৭. গণকমোগ্গল্লানসুত্তৰণ্ণনা

৭৪. এৰং মে সুতন্তি গণকমোগ্গল্লানসুত্তং. তত্থ যাৰ পচ্ছিমসোপানকল়েৰরাতি যাৰ পঠমসোপানফলকা একদিৰসেনেৰ সত্তভূমিকো পাসাদো ন সক্কা কাতুং, ৰত্থুং সোধেত্ৰা থম্ভুস্সাপনতো পট্ঠায পন যাৰ চিত্তকম্মকরণা অনুপুব্বকিরিযা চেত্থ পঞ্ঞাযতীতি দস্সেতি. যদিদং অজ্ঝেনেতি তযোপি ৰেদা ন সক্কা একদিৰসেনেৰ অধীযিতুং, এতেসং অজ্ঝেনেপি পন অনুপুব্বকিরিযাৰ পঞ্ঞাযতীতি দস্সেতি. ইস্সত্থেতি আৰুধৰিজ্জাযপি একদিৰসেনেৰ ৰালৰেধি নাম ন সক্কা কাতুং, ঠানসম্পাদনমুট্ঠিকরণাদীহি পন এত্থাপি অনুপুব্বকিরিযা পঞ্ঞাযতীতি দস্সেতি. সঙ্খানেতি গণনায. তত্থ অনুপুব্বকিরিযং অত্তনাৰ দস্সেন্তো এৰং গণাপেমাতিআদিমাহ.

৭৫. সেয্যথাপি ব্রাহ্মণাতি ইধ ভগৰা যস্মা বাহিরসমযে যথা যথা সিপ্পং উগ্গণ্হন্তি, তথা তথা কেরাটিকা হোন্তি, তস্মা অত্তনো সাসনং বাহিরসমযেন অনুপমেত্ৰা ভদ্রঅস্সাজানীযেন উপমেন্তো সেয্যথাপীতিআদিমাহ. ভদ্রো হি অস্সাজানীযো যস্মিং কারণে দমিতো হোতি, তং জীৰিতহেতুপি নাতিক্কমতি. এৰমেৰ সাসনে সম্মাপটিপন্নো কুলপুত্তো সীলৰেলং নাতিক্কমতি. মুখাধানেতি মুখট্ঠপনে.

৭৬. সতিসম্পজঞ্ঞায চাতি সতিসম্পজঞ্ঞাহি সমঙ্গিভাৰত্থায. দ্ৰে হি খীণাসৰা সততৰিহারী চ নোসততৰিহারী চ. তত্থ সততৰিহারী যংকিঞ্চি কম্মং কত্ৰাপি ফলসমাপত্তিং সমাপজ্জিতুং সক্কোতি, নো সততৰিহারী পন অপ্পমত্তকেপি কিচ্চে কিচ্চপ্পসুতো হুত্ৰা ফলসমাপত্তিং অপ্পেতুং ন সক্কোতি.

তত্রিদং ৰত্থু – একো কির খীণাসৰত্থেরো খীণাসৰসামণেরং গহেত্ৰা অরঞ্ঞৰাসং গতো, তত্থ মহাথেরস্স সেনাসনং পত্তং, সামণেরস্স ন পাপুণাতি, তং ৰিতক্কেন্তো থেরো একদিৰসম্পি ফলসমাপত্তিং অপ্পেতুং নাসক্খি. সামণেরো পন তেমাসং ফলসমাপত্তিরতিযা ৰীতিনামেত্ৰা ‘‘সপ্পাযো, ভন্তে, অরঞ্ঞৰাসো জাতো’’তি থেরং পুচ্ছি. থেরো ‘‘ন জাতো, আৰুসো’’তি আহ. ইতি যো এৰরূপো খীণাসৰো, সো ইমে ধম্মে আদিতো পট্ঠায আৰজ্জিত্ৰাৰ সমাপজ্জিতুং সক্খিস্সতীতি দস্সেন্তো ‘‘সতিসম্পজঞ্ঞায চা’’তি আহ.

৭৮. যেমে, ভো গোতমাতি তথাগতে কির কথযন্তেৰ ব্রাহ্মণস্স ‘‘ইমে পুগ্গলা ন আরাধেন্তি, ইমে আরাধেন্তী’’তি নযো উদপাদি, তং দস্সেন্তো এৰং ৰত্তুমারদ্ধো.

পরমজ্জধম্মেসূতি অজ্জধম্মা নাম ছসত্থারধম্মা, তেসু গোতমৰাদোৰ, পরমো উত্তমোতি অত্থো. সেসং সব্বত্থ উত্তানমেৰাতি.

পপঞ্চসূদনিযা মজ্ঝিমনিকাযট্ঠকথায

গণকমোগ্গল্লানসুত্তৰণ্ণনা নিট্ঠিতা.