২. সীহনাদৰগ্গো

১. চূল়সীহনাদসুত্তৰণ্ণনা

১৩৯. এৰং মে সুতন্তি চূল়সীহনাদসুত্তং. যস্মা পনস্স অত্থুপ্পত্তিকো নিক্খেপো, তস্মা তং দস্সেত্ৰা চস্স অনুপুব্বপদৰণ্ণনং করিস্সাম. কতরায পনিদং অত্থুপ্পত্তিযা নিক্খিত্তন্তি? লাভসক্কারপচ্চযা তিত্থিযপরিদেৰিতে. ভগৰতো কির ধম্মদাযাদসুত্তে ৰুত্তনযেন মহালাভসক্কারো উপ্পজ্জি. চতুপ্পমাণিকো হি অযং লোকসন্নিৰাসো, রূপপ্পমাণো রূপপ্পসন্নো, ঘোসপ্পমাণো ঘোসপ্পসন্নো, লূখপ্পমাণো লূখপ্পসন্নো, ধম্মপ্পমাণো ধম্মপ্পসন্নোতি ইমেসং পুগ্গলানং ৰসেন চতুধা ঠিতো.

তেসং ইদং নানাকরণং – কতমো চ পুগ্গলো রূপপ্পমাণো রূপপ্পসন্নো? ইধেকচ্চো পুগ্গলো আরোহং ৰা পস্সিত্ৰা পরিণাহং ৰা পস্সিত্ৰা সণ্ঠানং ৰা পস্সিত্ৰা পারিপূরিং ৰা পস্সিত্ৰা তত্থ পমাণং গহেত্ৰা পসাদং জনেতি, অযং ৰুচ্চতি পুগ্গলো রূপপ্পমাণো রূপপ্পসন্নো.

কতমো চ পুগ্গলো ঘোসপ্পমাণো ঘোসপ্পসন্নো? ইধেকচ্চো পুগ্গলো পরৰণ্ণনায পরথোমনায পরপসংসনায পরৰণ্ণহারিকায, তত্থ পমাণং গহেত্ৰা পসাদং জনেতি, অযং ৰুচ্চতি পুগ্গলো ঘোসপ্পমাণো ঘোসপ্পসন্নো.

কতমো চ পুগ্গলো লূখপ্পমাণো লূখপ্পসন্নো? ইধেকচ্চো পুগ্গলো চীৰরলূখং ৰা পস্সিত্ৰা পত্তলূখং ৰা পস্সিত্ৰা, সেনাসনলূখং ৰা পস্সিত্ৰা ৰিৰিধং ৰা দুক্করকারিকং পস্সিত্ৰা তত্থ পমাণং গহেত্ৰা পসাদং জনেতি, অযং ৰুচ্চতি পুগ্গলো লূখপ্পমাণো লূখপ্পসন্নো.

কতমো চ পুগ্গলো ধম্মপ্পমাণো ধম্মপ্পসন্নো? ইধেকচ্চো পুগ্গলো সীলং ৰা পস্সিত্ৰা সমাধিং ৰা পস্সিত্ৰা পঞ্ঞং ৰা পস্সিত্ৰা তত্থ পমাণং গহেত্ৰা পসাদং জনেতি, অযং ৰুচ্চতি পুগ্গলো ধম্মপ্পমাণো ধম্মপ্পসন্নোতি.

ইমেসু চতূসু পুগ্গলেসু রূপপ্পমাণোপি ভগৰতো আরোহপরিণাহসণ্ঠানপারিপূরিৰণ্ণপোক্খরতং, অসীতিঅনুব্যঞ্জনপ্পটিমণ্ডিতত্তা নানারতনৰিচিত্তমিৰ সুৰণ্ণমহাপটং, দ্ৰত্তিংসমহাপুরিসলক্খণসমাকিণ্ণতায তারাগণসমুজ্জলং ৰিয গগনতলং সব্বফালিফুল্লং ৰিয চ যোজনসতুব্বেধং পারিচ্ছত্তকং অট্ঠারসরতনুব্বেধং ব্যামপ্পভাপরিক্খেপং সস্সিরিকং অনোপমসরীরং দিস্ৰা সম্মাসম্বুদ্ধেযেৰ পসীদতি.

ঘোসপ্পমাণোপি, ভগৰতা কপ্পসতসহস্সাধিকানি চত্তারি অসঙ্খ্যেয্যানি দস পারমিযো দস উপপারমিযো দস পরমত্থপারমিযো পূরিতা অঙ্গপরিচ্চাগো পুত্তদারপরিচ্চাগো, রজ্জপরিচ্চাগো অত্তপরিচ্চাগো নযনপরিচ্চাগো চ কতোতিআদিনা নযেন পৰত্তং ঘোসং সুত্ৰা সম্মাসম্বুদ্ধেযেৰ পসীদতি.

লূখপ্পমাণোপি ভগৰতো চীৰরলূখং দিস্ৰা ‘‘সচে ভগৰা অগারং অজ্ঝাৰসিস্স, কাসিকৰত্থমেৰ অধারযিস্স. পব্বজিত্ৰা পনানেন সাণপংসুকূলচীৰরেন সন্তুস্সমানেন ভারিযং কত’’ন্তি সম্মাসম্বুদ্ধেযেৰ পসীদতি. পত্তলূখম্পি দিস্ৰা – ‘‘ইমিনা অগারং অজ্ঝাৰসন্তেন রত্তৰরসুৰণ্ণভাজনেসু চক্কৰত্তিভোজনারহং সুগন্ধসালিভোজনং পরিভুত্তং, পব্বজিত্ৰা পন পাসাণমযং পত্তং আদায উচ্চনীচকুলদ্ৰারেসু সপদানং পিণ্ডায চরিত্ৰা লদ্ধপিণ্ডিযালোপেন সন্তুস্সমানো ভারিযং করোতী’’তি সম্মাসম্বুদ্ধেযেৰ পসীদতি. সেনাসনলূখং দিস্ৰাপি – ‘‘অযং অগারং অজ্ঝাৰসন্তো তিণ্ণং উতূনং অনুচ্ছৰিকেসু তীসু পাসাদেসু তিৰিধনাটকপরিৰারো দিব্বসম্পত্তিং ৰিয রজ্জসিরিং অনুভৰিত্ৰা ইদানি পব্বজ্জূপগতো রুক্খমূলসেনাসনাদীসু দারুফলকসিলাপট্টপীঠমঞ্চকাদীহি সন্তুস্সমানো ভারিযং করোতী’’তি সম্মাসম্বুদ্ধেযেৰ পসীদতি. দুক্করকারিকমস্স দিস্ৰাপি – ‘‘ছব্বস্সানি নাম মুগ্গযূসকুলত্থযূসহরেণুযূসাদীনং পসটমত্তেন যাপেস্সতি, অপ্পাণকং ঝানং ঝাযিস্সতি, সরীরে চ জীৰিতে চ অনপেক্খো ৰিহরিস্সতি, অহো দুক্করকারকো ভগৰা’’তি সম্মাসম্বুদ্ধেযেৰ পসীদতি.

ধম্মপ্পমাণোপি ভগৰতো সীলগুণং সমাধিগুণং পঞ্ঞাগুণং ঝানৰিমোক্খসমাধিসমাপত্তিসম্পদং অভিঞ্ঞাপারিপূরিং যমকপাটিহারিযং দেৰোরোহণং পাথিকপুত্তদমনাদীনি চ অনেকানি অচ্ছরিযানি দিস্ৰা সম্মাসম্বুদ্ধেযেৰ পসীদতি, তে এৰং পসন্না ভগৰতো মহন্তং লাভসক্কারং অভিহরন্তি. তিত্থিযানং পন বাৰেরুজাতকে কাকস্স ৰিয লাভসক্কারো পরিহাযিত্থ. যথাহ –

‘‘অদস্সনেন মোরস্স, সিখিনো মঞ্জুভাণিনো;

কাকং তত্থ অপূজেসুং, মংসেন চ ফলেন চ.

যদা চ সরসম্পন্নো, মোরো বাৰেরুমাগমা;

অথ লাভো চ সক্কারো, ৰাযসস্স অহাযথ.

যাৰ নুপ্পজ্জতি বুদ্ধো, ধম্মরাজা পভঙ্করো;

তাৰ অঞ্ঞে অপূজেসুং, পুথূ সমণব্রাহ্মণে.

যদা চ সরসম্পন্নো, বুদ্ধো ধম্মমদেসযি;

অথ লাভো চ সক্কারো, তিত্থিযানং অহাযথা’’তি. (জা. ১.৪.১৫৩-১৫৬);

তে এৰং পহীনলাভসক্কারা রত্তিং একদ্ৰঙ্গুলমত্তং ওভাসেত্ৰাপি সূরিযুগ্গমনে খজ্জোপনকা ৰিয হতপ্পভা অহেসুং.

যথা হি খজ্জোপনকা, কাল়পক্খম্হি রত্তিযা;

নিদস্সযন্তি ওভাসং, এতেসং ৰিসযো হি সো.

যদা চ রস্মিসম্পন্নো, অব্ভুদেতি পভঙ্করো;

অথ খজ্জুপসঙ্ঘানং, পভা অন্তরধাযতি.

এৰং খজ্জুপসদিসা, তিত্থিযাপি পুথূ ইধ;

কাল়পক্খূপমে লোকে, দীপযন্তি সকং গুণং.

যদা চ বুদ্ধো লোকস্মিং, উদেতি অমিতপ্পভো;

নিপ্পভা তিত্থিযা হোন্তি, সূরিযে খজ্জুপকা যথাতি.

তে এৰং নিপ্পভা হুত্ৰা কচ্ছুপিল়কাদীহি কিণ্ণসরীরা পরমপারিজুঞ্ঞপত্তা যেন বুদ্ধো যেন ধম্মো যেন সঙ্ঘো যেন চ মহাজনস্স সন্নিপাতো, তেন তেন গন্ত্ৰা অন্তরৰীথিযম্পি সিঙ্ঘাটকেপি চতুক্কেপি সভাযম্পি ঠত্ৰা পরিদেৰন্তি –

‘‘কিং ভো সমণোযেৰ গোতমো সমণো, মযং অস্সমণা; সমণস্সেৰ গোতমস্স সাৰকা সমণা, অম্হাকং সাৰকা অস্সমণা? সমণস্সেৰ গোতমস্স সাৰকানঞ্চস্স দিন্নং মহপ্ফলং, ন অম্হাকং, সাৰকানঞ্চ নো দিন্নং মহপ্ফলং? ননু সমণোপি গোতমো সমণো, মযম্পি সমণা. সমণস্সপি গোতমস্স সাৰকা সমণা, অম্হাকম্পি সাৰকা সমণা. সমণস্সপি গোতমস্স সাৰকানঞ্চস্স দিন্নং মহপ্ফলং, অম্হাকম্পি সাৰকানঞ্চ নো দিন্নং মহপ্ফলঞ্চেৰ? সমণস্সপি গোতমস্স সাৰকানঞ্চস্স দেথ করোথ, অম্হাকম্পি সাৰকানঞ্চ নো দেথ সক্করোথ? ননু সমণো গোতমো পুরিমানি দিৰসানি উপ্পন্নো, মযং পন লোকে উপ্পজ্জমানেযেৰ উপ্পন্না’’তি.

এৰং নানপ্পকারং ৰিরৰন্তি. অথ ভিক্খূ ভিক্খুনিযো উপাসকা উপাসিকাযোতি চতস্সো পরিসা তেসং সদ্দং সুত্ৰা ভগৰতো আরোচেসুং ‘‘তিত্থিযা ভন্তে ইদঞ্চিদঞ্চ কথেন্তী’’তি. তং সুত্ৰা ভগৰা – ‘‘মা তুম্হে, ভিক্খৰে, তিত্থিযানং ৰচনেন ‘অঞ্ঞত্র সমণো অত্থী’তি সঞ্ঞিনো অহুৰত্থা’’তি ৰত্ৰা অঞ্ঞতিত্থিযেসু সমণভাৰং পটিসেধেন্তো ইধেৰ চ অনুজানন্তো ইমিস্সা অত্থুপ্পত্তিযা ইধেৰ, ভিক্খৰে, সমণোতি ইদং সুত্তং অভাসি.

তত্থ ইধেৰাতি ইমস্মিংযেৰ সাসনে. অযং পন নিযমো সেসপদেসুপি ৰেদিতব্বো. দুতিযাদযোপি হি সমণা ইধেৰ, ন অঞ্ঞত্থ. সমণোতি সোতাপন্নো. তেনেৰাহ – ‘‘কতমো চ, ভিক্খৰে, পঠমো সমণো? ইধ, ভিক্খৰে, ভিক্খু তিণ্ণং সংযোজনানং পরিক্খযা সোতাপন্নো হোতি অৰিনিপাতধম্মো নিযতো সম্বোধিপরাযণো, অযং, ভিক্খৰে, পঠমো সমণো’’তি (অ. নি. ৪.২৪১).

দুতিযোতি সকদাগামী. তেনেৰাহ – ‘‘কতমো চ? ভিক্খৰে, দুতিযো সমণো. ইধ, ভিক্খৰে, ভিক্খু তিণ্ণং সংযোজনানং পরিক্খযা রাগদোসমোহানং তনুত্তা সকদাগামী হোতি, সকিদেৰ ইমং লোকং আগন্ত্ৰা দুক্খস্সন্তং করোতি. অযং, ভিক্খৰে, দুতিযো সমণো’’তি.

ততিযোতি অনাগামী. তেনেৰাহ – ‘‘কতমো চ, ভিক্খৰে, ততিযো সমণো? ইধ, ভিক্খৰে, ভিক্খু পঞ্চন্নং ওরম্ভাগিযানং সংযোজনানং পরিক্খযা ওপপাতিকো হোতি তত্থ পরিনিব্বাযী অনাৰত্তিধম্মো তস্মা লোকা. অযং, ভিক্খৰে, ততিযো সমণো’’তি.

চতুত্থোতি অরহা. তেনেৰাহ – ‘‘কতমো চ, ভিক্খৰে, চতুত্থো সমণো? ইধ, ভিক্খৰে, ভিক্খু আসৰানং খযা অনাসৰং চেতোৰিমুত্তিং পঞ্ঞাৰিমুত্তিং দিট্ঠেৰ ধম্মে সযং অভিঞ্ঞা সচ্ছিকত্ৰা উপসম্পজ্জ ৰিহরতি. অযং, ভিক্খৰে, চতুত্থো সমণো’’তি (অ. নি. ৪.২৪১). ইতি ইমস্মিং ঠানে চত্তারো ফলট্ঠকসমণাৰ অধিপ্পেতা.

সুঞ্ঞাতি রিত্তা তুচ্ছা. পরপ্পৰাদাতি চত্তারো সস্সতৰাদা, চত্তারো একচ্চসস্সতিকা, চত্তারো অন্তানন্তিকা, চত্তারো অমরাৰিক্খেপিকা, দ্ৰে অধিচ্চসমুপ্পন্নিকা, সোল়স সঞ্ঞীৰাদা, অট্ঠ অসঞ্ঞীৰাদা, অট্ঠ নেৰসঞ্ঞীনাসঞ্ঞীৰাদা, সত্ত উচ্ছেদৰাদা, পঞ্চ দিট্ঠধম্মনিব্বানৰাদাতি ইমে সব্বেপি ব্রহ্মজালে আগতা দ্ৰাসট্ঠি দিট্ঠিযো. ইতো বাহিরানং পরেসং ৰাদা পরপ্পৰাদা নাম. তে সব্বেপি ইমেহি চতূহি ফলট্ঠকসমণেহি সুঞ্ঞা, ন হি তে এত্থ সন্তি. ন কেৰলঞ্চ এতেহেৰ সুঞ্ঞা, চতূহি পন মগ্গট্ঠকসমণেহিপি চতুন্নং মগ্গানং অত্থায আরদ্ধৰিপস্সকেহিপীতি দ্ৰাদসহিপি সমণেহি সুঞ্ঞা এৰ. ইমমেৰ অত্থং সন্ধায ভগৰতা মহাপরিনিব্বানে ৰুত্তং –

‘‘একূনতিংসো ৰযসা সুভদ্দ,

যং পব্বজিং কিং কুসলানুএসী;

ৰস্সানি পঞ্ঞাস সমাধিকানি,

যতো অহং পব্বজিতো সুভদ্দ;

ঞাযস্স ধম্মস্স পদেসৰত্তী,

ইতো বহিদ্ধা সমণোপি নত্থি.

