৭. ধনঞ্জানিসুত্তৰণ্ণনা

৪৪৫. এৰং মে সুতন্তি ধনঞ্জানিসুত্তং. তত্থ দক্খিণাগিরিস্মিন্তি গিরীতি পব্বতো, রাজগহং পরিক্খিপিত্ৰা ঠিতপব্বতস্স দক্খিণদিসাভাগে জনপদস্সেতং নামং. তণ্ডুলপালিদ্ৰারাযাতি রাজগহস্স কির দ্ৰত্তিংসমহাদ্ৰারানি চতুসট্ঠিখুদ্দকদ্ৰারানি, তেসু একং তণ্ডুলপালিদ্ৰারং নাম, তং সন্ধাযেৰমাহ. রাজানং নিস্সাযাতি ‘‘গচ্ছ মনুস্সে অপীল়েত্ৰা সস্সভাগং গণ্হাহী’’তি রঞ্ঞা পেসিতো গন্ত্ৰা সব্বমেৰ সস্সং গণ্হাতি, ‘‘মা নো, ভন্তে, নাসেহী’’তি চ ৰুত্তে – ‘‘রাজকুলে ৰুত্তং মন্দং, অহং রঞ্ঞা আগমনকালেযেৰ এৰং আণত্তো, মা কন্দিত্থা’’তি এৰং রাজানং নিস্সায ব্রাহ্মণগহপতিকে ৰিলুম্পতি. ধঞ্ঞং যেভুয্যেন অত্তনো ঘরং পৰেসেত্ৰা অপ্পকং রাজকুলে পৰেসেতি. কিং ব্রাহ্মণগহপতিকানং ন পীল়ং অকাসীতি চ ৰুত্তো – ‘‘আম, মহারাজ, ইমস্মিং ৰারে খেত্তানি মন্দসস্সানি অহেসুং, তস্মা অপীল়েন্তস্স মে গণ্হতো ন বহুং জাত’’ন্তি এৰং ব্রাহ্মণগহপতিকে নিস্সায রাজানং ৰিলুম্পতি.

৪৪৬. পযো পীযতন্তি তরুণখীরং পিৰতু. তাৰ ভত্তস্সাতি যাৰ খীরং পিৰিত্ৰা নিসীদিস্সথ, তাৰদেৰ ভত্তস্স কালো ভৰিস্সতি. ইধেৰ হি নো পাতরাসভত্তং আহরিস্সন্তীতি দস্সেতি. মাতাপিতরোতিআদীসু মহল্লকা মাতাপিতরো মুদুকানি অত্থরণপাৰুরণানি সুখুমানি ৰত্থানি মধুরভোজনং সুগন্ধগন্ধমালাদীনি চ পরিযেসিত্ৰা পোসেতব্বা. পুত্তধীতানং নামকরণমঙ্গলাদীনি সব্বকিচ্চানি করোন্তেন পুত্তদারো পোসেতব্বো. এৰঞ্হি অকরিযমানে গরহা উপ্পজ্জতীতি ইমিনা নযেন অত্থো ৰেদিতব্বো.

৪৪৭. অধম্মচারীতি পঞ্চ দুস্সীল্যকম্মানি ৰা দস দুস্সীল্যকম্মানি ৰা ইধ অধম্মো নাম. উপকড্ঢেয্যুন্তি পঞ্চৰিধবন্ধনাদিকম্মকরণত্থং তং তং নিরযং কড্ঢেয্যুং.

৪৪৮. ধম্মচারীতি ধম্মিকসিৰৰিজ্জাদিকম্মকারী. পটিক্কমন্তীতি ওসরন্তি পরিহাযন্তি. অভিক্কমন্তীতি অভিসরন্তি ৰড্ঢন্তি. সেয্যোতি ৰরতরং. হীনেতি নিহীনে লামকে. কালঙ্কতো চ সারিপুত্তাতি ইদং ভগৰা ‘‘তত্রস্স গন্ত্ৰা দেসেহী’’তি অধিপ্পাযেন থেরমাহ. থেরোপি তংখণংযেৰ গন্ত্ৰা মহাব্রহ্মুনো ধম্মং দেসেসি, ততো পট্ঠায চাতুপ্পদিকং গাথং কথেন্তোপি চতুসচ্চৰিমুত্তং নাম ন কথেসীতি.

পপঞ্চসূদনিযা মজ্ঝিমনিকাযট্ঠকথায

ধনঞ্জানিসুত্তৰণ্ণনা নিট্ঠিতা.