৯. বহুৰেদনীযসুত্তৰণ্ণনা

৮৮. এৰং মে সুতন্তি বহুৰেদনীযসুত্তং. তত্থ পঞ্চকঙ্গো থপতীতি পঞ্চকঙ্গোতি তস্স নামং. ৰাসিফরসুনিখাদনদণ্ডমুগ্গরকাল়সুত্তনাল়িসঙ্খাতেহি ৰা অঙ্গেহি সমন্নাগতত্তা সো পঞ্চঙ্গোতি পঞ্ঞাতো. থপতীতি ৰড্ঢকীজেট্ঠকো. উদাযীতি পণ্ডিতউদাযিত্থেরো.

৮৯. পরিযাযন্তি কারণং. দ্ৰেপানন্দাতি দ্ৰেপি, আনন্দ. পরিযাযেনাতি কারণেন. এত্থ চ কাযিকচেতসিকৰসেন দ্ৰে ৰেদিতব্বা. সুখাদিৰসেন তিস্সো, ইন্দ্রিযৰসেন সুখিন্দ্রিযাদিকা পঞ্চ, দ্ৰারৰসেন চক্খুসম্ফস্সজাদিকা ছ, উপৰিচারৰসেন ‘‘চক্খুনা রূপং দিস্ৰা সোমনস্সট্ঠানিযং রূপং উপৰিচরতী’’তিআদিকা অট্ঠারস, ছ গেহস্সিতানি সোমনস্সানি, ছ নেক্খম্মসিতানি সোমনস্সানি, ছ গেহস্সিতানি দোমনস্সানি, ছ নেক্খম্মসিতানি দোমনস্সানি, ছ গেহস্সিতা উপেক্খা, ছ নেক্খম্মসিতাতি এৰং ছত্তিংস, তা অতীতে ছত্তিংস, অনাগতে ছত্তিংস, পচ্চুপ্পন্নে ছত্তিংসাতি এৰং অট্ঠৰেদনাসতং ৰেদিতব্বং.

৯০. পঞ্চ খো ইমে, আনন্দ, কামগুণাতি অযং পাটিএক্কো অনুসন্ধি. ন কেৰলম্পি দ্ৰে আদিং কত্ৰা ৰেদনা ভগৰতা পঞ্ঞত্তা, পরিযাযেন একাপি ৰেদনা কথিতা. তং দস্সেন্তো পঞ্চকঙ্গস্স থপতিনো ৰাদং উপত্থম্ভেতুং ইমং দেসনং আরভি.

অভিক্কন্ততরন্তি সুন্দরতরং. পণীততরন্তি অতপ্পকতরং. এত্থ চ চতুত্থজ্ঝানতো পট্ঠায অদুক্খমসুখা ৰেদনা, সাপি সন্তট্ঠেন পণীতট্ঠেন চ সুখন্তি ৰুত্তা. ছ গেহস্সিতানি সুখন্তি ৰুত্তানি. নিরোধো অৰেদযিতসুখৰসেন সুখং নাম জাতো. পঞ্চকামগুণৰসেন হি অট্ঠসমাপত্তিৰসেন চ উপ্পন্নং ৰেদযিতসুখং নাম. নিরোধো অৰেদযিতসুখং নাম. ইতি ৰেদযিতসুখং ৰা হোতু অৰেদযিতসুখং ৰা, তং নিদ্দুক্খভাৰসঙ্খাতেন সুখট্ঠেন একন্তসুখমেৰ জাতং.

৯১. যত্থ যত্থাতি যস্মিং যস্মিং ঠানে. সুখং উপলব্ভতীতি ৰেদযিতসুখং ৰা অৰেদযিতসুখং ৰা উপলব্ভতি. তং তং তথাগতো সুখস্মিং পঞ্ঞপেতীতি তং সব্বং তথাগতো নিদ্দুক্খভাৰং সুখস্মিংযেৰ পঞ্ঞপেতীতি. ইধ ভগৰা নিরোধসমাপত্তিং সীসং কত্ৰা নেয্যপুগ্গলৰসেন অরহত্তনিকূটেনেৰ দেসনং নিট্ঠাপেসীতি.

পপঞ্চসূদনিযা মজ্ঝিমনিকাযট্ঠকথায

বহুৰেদনীযসুত্তৰণ্ণনা নিট্ঠিতা.