‘‘দুতিযোপি সমণো নত্থি, ততিযোপি সমণো নত্থি, চতুত্থোপি সমণো নত্থি. সুঞ্ঞা পরপ্পৰাদা সমণেভি অঞ্ঞেহী’’তি (দী. নি. ২.২১৪).

এত্থ হি পদেসৰত্তীতি আরদ্ধৰিপস্সকো অধিপ্পেতো. তস্মা সোতাপত্তিমগ্গস্স আরদ্ধৰিপস্সকং মগ্গট্ঠং ফলট্ঠন্তি তযোপি একতো কত্ৰা সমণোপি নত্থীতি আহ. সকদাগামিমগ্গস্স আরদ্ধৰিপস্সকং মগ্গট্ঠং ফলট্ঠন্তি তযোপি একতো কত্ৰা দুতিযোপি সমণো নত্থীতি আহ. ইতরেসুপি দ্ৰীসু এসেৰ নযো.

কস্মা পনেতে অঞ্ঞত্থ নত্থীতি? অখেত্ততায. যথা হি ন আরগ্গে সাসপো তিট্ঠতি, ন উদকপিট্ঠে অগ্গি জলতি, ন পিট্ঠিপাসাণে বীজানি রুহন্তি, এৰমেৰ বাহিরেসু তিত্থাযতনেসু ন ইমে সমণা উপ্পজ্জন্তি, ইমস্মিংযেৰ পন সাসনে উপ্পজ্জন্তি. কস্মা? খেত্ততায. তেসং অখেত্ততা চ খেত্ততা চ অরিযমগ্গস্স অভাৰতো চ ভাৰতো চ ৰেদিতব্বা. তেনাহ ভগৰা –

‘‘যস্মিং খো, সুভদ্দ, ধম্মৰিনযে অরিযো অট্ঠঙ্গিকো মগ্গো ন উপলব্ভতি, সমণোপি তত্থ ন উপলব্ভতি, দুতিযোপি তত্থ সমণো ন উপলব্ভতি, ততিযোপি তত্থ সমণো ন উপলব্ভতি, চতুত্থোপি তত্থ সমণো ন উপলব্ভতি. যস্মিঞ্চ খো, সুভদ্দ, ধম্মৰিনযে অরিযো অট্ঠঙ্গিকো মগ্গো উপলব্ভতি, সমণোপি তত্থ উপলব্ভতি, দুতিযোপি তত্থ…পে…. চতুত্থোপি তত্থ সমণো উপলব্ভতি. ইমস্মিং খো, সুভদ্দ, ধম্মৰিনযে অরিযো অট্ঠঙ্গিকো মগ্গো উপলব্ভতি, ইধেৰ, সুভদ্দ, সমণো, ইধ দুতিযো সমণো, ইধ ততিযো সমণো, ইধ চতুত্থো সমণো, সুঞ্ঞা পরপ্পৰাদা সমণেভি অঞ্ঞেহী’’তি (দী. নি. ২.২১৪).

এৰং যস্মা তিত্থাযতনং অখেত্তং, সাসনং খেত্তং, তস্মা যথা সুরত্তহত্থপাদো সূরকেসরকো সীহো মিগরাজা ন সুসানে ৰা সঙ্কারকূটে ৰা পটিৰসতি, তিযোজনসহস্সৰিত্থতং পন হিমৰন্তং অজ্ঝোগাহেত্ৰা মণিগুহাযংযেৰ পটিৰসতি. যথা চ ছদ্দন্তো নাগরাজা ন গোচরিযহত্থিকুলাদীসু নৰসু নাগকুলেসু উপ্পজ্জতি, ছদ্দন্তকুলেযেৰ উপ্পজ্জতি. যথা চ ৰলাহকো অস্সরাজা ন গদ্রভকুলে ৰা ঘোটককুলে ৰা উপ্পজ্জতি, সিন্ধুযা তীরে পন সিন্ধৰকুলেযেৰ উপ্পজ্জতি. যথা চ সব্বকামদদং মনোহরং মণিরতনং ন সঙ্কারকূটে ৰা পংসুপব্বতাদীসু ৰা উপ্পজ্জতি, ৰেপুল্লপব্বতব্ভন্তরেযেৰ উপ্পজ্জতি. যথা চ তিমিরপিঙ্গলো মচ্ছরাজা ন খুদ্দকপোক্খরণীসু উপ্পজ্জতি, চতুরাসীতিযোজনসহস্সগম্ভীরে মহাসমুদ্দেযেৰ উপ্পজ্জতি. যথা চ দিযড্ঢযোজনসতিকো সুপণ্ণরাজা ন গামদ্ৰারে এরণ্ডৰনাদীসু পটিৰসতি, মহাসমুদ্দং পন অজ্ঝোগাহেত্ৰা সিম্বলিদহৰনেযেৰ পটিৰসতি. যথা চ ধতরট্ঠো সুৰণ্ণহংসো ন গামদ্ৰারে আৰাটকাদীসু পটিৰসতি, নৰুতিহংসসহস্সপরিৰারো হুত্ৰা চিত্তকূটপব্বতেযেৰ পটিৰসতি. যথা চ চতুদ্দীপিস্সরো চক্কৰত্তিরাজা ন নীচকুলে উপ্পজ্জতি, অসম্ভিন্নজাতিখত্তিযকুলেযেৰ পন উপ্পজ্জতি. এৰমেৰ ইমেসু সমণেসু একসমণোপি ন অঞ্ঞতিত্থাযতনে উপ্পজ্জতি, অরিযমগ্গপরিক্খিত্তে পন বুদ্ধসাসনেযেৰ উপ্পজ্জতি. তেনাহ ভগৰা ‘‘ইধেৰ, ভিক্খৰে, সমণো…পে… সুঞ্ঞা পরপ্পৰাদা সমণেহি সমণেভি অঞ্ঞেহী’’তি.

সম্মা সীহনাদং নদথাতি এত্থ সম্মাতি হেতুনা নযেন কারণেন. সীহনাদন্তি সেট্ঠনাদং অভীতনাদং অপ্পটিনাদং. ইমেসঞ্হি চতুন্নং সমণানং ইধেৰ অত্থিতায অযং নাদো সেট্ঠনাদো নাম হোতি উত্তমনাদো. ‘‘ইমে সমণা ইধেৰ অত্থী’’তি ৰদন্তস্স অঞ্ঞতো ভযং ৰা আসঙ্কা ৰা নত্থীতি অভীতনাদো নাম হোতি. ‘‘অম্হাকম্পি সাসনে ইমে সমণা অত্থী’’তি পূরণাদীসু একস্সাপি উট্ঠহিত্ৰা ৰত্তুং অসমত্থতায অযং নাদো অপ্পটিনাদো নাম হোতি. তেন ৰুত্তং ‘‘সীহনাদন্তি সেট্ঠনাদং অভীতনাদং অপ্পটিনাদ’’ন্তি.

১৪০. ঠানং খো পনেতং ৰিজ্জতীতি ইদং খো পন কারণং ৰিজ্জতি. যং অঞ্ঞতিত্থিযাতি যেন কারণেন অঞ্ঞতিত্থিযা. এত্থ চ তিত্থং জানিতব্বং, তিত্থকরো জানিতব্বো তিত্থিযা জানিতব্বা, তিত্থিযসাৰকা জানিতব্বা. তিত্থংনাম দ্ৰাসট্ঠি দিট্ঠিযো. এত্থ হি সত্তা তরন্তি উপ্পলৰন্তি উম্মুজ্জনিমুজ্জং করোন্তি, তস্মা তিত্থন্তি ৰুচ্চন্তি. তাসং দিট্ঠীনং উপ্পাদেতা তিত্থকরো নাম. তস্স লদ্ধিং গহেত্ৰা পব্বজিতা তিত্থিযা নাম. তেসং পচ্চযদাযকা তিত্থিযসাৰকাতি ৰেদিতব্বা. পরিব্বাজকাতি গিহিবন্ধনং পহায পব্বজ্জূপগতা. অস্সাসোতি অৰস্সযো পতিট্ঠা উপত্থম্ভো. বলন্তি থামো. যেন তুম্হেতি যেন অস্সাসেন ৰা বলেন ৰা এৰং ৰদেথ.

অত্থি খো নো, আৰুসো, তেন ভগৰতা জানতা পস্সতা অরহতা সম্মাসম্বুদ্ধেনাতি এত্থ অযং সঙ্খেপত্থো – যো সো ভগৰা সমতিংস পারমিযো পূরেত্ৰা সব্বকিলেসে ভঞ্জিত্ৰা অনুত্তরং সম্মাসম্বোধিং অভিসম্বুদ্ধো, তেন ভগৰতা তেসং তেসং সত্তানং আসযানুসযং জানতা, হত্থতলে ঠপিতং আমলকং ৰিয সব্বং ঞেয্যধম্মং পস্সতা. অপিচ পুব্বেনিৰাসাদীহি জানতা, দিব্বেন চক্খুনা পস্সতা. তীহি ৰিজ্জাহি ছহি ৰা পন অভিঞ্ঞাহি জানতা, সব্বত্থ অপ্পটিহতেন সমন্তচক্খুনা পস্সতা. সব্বধম্মজাননসমত্থায পঞ্ঞায জানতা, সব্বসত্তানং চক্খুৰিসযাতীতানি তিরোকুট্টাদিগতানি ৰাপি রূপানি অতিৰিসুদ্ধেন মংসচক্খুনা পস্সতা. অত্তহিতসাধিকায সমাধিপদট্ঠানায পটিৰেধপঞ্ঞায জানতা, পরহিতসাধিকায করুণাপদট্ঠানায দেসনাপঞ্ঞায পস্সতা. অরীনং হতত্তা পচ্চযাদীনং অরহত্তা চ অরহতা, সম্মা সামঞ্চ সচ্চানং বুদ্ধত্তা সম্মাসম্বুদ্ধেন. অন্তরাযিকধম্মে ৰা জানতা, নিয্যানিকধম্মে পস্সতা. কিলেসারীনং হতত্তা অরহতা, সম্মা সামং সব্বধম্মানং বুদ্ধত্তা সম্মাসম্বুদ্ধেনাতি, এৰং চতুৰেসারজ্জৰসেন চতূহি আকারেহি থোমিতেন চত্তারো ধম্মা অক্খাতা, যে মযং অত্তনি সম্পস্সমানা এৰং ৰদেম, ন রাজরাজমহামত্তাদীনং উপত্থম্ভং কাযবলন্তি.

সত্থরি পসাদোতি ‘‘ইতিপি সো ভগৰা’’তিআদিনা নযেন বুদ্ধগুণে অনুস্সরন্তানং উপ্পন্নপ্পসাদো. ধম্মে পসাদোতি ‘‘স্ৰাক্খাতো ভগৰতা ধম্মো’’তিআদিনা নযেন ধম্মগুণে অনুস্সরন্তানং উপ্পন্নপ্পসাদো. সীলেসু পরিপূরকারিতাতি অরিযকন্তেসু সীলেসু পরিপূরকারিতা. অরিযকন্তসীলানি নাম পঞ্চসীলানি. তানি হি ভৰন্তরগতোপি অরিযসাৰকো অত্তনো অরিযসাৰকভাৰং অজানন্তোপি ন ৰীতিক্কমতি. সচেপি হি নং কোচি ৰদেয্য – ‘‘ইমং সকলং চক্কৰত্তিরজ্জং সম্পটিচ্ছিত্ৰা খুদ্দকমক্খিকং জীৰিতা ৰোরোপেহী’’তি, অট্ঠানমেতং, যং সো তস্স ৰচনং করেয্য. এৰং অরিযানং সীলানি কন্তানি পিযানি মনাপানি. তানি সন্ধায ৰুত্তং ‘‘সীলেসু পরিপূরকারিতা’’তি.

সহধম্মিকা খো পনাতি ভিক্খু ভিক্খুনী সিক্খমানা সামণেরো সামণেরী উপাসকো উপাসিকাতি এতে সত্ত সহধম্মচারিনো. এতেসু হি ভিক্খু ভিক্খূহি সদ্ধিং সহধম্মং চরতি সমানসিক্খতায. তথা ভিক্খুনী ভিক্খুনীহি…পে… উপাসিকা উপাসিকাহি, সোতাপন্নো সোতাপন্নেহি, সকদাগামী…পে… অনাগামীহি সহধম্মং চরতি. তস্মা সব্বেপেতে সহধম্মিকাতি ৰুচ্চন্তি. অপিচেত্থ অরিযসাৰকাযেৰ অধিপ্পেতা. তেসঞ্হি ভৰন্তরেপি মগ্গদস্সনম্হি ৰিৰাদো নত্থি, তস্মা তে অচ্চন্তং একধম্মচারিতায সহধম্মিকা. ইমিনা, ‘‘সুপ্পটিপন্নো ভগৰতো সাৰকসঙ্ঘো’’তিআদিনা নযেন সঙ্ঘং অনুস্সরন্তানং উপ্পন্নপ্পসাদো কথিতো. এত্তাৰতা চত্তারি সোতাপন্নস্স অঙ্গানি কথিতানি হোন্তি.

ইমে খো নো, আৰুসোতি, আৰুসো, ইমে চত্তারো ধম্মা তেন ভগৰতা অম্হাকং অস্সাসো চেৰ বলঞ্চাতি অক্খাতা, যে মযং অত্তনি সম্পস্সমানা এৰং ৰদেম.

১৪১. যো অম্হাকং সত্থাতি ইমিনা পূরণকস্সপাদিকে ছ সত্থারো অপদিস্সন্তি. যথা পন ইদানি সাসনে আচরিযুপজ্ঝাযাদীসু ‘‘অম্হাকং আচরিযো, অম্হাকং উপজ্ঝাযো’’তি গেহসিতপেমং হোতি. এৰরূপং পেমং সন্ধায ‘‘সত্থরি পসাদো’’তি ৰদন্তি. থেরো পনাহ – ‘‘যস্মা সত্থা নাম ন একস্স, ন দ্ৰিন্নং হোতি, সদেৰকস্স লোকস্স একোৰ সত্থা, তস্মা তিত্থিযা ‘অম্হাকং সত্থা’ তি একপদেনেৰ সত্থারং ৰিসুং কত্ৰা ইমিনাৰ পদেন ৰিরুদ্ধা পরাজিতা’’তি. ধম্মে পসাদোতি ইদং পন যথা ইদানি সাসনে ‘‘অম্হাকং দীঘনিকাযো অম্হাকং মজ্ঝিমনিকাযো’’তি মমাযন্তি, এৰং অত্তনো অত্তনো পরিযত্তিধম্মে গেহসিতপেমং সন্ধায ৰদন্তি. সীলেসূতি অজসীলগোসীলমেণ্ডকসীলকুক্কুরসীলাদীসু. ইধ নো আৰুসোতি এত্থ ইধাতি পসাদং সন্ধায ৰদন্তি. কো অধিপ্পযাসোতি কো অধিকপ্পযোগো. যদিদন্তি যমিদং তুম্হাকঞ্চেৰ অম্হাকঞ্চ নানাকরণং ৰদেয্যাথ. তং কিং নাম? তুম্হাকম্পি হি চতূসু ঠানেসু পসাদো, অম্হাকম্পি. ননু এতস্মিং পসাদে তুম্হে চ অম্হে চ দ্ৰেধা ভিন্নসুৰণ্ণং ৰিয একসদিসাতি ৰাচায সমধুরা হুত্ৰা অট্ঠংসু.

