এসো’’তি আহ. ভগৰা তং কথং সুত্ৰা – ‘‘সচে খমাপেতি, ইচ্চেতং কুসলং. নো চে খমাপেতি, ইমস্মিং ৰেল়ুৰনে গোনঙ্গলমক্কটো ভৰিস্সতী’’তি আহ. সো তং কথং সুত্ৰা – ‘‘সমণস্স গোতমস্স কথায দ্ৰেধাভাৰো নাম নত্থি, পচ্ছা মে মক্কটভূতকালে গোচরট্ঠানং ভৰিস্সতী’’তি ৰেল়ুৰনে নানাৰিধে রুক্খে রোপেত্ৰা আরক্খং অদাসি. অপরভাগে কালং কত্ৰা মক্কটো হুত্ৰা নিব্বত্তি. ‘‘ৰস্সকারা’’তি ৰুত্তে আগন্ত্ৰা সমীপে অট্ঠাসি. তগ্ঘাতি সব্বৰারেসু একংসৰচনেযেৰ নিপাতো. তগ্ঘ, ভো আনন্দাতি এৰং থেরেন পরিসমজ্ঝে অত্তনো উক্কংসিতভাৰং ঞত্ৰা অহম্পি থেরং উক্কংসিস্সামীতি এৰমাহ.

৮৪. ন চ খো, ব্রাহ্মণাতি থেরো কির চিন্তেসি ‘‘সম্মাসম্বুদ্ধেন ৰণ্ণিতজ্ঝানম্পি অত্থি, অৰণ্ণিতজ্ঝানম্পি অত্থি, অযং পন ব্রাহ্মণো সব্বমেৰ ৰণ্ণেতীতি পঞ্হং ৰিসংৰাদেতি, ন খো পন সক্কা ইমস্স মুখং উল্লোকেতুং ন পিণ্ডপাতং রক্খিতুং, পঞ্হং উজুং কত্ৰা কথেস্সামী’’তি ইদং ৰত্তুং আরদ্ধং. অন্তরং করিত্ৰাতি অব্ভন্তরং করিত্ৰা. এৰরূপং খো, ব্রাহ্মণ, সো ভগৰা ঝানং ৰণ্ণেসীতি ইধ সব্বসঙ্গাহকজ্ঝানং নাম কথিতং.

যং নো মযন্তি অযং কির ব্রাহ্মণো ৰস্সকারব্রাহ্মণং উসূযতি, তেন পুচ্ছিতপঞ্হস্স অকথনং পচ্চাসীসমানো কথিতভাৰং ঞত্ৰা ‘‘ৰস্সকারেন পুচ্ছিতং পঞ্হং পুনপ্পুনং তস্স নামং গণ্হন্তো ৰিত্থারেত্ৰা কথেসি, মযা পুচ্ছিতপঞ্হং পন যট্ঠিকোটিযা উপ্পীল়েন্তো ৰিয একদেসমেৰ কথেসী’’তি অনত্তমনো অহোসি, তস্মা এৰমাহ. সেসং সব্বত্থ উত্তানমেৰাতি.

পপঞ্চসূদনিযা মজ্ঝিমনিকাযট্ঠকথায

গোপকমোগ্গল্লানসুত্তৰণ্ণনা নিট্ঠিতা.