৬. এসুকারীসুত্তৰণ্ণনা

৪৩৭. এৰং মে সুতন্তি এসুকারীসুত্তং. তত্থ বিলং ওলগ্গেয্যুন্তি কোট্ঠাসং লগ্গাপেয্যুং, ইমিনা সত্থধম্মং নাম দস্সেতি. সত্থৰাহো কির মহাকন্তারপটিপন্নো অন্তরামগ্গে গোণে মতে মংসং গহেত্ৰা সব্বেসং সত্থিকানং ‘‘ইদং খাদিত্ৰা এত্তকং মূলং দাতব্ব’’ন্তি কোট্ঠাসং ওলগ্গেতি, গোণমংসং নাম খাদন্তাপি অত্থি অখাদন্তাপি, মূলং দাতুং সক্কোন্তাপি অসক্কোন্তাপি. সত্থৰাহো যেন মূলেন গোণো গহিতো, তস্স নিক্খমনত্থং সব্বেসং বলক্কারেন কোট্ঠাসং দত্ৰা মূলং গণ্হাতি, অযং সত্থধম্মো. এৰমেৰং ব্রাহ্মণাপি লোকস্স পটিঞ্ঞং অগ্গহেত্ৰা অত্তনোৰ ধম্মতায চতস্সো পারিচরিযা পঞ্ঞপেন্তীতি দস্সেতুং এৰমেৰ খোতিআদিমাহ. পাপিযো অস্সাতি পাপং অস্স. সেয্যো অস্সাতি হিতং অস্স. অথ ৰা পাপিযোতি পাপকো লামকো অত্তভাৰো অস্স. সেয্যোতি সেট্ঠো উত্তমো. সেয্যংসোতি সেয্যো. উচ্চাকুলীনতাতি উচ্চাকুলীনত্তেন সেয্যো. পাপিযংসোতি পাপিযো. উচ্চাকুলীনতা চ দ্ৰীসু কুলেসু ৰড্ঢেতি খত্তিযকুলে ব্রাহ্মণকুলে চ, উল়ারৰণ্ণতা তীসু. ৰেস্সোপি হি উল়ারৰণ্ণো হোতি. উল়ারভোগতা চতূসুপি. সুদ্দোপি হি অন্তমসো চণ্ডালোপি উল়ারভোগো হোতিযেৰ.

৪৪০. ভিক্খাচরিযন্তি কোটিধনেনপি হি ব্রাহ্মণেন ভিক্খা চরিতব্বাৰ, পোরাণকব্রাহ্মণা অসীতিকোটিধনাপি একৰেলং ভিক্খং চরন্তি. কস্মা? দুগ্গতকালে চরন্তানং ইদানি ভিক্খং চরিতুং আরদ্ধাতি গরহা ন ভৰিস্সতীতি. অতিমঞ্ঞমানোতি যো ভিক্খাচরিযৰংসং হরিত্ৰা সত্তজীৰকসিকম্মৰণিজ্জাদীহি জীৰিকং কপ্পেতি, অযং অতিমঞ্ঞতি নাম. গোপো ৰাতি যথা গোপকো অত্তনা রক্খিতব্বং ভণ্ডং থেনেন্তো অকিচ্চকারী হোতি, এৰন্তি অত্থো. ইমিনা নযেন সব্বৰারেসু অত্থো ৰেদিতব্বো. অসিতব্যাভঙ্গিন্তি তিণলাযনঅসিতঞ্চেৰ কাজঞ্চ. অনুস্সরতোতি যত্থ জাতো, তস্মিং পোরাণে মাতাপেত্তিকে কুলৰংসে অনুস্সরিযমানেতি অত্থো. সেসং সব্বত্থ উত্তানমেৰাতি.

পপঞ্চসূদনিযা মজ্ঝিমনিকাযট্ঠকথায

এসুকারীসুত্তৰণ্ণনা নিট্ঠিতা.