অথ নেসং তং সমধুরতং ভিন্দন্তো ভগৰা এৰং ৰাদিনোতিআদিমাহ. তত্থ একা নিট্ঠাতি যা তস্স পসাদস্স পরিযোসানভূতা নিট্ঠা, কিং সা একা, উদাহু পুথূতি এৰং পুচ্ছথাতি ৰদতি. যস্মা পন তস্মিং তস্মিং সমযে নিট্ঠং অপঞ্ঞপেন্তো নাম নত্থি, ব্রাহ্মণানঞ্হি ব্রহ্মলোকো নিট্ঠা, মহাতাপসানং আভস্সরা, পরিব্বাজকানং সুভকিণ্হা, আজীৰকানং ‘‘অনন্তমানসো’’তি এৰং পরিকপ্পিতো অসঞ্ঞীভৰো. ইমস্মিং সাসনে পন অরহত্তং নিট্ঠা. সব্বেৰ চেতে অরহত্তমেৰ নিট্ঠাতি ৰদন্তি. দিট্ঠিৰসেন পন ব্রহ্মলোকাদীনি পঞ্ঞপেন্তি. তস্মা অত্তনো অত্তনো লদ্ধিৰসেন একমেৰ নিট্ঠং পঞ্ঞপেন্তি, তং দস্সেতুং ভগৰা সম্মা ব্যাকরমানাতিআদিমাহ.

ইদানি ভিক্খূনম্পি একা নিট্ঠা, তিত্থিযানম্পি একা নিট্ঠাতি দ্ৰীসু অট্টকারকেসু ৰিয ঠিতেসু ভগৰা অনুযোগৰত্তং দস্সেন্তো সা পনাৰুসো, নিট্ঠা সরাগস্স, উদাহু ৰীতরাগস্সাতিআদিমাহ. তত্থ যস্মা রাগরত্তাদীনং নিট্ঠা নাম নত্থি. যদি সিযা, সোণসিঙ্গালাদীনম্পি সিযাতি ইমং দোসং পস্সন্তানং তিত্থিযানং ‘‘ৰীতরাগস্স আৰুসো সা নিট্ঠা’’তিআদিনা নযেন ব্যাকরণং দস্সিতং.

তত্থ ৰিদ্দসুনোতি পণ্ডিতস্স. অনুরুদ্ধপটিৰিরুদ্ধস্সাতি রাগেন অনুরুদ্ধস্স কোধেন পটিৰিরুদ্ধস্স. পপঞ্চারামস্স পপঞ্চরতিনোতি এত্থ আরমন্তি এত্থাতি আরামো. পপঞ্চো আরামো অস্সাতি পপঞ্চারামো. পপঞ্চে রতি অস্সাতি পপঞ্চরতি. পপঞ্চোতি চ মত্তপমত্তাকারভাৰেন পৰত্তানং তণ্হাদিট্ঠিমানানমেতং অধিৰচনং. ইধ পন তণ্হাদিট্ঠিযোৰ অধিপ্পেতা. সরাগস্সাতিআদীসু পঞ্চসু ঠানেসু একোৰ কিলেসো আগতো. তস্স আকারতো নানত্তং ৰেদিতব্বং. সরাগস্সাতি হি ৰুত্তট্ঠানে পঞ্চকামগুণিকরাগৰসেন গহিতো. সতণ্হস্সাতি ভৰতণ্হাৰসেন. সউপাদানস্সাতি গহণৰসেন. অনুরুদ্ধপটিৰিরুদ্ধস্সাতি যুগল়ৰসেন. পপঞ্চারামস্সাতি পপঞ্চুপ্পত্তিদস্সনৰসেন. সরাগস্সাতি ৰা এত্থ অকুসলমূলৰসেন গহিতো. সতণ্হস্সাতি এত্থ তণ্হাপচ্চযা উপাদানদস্সনৰসেন. সেসং পুরিমসদিসমেৰ. থেরো পনাহ ‘‘কস্মা এৰং ৰিদ্ধংসেথ? একোযেৰ হি অযং লোভো রজ্জনৰসেন রাগোতি ৰুত্তো. তণ্হাকরণৰসেন তণ্হা. গহণট্ঠেন উপাদানং. যুগল়ৰসেন অনুরোধপটিৰিরোধো. পপঞ্চুপ্পত্তিদস্সনট্ঠেন পপঞ্চো’’তি.

১৪২. ইদানি ইমেসং কিলেসানং মূলভূতং দিট্ঠিৰাদং দস্সেন্তো দ্ৰেমা, ভিক্খৰে, দিট্ঠিযোতিআদিমাহ.

তত্থ ভৰদিট্ঠীতি সস্সতদিট্ঠি. ৰিভৰদিট্ঠীতি উচ্ছেদদিট্ঠি. ভৰদিট্ঠিং অল্লীনাতি তণ্হাদিট্ঠিৰসেন সস্সতদিট্ঠিং অল্লীনা. উপগতাতি তণ্হাদিট্ঠিৰসেনেৰ উপগতা. অজ্ঝোসিতাতি তণ্হাদিট্ঠিৰসেনেৰ অনুপৰিট্ঠা. ৰিভৰদিট্ঠিযা তে পটিৰিরুদ্ধাতি তে সব্বে উচ্ছেদৰাদীহি সদ্ধিং – ‘‘তুম্হে অন্ধবালা ন জানাথ, সস্সতো অযং লোকো, নাযং লোকো উচ্ছিজ্জতী’’তি পটিৰিরুদ্ধা নিচ্চং কলহভণ্ডনপসুতা ৰিহরন্তি. দুতিযৰারেপি এসেৰ নযো.

সমুদযঞ্চাতিআদীসু দ্ৰে দিট্ঠীনং সমুদযা খণিকসমুদযো পচ্চযসমুদযো চ. খণিকসমুদযো দিট্ঠীনং নিব্বত্তি. পচ্চযসমুদযো অট্ঠ ঠানানি. সেয্যথিদং, খন্ধাপি দিট্ঠিট্ঠানং, অৰিজ্জাপি, ফস্সোপি, সঞ্ঞাপি, ৰিতক্কোপি, অযোনিসোমনসিকারোপি, পাপমিত্তোপি, পরতোঘোসোপি দিট্ঠিট্ঠানং. ‘‘খন্ধা হেতু খন্ধা পচ্চযো দিট্ঠীনং উপাদায সমুট্ঠানট্ঠেন. এৰং খন্ধাপি দিট্ঠিট্ঠানং. অৰিজ্জা… ফস্সো… সঞ্ঞা… ৰিতক্কো… অযোনিসোমনসিকারো… পাপমিত্তো… পরতোঘোসো হেতু, পরতোঘোসো পচ্চযো দিট্ঠীনং উপাদায সমুট্ঠানট্ঠেন. এৰং পরতোঘোসোপি দিট্ঠিট্ঠানং’’ (পটি. ম. ১.১২৪). অত্থঙ্গমাপি দ্ৰেযেৰ খণিকত্থঙ্গমো পচ্চযত্থঙ্গমো চ. খণিকত্থঙ্গমো নাম খযো ৰযো ভেদো পরিভেদো অনিচ্চতা অন্তরধানং. পচ্চযত্থঙ্গমো নাম সোতাপত্তিমগ্গো. সোতাপত্তিমগ্গো হি দিট্ঠিট্ঠানসমুগ্ঘাতোতি ৰুত্তো.

অস্সাদন্তি দিট্ঠিমূলকং আনিসংসং. যং সন্ধায ৰুত্তং – ‘‘যংদিট্ঠিকো সত্থা হোতি, তংদিট্ঠিকা সাৰকা হোন্তি. যংদিট্ঠিকা সত্থারং সাৰকা সক্করোন্তি, গরুং করোন্তি, মানেন্তি, পূজেন্তি, লভন্তি ততোনিদানং চীৰরপিণ্ডপাতসেনাসনগিলানপচ্চযভেসজ্জপরিক্খারং. অযং, ভিক্খৰে, দিট্ঠিযা দিট্ঠধম্মিকো আনিসংসো’’তি. আদীনৰন্তি দিট্ঠিগ্গহণমূলকং উপদ্দৰং. সো ৰগ্গুলিৰতং উক্কুটিকপ্পধানং কণ্টকাপস্সযতা পঞ্চাতপতপ্পনং সানুপপাতপতনং কেসমস্সুলুঞ্চনং অপ্পোণকং ঝানন্তিআদীনং ৰসেনং ৰেদিতব্বো. নিস্সরণন্তি দিট্ঠীনং নিস্সরণং নাম নিব্বানং. যথাভূতং নপ্পজানন্তীতি যে এতং সব্বং যথাসভাৰং ন জানন্তি. ন পরিমুচ্চন্তি দুক্খস্মাতি সকলৰট্টদুক্খতো ন পরিমুচ্চন্তি. ইমিনা এতেসং নিট্ঠা নাম নত্থীতি দস্সেতি. পরিমুচ্চন্তি দুক্খস্মাতি সকলৰট্টদুক্খতো পরিমুচ্চন্তি. ইমিনা এতেসং নিট্ঠা নাম অত্থীতি দ্ৰিন্নং অট্টকারকানং অট্টং ছিন্দন্তো ৰিয সাসনস্মিংযেৰ নিট্ঠায অত্থিতং পতিট্ঠপেতি.

১৪৩. ইদানি দিট্ঠিচ্ছেদনং দস্সেন্তো চত্তারিমানি, ভিক্খৰে, উপাদানানীতিআদিমাহ. তেসং ৰিত্থারকথা ৰিসুদ্ধিমগ্গে ৰুত্তাযেৰ.

সব্বুপাদানপরিঞ্ঞাৰাদা পটিজানমানাতি মযং সব্বেসং উপাদানানং পরিঞ্ঞং সমতিক্কমং ৰদামাতি এৰং পটিজানমানা. ন সম্মা সব্বুপাদানপরিঞ্ঞন্তি সব্বেসং উপাদানানং সমতিক্কমং সম্মা ন পঞ্ঞপেন্তি. কেচি কামুপাদানমত্তস্স পরিঞ্ঞং পঞ্ঞপেন্তি. কেচি দিট্ঠুপাদানমত্তস্স পঞ্ঞপেন্তি, কেচি সীলব্বতুপাদানস্সাপি. অত্তৰাদুপাদানস্স পন পরিঞ্ঞং পঞ্ঞপেন্তো নাম নত্থি. তেসং পন ভেদং দস্সেন্তো কামুপাদানস্স পরিঞ্ঞং পঞ্ঞপেন্তীতিআদিমাহ. তত্থ সব্বেপি কামুপাদানস্স পরিঞ্ঞং পঞ্ঞপেন্তিযেৰ, ছন্নৰুতি পাসণ্ডাপি হি ‘‘কামা খো পব্বজিতেন ন সেৰিতব্বা’’তি ৰত্থুপটিসেৰনং কামং কপ্পতীতি ন পঞ্ঞপেন্তি, অকপ্পিযমেৰ কত্ৰা পঞ্ঞপেন্তি. যে পন সেৰন্তি, তে থেয্যেন সেৰন্তি. তেন ৰুত্তং ‘‘কামুপাদানস্স পরিঞ্ঞং পঞ্ঞপেন্তী’’তি.

যস্মা ‘‘নত্থি দিন্ন’’ন্তিআদীনি গহেত্ৰা চরন্তি. ‘‘সীলেন সুদ্ধি ৰতেন সুদ্ধি, ভাৰনায সুদ্ধী’’তি গণ্হন্তি, অত্তুপলদ্ধিং ন পজহন্তি, তস্মা ন দিট্ঠুপাদানস্স, ন সীলব্বতুপাদানস্স, ন অত্তৰাদুপাদানস্স পরিঞ্ঞং পঞ্ঞপেন্তি. তং কিস্স হেতূতি তং অপঞ্ঞাপনং এতেসং কিস্স হেতু, কিং কারণা? ইমানি হি তে ভোন্তোতি যস্মা তে ভোন্তো ইমানি তীণি কারণানি যথাসভাৰতো ন জানন্তীতি অত্থো. যে পনেত্থ দ্ৰিন্নং পরিঞ্ঞানং পঞ্ঞাপনকারণং দিট্ঠিঞ্চেৰ সীলব্বতঞ্চ ‘‘এতং পহাতব্ব’’ন্তি যথাসভাৰতো জানন্তি. তে সন্ধায পরতো দ্ৰে ৰারা ৰুত্তা. তত্থ যে ‘‘অত্থি দিন্ন’’ন্তিআদীনি গণ্হন্তি, তে দিট্ঠুপাদানস্স পরিঞ্ঞং পঞ্ঞপেন্তি. যে পন ‘‘ন সীলেন সুদ্ধি, ন ৰতেন সুদ্ধি, ন ভাৰনায সুদ্ধী’’তি গণ্হন্তি, তে সীলব্বতুপাদানস্স পরিঞ্ঞং পঞ্ঞপেন্তি. অত্তৰাদুপাদানস্স পরিঞ্ঞং পন একোপি পঞ্ঞপেতুং ন সক্কোতি. অট্ঠসমাপত্তিলাভিনোপি হি চন্দিমসূরিযে পাণিনা পরিমজ্জিত্ৰা চরমানাপি চ তিত্থিযা তিস্সো পরিঞ্ঞা পঞ্ঞপেন্তি. অত্তৰাদং মুঞ্চিতুং ন সক্কোন্তি. তস্মা পুনপ্পুনং ৰট্টস্মিংযেৰ পতন্তি. পথৰিজিগুচ্ছনসসকো ৰিয হি এতে.

তত্থাযং অত্থসল্লাপিকা উপমা – পথৰী কির সসকং আহ – ‘‘ভো সসকা’’তি. সসকো আহ – ‘‘কো এসো’’তি. ‘‘কস্মা মমেৰ উপরি সব্বইরিযাপথে কপ্পেন্তো উচ্চারপস্সাৰং করোন্তো মং ন জানাসী’’তি. ‘‘সুট্ঠু তযা অহং দিট্ঠো, মযা অক্কন্তট্ঠানম্পি অঙ্গুলগ্গেহি ফুট্ঠট্ঠানং ৰিয হোতি, ৰিস্সট্ঠউদকং অপ্পমত্তকং, করীসং কতকফলমত্তং. হত্থিঅস্সাদীহি পন অক্কন্তট্ঠানম্পি মহন্তং, পস্সাৰোপি নেসং ঘটমত্তো হোতি, উচ্চারোপি পচ্ছিমত্তো হোতি, অলং ময্হং তযা’’তি উপ্পতিত্ৰা অঞ্ঞস্মিং ঠানে পতিতো. ততো নং পথৰী আহ – ‘‘অরে দূরং গতোপি ননু ময্হং উপরিযেৰ পতিতোসী’’তি. সো পুন তং জিগুচ্ছন্তো উপ্পতিত্ৰা অঞ্ঞত্থ পতিতো, এৰং ৰস্সসহস্সম্পি উপ্পতিত্ৰা পতমানো সসকো পথৰিং মুঞ্চিতুং ন সক্কোতি. এৰমেৰং তিত্থিযা সব্বূপাদানপরিঞ্ঞং পঞ্ঞপেন্তোপি কামুপাদানাদীনং তিণ্ণংযেৰ সমতিক্কমং পঞ্ঞপেন্তি. অত্তৰাদং পন মুঞ্চিতুং ন সক্কোন্তি, অসক্কোন্তা পুনপ্পুনং ৰট্টস্মিংযেৰ পতন্তীতি.

