১০. সেরীসকৰিমানৰণ্ণনা
সুণোথ যক্খস্স চ ৰাণিজান চাতি সেরীসকৰিমানং. তস্স কা উপ্পত্তি? ভগৰতি পরিনিব্বুতে আযস্মা কুমারকস্সপো পঞ্চহি ভিক্খুসতেহি সদ্ধিং সেতব্যনগরং সম্পত্তো. তত্থ পাযাসিরাজঞ্ঞং অত্তনো সন্তিকং উপগতং ৰিপরীতগ্গাহতো ৰিৰেচেত্ৰা সম্মাদস্সনে পতিট্ঠাপেসি. সো ততো পট্ঠায পুঞ্ঞপসুতো হুত্ৰা সমণব্রাহ্মণানং দানং দেন্তো তত্থ অকতপরিচযতায অসক্কচ্চং দানং দত্ৰা অপরভাগে কালং কত্ৰা চাতুমহারাজিকভৰনে সুঞ্ঞে সেরীসকে ৰিমানে নিব্বত্তি.
অতীতে কির কস্সপস্স ভগৰতো কালে একো খীণাসৰত্থেরো অঞ্ঞতরস্মিং গামে পিণ্ডায চরিত্ৰা বহিগামে দেৰসিকং একস্মিং পদেসে ভত্তকিচ্চং অকাসি. তং দিস্ৰা একো গোপালকো ‘‘অয্যো সূরিযাতপেন কিলমতী’’তি পসন্নচিত্তো চতূহি সিরীসথম্ভেহি সাখামণ্ডপং কত্ৰা অদাসি, মণ্ডপস্স সমীপে সিরীসরুক্খং রোপেসীতি চ ৰদন্তি. সো কালং কত্ৰা তেনেৰ পুঞ্ঞকম্মেন চাতুমহারাজিকেসু নিব্বত্তি, তস্স পুরিমকম্মস্স সূচকং ৰিমানদ্ৰারে সিরীসৰনং নিব্বত্তি ৰণ্ণগন্ধসম্পন্নেহি পুপ্ফেহি সব্বকালং উপসোভমানং, তেন তং ৰিমানং ‘‘সেরীসক’’ন্তি পঞ্ঞাযিত্থ. সো চ দেৰপুত্তো একং বুদ্ধন্তরং দেৰেসু চেৰ মনুস্সেসু চ সংসরন্তো ইমস্মিং বুদ্ধুপ্পাদে যসত্থেরস্স চতূসু ৰিমলাদীসু গিহিসহাযেসু গৰম্পতি নাম হুত্ৰা ভগৰতো ধম্মদেসনায অরহত্তে পতিট্ঠিতো পুব্বাচিণ্ণৰসেন তং সুঞ্ঞৰিমানং দিস্ৰা অভিণ্হং দিৰাৰিহারং গচ্ছতি.
সো অপরভাগে পাযাসিদেৰপুত্তং তত্থ দিস্ৰা ‘‘কোসি ত্ৰং, আৰুসো’’তি পুচ্ছিত্ৰা তেন ‘‘অহং, ভন্তে, পাযাসিরাজঞ্ঞো ইধূপপন্নো’’তি ৰুত্তে ‘‘ননু ত্ৰং মিচ্ছাদিট্ঠিকো ৰিপরীতদস্সনো কথমিধূপপন্নো’’তি আহ. অথ নং পাযাসিদেৰপুত্তো ‘‘অয্যেনম্হি কুমারকস্সপত্থেরেন মিচ্ছাদস্সনতো ৰিৰেচিতো, পুঞ্ঞকিরিযানং অসক্কচ্চকারিতায পন সুঞ্ঞে ৰিমানে নিব্বত্তো. সাধু, ভন্তে, মনুস্সলোকং গতকালে মম পরিজনস্স আরোচেথ ‘পাযাসিরাজঞ্ঞো অসক্কচ্চং দানং দত্ৰা সুঞ্ঞং সেরীসকৰিমানং উপপন্নো, তুম্হে পন সক্কচ্চং পুঞ্ঞানি কত্ৰা তত্রূপপত্তিযা চিত্তং পণিদহথা’’তি. থেরো তস্সানুকম্পায তথা অকাসি. তেপি থেরস্স ৰচনং সুত্ৰা তথা চিত্তং পণিধায পুঞ্ঞানি কত্ৰা সেরীসকে ৰিমানে নিব্বত্তিংসু. সেরীসকদেৰপুত্তং পন ৰেস্সৰণমহারাজা মরুভূমিযং ছাযূদকরহিতে মগ্গে মগ্গপটিপন্নানং মনুস্সানং অমনুস্সপরিপন্থ মোচনত্থং মগ্গরক্খকং ঠপেসি.
