৭. পিযজাতিকসুত্তৰণ্ণনা

৩৫৩. এৰং মে সুতন্তি পিযজাতিকসুত্তং. তত্থ নেৰ কম্মন্তা পটিভন্তীতি ন সব্বেন সব্বং পটিভন্তি, পকতিনিযামেন পন ন পটিভন্তি. দুতিযপদেপি এসেৰ নযো. এত্থ চ ন পটিভাতীতি ন রুচ্চতি. আল়াহনন্তি সুসানং. অঞ্ঞথত্তন্তি ৰিৰণ্ণতায অঞ্ঞথাভাৰো. ইন্দ্রিযানি নাম মনোৰিঞ্ঞেয্যা ধম্মা, পতিট্ঠিতোকাসং পন সন্ধায ইদং ৰুত্তং. পিযজাতিকাতি পিযতো জাযন্তি. পিযপ্পভাৰিকাতি পিযতো পভৰন্তি.

৩৫৫. সচে তং, মহারাজাতি তস্স অত্থং অসল্লক্খযমানাপি সত্থরি সদ্ধায এৰং ৰদতি. চর পিরেতি অপেহি অম্হাকং পরে, অনজ্ঝত্তিকভূতেতি অত্থো. অথ ৰা চর পিরেতি পরতো গচ্ছ, মা ইধ তিট্ঠাতিপি অত্থো.

৩৫৬. দ্ৰিধা ছেত্ৰাতি অসিনা দ্ৰে কোট্ঠাসে করোন্তো ছিন্দিত্ৰা. অত্তানং উপ্ফালেসীতি তেনেৰ অসিনা অত্তনো উদরং ফালেসি. যদি হি তস্স সা অপ্পিযা ভৰেয্য, ইদানি অঞ্ঞং মাতুগামং গণ্হিস্সামীতি অত্তানং ন ঘাতেয্য. যস্মা পনস্স সা পিযা অহোসি, তস্মা পরলোকেপি তায সদ্ধিং সমঙ্গিভাৰং পত্থযমানো এৰমকাসি.

৩৫৭. পিযা তে ৰজিরীতি এৰং কিরস্সা অহোসি – ‘‘সচাহং, ‘ভূতপুব্বং, মহারাজ, ইমিস্সাযেৰ সাৰত্থিযং অঞ্ঞতরিস্সা ইত্থিযা’তিআদিকথং কথেয্যং, ‘কো তে এৰং অকাসি, অপেহি নত্থি এত’ন্তি মং পটিসেধেয্য, ৰত্তমানেনেৰ নং সঞ্ঞাপেস্সামী’’তি চিন্তেত্ৰা এৰমাহ. ৰিপরিণামঞ্ঞথাভাৰাতি এত্থ মরণৰসেন ৰিপরিণামো, কেনচি সদ্ধিং পলাযিত্ৰা গমনৰসেন অঞ্ঞথাভাৰো ৰেদিতব্বো.

ৰাসভাযাতি ৰাসভা নাম রঞ্ঞো একা দেৰী, তং সন্ধাযাহ.

পিযা তে অহন্তি কস্মা সব্বপচ্ছা আহ? এৰং কিরস্সা অহোসি – ‘‘অযং রাজা ময্হং কুপিতো, সচাহং সব্বপঠমং ‘পিযা তে অহ’ন্তি পুচ্ছেয্যং, ‘ন মে ত্ৰং পিযা, চর পিরে’তি ৰদেয্য, এৰং সন্তে কথা পতিট্ঠানং ন লভিস্সতী’’তি কথায পতিট্ঠানত্থং সব্বপচ্ছা পুচ্ছি. কাসিকোসলেসু ছড্ডিতভাৰেন ৰিপরিণামো, পটিরাজূনং হত্থগমনৰসেন অঞ্ঞথাভাৰো ৰেদিতব্বো.

আচমেহীতি আচমনোদকং দেহি. আচমিত্ৰা হত্থপাদে ধোৰিত্ৰা মুখং ৰিক্খালেত্ৰা সত্থারং নমস্সিতুকামো এৰমাহ. সেসং সব্বত্থ উত্তানমেৰাতি.

পপঞ্চসূদনিযা মজ্ঝিমনিকাযট্ঠকথায

পিযজাতিকসুত্তৰণ্ণনা নিট্ঠিতা.