এৰং যং তিত্থিযা সমতিক্কমিতুং ন সক্কোন্তি, তস্স ৰসেন দিট্ঠিচ্ছেদৰাদং ৰত্ৰা ইদানি পসাদপচ্ছেদৰাদং দস্সেন্তো এৰরূপে খো, ভিক্খৰে, ধম্মৰিনযেতিআদিমাহ. তত্থ ধম্মৰিনযেতি ধম্মে চেৰ ৰিনযে চ, উভযেনপি অনিয্যানিকসাসনং দস্সেতি. ‘‘যো সত্থরি পসাদো সো ন সম্মগ্গতো’’তি অনিয্যানিকসাসনম্হি হি সত্থা কালং কত্ৰা সীহোপি হোতি, ব্যগ্ঘোপি হোতি, দীপিপি অচ্ছোপি তরচ্ছোপি. সাৰকা পনস্স মিগাপি সূকরাপি পসদাপি হোন্তি, সো ‘‘ইমে ময্হং পুব্বে উপট্ঠাকা পচ্চযদাযকা’’তি খন্তিং ৰা মেত্তং ৰা অনুদ্দযং ৰা অকত্ৰা তেসং উপরি পতিত্ৰা লোহিতং পিৰতি, থূলথূলমংসানিপি খাদতি. সত্থা ৰা পন বিল়ারো হোতি, সাৰকা কুক্কুটা ৰা মূসিকা ৰা. অথ নে ৰুত্তনযেনেৰ অনুকম্পং অকত্ৰা খাদতি. অথ ৰা সত্থা নিরযপালো হোতি, সাৰকা নেরযিকসত্তা. সো ‘‘ইমে ময্হং পুব্বে উপট্ঠাকা পচ্চযদাযকা’’তি অনুকম্পং অকত্ৰা ৰিৰিধা কম্মকারণা করোতি, আদিত্তেপি রথে যোজেতি, অঙ্গারপব্বতম্পি আরোপেতি, লোহকুম্ভিযম্পি খিপতি, অনেকেহিপি দুক্খধম্মেহি সম্পযোজেতি. সাৰকা ৰা পন কালং কত্ৰা সীহাদযো হোন্তি, সত্থা মিগাদীসু অঞ্ঞতরো. তে ‘‘ইমং মযং পুব্বে চতূহি পচ্চযেহি উপট্ঠহিম্হা, সত্থা নো অয’’ন্তি তস্মিং খন্তিং ৰা মেত্তং ৰা অনুদ্দযং ৰা অকত্ৰা ৰুত্তনযেনেৰ অনযব্যসনং পাপেন্তি. এৰং অনিয্যানিকসাসনে যো সত্থরি পসাদো, সো ন সম্মগ্গতো হোতি, কঞ্চি কালং গন্ত্ৰাপি পচ্ছা ৰিনস্সতিযেৰ.

যো ধম্মে পসাদোতি অনিয্যানিকসাসনস্মিঞ্হি ধম্মে পসাদো নাম, উগ্গহিতপরিযাপুট – ধারিতৰাচিত্তমত্তকে তন্তিধম্মে পসাদো হোতি, ৰট্টমোক্খো পনেত্থ নত্থি. তস্মা যো এত্থ পসাদো, সো পুনপ্পুনং ৰট্টমেৰ গম্ভীরং করোতীতি সাসনস্মিং অসম্মগ্গতো অসভাৰতো অক্খাযতি.

যা সীলেসু পরিপূরকারিতাতি যাপি চ অনিয্যানিকসাসনে অজসীলাদীনং ৰসেন পরিপূরকারিতা, সাপি যস্মা ৰট্টমোক্খং ভৰনিস্সরণং ন সম্পাপেতি, সম্পজ্জমানা পন তিরচ্ছানযোনিং আৰহতি, ৰিপচ্চমানা নিরযং, তস্মা সা ন সম্মগ্গতা অক্খাযতি. যা সহধম্মিকেসূতি অনিয্যানিকসাসনস্মিঞ্হি যে সহধম্মিকা, তেসু যস্মা একচ্চে কালং কত্ৰা সীহাদযোপি হোন্তি, একচ্চে মিগাদযো, তত্থ সীহাদিভূতা ‘‘ইমে অম্হাকং সহধম্মিকা অহেসু’’ন্তি মিগাদিভূতেসু খন্তিআদীনি অকত্ৰা পুব্বে ৰুত্তনযেনেৰ নেসং মহাদুক্খং উপ্পাদেন্তি. তস্মা এত্থ সহধম্মিকেসু পিযমনাপতাপি অসম্মগ্গতা অক্খাযতি.

ইদং পন সব্বম্পি কারণভেদং একতো কত্ৰা দস্সেন্তো ভগৰা তং কিস্স হেতু? এৰঞ্হেতং, ভিক্খৰে, হোতীতিআদিমাহ. তত্রাযং সংখেপত্থো – এৰঞ্হেতং, ভিক্খৰে, হোতি, যং মযা ৰুত্তং ‘‘যো সত্থরি পসাদো সো ন সম্মগ্গতো অক্খাযতী’’তিআদি, তং এৰমেৰ হোতি. কস্মা? যস্মা তে পসাদাদযো দুরক্খাতে ধম্মৰিনযে …পে… অসম্মাসম্বুদ্ধপ্পৰেদিতেতি, এত্থ হি যথা তন্তি কারণত্থে নিপাতো. তত্থ দুরক্খাতেতি দুক্কথিতে, দুক্খথিতত্তাযেৰ দুপ্পৰেদিতে. সো পনেস যস্মা মগ্গফলত্থায ন নিয্যাতি, তস্মা অনিয্যানিকো. রাগাদীনং উপসমায অসংৰত্তনতো অনুপসমসংৰত্তনিকো. ন সম্মাসম্বুদ্ধেন সব্বঞ্ঞুনা পৰেদিতোতি অসম্মাসম্বুদ্ধপ্পৰেদিতো. তস্মিং অনিয্যানিকে অনুপসমসংৰত্তনিকে অসম্মাসম্বুদ্ধপ্পৰেদিতে. এত্তাৰতা ভগৰা তিত্থিযেসু পসাদো সুরাপীতসিঙ্গালে পসাদো ৰিয নিরত্থকোতি দস্সেতি.

একো কির কাল়সিঙ্গালো রত্তিং নগরং পৰিট্ঠো সুরাজল্লিকং খাদিত্ৰা পুন্নাগৰনে নিপজ্জিত্ৰা নিদ্দাযন্তো সূরিযুগ্গমনে পবুজ্ঝিত্ৰা চিন্তেসি ‘‘ইমস্মিং কালে ন সক্কা গন্তুং, বহূ অম্হাকং ৰেরিনো, একং ৰঞ্চেতুং ৰট্টতী’’তি. সো একং ব্রাহ্মণং গচ্ছন্তং দিস্ৰা ইমং ৰঞ্চেস্সামীতি ‘‘অয্য ব্রাহ্মণা’’তি আহ. কো এসো ব্রাহ্মণং পক্কোসতীতি. ‘‘অহং, সামী, ইতো তাৰ এহীতি. কিং ভোতি? মং বহিগামং নেহি, অহং তে দ্ৰে কহাপণসতানি দস্সামীতি. সোপি নযিস্সামীতি তং পাদেসু গণ্হি. অরে বাল ব্রাহ্মণ, ন ময্হং কহাপণা ছড্ডিতকা অত্থি, দুল্লভা কহাপণা, সাধুকং মং গণ্হাহীতি. কথং ভো গণ্হামীতি? উত্তরাসঙ্গেন গণ্ঠিকং কত্ৰা অংসে লগ্গেত্ৰা গণ্হাহীতি. ব্রাহ্মণো তং তথা গহেত্ৰা দক্খিণদ্ৰারসমীপট্ঠানং গন্ত্ৰা এত্থ ওতারেমীতি পুচ্ছি. কতরট্ঠানং নাম এতন্তি? মহাদ্ৰারং এতন্তি. অরে বাল, ব্রাহ্মণ, কিং তৰ ঞাতকা অন্তরদ্ৰারে কহাপণং ঠপেন্তি, পরতো মং হরা’’তি. সো পুনপ্পুনং থোকং থোকং গন্ত্ৰা ‘‘এত্থ ওতারেমি এত্থ ওতারেমী’’তি পুচ্ছিত্ৰা তেন তজ্জিতো খেমট্ঠানং গন্ত্ৰা তত্থ ওতারেহীতি ৰুত্তো ওতারেত্ৰা সাটকং গণ্হি. কাল়সিঙ্গালো আহ ‘‘অহং তে দ্ৰে কহাপণসতানি দস্সামীতি অৰোচং. ময্হং পন কহাপণা বহূ, ন দ্ৰে কহাপণসতানেৰ, যাৰ অহং কহাপণে আহরামি, তাৰ ত্ৰং সূরিযং ওলোকেন্তো তিট্ঠা’’তি ৰত্ৰা থোকং গন্ত্ৰা নিৰত্তেত্ৰা পুন ব্রাহ্মণং আহ ‘‘অয্য ব্রাহ্মণ মা ইতো ওলোকেহি, সূরিযমেৰ ওলোকেন্তো তিট্ঠা’’তি. এৰঞ্চ পন ৰত্ৰা কেতকৰনং পৰিসিত্ৰা যথারুচিং পক্কন্তো. ব্রাহ্মণস্সপি সূরিযং ওলোকেন্তস্সেৰ নলাটতো চেৰ কচ্ছেহি চ সেদা মুচ্চিংসু. অথ নং রুক্খদেৰতা আহ –

‘‘সদ্দহাসি সিঙ্গালস্স, সুরাপীতস্স ব্রাহ্মণ;

সিপ্পিকানং সতং নত্থি, কুতো কংসসতা দুৰে’’তি. (জা. ১.১.১১৩);

এৰং যথা কাল়সিঙ্গালে পসাদো নিরত্থকো, এৰং তিত্থিযেসুপীতি.

১৪৪. অনিয্যানিকসাসনে পসাদস্স নিরত্থকভাৰং দস্সেত্ৰা নিয্যানিকসাসনে তস্স সাত্থকতং দস্সেতুং তথাগতো চ খো, ভিক্খৰেতিআদিমাহ. তত্থ কামুপাদানস্স পরিঞ্ঞং পঞ্ঞপেতীতি অরহত্তমগ্গেন কামুপাদানস্স পহানপরিঞ্ঞং সমতিক্কমং পঞ্ঞপেতি, ইতরেসং তিণ্ণং উপাদানানং সোতাপত্তিমগ্গেন পরিঞ্ঞং পঞ্ঞপেতি. এৰরূপে খো, ভিক্খৰে, ধম্মৰিনযেতি, ভিক্খৰে, এৰরূপে ধম্মে চ ৰিনযে চ. উভযেনপি নিয্যানিকসাসনং দস্সেতি. সত্থরি পসাদোতি এৰরূপে সাসনে যো সত্থরি পসাদো, সো সম্মগ্গতো অক্খাযতি, ভৰদুক্খনিস্সরণায সংৰত্ততি.

তত্রিমানি ৰত্থূনি – ভগৰা কির ৰেদিযকপব্বতে ইন্দসালগুহাযং পটিৰসতি. অথেকো উলূকসকুণো ভগৰতি গামং পিণ্ডায পৰিসন্তে উপড্ঢমগ্গং অনুগচ্ছতি, নিক্খমন্তে উপড্ঢমগ্গং পচ্চুগ্গমনং করোতি. সো একদিৰসং সম্মাসম্বুদ্ধং সাযন্হসমযে ভিক্খুসঙ্ঘপরিৰুতং নিসিন্নং পব্বতা ওরুয্হ ৰন্দিত্ৰা পক্খে পণামেত্ৰা অঞ্জলিং পগ্গয্হ সীসং হেট্ঠা কত্ৰা দসবলং নমস্সমানো অট্ঠাসি. ভগৰা তং ওলোকেত্ৰা সিতং পাত্ৰাকাসি. আনন্দত্থেরো ‘‘কো নু খো, ভন্তে, হেতু কো পচ্চযো সিতস্স পাতুকম্মাযা’’তি পুচ্ছি. ‘‘পস্সানন্দ, ইমং উলূকসকুণং, অযং মযি চ ভিক্খুসঙ্ঘে চ চিত্তং পসাদেত্ৰা সতসহস্সকপ্পে দেৰেসু চ মনুস্সেসু চ সংসরিত্ৰা সোমনস্সো নাম পচ্চেকবুদ্ধো ভৰিস্সতী’’তি আহ –

উলূকমণ্ডলক্খিক, ৰেদিযকে চিরদীঘৰাসিক;

সুখিতোসি ত্ৰং অয্য কোসিয, কালুট্ঠিতং পস্সসি বুদ্ধৰরং.

মযি চিত্তং পসাদেত্ৰা, ভিক্খুসঙ্ঘে অনুত্তরে;

কপ্পানং সতসহস্সানি, দুগ্গতেসো ন গচ্ছতি.

দেৰলোকা চৰিত্ৰান, কুসলমূলেন চোদিতো;

ভৰিস্সতি অনন্তঞাণো, সোমনস্সোতি ৰিস্সুতোতি.

অঞ্ঞানিপি চেত্থ রাজগহনগরে সুমনমালাকারৰত্থু মহাভেরিৰাদকৰত্থু মোরজিকৰত্থু ৰীণাৰাদকৰত্থু সঙ্খধমকৰত্থূতি এৰমাদীনি ৰত্থূনি ৰিত্থারেতব্বানি. এৰং নিয্যানিকসাসনে সত্থরি পসাদো সম্মগ্গতো হোতি.

ধম্মে পসাদোতি নিয্যানিকসাসনম্হি ধম্মে পসাদো সম্মগ্গতো হোতি. সরমত্তে নিমিত্তং গহেত্ৰা সুণন্তানং তিরচ্ছানগতানম্পি সম্পত্তিদাযকো হোতি, পরমত্থে কিং পন ৰত্তব্বং. অযমত্থো মণ্ডূকদেৰপুত্তাদীনং ৰত্থুৰসেন ৰেদিতব্বো.

সীলেসু পরিপূরকারিতাতি নিয্যানিকসাসনম্হি সীলেসু পরিপূরকারিতাপি সম্মগ্গতা হোতি, সগ্গমোক্খসম্পত্তিং আৰহতি. তত্থ ছত্তমাণৰকৰত্থুসামণেরৰত্থুআদীনি দীপেতব্বানি.

সহধম্মিকেসূতি নিয্যানিকসাসনে সহধম্মিকেসু পিযমনাপতাপি সম্মগ্গতা হোতি, মহাসম্পত্তিং আৰহতি. অযমত্থো ৰিমানপেতৰত্থূহি দীপেতব্বো. ৰুত্তঞ্হেতং –

‘‘খীরোদনমহমদাসিং, ভিক্খুনো পিণ্ডায চরন্তস্স…পে…

ফাণিতং…পে… উচ্ছুখণ্ডিকং… তিম্বরুসকং… কক্কারিকং…

এল়ালুকং… ৰল্লিপক্কং… ফারুসকং… হত্থপতাকং…

সাকমুট্ঠিং … পুপ্ফকমুট্ঠিং… মূলকং… নিম্বমুট্ঠিং…

অম্বিকঞ্জিকং… দোণিনিম্মজ্জনিং… কাযবন্ধনং…

অংসবদ্ধকং… আযোগপট্টং… ৰিধূপনং… তালৰণ্টং…

মোরহত্থং… ছত্তং… উপাহনং… পূৰং মোদকং…

সক্খলিকং অহমদাসিং, ভিক্খুনো পিণ্ডায চরন্তস্স…পে…

তস্সা মে পস্স ৰিমানং, অচ্ছরা কামৰণ্ণিনীহমস্মী’’তি (ৰি. ৰ. ৪০৬).