অথ অপরেন সমযেন অঙ্গমগধৰাসিনো ৰাণিজা সকটসহস্সং ভণ্ডস্স পূরেত্ৰা সিন্ধুসোৰীরদেসং গচ্ছন্তা মরুকন্তারে দিৰা উণ্হভযেন মগ্গং অপ্পটিপজ্জিত্ৰা রত্তিং নক্খত্তসঞ্ঞায মগ্গং পটিপজ্জিংসু. তে মগ্গমূল়্হা হুত্ৰা অঞ্ঞং দিসং অগমংসু. তেসং অন্তরে একো উপাসকো অহোসি সদ্ধো পসন্নো সীলসম্পন্নো অরহত্তপ্পত্তিযা উপনিস্সযসম্পন্নো মাতাপিতূনং উপট্ঠানত্থং ৰণিজ্জায গতো. তং অনুগ্গণ্হন্তো সেরীসকদেৰপুত্তো সহ ৰিমানেন অত্তানং দস্সেসি. দস্সেত্ৰা চ পন ‘‘কস্মা তুম্হে ইমং ছাযূদকরহিতং ৰালুকাকন্তারং পটিপন্না’’তি পুচ্ছি. তে চস্স তত্থ অত্তনো আগতপ্পকারং কথেসুং, তদত্থদীপনা দেৰপুত্তস্স ৰাণিজানঞ্চ ৰচনপটিৰচনগাথা হোন্তি. আদিতো পন দ্ৰে গাথা তাসং সম্বন্ধদস্সনত্থং ধম্মসঙ্গাহকেহি ঠপিতা –
১২২৮. ‘‘সুণোথ যক্খস্স চ ৰাণিজান চ, সমাগমো যত্থ তদা অহোসি;
যথা কথং ইতরিতরেন চাপি, সুভাসিতং তঞ্চ সুণাথ সব্বে.
১২২৯. ‘‘যো সো অহু রাজা পাযাসি নাম, ভুম্মানং সহব্যগতো যসস্সী;
সো মোদমানোৰ সকে ৰিমানে, অমানুসো মানুসে অজ্ঝভাসী’’তি.
১২২৮-৯. তত্থ সুণোথাতি সৰনাণত্তিকৰচনং. যং মযং ইদানি ভণাম, তং সুণোথাতি. যক্খস্সাতি দেৰস্স. দেৰো হি মনুস্সানং একচ্চানং দেৰানঞ্চ পূজনীযভাৰতো ‘‘যক্খো’’তি ৰুচ্চতি. অপিচ সক্কোপি চত্তারো মহারাজানোপি ৰেস্সৰণপারিসজ্জাপি পুরিসোপি ‘‘যক্খো’’তি ৰুচ্চতি. তথা হি ‘‘অতিবাল়্হং খো অযং যক্খো পমত্তো ৰিহরতি, যংনূনাহং ইমং যক্খং সংৰেজেয্য’’ন্তিআদীসু (ম. নি. ১.৩৯৩) সক্কো ‘‘যক্খো’’তি ৰুত্তো. ‘‘চত্তারো যক্খা খগ্গহত্থা’’তিআদীসু মহারাজানো. ‘‘সন্তি হি, ভন্তে, উল়ারা যক্খা ভগৰতো অপ্পসন্না’’তিআদীসু (দী. নি. ৩.২৭৬) ৰেস্সৰণপারিসজ্জা. ‘‘এত্তাৰতা যক্খস্স সুদ্ধী’’তিআদীসু (সু. নি. ৪৮২) পুরিসো. ইধ পন ৰেস্সৰণপারিসজ্জো অধিপ্পেতো. ৰাণিজান চাতি গাথাবন্ধসুখত্থং অনুনাসিকলোপং কত্ৰা ৰুত্তং. সমাগমোতি সমোধানং. যত্থাতি যস্মিং ৰণ্ণুপথে. তদাতি তস্মিং মগ্গমূল়্হা হুত্ৰা গমনকালে. ইতরিতরেন চাপীতি ইতরীতরঞ্চাপি, ইদং যথাতি ইমিনা যোজেতব্বং. অযঞ্হেত্থ অত্থো – সেরীসকদেৰপুত্তস্স ৰাণিজানঞ্চ তদা যত্থ সমাগমো অহোসি, তং সুণোথ, যথা ৰাপি তেহি অঞ্ঞমঞ্ঞং সুভাসিতং সুলপিতং কথং পৰত্তিতং, তঞ্চ সব্বে ওহিতচিত্তা সুণাথাতি. ভুম্মানন্তি ভুম্মদেৰানং.
