নামরূপৰারৰণ্ণনা

১০০. নামরূপৰারে নমনলক্খণং নামং. রুপ্পনলক্খণং রূপং. ৰিত্থারৰারে পনস্স ৰেদনাতি ৰেদনাক্খন্ধো. সঞ্ঞাতি সঞ্ঞাক্খন্ধো. চেতনা ফস্সো মনসিকারোতি সঙ্খারক্খন্ধো ৰেদিতব্বো. কামঞ্চ অঞ্ঞেপি সঙ্খারক্খন্ধসঙ্গহিতা ধম্মা সন্তি, ইমে পন তযো সব্বদুব্বলেসুপি চিত্তেসু সন্তি. তস্মা এতেসংযেৰ ৰসেনেত্থ সঙ্খারক্খন্ধোপি দস্সিতো. চত্তারি চ মহাভূতানীতি এত্থ চত্তারীতি গণনপরিচ্ছেদো. মহাভূতানীতি পথৰীআপতেজৰাযানমেতং অধিৰচনং. যেন পন কারণেন তানি মহাভূতানীতি ৰুচ্চন্তি, যো চেত্থ অঞ্ঞো ৰিনিচ্ছযনযো, সো সব্বো ৰিসুদ্ধিমগ্গে রূপক্খন্ধনিদ্দেসে ৰুত্তো.

চতুন্নঞ্চ মহাভূতানং উপাদাযাতি এত্থ পন চতুন্নন্তি উপযোগত্থে সামিৰচনং, চত্তারি চ মহাভূতানীতি ৰুত্তং হোতি. উপাদাযাতি উপাদিযিত্ৰা, গহেত্ৰাতি অত্থো. নিস্সাযাতিপি একে. ৰত্তমানন্তি অযঞ্চেত্থ পাঠসেসো. সমূহত্থে ৰা এতং সামিৰচনং. তেন চতুন্নঞ্চ মহাভূতানং সমূহং উপাদায পৰত্তমানং রূপন্তি অযমত্থো ৰেদিতব্বো. এৰং সব্বত্থাপি যানি চত্তারি পথৰীআদীনি মহাভূতানি, যঞ্চ চতুন্নং মহাভূতানং উপাদায ৰত্তমানং চক্খাযতনাদিভেদেন অভিধম্মপাল়িযমেৰ ৰুত্তং তেৰীসতিৰিধং রূপং, তং সব্বম্পি ‘‘রূপ’’ন্তি ৰেদিতব্বং. ৰিঞ্ঞাণসমুদযাতি এত্থ পন যং ৰিঞ্ঞাণং যস্স নামস্স যস্স চ রূপস্স যস্স চ নামরূপস্স পচ্চযো হোতি, তস্স ৰসেন ৰিসুদ্ধিমগ্গে পটিচ্চসমুপ্পাদনিদ্দেসে ৰুত্তনযেনেৰ ৰিঞ্ঞাণসমুদযা নামরূপসমুদযো ৰেদিতব্বো. সেসং ৰুত্তনযমেৰাতি.

নামরূপৰারৰণ্ণনা নিট্ঠিতা.