তং কিস্স হেতূতিআদি ৰুত্তনযানুসারেনেৰ যোজেত্ৰা ৰেদিতব্বং.

১৪৫. ইদানি যেসং উপাদানানং তিত্থিযা ন সম্মা পরিঞ্ঞং পঞ্ঞপেন্তি, তথাগতো পঞ্ঞপেতি, তেসং পচ্চযং দস্সেতুং ইমে চ, ভিক্খৰেতিআদিমাহ. তত্থ কিংনিদানাতিআদীসু নিদানাদীনি সব্বানেৰ কারণৰেৰচনানি. কারণঞ্হি যস্মা ফলং নিদেতি হন্দ, নং গণ্হথাতি অপ্পেতি ৰিয, তস্মা নিদানন্তি ৰুচ্চতি. যস্মা তং ততো জাযতি সমুদেতি পভৰতি, তস্মা সমুদযো, জাতি, পভৰোতি ৰুচ্চতি. অযং পনেত্থ পদত্থো – কিং নিদানং এতেসন্তি কিংনিদানা. কো সমুদযো এতেসন্তি কিংসমুদযা. কা জাতি এতেসন্তি কিংজাতিকা. কো পভৰো এতেসন্তি কিংপভৰা. যস্মা পন তেসং তণ্হা যথাৰুত্তেন অত্থেন নিদানঞ্চেৰ সমুদযো চ জাতি চ পভৰো চ, তস্মা ‘‘তণ্হানিদানা’’তিআদিমাহ. এৰং সব্বপদেসু অত্থো ৰেদিতব্বো. যস্মা পন ভগৰা ন কেৰলং উপাদানস্সেৰ পচ্চযং জানাতি, উপাদানস্স পচ্চযভূতায তণ্হাযপি, তণ্হাদিপচ্চযানং ৰেদনাদীনম্পি পচ্চযং জানাতিযেৰ, তস্মা তণ্হা চাযং, ভিক্খৰেতিআদিমাহ.

যতো চ খোতি যস্মিং কালে. অৰিজ্জা পহীনা হোতীতি ৰট্টমূলিকা অৰিজ্জা অনুপ্পাদনিরোধেন পহীনা হোতি. ৰিজ্জা উপ্পন্নাতি অরহত্তমগ্গৰিজ্জা উপ্পন্না. সো অৰিজ্জাৰিরাগা ৰিজ্জুপ্পাদাতি. সো ভিক্খু অৰিজ্জায চ পহীনত্তা ৰিজ্জায চ উপ্পন্নত্তা. নেৰ কামুপাদানং উপাদিযতীতি নেৰ কামুপাদানং গণ্হাতি ন উপেতি, ন সেসানি উপাদানানি. অনুপাদিযং ন পরিতস্সতীতি এৰং কিঞ্চি উপাদানং অগ্গণ্হন্তো তণ্হাপরিতস্সনায ন পরিতস্সতি. অপরিতস্সন্তি অপরিতস্সন্তো তণ্হং অনুপ্পাদেন্তো. পচ্চত্তংযেৰ পরিনিব্বাযতীতি সযমেৰ কিলেসপরিনিব্বানেন পরিনিব্বাযতি. এৰমস্স আসৰক্খযং দস্সেত্ৰা ইদানি খীণাসৰস্স ভিক্খুনো পচ্চৰেক্খণং দস্সেন্তো খীণা জাতীতিআদিমাহ. তং ৰুত্তত্থমেৰাতি.

পপঞ্চসূদনিযা মজ্ঝিমনিকাযট্ঠকথায

চূল়সীহনাদসুত্তৰণ্ণনা নিট্ঠিতা.

২. মহাসীহনাদসুত্তৰণ্ণনা

ৰেসালিনগরৰণ্ণনা

১৪৬. এৰং মে সুতন্তি মহাসীহনাদসুত্তং. তত্থ ৰেসালিযন্তি এৰংনামকে নগরে. তং কির অপরাপরং ৰিসালীভূততায ‘‘ৰেসালী’’তি সঙ্খং গতং. তত্রাযং অনুপুব্বকথা – বারাণসিরঞ্ঞো কির অগ্গমহেসিযা কুচ্ছিম্হি গব্ভো সণ্ঠাসি. সা ঞত্ৰা রঞ্ঞো নিৰেদেসি. রাজা গব্ভপরিহারং অদাসি. সা সম্মা পরিহরীযমানা গব্ভপরিপাককালে ৰিজাযনঘরং পাৰিসি. পুঞ্ঞৰন্তীনং পচ্চূসসমযে গব্ভৰুট্ঠানং হোতি, সা চ তাসং অঞ্ঞতরা, তেন পচ্চূসসমযে অলত্তকপটলবন্ধুজীৰকপুপ্ফসদিসং মংসপেসিং ৰিজাযি. ততো ‘‘অঞ্ঞা দেৰিযো সুৰণ্ণবিম্বসদিসে পুত্তে ৰিজাযন্তি, অগ্গমহেসী মংসপেসিন্তি রঞ্ঞো পুরতো মম অৰণ্ণো উপ্পজ্জেয্যা’’তি চিন্তেত্ৰা তেন অৰণ্ণভযেন তং মংসপেসিং একস্মিং ভাজনে পক্খিপিত্ৰা পটিকুজ্জিত্ৰা রাজমুদ্দিকায লঞ্ছেত্ৰা গঙ্গায সোতে পক্খিপাপেসি. মনুস্সেহি ছড্ডিতমত্তে দেৰতা আরক্খং সংৰিদহিংসু. সুৰণ্ণপট্টকঞ্চেত্থ জাতিহিঙ্গুলকেন ‘‘বারাণসিরঞ্ঞো অগ্গমহেসিযা পজা’’তি লিখিত্ৰা বন্ধিংসু. ততো তং ভাজনং ঊমিভযাদীহি অনুপদ্দুতং গঙ্গাসোতেন পাযাসি.

তেন চ সমযেন অঞ্ঞতরো তাপসো গোপালককুলং নিস্সায গঙ্গাতীরে ৰিহরতি. সো পাতোৰ গঙ্গং ওতিণ্ণো তং ভাজনং আগচ্ছন্তং দিস্ৰা পংসুকূলসঞ্ঞায অগ্গহেসি. অথেত্থ তং অক্খরপট্টিকং রাজমুদ্দিকালঞ্ছনং চ দিস্ৰা মুঞ্চিত্ৰা তং মংসপেসিং অদ্দস, দিস্ৰানস্স এতদহোসি ‘‘সিযা গব্ভো, তথা হিস্স দুগ্গন্ধপূতিকভাৰো নত্থী’’তি. অস্সমং নেত্ৰা সুদ্ধে ওকাসে ঠপেসি. অথ অড্ঢমাসচ্চযেন দ্ৰে মংসপেসিযো অহেসুং. তাপসো দিস্ৰা সাধুতরং ঠপেসি. ততো পুন অড্ঢমাসচ্চযেন একমেকিস্সা মংসপেসিযা হত্থপাদসীসানমত্থায পঞ্চ পঞ্চ পিল়কা উট্ঠহিংসু. অথ ততো অড্ঢমাসচ্চযেন একা মংসপেসি সুৰণ্ণবিম্বসদিসো দারকো, একা দারিকা অহোসি.

তেসু তাপসস্স পুত্তসিনেহো উপ্পজ্জি, অঙ্গুট্ঠকতো চস্স খীরং নিব্বত্তি. ততো পভুতি চ খীরভত্তং অলভিত্থ, সো ভত্তং ভুঞ্জিত্ৰা খীরং দারকানং মুখে আসিঞ্চতি. তেসং উদরং যং যং পৰিসতি, তং তং সব্বং মণিভাজনগতং ৰিয দিস্সতি, এৰং নিচ্ছৰী অহেসুং. অপরে আহু ‘‘সিব্বেত্ৰা ঠপিতা ৰিয নেসং অঞ্ঞমঞ্ঞং লীনা ছৰি অহোসী’’তি. এৰং তে নিচ্ছৰিতায ৰা লীনচ্ছৰিতায ৰা লিচ্ছৰীতি পঞ্ঞাযিংসু.

তাপসো দারকে পোসেন্তো উস্সূরে গামং সিক্খায পৰিসতি, অতিদিৰা পটিক্কমতি. তস্স তং ব্যাপারং ঞত্ৰা গোপালকা আহংসু – ‘‘ভন্তে, পব্বজিতানং দারকপোসনং পলিবোধো, অম্হাকং দারকে দেথ, মযং পোসেস্সাম, তুম্হে অত্তনো কম্মং করোথা’’তি. তাপসো সাধূতি পটিস্সুণি. গোপালকা দুতিযদিৰসে মগ্গং সমং কত্ৰা পুপ্ফেহি ওকিরিত্ৰা ধজপটাকা উস্সাপেত্ৰা তূরিযেহি ৰজ্জমানেহি অস্সমং আগতা. তাপসো – ‘‘মহাপুঞ্ঞা দারকা অপ্পমাদেন ৰড্ঢেথ, ৰড্ঢেত্ৰা চ অঞ্ঞমঞ্ঞং আৰাহৰিৰাহং করোথ, পঞ্চগোরসেন রাজানং তোসেত্ৰা ভূমিভাগং গহেত্ৰা নগরং মাপেথ, তত্থ কুমারং অভিসিঞ্চথা’’তি ৰত্ৰা দারকে অদাসি. তে সাধূতি পটিস্সুণিত্ৰা দারকে নেত্ৰা পোসেসুং.

দারকা ৰুদ্ধিমন্ৰায কীল়ন্তা ৰিৰাদট্ঠানেসু অঞ্ঞে গোপালকদারকে হত্থেনপি পাদেনপি পহরন্তি. তে রোদন্তি. ‘‘কিস্স রোদথা’’তি চ মাতাপিতূহি ৰুত্তা ‘‘ইমে নিম্মাতাপিতিকা তাপসপোসিতা অম্হে অতিপহরন্তী’’তি ৰদন্তি. ততো তেসং মাতাপিতরো ‘‘ইমে দারকা অঞ্ঞে দারকে ৰিনাসেন্তি দুক্খাপেন্তি, ন ইমে সঙ্গহেতব্বা, ৰজ্জেতব্বা ইমে’’তি আহংসু. ততো পভুতি কির সো পদেসো ৰজ্জীতি ৰুচ্চতি যোজনসতিকো পরিমাণেন. অথ তং পদেসং গোপালকা রাজানং তোসেত্ৰা অগ্গহেসুং. তত্থ চ নগরং মাপেত্ৰা সোল়সৰস্সুদ্দেসিকং কুমারং অভিসিঞ্চিত্ৰা রাজানং অকংসু. তায চস্স দারিকায সদ্ধিং ৰিৰাহং কত্ৰা কতিকং অকংসু ‘‘বাহিরকদারিকা ন আনেতব্বা, ইতো দারিকা ন কস্সচি দাতব্বা’’তি. তেসং পঠমসংৰাসেন দ্ৰে দারকা জাতা ধীতা চ পুত্তো চ. এৰং সোল়সক্খত্তুং দ্ৰে দ্ৰে জাতা. ততো তেসং দারকানং যথাক্কমং ৰড্ঢন্তানং আরামুয্যাননিৰাসট্ঠানপরিৰারসম্পত্তিং গহেতুং অপ্পহোন্তা নগরং তিক্খত্তুং গাৰুতন্তরেন গাৰুতন্তরেন পরিক্খিপিংসু. তস্স পুনপ্পুনং ৰিসালীকতত্তা ৰেসালীত্ৰেৰ নামং জাতং. তেন ৰুত্তং ‘‘ৰেসালিযন্তি এৰং নামকে নগরে’’তি.

০১. বহিনগরেতি নগরস্স বহি, ন অম্বপালিৰনং ৰিয অন্তোনগরস্মিং. অযং পন জীৰকম্বৰনং ৰিয নগরস্স বহিদ্ধা ৰনসণ্ডো. তেন ৰুত্তং ‘‘বহিনগরে’’তি. অপরপুরেতি পুরস্স অপরে, পচ্ছিমদিসাযন্তি অত্থো. ৰনসণ্ডেতি সো কির ৰনসণ্ডো নগরস্স পচ্ছিমদিসাযং গাৰুতমত্তে ঠানে. তত্থ মনুস্সা ভগৰতো গন্ধকুটিং কত্ৰা তং পরিৰারেত্ৰা ভিক্খূনং রত্তিট্ঠানদিৰাট্ঠানচঙ্কমলেণকুটিমণ্ডপাদীনি পতিট্ঠপেসুং, ভগৰা তত্থ ৰিহরতি. তেন ৰুত্তং ‘‘অপরপুরে ৰনসণ্ডে’’তি. সুনক্খত্তোতি তস্স নামং. লিচ্ছৰীনং পন পুত্তত্তা লিচ্ছৰিপুত্তোতি ৰুত্তো. অচিরপক্কন্তোতি ৰিব্ভমিত্ৰা গিহিভাৰূপগমনেন অধুনাপক্কন্তো. পরিসতীতি পরিসমজ্ঝে. উত্তরিমনুস্সধম্মাতি এত্থ মনুস্সধম্মা নাম দসকুসলকম্মপথা. তে পটিসেধেতুং ন সক্কোতি. কস্মা? উপারম্ভভযা. ৰেসালিযঞ্হি বহূ মনুস্সা রতনত্তযে পসন্না বুদ্ধমামকা ধম্মমামকা সঙ্ঘমামকা. তে দসকুসলকম্মপথমত্তম্পি নত্থি সমণস্স গোতমস্সাতি ৰুত্তে ত্ৰং কত্থ ভগৰন্তং পাণং হনন্তং অদ্দস, কত্থ অদিন্নং আদিযন্তন্তিআদীনি ৰত্ৰা অত্তনো পমাণং ন জানাসি? কিং দন্তা মে অত্থীতি পাসাণসক্খরা খাদসি, অহিনঙ্গুট্ঠে গণ্হিতুং ৰাযমসি, ককচদন্তেসু পুপ্ফাৰল়িকং কীল়িতুং ইচ্ছসি? মুখতো তে দন্তে পাতেস্সামাতি ৰদেয্যুং. সো তেসং উপারম্ভভযা এৰং ৰত্তুং ন সক্কোতি.

ৰেসালিনগরৰণ্ণনা নিট্ঠিতা.

উত্তরিমনুস্সধম্মাদিৰণ্ণনা

ততো উত্তরিং পন ৰিসেসাধিগমং পটিসেধেন্তো উত্তরি মনুস্সধম্মা অলমরিযঞাণদস্সনৰিসেসোতি আহ.

