৭. ৰনপত্থপরিযাযসুত্তৰণ্ণনা

১৯০. এৰং মে সুতন্তি ৰনপত্থপরিযাযং. তত্থ ৰনপত্থপরিযাযন্তি ৰনপত্থকারণং, ৰনপত্থদেসনং ৰা.

১৯১. ৰনপত্থং উপনিস্সায ৰিহরতীতি মনুস্সূপচারাতিক্কন্তং ৰনসণ্ডসেনাসনং নিস্সায সমণধম্মং করোন্তো ৰিহরতি. অনুপট্ঠিতাতিআদীসু পুব্বে অনুপট্ঠিতা সতি তং উপনিস্সায ৰিহরতোপি ন উপট্ঠাতি, পুব্বে অসমাহিতং চিত্তং ন সমাধিযতি, পুব্বে অপরিক্খীণা আসৰা ন পরিক্খযং গচ্ছন্তি, পুব্বে অননুপ্পত্তং অনুত্তরং যোগক্খেমসঙ্খাতং অরহত্তঞ্চ ন পাপুণাতীতি অত্থো. জীৰিতপরিক্খারাতি জীৰিতসম্ভারা. সমুদানেতব্বাতি সমাহরিতব্বা. কসিরেন সমুদাগচ্ছন্তীতি দুক্খেন উপ্পজ্জন্তি. রত্তিভাগং ৰা দিৰসভাগং ৰাতি রত্তিকোট্ঠাসে ৰা দিৰসকোট্ঠাসে ৰা. এত্থ চ রত্তিভাগে পটিসঞ্চিক্খমানেন ঞত্ৰা রত্তিংযেৰ পক্কমিতব্বং, রত্তিং চণ্ডৰাল়াদীনং পরিবন্ধে সতি অরুণুগ্গমনং আগমেতব্বং. দিৰসভাগে ঞত্ৰা দিৰাৰ পক্কমিতব্বং, দিৰা পরিবন্ধে সতি সূরিযত্থঙ্গমনং আগমেতব্বং.

১৯২. সঙ্খাপীতি এৰং সমণধম্মস্স অনিপ্ফজ্জনভাৰং জানিত্ৰা. অনন্তরৰারে পন সঙ্খাপীতি এৰং সমণধম্মস্স নিপ্ফজ্জনভাৰং জানিত্ৰা.

১৯৪. যাৰজীৰন্তি যাৰ জীৰিতং পৰত্ততি, তাৰ ৰত্থব্বমেৰ.

১৯৫. সো পুগ্গলোতি পদস্স নানুবন্ধিতব্বোতি ইমিনা সম্বন্ধো. অনাপুচ্ছাতি ইধ পন তং পুগ্গলং অনাপুচ্ছা পক্কমিতব্বন্তি অত্থো.

১৯৭. সঙ্খাপীতি এৰং সমণধম্মস্স অনিপ্ফজ্জনভাৰং ঞত্ৰা সো পুগ্গলো নানুবন্ধিতব্বো, তং আপুচ্ছা পক্কমিতব্বং.

১৯৮. অপি পনুজ্জমানেনাপীতি অপি নিক্কড্ঢীযমানেনাপি. এৰরূপো হি পুগ্গলো সচেপি দারুকলাপসতং ৰা উদকঘটসতং ৰা ৰালিকম্বণসতং ৰা দণ্ডং আহরাপেতি, মা ইধ ৰসীতি নিক্কড্ঢাপেতি ৰা, তং তং খমাপেত্ৰা যাৰজীৰং ৰত্থব্বমেৰাতি.

পপঞ্চসূদনিযা মজ্ঝিমনিকাযট্ঠকথায

ৰনপত্থপরিযাযসুত্তৰণ্ণনা নিট্ঠিতা.