তত্থ অলমরিযং ঞাতুন্তি অলমরিযো, অরিযভাৰায সমত্থোতি ৰুত্তং হোতি. ঞাণদস্সনমেৰ ঞাণদস্সনৰিসেসো. অলমরিযো চ সো ঞাণদস্সনৰিসেসো চাতি অলমরিযঞাণদস্সনৰিসেসো. ঞাণদস্সনন্তি দিব্বচক্খুপি ৰিপস্সনাপি মগ্গোপি ফলম্পি পচ্চৰেক্খণঞাণম্পি সব্বঞ্ঞুতঞ্ঞাণম্পি ৰুচ্চতি. ‘‘অপ্পমত্তো সমানো ঞাণদস্সনং আরাধেতী’’তি (ম. নি. ১.৩১১) হি এত্থ দিব্বচক্খু ঞাণদস্সনং নাম. ‘‘ঞাণদস্সনায চিত্তং অভিনীহরতি অভিনিন্নামেতী’’তি (দী. নি. ১.২৩৫) এত্থ ৰিপস্সনাঞাণং. ‘‘অভব্বা তে ঞাণদস্সনায অনুত্তরায সম্বোধাযা’’তি (অ. নি. ৪.১৯৬) এত্থ মগ্গো. ‘‘অযমঞ্ঞো উত্তরি মনুস্সধম্মা অলমরিযঞাণদস্সনৰিসেসো অধিগতো ফাসু ৰিহারো’’তি (ম. নি. ১.৩২৮) এত্থ ফলং. ‘‘ঞাণঞ্চ পন মে দস্সনং উদপাদি, অকুপ্পা মে চেতোৰিমুত্তি, অযমন্তিমা জাতি, নত্থি দানি পুনব্ভৰো’’তি (মহাৰ. ১৬) এত্থ পচ্চৰেক্খণঞাণং. ‘‘ঞাণঞ্চ পন মে দস্সনং উদপাদি সত্তাহকালঙ্কতো আল়ারো কাল়ামো’’তি (ম. নি. ২.৩৪০) এত্থ সব্বঞ্ঞুতঞ্ঞাণং. ইধ পন লোকুত্তরমগ্গো অধিপ্পেতো. তঞ্হি সো ভগৰতো পটিসেধেতি.

তক্কপরিযাহতন্তি ইমিনা আচরিযং পটিবাহতি. এৰং কিরস্স অহোসি – সমণেন গোতমেন আচরিযে উপসঙ্কমিত্ৰা সুখুমং ধম্মন্তরং গহিতং নাম নত্থি, তক্কপরিযাহতং পন তক্কেত্ৰা এৰং ভৰিস্সতি এৰং ভৰিস্সতীতি তক্কপরিযাহতং ধম্মং দেসেতীতি. ৰীমংসানুচরিতন্তি ইমিনা চস্স লোকিযপঞ্ঞং অনুজানাতি. সমণো গোতমো পঞ্ঞৰা, সো তং পঞ্ঞাসঙ্খাতং ইন্দৰজিরূপমং ৰীমংসং এৰং ৰট্টিস্সতি, এৰং ৰট্টিস্সতীতি ইতো চিতো চ অনুচরাপেত্ৰা ৰীমংসায অনুচরিতং ধম্মং দেসেতি. সযংপটিভানন্তি ইমিনাস্স ধম্মেসু পচ্চক্খভাৰং পটিবাহতি. এৰং হিস্স অহোসি – সমণস্স গোতমস্স সুখুমং ধম্মন্তরং ৰিপস্সনা ৰা মগ্গো ৰা ফলং ৰা পচ্চৰেক্খণা ৰা নত্থি, অযং পন লদ্ধপরিসো, রাজানং চক্কৰত্তিং ৰিয নং চত্তারো ৰণ্ণা পরিৰারেন্তি, সুফুসিতং পনস্স দন্তাৰরণং, মুদুকা জিৰ্হা, মধুরো সরো, অনেলগল়া ৰাচা, সো যং যদেৰস্স উপট্ঠাতি, তং তং গহেত্ৰা সযংপটিভানং কথেন্তো মহাজনং রঞ্জেতীতি.

যস্স চ খ্ৰাস্স অত্থায ধম্মো দেসিতোতি যস্স চ খো অত্থায অস্স ধম্মো দেসিতো. সেয্যথিদং, রাগপটিঘাতত্থায অসুভকম্মট্ঠানং, দোসপ্পটিঘাতত্থায মেত্তাভাৰনা, মোহপটিঘাতত্থায পঞ্চ ধম্মা, ৰিতক্কূপচ্ছেদায আনাপানস্সতি.

সো নিয্যাতি তক্করস্স সম্মা দুক্খক্খযাযাতি সো ধম্মো যো তং যথাদেসিতং করোতি, তস্স তক্করস্স সম্মা হেতুনা নযেন কারণেন ৰট্টদুক্খক্খযায নিয্যাতি গচ্ছতি তমত্থং সাধেতীতি দীপেতি. ইদং পনেস ন অত্তনো অজ্ঝাসযেন ৰদতি. বুদ্ধানঞ্হি ধম্মো অনিয্যানিকোতি এৰমেৰং পৰেদেয্য, ন পন সক্কোতি ৰত্তুং. কস্মা? উপারম্ভভযা. ৰেসালিযঞ্হি বহূ সোতাপন্ন-সকদাগামি-অনাগামিউপাসকা. তে এৰং ৰদেয্যুং ‘‘সুনক্খত্ত ত্ৰং ভগৰতা দেসিতধম্মো অনিয্যানিকোতি ৰদসি, যদি অযং ধম্মো অনিয্যানিকো, ইমস্মিং নগরে ইমে কস্মা এত্তকা সোতাপন্না জাতা, এত্তকা সকদাগামী, এত্তকা অনাগামীতি পুব্বে ৰুত্তনযেন উপারম্ভং করেয্যু’’ন্তি. সো ইমিনা উপারম্ভভযেন অনিয্যানিকোতি ৰত্তুং অসক্কোন্তো অজ্জুনেন ৰিস্সট্ঠকণ্ডং ৰিয অস্স ধম্মো অমোঘো নিয্যাতি, অব্ভন্তরে পনস্স কিঞ্চি নত্থীতি ৰদতি.

অস্সোসি খোতি ৰেসালিযং ব্রাহ্মণকুলসেট্ঠিকুলাদীসু তত্থ তত্থ পরিসমজ্ঝে এৰং ভাসমানস্স তং ৰচনং সুণি, ন পন পটিসেধেসি. কস্মা? কারুঞ্ঞতায. এৰং কিরস্স অহোসি অযং কুদ্ধো ঝাযমানং ৰেল়ুৰনং ৰিয পক্খিত্তলোণং উদ্ধনং ৰিয চ কোধৰসেন পটপটাযতি, মযা পটিবাহিতো পন মযিপি আঘাতং বন্ধিস্সতি, এৰমস্স তথাগতে চ মযি চাতি দ্ৰীসু জনেসু আঘাতো অতিভারিযো ভৰিস্সতীতি কারুঞ্ঞতায ন পটিসেধেসি. অপি চস্স এৰং অহোসি, বুদ্ধানং অৰণ্ণকথনং নাম পুণ্ণচন্দে দোসারোপনসদিসং, কো ইমস্স কথং গণ্হিস্সতি? সযমেৰ খেল়ে পচ্ছিন্নে মুখে সুক্খে ওরমিস্সতীতি ইমিনা কারণেন ন পটিসেধেসি. পিণ্ডপাতপটিক্কন্তোতি পিণ্ডপাতপরিযেসনতো অপগতো.

১৪৭. কোধনোতি চণ্ডো ফরুসো. মোঘপুরিসোতি তুচ্ছপুরিসো. যস্স হি তস্মিং অত্তভাৰে মগ্গফলানং উপনিস্সযো নত্থি, তং বুদ্ধা ‘‘মোঘপুরিসো’’তি ৰদন্তি. উপনিস্সযে সতিপি তস্মিং খণে মগ্গে ৰা ফলে ৰা অসতি ‘‘মোঘপুরিসো’’তি ৰদন্তিযেৰ. ইমস্স পন তস্মিং অত্তভাৰে মগ্গফলানং উপনিস্সযো সমুচ্ছিন্নোযেৰ, তেন তং ‘‘মোঘপুরিসো’’তি আহ. কোধা চ পনস্স এসা ৰাচা ভাসিতাতি এসা চ পনস্স ৰাচা কোধেন ভাসিতা.

কস্মা পনেস ভগৰতো কুদ্ধোতি? অযঞ্হি পুব্বে ভগৰন্তং উপসঙ্কমিত্ৰা দিব্বচক্খুপরিকম্মং পুচ্ছি. অথস্স ভগৰা কথেসি. সো দিব্বচক্খুং নিব্বত্তেত্ৰা আলোকং ৰড্ঢেত্ৰা দেৰলোকে ওলোকেন্তো নন্দনৰনচিত্তলতাৰনফারুসকৰনমিস্সকৰনেসু দিব্বসম্পত্তিং অনুভৰমানে দেৰপুত্তে চ দেৰধীতরো চ দিস্ৰা এতেসং এৰরূপায অত্তভাৰসম্পত্তিযা ঠিতানং কীৰমধুরো নু খো সদ্দো ভৰিস্সতীতি সদ্দং সোতুকামো হুত্ৰা দসবলং উপসঙ্কমিত্ৰা দিব্বসোতধাতুপরিকম্মং পুচ্ছি. ভগৰা পনস্স দিব্বসোতধাতুযা উপনিস্সযো নত্থীতি ঞত্ৰা পরিকম্মং ন কথেসি. ন হি বুদ্ধা উপনিস্সযৰিরহিত তস্স পরিকম্মং কথেন্তি. সো ভগৰতি আঘাতং বন্ধিত্ৰা চিন্তেসি ‘‘অহং সমণং গোতমং পঠমং দিব্বচক্খুপরিকম্মং পুচ্ছিং, সো ‘ময্হং তং সম্পজ্জতু ৰা মা ৰা সম্পজ্জতূ’তি কথেসি. অহং পন পচ্চত্তপুরিসকারেন তং নিব্বত্তেত্ৰা দিব্বসোতধাতুপরিকম্মং পুচ্ছিং, তং মে ন কথেসি. অদ্ধাস্স এৰং হোতি ‘অযং রাজপব্বজিতো দিব্বচক্খুঞাণং নিব্বত্তেত্ৰা দিব্বসোতধাতুঞাণং নিব্বত্তেত্ৰা চেতোপরিযঞাণং নিব্বত্তেত্ৰা আসৰানং খযঞাণং নিব্বত্তেত্ৰা মযা সমসমো ভৰিস্সতী’তি ইস্সামচ্ছরিযৰসেন ময্হং ন কথেতী’’তি. ভিয্যোসো আঘাতং বন্ধিত্ৰা কাসাযানি ছড্ডেত্ৰা গিহিভাৰং পত্ৰাপি ন তুণ্হীভূতো ৰিচরতি. দসবলং পন অসতা তুচ্ছেন অব্ভাচিক্খন্তো ৰিচরতি. তেনাহ ভগৰা ‘‘কোধা চ পনস্স এসা ৰাচা ভাসিতা’’তি.

ৰণ্ণো হেসো, সারিপুত্তাতি, সারিপুত্ত, তথাগতেন সতসহস্সকপ্পাধিকানি চত্তারি অসঙ্খ্যেয্যানি পারমিযো পূরেন্তেন এতদত্থমেৰ ৰাযামো কতো ‘‘দেসনাধম্মো মে নিয্যানিকো ভৰিস্সতী’’তি. তস্মা যো এৰং ৰদেয্য, সো ৰণ্ণংযেৰ তথাগতস্স ভাসতি. ৰণ্ণো হেসো, সারিপুত্ত, তথাগতস্স গুণো এসো তথাগতস্স, ন অগুণোতি দস্সেতি.

অযম্পি হি নাম সারিপুত্তাতিআদিনা কিং দস্সেতি? সুনক্খত্তেন পটিসিদ্ধস্স উত্তরিমনুস্সধম্মস্স অত্তনি অত্থিতং দস্সেতি. ভগৰা কির অযং, সারিপুত্ত, সুনক্খত্তো মোঘপুরিসো নত্থি তথাগতস্স উত্তরিমনুস্সধম্মোতি ৰদতি. ময্হঞ্চ সব্বঞ্ঞুতঞ্ঞাণং নাম অত্থি, ইদ্ধিৰিধঞাণং নাম অত্থি, দিব্বসোতধাতুঞাণং নাম অত্থি, চেতোপরিযঞাণং নাম অত্থি, দসবলঞাণং নাম অত্থি, চতুৰেসারজ্জঞাণং নাম অত্থি, অট্ঠসু পরিসাসু অকম্পনঞাণং নাম অত্থি, চতুযোনিপরিচ্ছেদকঞাণং নাম অত্থি, পঞ্চগতিপরিচ্ছেদকঞাণং নাম অত্থি, সব্বেপি চেতে উত্তরিমনুস্সধম্মাযেৰ. এৰরূপেসু উত্তরিমনুস্সধম্মেসু একস্সাপি ৰিজাননসমত্থং ধম্মন্ৰযমত্তম্পি নাম এতস্স মোঘপুরিসস্স ন ভৰিস্সতীতি এতমত্থং দস্সেতুং অযম্পি হি নাম সারিপুত্তাতিআদিনা নযেন ইমং দেসনং আরভি. তত্থ অন্ৰেতীতি অন্ৰযো, জানাতি, অনুবুজ্ঝতীতি অত্থো. ধম্মস্স অন্ৰযো ধম্মন্ৰযো, তং তং সব্বঞ্ঞুতঞ্ঞাণাদিধম্মং জাননপঞ্ঞাযেতং অধিৰচনং. ‘‘ইতিপি সো ভগৰা’’তিআদীহি এৰরূপম্পি নাম ময্হং সব্বঞ্ঞুতঞ্ঞাণসঙ্খাতং উত্তরিমনুস্সধম্মং ৰিজ্জমানমেৰ অত্থীতি জানিতুং তস্স মোঘপুরিসস্স ধম্মন্ৰযোপি ন ভৰিস্সতীতি দস্সেতি. ইদ্ধিৰিধঞাণাদীসুপি এৰং যোজনা ৰেদিতব্বা.

উত্তরিমনুস্সধম্মাদিৰণ্ণনা নিট্ঠিতা.

দসবলঞাণাদিৰণ্ণনা

১৪৮. এত্থ চ কিঞ্চাপি চেতোপরিযঞাণানন্তরং তিস্সো ৰিজ্জা ৰত্তব্বা সিযুং, যস্মা পন তাসু ৰুত্তাসু উপরি দসবলঞাণং ন পরিপূরতি, তস্মা তা অৰত্ৰা তথাগতস্স দসবলঞাণং পরিপূরং কত্ৰা দস্সেন্তো দস খো পনিমানি সারিপুত্তাতিআদিমাহ. তত্থ তথাগতবলানীতি অঞ্ঞেহি অসাধারণানি তথাগতস্সেৰ বলানি. যথা ৰা পুব্ববুদ্ধানং বলানি পুঞ্ঞুস্সযসম্পত্তিযা আগতানি, তথা আগতবলানীতিপি অত্থো. তত্থ দুৰিধং তথাগতবলং কাযবলঞ্চ ঞাণবলঞ্চ. তেসু কাযবলং হত্থিকুলানুসারেন ৰেদিতব্বং. ৰুত্তঞ্হেতং পোরাণেহি –

‘‘কালাৰকঞ্চ গঙ্গেয্যং, পণ্ডরং তম্বপিঙ্গলং;

গন্ধমঙ্গলহেমঞ্চ, উপোসথছদ্দন্তিমে দসা’’তি.

ইমানি হি দস হত্থিকুলানি. তত্থ কালাৰকন্তি পকতিহত্থিকুলং দট্ঠব্বং. যং দসন্নং পুরিসানং কাযবলং, তং একস্স কালাৰকহত্থিনো. যং দসন্নং কালাৰকানং বলং, তং একস্স গঙ্গেয্যস্স. যং দসন্নং গঙ্গেয্যানং, তং একস্স পণ্ডরস্স. যং দসন্নং পণ্ডরানং, তং একস্স তম্বস্স. যং দসন্নং তম্বানং, তং একস্স পিঙ্গলস্স. যং দসন্নং পিঙ্গলানং, তং একস্স গন্ধহত্থিনো. যং দসন্নং গন্ধহত্থীনং, তং একস্স মঙ্গলস্স. যং দসন্নং মঙ্গলানং, তং একস্স হেমৰতস্স. যং দসন্নং হেমৰতানং, তং একস্স উপোসথস্স. যং দসন্নং উপোসথানং, তং একস্স ছদ্দন্তস্স. যং দসন্নং ছদ্দন্তানং তং একস্স তথাগতস্স. নারাযনসঙ্ঘাতবলন্তিপি ইদমেৰ ৰুচ্চতি. তদেতং পকতিহত্থিগণনায হত্থীনং কোটিসহস্সানং পুরিসগণনায দসন্নং পুরিসকোটিসহস্সানং বলং হোতি. ইদং তাৰ তথাগতস্স কাযবলং.

ঞাণবলং পন পাল়িযং তাৰ আগতমেৰ. দসবলঞাণং, চতুৰেসারজ্জঞাণং, অট্ঠসু পরিসাসু অকম্পনঞাণং, চতুযোনিপরিচ্ছেদকঞাণং, পঞ্চগতিপরিচ্ছেদকঞাণং. সংযুত্তকে (সং. নি. ২.৩৪) আগতানি তেসত্ততি ঞাণানি সত্তসত্ততি ঞাণানীতি এৰং অঞ্ঞানিপি অনেকানি ঞাণসহস্সানি, এতং ঞাণবলং নাম. ইধাপি ঞাণবলমেৰ অধিপ্পেতং. ঞাণঞ্হি অকম্পিযট্ঠেন উপত্থম্ভনট্ঠেন চ বলন্তি ৰুত্তং.

যেহি বলেহি সমন্নাগতোতি যেহি দসহি ঞাণবলেহি উপেতো সমুপেতো. আসভং ঠানন্তি সেট্ঠট্ঠানং উত্তমট্ঠানং. আসভা ৰা পুব্ববুদ্ধা, তেসং ঠানন্তি অত্থো. অপিচ গৰসতজেট্ঠকো উসভো, গৰসহস্সজেট্ঠকো ৰসভো. ৰজসতজেট্ঠকো ৰা উসভো, ৰজসহস্সজেট্ঠকো ৰসভো. সব্বগৰসেট্ঠো সব্বপরিস্সযসহো সেতো পাসাদিকো মহাভারৰহো অসনিসতসদ্দেহিপি অকম্পনিযো নিসভো, সো ইধ উসভোতি অধিপ্পেতো. ইদম্পি হি তস্স পরিযাযৰচনং. উসভস্স ইদন্তি আসভং. ঠানন্তি চতূহি পাদেহি পথৰিং উপ্পীল়েত্ৰা অচলট্ঠানং. ইদং পন আসভং ৰিযাতি আসভং. যথেৰ হি নিসভসঙ্খাতো উসভো উসভবলেন সমন্নাগতো চতূহি পাদেহি পথৰিং উপ্পীল়েত্ৰা অচলট্ঠানেন তিট্ঠতি, এৰং তথাগতোপি দসহি তথাগতবলেহি সমন্নাগতো চতূহি ৰেসারজ্জপাদেহি অট্ঠপরিসপথৰিং উপ্পীল়েত্ৰা সদেৰকে লোকে কেনচি পচ্চত্থিকেন পচ্চামিত্তেন অকম্পিযো অচলট্ঠানেন তিট্ঠতি. এৰং তিট্ঠমানোৰ তং আসভং ঠানং পটিজানাতি, উপগচ্ছতি ন পচ্চক্খাতি অত্তনি আরোপেতি. তেন ৰুত্তং ‘‘আসভং ঠানং পটিজানাতী’’তি.

পরিসাসূতি অট্ঠসু পরিসাসু. সীহনাদং নদতীতি সেট্ঠনাদং অভীতনাদং নদতি, সীহনাদসদিসং ৰা নাদং নদতি. অযমত্থো সীহনাদসুত্তেন দীপেতব্বো. যথা ৰা সীহো সহনতো হননতো চ সীহোতি ৰুচ্চতি, এৰং তথাগতো লোকধম্মানং সহনতো পরপ্পৰাদানঞ্চ হননতো সীহোতি ৰুচ্চতি. এৰং ৰুত্তস্স সীহস্স নাদং সীহনাদং. তত্থ যথা সীহো সীহবলেন সমন্নাগতো সব্বত্থ ৰিসারদো ৰিগতলোমহংসো সীহনাদং নদতি, এৰং তথাগতসীহোপি তথাগতবলেহি সমন্নাগতো অট্ঠসু পরিসাসু ৰিসারদো ৰিগতলোমহংসো ইতি রূপন্তিআদিনা নযেন নানাৰিধদেসনাৰিলাসসম্পন্নং সীহনাদং নদতি. তেন ৰুত্তং ‘‘পরিসাসু সীহনাদং নদতী’’তি. ব্রহ্মচক্কং পৰত্তেতীতি এত্থ ব্রহ্মন্তি সেট্ঠং উত্তমং ৰিসিট্ঠং. চক্ক-সদ্দো পনাযং –

সম্পত্তিযং লক্খণে চ, রথঙ্গে ইরিযাপথে;

দানে রতনধম্মূর-চক্কাদীসু চ দিস্সতি;

ধম্মচক্কে ইধ মতো, তঞ্চ দ্ৰেধা ৰিভাৰযে.

‘‘চত্তারিমানি, ভিক্খৰে, চক্কানি, যেহি সমন্নাগতানং দেৰমনুস্সান’’ন্তিআদীসু (অ. নি. ৪.৩১) হি অযং সম্পত্তিযং দিস্সতি. ‘‘পাদতলেসু চক্কানি জাতানী’’তি (দী. নি. ২.৩৫) এত্থ লক্খণে. ‘‘চক্কংৰ ৰহতো পদ’’ন্তি (ধ. প. ১) এত্থ রথঙ্গে. ‘‘চতুচক্কং নৰদ্ৰার’’ন্তি (সং. নি. ১.২৯) এত্থ ইরিযাপথে. ‘‘দদং ভুঞ্জ মা চ পমাদো, চক্কং পৰত্তয সব্বপাণিন’’ন্তি (জা. ১.৭.১৪৯) এত্থ দানে. ‘‘দিব্বং চক্করতনং পাতুরহোসী’’তি (দী. নি. ২.২৪৩) এত্থ রতনচক্কে. ‘‘মযা পৰত্তিতং চক্ক’’ন্তি (সু. নি. ৫৬২) এত্থ ধম্মচক্কে. ‘‘ইচ্ছাহতস্স পোসস্স, চক্কং ভমতি মত্থকে’’তি (জা. ১.১.১০৪; ১.৫.১০৩) এত্থ উরচক্কে. ‘‘খুরপরিযন্তেন চেপি চক্কেনা’’তি (দী. নি. ১.১৬৬) এত্থ পহরণচক্কে. ‘‘অসনিৰিচক্ক’’ন্তি (দী. নি. ৩.৬১; সং. নি. ২.১৬২) এত্থ অসনিমণ্ডলে. ইধ পনাযং ধম্মচক্কে অধিপ্পেতো.

তং পন ধম্মচক্কং দুৰিধং হোতি পটিৰেধঞাণঞ্চেৰ দেসনাঞাণঞ্চ. তত্থ পঞ্ঞাপভাৰিতং অত্তনো অরিযবলাৰহং পটিৰেধঞাণং. করুণাপভাৰিতং সাৰকানং অরিযবলাৰহং দেসনাঞাণং. তত্থ পটিৰেধঞাণং উপ্পজ্জমানং উপ্পন্নন্তি দুৰিধং. তঞ্হি অভিনিক্খমনতো যাৰ অরহত্তমগ্গা উপ্পজ্জমানং, ফলক্খণে উপ্পন্নং নাম. তুসিতভৰনতো ৰা যাৰ মহাবোধিপল্লঙ্কে অরহত্তমগ্গা উপ্পজ্জমানং, ফলক্খণে উপ্পন্নং নাম. দীপঙ্করদসবলতো পট্ঠায ৰা যাৰ অরহত্তমগ্গা উপ্পজ্জমানং, ফলক্খণে উপ্পন্নং নাম. দেসনাঞাণম্পি পৰত্তমানং পৰত্তন্তি দুৰিধং. তঞ্হি যাৰ অঞ্ঞাতকোণ্ডঞ্ঞস্স সোতাপত্তিমগ্গা পৰত্তমানং, ফলক্খণে পৰত্তং নাম. তেসু পটিৰেধঞাণং লোকুত্তরং, দেসনাঞাণং লোকিযং. উভযম্পি পনেতং অঞ্ঞেহি অসাধারণং, বুদ্ধানংযেৰ ওরসঞাণং.

ইদানি যেহি বলেহি সমন্নাগতো তথাগতো আসভং ঠানং পটিজানাতি, যানি আদিতোৰ ‘‘দস খো পনিমানি, সারিপুত্ত, তথাগতস্স তথাগতবলানী’’তি নিক্খিত্তানি, তানি ৰিত্থারতো দস্সেতুং কতমানি দস? ইধ, সারিপুত্ত, তথাগতো ঠানঞ্চ ঠানতোতিআদিমাহ. তত্থ ঠানঞ্চ ঠানতোতি কারণঞ্চ কারণতো. কারণঞ্হি যস্মা তত্থ ফলং তিট্ঠতি তদাযত্তৰুত্তিযায উপ্পজ্জতি চেৰ পৰত্ততি চ, তস্মা ঠানন্তি ৰুচ্চতি. তং ভগৰা ‘‘যে যে ধম্মা যেসং যেসং ধম্মানং হেতূ পচ্চযা উপ্পাদায, তং তং ঠানং. যে যে ধম্মা যেসং যেসং ধম্মানং ন হেতূ ন পচ্চযা উপ্পাদায, তং তং অট্ঠান’’ন্তি পজানন্তো ঠানঞ্চ ঠানতো অট্ঠানঞ্চ অট্ঠানতো যথাভূতং পজানাতি. অভিধম্মে পনেতং, ‘‘তত্থ কতমং তথাগতস্স ঠানঞ্চ ঠানতো অট্ঠানঞ্চ অট্ঠানতো যথাভূতং ঞাণ’’ন্তিআদিনা (ৰিভ. ৮০৯) নযেন ৰিত্থারিতমেৰ. যম্পীতি যেন ঞাণেন. ইদম্পি, সারিপুত্ত, তথাগতস্সাতি ইদম্পি ঠানাট্ঠানঞাণং তথাগতস্স তথাগতবলং নাম হোতীতি অত্থো. এৰং সব্বপদেসু যোজনা ৰেদিতব্বা.

কম্মসমাদানানন্তি সমাদিযিত্ৰা কতানং কুসলাকুসলকম্মানং, কম্মমেৰ ৰা কম্মসমাদানং. ঠানসো হেতুসোতি পচ্চযতো চেৰ হেতুতো চ. তত্থ গতিউপধিকালপযোগা ৰিপাকস্স ঠানং. কম্মং হেতু. ইমস্স পন ঞাণস্স ৰিত্থারকথা ‘‘অত্থেকচ্চানি পাপকানি কম্মসমাদানানি গতিসম্পত্তিপটিবাল়্হানি ন ৰিপচ্চন্তী’’তিআদিনা (ৰিভ. ৮১০) নযেন অভিধম্মে আগতাযেৰ.

সব্বত্থগামিনিন্তি সব্বগতিগামিনিং অগতিগামিনিঞ্চ. পটিপদন্তি মগ্গং. যথাভূতং পজানাতীতি বহূসুপি মনুস্সেসু একমেৰ পাণং ঘাতেন্তেসু ইমস্স চেতনা নিরযগামিনী ভৰিস্সতি, ইমস্স চেতনা তিরচ্ছানযোনিগামিনীতি ইমিনা নযেন একৰত্থুস্মিম্পি কুসলাকুসলচেতনাসঙ্খাতানং পটিপত্তীনং অৰিপরীততো সভাৰং জানাতি. ইমস্স চ ঞাণস্স ৰিত্থারকথা ‘‘তত্থ কতমং তথাগতস্স সব্বত্থগামিনিং পটিপদং যথাভূতং ঞাণং? ইধ তথাগতো অযং মগ্গো অযং পটিপদা নিরযগামীতি পজানাতী’’তিআদিনা (ৰিভ. ৮১১) নযেন অভিধম্মে আগতাযেৰ.

অনেকধাতুন্তি চক্খুধাতুআদীহি কামধাতুআদীহি ৰা ধাতূহি বহুধাতুং. নানাধাতুন্তি তাসংযেৰ ধাতূনং ৰিলক্খণতায নানপ্পকারধাতুং. লোকন্তি খন্ধাযতনধাতুলোকং. যথাভূতং পজানাতীতি তাসং তাসং ধাতূনং অৰিপরীততো সভাৰং পটিৰিজ্ঝতি. ইদম্পি ঞাণং ‘‘তত্থ কতমং তথাগতস্স অনেকধাতুনানাধাতুলোকং যথাভূতং ঞাণং, ইধ তথাগতো খন্ধনানত্তং পজানাতী’’তিআদিনা নযেন অভিধম্মে ৰিত্থারিতমেৰ.

নানাধিমুত্তিকতন্তি হীনাদীহি অধিমুত্তীহি নানাধিমুত্তিকভাৰং. ইদম্পি ঞাণং, ‘‘তত্থ কতমং তথাগতস্স সত্তানং নানাধিমুত্তিকতং যথাভূতং ঞাণং, ইধ তথাগতো পজানাতি সন্তি সত্তা হীনাধিমুত্তিকা’’তি আদিনা নযেন অভিধম্মে ৰিত্থারিতমেৰ.

পরসত্তানন্তি পধানসত্তানং. পরপুগ্গলানন্তি ততো পরেসং হীনসত্তানং. একত্থমেৰ ৰা এতং পদদ্ৰযং. ৰেনেয্যৰসেন পন দ্ৰেধা ৰুত্তং. ইন্দ্রিযপরোপরিযত্তন্তি সদ্ধাদীনং ইন্দ্রিযানং পরভাৰং অপরভাৰঞ্চ, ৰুদ্ধিঞ্চ হানিঞ্চাতি অত্থো. ইমস্সপি ঞাণস্স ৰিত্থারকথা – ‘‘তত্থ কতমং তথাগতস্স পরসত্তানং পরপুগ্গলানং ইন্দ্রিযপরোপরিযত্তং যথাভূতং ঞাণং, ইধ তথাগতো সত্তানং আসযং পজানাতি অনুসযং পজানাতী’’তিআদিনা (ৰিভ. ৮১৪) নযেন অভিধম্মে আগতাযেৰ.

ঝানৰিমোক্খসমাধিসমাপত্তীনন্তি পঠমাদীনং চতুন্নং ঝানানং রূপী রূপানি পস্সতীতিআদীনং অট্ঠন্নং ৰিমোক্খানং সৰিতক্কসৰিচারাদীনং তিণ্ণং সমাধীনং পঠমজ্ঝানসমাপত্তিআদীনঞ্চ নৰন্নং অনুপুব্বসমাপত্তীনং. সংকিলেসন্তি হানভাগিযধম্মং. ৰোদানন্তি ৰিসেসভাগিযধম্মং. ৰুট্ঠানন্তি ‘‘ৰোদানম্পি ৰুট্ঠানং. তম্হা তম্হা সমাধিম্হা ৰুট্ঠানম্পি ৰুট্ঠান’’ন্তি (ৰিভ. ৮২৮) এৰং ৰুত্তপগুণজ্ঝানঞ্চেৰ ভৰঙ্গফলসমাপত্তিযো চ. হেট্ঠিমং হেট্ঠিমঞ্হি পগুণজ্ঝানং উপরিমস্স উপরিমস্স পদট্ঠানং হোতি. তস্মা ‘‘ৰোদানম্পি ৰুট্ঠান’’ন্তি ৰুত্তং. ভৰঙ্গেন পন সব্বজ্ঝানেহি ৰুট্ঠানং হোতি. ফলসমাপত্তিযা নিরোধসমাপত্তিতো ৰুট্ঠানং হোতি. তং সন্ধায ‘‘তম্হা তম্হা সমাধিম্হা ৰুট্ঠানম্পি ৰুট্ঠান’’ন্তি ৰুত্তং. ইদম্পি ঞাণং ‘‘তত্থ কতমং তথাগতস্স ঝানৰিমোক্খসমাধিসমাপত্তীনং সংকিলেসং ৰোদানং ৰুট্ঠানং যথাভূতং ঞাণং, ঝাযীতি চত্তারো ঝাযী, অত্থেকচ্চো ঝাযী সম্পত্তিংযেৰ সমানং ৰিপত্তীতি পচ্চেতী’’তিআদিনা (ৰিভ. ৮২৮) নযেন অভিধম্মে ৰিত্থারিতং. সত্তন্নং ঞাণানং ৰিত্থারকথাৰিনিচ্ছযো সম্মোহৰিনোদনিযং ৰিভঙ্গট্ঠকথাযং ৰুত্তো. পুব্বেনিৰাসানুস্সতিদিব্বচক্খুঞাণকথা ৰিসুদ্ধিমগ্গে ৰিত্থারিতা. আসৰক্খযকথা ভযভেরৰে.

১৪৯. ইমানি খো সারিপুত্তাতি যানি পুব্বে ‘‘দস খো পনিমানি, সারিপুত্ত, তথাগতস্স তথাগতবলানী’’তি অৰোচং, ইমানি তানীতি অপ্পনং করোতি. তত্থ পরৰাদীকথা হোতি – দসবলঞাণং নাম পাটিযেক্কং নত্থি, সব্বঞ্ঞুতঞ্ঞাণস্সেৰাযং পভেদোতি. তং ন তথা দট্ঠব্বং. অঞ্ঞমেৰ হি দসবলঞাণং, অঞ্ঞং সব্বঞ্ঞুতঞ্ঞাণং. দসবলঞাণঞ্হি সকসককিচ্চমেৰ জানাতি. সব্বঞ্ঞুতঞাণং তম্পি ততো অৰসেসম্পি পজানাতি. দসবলঞাণেসু হি পঠমং কারণাকারণমেৰ জানাতি. দুতিযং কম্মন্তরৰিপাকন্তরমেৰ. ততিযং কম্মপরিচ্ছেদমেৰ. চতুত্থং ধাতুনানত্তকারণমেৰ. পঞ্চমং সত্তানং অজ্ঝাসযাধিমুত্তিমেৰ. ছট্ঠং ইন্দ্রিযানং তিক্খমুদুভাৰমেৰ. সত্তমং ঝানাদীহি সদ্ধিং তেসং সংকিলেসাদিমেৰ. অট্ঠমং পুব্বেনিৰুত্থখন্ধসন্ততিমেৰ. নৰমং সত্তানং চুতিপটিসন্ধিমেৰ. দসমং সচ্চপরিচ্ছেদমেৰ. সব্বঞ্ঞুতঞ্ঞাণং পন এতেহি জানিতব্বঞ্চ ততো উত্তরিঞ্চ পজানাতি. এতেসং পন কিচ্চং ন সব্বং করোতি. তঞ্হি ঝানং হুত্ৰা অপ্পেতুং ন সক্কোতি, ইদ্ধি হুত্ৰা ৰিকুব্বিতুং ন সক্কোতি, মগ্গো হুত্ৰা কিলেসে খেপেতুং ন সক্কোতি. অপিচ পরৰাদী এৰং পুচ্ছিতব্বো – ‘‘দসবলঞাণং নাম এতং সৰিতক্কসৰিচারং অৰিতক্কৰিচারমত্তং অৰিতক্কঅৰিচারং কামাৰচরং রূপাৰচরং অরূপাৰচরং লোকিযং লোকুত্তর’’ন্তি? জানন্তো পটিপাটিযা সত্ত ঞাণানি সৰিতক্কসৰিচারানীতি ৰক্খতি. ততো পরানি দ্ৰে অৰিতক্কঅৰিচারানীতি ৰক্খতি. আসৰক্খযঞাণং সিযা সৰিতক্কসৰিচারং, সিযা অৰিতক্কৰিচারমত্তং, সিযা অৰিতক্কঅৰিচারন্তি ৰক্খতি. তথা পটিপাটিযা সত্ত কামাৰচরানি, ততো পরানি দ্ৰে রূপাৰচরানি, অৰসানে একং লোকুত্তরন্তি ৰক্খতি, সব্বঞ্ঞুতঞ্ঞাণং পন সৰিতক্কসৰিচারমেৰ কামাৰচরমেৰ লোকিযমেৰাতি ৰক্খতি.

এৰমেত্থ অনুপদৰণ্ণনং কত্ৰা ইদানি যস্মা তথাগতো পঠমংযেৰ ঠানাট্ঠানঞাণেন ৰেনেয্যসত্তানং আসৰক্খযাধিগমস্স চেৰ অনধিগমস্স চ ঠানাট্ঠানভূতং কিলেসাৰরণাভাৰং পস্সতি, লোকিযসম্মাদিট্ঠিট্ঠানদস্সনতো নিযতমিচ্ছাদিট্ঠিট্ঠানাভাৰদস্সনতো চ. অথ নেসং কম্মৰিপাকঞাণেন ৰিপাকাৰরণাভাৰং পস্সতি, তিহেতুকপটিসন্ধিদস্সনতো. সব্বত্থগামিনীপটিপদাঞাণেন কম্মাৰরণাভাৰং পস্সতি, অনন্তরিযকম্মাভাৰদস্সনতো. এৰং অনাৰরণানং অনেকধাতুনানাধাতুঞাণেন অনুকূলধম্মদেসনত্থং চরিযৰিসেসং পস্সতি, ধাতুৰেমত্তদস্সনতো. অথ নেসং নানাধিমুত্তিকতাঞাণেন অধিমুত্তিং পস্সতি, পযোগং অনাদিযিত্ৰাপি অধিমুত্তিৰসেন ধম্মদেসনত্থং. অথেৰং দিট্ঠাধিমুত্তীনং যথাসত্তি যথাবলং ধম্মং দেসেতুং ইন্দ্রিযপরোপরিযত্তঞাণেন ইন্দ্রিযপরোপরিযত্তং পস্সতি, সদ্ধাদীনং তিক্খমুদুভাৰদস্সনতো. এৰং পরিঞ্ঞাতিন্দ্রিযপরোপরিযত্তা পন তে সচে দূরে হোন্তি, পঠমজ্ঝানাদীসু ৰসীভূতত্তা ইদ্ধিৰিসেসেন তে খিপ্পং উপগচ্ছতি. উপগন্ত্ৰা চ নেসং পুব্বেনিৰাসানুস্সতিঞাণেন পুব্বজাতিভাৰনং, দিব্বচক্খুঞাণানুভাৰতো পত্তব্বেন চেতোপরিযঞাণেন সম্পতি চিত্তৰিসেসং পস্সন্তো আসৰক্খযঞাণানুভাৰেন আসৰক্খযগামিনিযা পটিপদায ৰিগতসম্মোহত্তা আসৰক্খযায ধম্মং দেসেতি. তস্মা ইমিনা অনুক্কমেন ইমানি দসবলানি ৰুত্তানীতি ৰেদিতব্বানি.

তং, সারিপুত্ত, ৰাচং অপ্পহাযাতিআদীসু পুন এৰরূপিং ৰাচং ন ৰক্খামীতি ৰদন্তো তং ৰাচং পজহতি নাম. পুন এৰরূপং চিত্তং ন উপ্পাদেস্সামীতি চিন্তেন্তো চিত্তং পজহতি নাম. পুন এৰরূপং দিট্ঠিং ন গণ্হিস্সামীতি পজহন্তো দিট্ঠিং পটিনিস্সজ্জতি নাম, তথা অকরোন্তো নেৰ পজহতি, ন পটিনিস্সজ্জতি. সো যথাভতং নিক্খিত্তো এৰং নিরযেতি যথা নিরযপালেহি আহরিত্ৰা নিরযে ঠপিতো, এৰং নিরযে ঠপিতোযেৰাতি ৰেদিতব্বো.

ইদানিস্স অত্থসাধকং উপমং দস্সেন্তো সেয্যথাপীতিআদিমাহ. তত্থ সীলসম্পন্নোতিআদীসু লোকিযলোকুত্তরা সীলসমাধিপঞ্ঞা ৰেদিতব্বা. লোকুত্তরৰসেনেৰ ৰিনিৰত্তেতুম্পি ৰট্টতি. অযঞ্হি সম্মাৰাচাকম্মন্তাজীৰেহি সীলসম্পন্নো, সম্মাৰাযামসতিসমাধীহি সমাধিসম্পন্নো, সম্মাদিট্ঠিসঙ্কপ্পেহি পঞ্ঞাসম্পন্নো, সো এৰং সীলাদিসম্পন্নো ভিক্খু যথা দিট্ঠেৰ ধম্মে ইমস্মিংযেৰ অত্তভাৰে অঞ্ঞং আরাধেতি অরহত্তং পাপুণাতি, এৰংসম্পদমিদং, সারিপুত্ত, ৰদামি ইমম্পি কারণং এৰরূপমেৰ. যথা হি মগ্গানন্তরং অৰিরজ্ঝিত্ৰাৰ ফলং নিব্বত্ততি, এৰমেৰ ইমস্সাপি পুগ্গলস্স চুতিঅনন্তরং অৰিরজ্ঝিত্ৰাৰ নিরযে পটিসন্ধি হোতীতি দস্সেতি. সকলস্মিঞ্হি বুদ্ধৰচনে ইমায উপমায গাল়্হতরং কত্ৰা ৰুত্তউপমা নাম নত্থি.

১৫০. ৰেসারজ্জানীতি এত্থ সারজ্জপটিপক্খো ৰেসারজ্জং, চতূসু ঠানেসু সারজ্জাভাৰং পচ্চৰেক্খন্তস্স উপ্পন্নসোমনস্সমযঞাণস্সেতং নামং. সম্মাসম্বুদ্ধস্স তে পটিজানতোতি অহং সম্মাসম্বুদ্ধো, সব্বে ধম্মা মযা অভিসম্বুদ্ধাতি এৰং পটিজানতো তৰ. অনভিসম্বুদ্ধাতি ইমে নাম ধম্মা তযা অনভিসম্বুদ্ধা. তত্র ৰতাতি তেসু ৰত অনভিসম্বুদ্ধাতি এৰং দস্সিতধম্মেসু. সহধম্মেনাতি সহেতুনা সকারণেন ৰচনেন সুনক্খত্তো ৰিয ৰিপ্পলপন্তো অপ্পমাণং. নিমিত্তমেতন্তি এত্থ পুগ্গলোপি ধম্মোপি নিমিত্তন্তি অধিপ্পেতো. তং পুগ্গলং ন পস্সামি, যো মং পটিচোদেস্সতি, তং ধম্মং ন পস্সামি, যং দস্সেত্ৰা অযং নাম ধম্মো তযা অনভিসম্বুদ্ধোতি মং পটিচোদেস্সতীতি অযমেত্থ অত্থো. খেমপ্পত্তোতি খেমং পত্তো, সেসপদদ্ৰযং ইমস্সেৰ ৰেৰচনং. সব্বঞ্হেতং ৰেসারজ্জঞাণমেৰ সন্ধায ৰুত্তং. দসবলস্স হি অযং নাম ধম্মো তযা অনভিসম্বুদ্ধোতি চোদকং পুগ্গলং ৰা চোদনাকারণং অনভিসম্বুদ্ধধম্মং ৰা অপস্সতো সভাৰবুদ্ধোযেৰ ৰা সমানো অহং বুদ্ধোস্মীতি ৰদামীতি পচ্চৰেক্খন্তস্স বলৰতরং সোমনস্সং উপ্পজ্জতি. তেন সম্পযুত্তং ঞাণং ৰেসারজ্জং নাম. তং সন্ধায ‘‘খেমপ্পত্তো’’তিআদিমাহ. এৰং সব্বত্থ অত্থো ৰেদিতব্বো.

অন্তরাযিকা ধম্মাতি এত্থ পন অন্তরাযং করোন্তীতি অন্তরাযিকা, তে অত্থতো সঞ্চিচ্চ ৰীতিক্কন্তা সত্ত আপত্তিক্খন্ধা. সঞ্চিচ্চ ৰীতিক্কন্তঞ্হি অন্তমসো দুক্কট-দুব্ভাসিতম্পি মগ্গফলানং অন্তরাযং করোতি. ইধ পন মেথুনধম্মো অধিপ্পেতো. মেথুনং সেৰতো হি যস্স কস্সচি নিস্সংসযমেৰ মগ্গফলানং অন্তরাযো হোতি. যস্স খো পন তেসু অত্থাযাতি রাগক্খযাদীসু যস্স অত্থায. ধম্মো দেসিতোতি অসুভভাৰনাদিধম্মো কথিতো. তত্র ৰত মন্তি তস্মিং অনিয্যানিকধম্মে মং. সেসং ৰুত্তনযেনেৰ ৰেদিতব্বং.

দসবলঞাণাদিৰণ্ণনা নিট্ঠিতা.

অট্ঠপরিসৰণ্ণনা

১৫১. ‘‘অট্ঠ খো ইমা সারিপুত্তা’’তি ইদং কস্মা আরদ্ধং? ৰেসারজ্জঞাণস্স বলদস্সনত্থং. যথা হি ব্যত্তং পরিসং অজ্ঝোগাহেত্ৰা ৰিঞ্ঞূনং চিত্তং আরাধনসমত্থায কথায ধম্মকথিকস্স ছেকভাৰো পঞ্ঞাযতি, এৰং ইমা অট্ঠ পরিসা পত্ৰা ৰেসারজ্জঞাণস্স ৰেসারজ্জভাৰো সক্কা ঞাতুন্তি ৰেসারজ্জঞাণস্স বলং দস্সেন্তো, অট্ঠ খো ইমা সারিপুত্তাতিআদিমাহ.

তত্থ খত্তিযপরিসাতি খত্তিযানং সন্নিপতিত্ৰা নিসিন্নট্ঠানং, এস নযো সব্বত্থ. মারকাযিকানং পন সন্নিপতিত্ৰা নিসিন্নট্ঠানং মারপরিসা ৰেদিতব্বা, ন মারানং. সব্বাপি চেতা পরিসা উগ্গট্ঠানদস্সনৰসেন গহিতা. মনুস্সা হি ‘‘এত্থ রাজা নিসিন্নো’’তি পকতিৰচনম্পি ৰত্তুং ন সক্কোন্তি, কচ্ছেহি সেদা মুচ্চন্তি. এৰং উগ্গা খত্তিযপরিসা. ব্রাহ্মণা তীসু ৰেদেসু কুসলা হোন্তি, গহপতযো নানাৰোহারেসু চেৰ অক্খরচিন্তায চ. সমণা সকৰাদপরৰাদেসু কুসলা হোন্তি. তেসং মজ্ঝে ধম্মকথাকথনং নাম অতিৰিয ভারো. অমনুস্সাপি উগ্গা হোন্তি. অমনুস্সোতি হি ৰুত্তমত্তেপি মনুস্সানং সকলসরীরং সঙ্কম্পতি, তেসং রূপং ৰা দিস্ৰা সদ্দং ৰা সুত্ৰা সত্তা ৰিসঞ্ঞিনো হোন্তি. এৰং অমনুস্সপরিসা উগ্গা. তাসুপি ধম্মকথাকথনং নাম অতিৰিয ভারো. ইতি উগ্গট্ঠানদস্সনৰসেন তা গহিতাতি ৰেদিতব্বা.