ইদানি যক্খস্স পুচ্ছাগাথাযো হোন্তি –
১২৩০. ‘‘ৰঙ্কে অরঞ্ঞে অমনুস্সট্ঠানে, কন্তারে অপ্পোদকে অপ্পভক্খে;
সুদুগ্গমে ৰণ্ণুপথস্স মজ্ঝে, ৰঙ্কংভযা নট্ঠমনা মনুস্সা.
১২৩১. ‘‘নযিধ ফলা মূলমযা চ সন্তি, উপাদানং নত্থি কুতোধ ভক্খো;
অঞ্ঞত্র পংসূহি চ ৰালুকাহি চ, তত্তাহি উণ্হাহি চ দারুণাহি চ.
১২৩২. ‘‘উজ্জঙ্গলং তত্তমিৰং কপালং, অনাযসং পরলোকেন তুল্যং;
লুদ্দানমাৰাসমিদং পুরাণং, ভূমিপ্পদেসো অভিসত্তরূপো.
১২৩৩. ‘‘অথ তুম্হে কেন ৰণ্ণেন, কিমাসমানা ইমং পদেসঞ্হি;
অনুপৰিট্ঠা সহসা সমেচ্চ, লোভা ভযা অথ ৰা সম্পমূল়্হা’’তি.
১২৩০. তত্থ ৰঙ্কেতি সংসযট্ঠানে. যত্থ পৰিট্ঠানং ‘‘জীৰিস্সাম নু খো, মরিস্সাম নু খো’’তি জীৰিতে সংসযো হোতি, তাদিসে অরঞ্ঞে. অমনুস্সট্ঠানেতি অমনুস্সানং পিসাচাদীনং সঞ্চরণট্ঠানে, মনুস্সানং ৰা অগোচরট্ঠানে. কন্তারেতি নিরুদকে ইরিণে, কং তারেন্তি নযন্তি এত্থাতি হি কন্তারো, উদকং গহেত্ৰা তরিতব্বট্ঠানং. তেনাহ ‘‘অপ্পোদকে’’তি. অপ্প-সদ্দো হেত্থ অভাৰত্থো ‘‘অপ্পিচ্ছো অপ্পনিগ্ঘোসো’’তিআদীসু (অ. নি. ৮.২৩; চূল়ৰ. ৪৫৬) ৰিয. ৰণ্ণুপথস্স মজ্ঝেতি ৰালুকাকন্তারমজ্ঝেতি অত্থো. ৰঙ্কংভযাতি ৰঙ্কেহি ভীতা. ৰঙ্কেহি ভযং এতেসন্তি ‘‘ৰঙ্কভযা’’তি ৰত্তব্বে গাথাসুখত্থং সানুনাসিকং কত্ৰা ‘‘ৰঙ্কংভযা’’তি ৰুত্তং. ইদঞ্চ ৰালুকাকন্তারপৰেসনতো পুব্বে তেসং উপ্পন্নভযং সন্ধায ৰুত্তং. নট্ঠমনাতি মগ্গসতিৰিপ্পৰাসেন নট্ঠমানসা, মগ্গমূল়্হাতি অত্থো. মনুস্সাতি তেসং আলপনং.
১২৩১. ইধাতি ইমস্মিং মরুকন্তারে. ফলাতি অম্বজম্বুতালনাল়িকেরাদিফলানি ন সন্তীতি যোজনা. মূলমযা চাতি মূলানিযেৰ মূলমযা, ৰল্লিকন্দাদীনি সন্ধায ৰদতি. উপাদানং নত্থীতি কিঞ্চাপি কিঞ্চি ভক্খং নত্থি, উপাদানং ৰা ইন্ধনং, অগ্গিস্স ইন্ধনমত্তম্পি নত্থি, কুতো কেন কারণেন ইধ মরুকন্তারে ভক্খো সিযাতি অত্থো. যং পন অত্থি তত্থ, তং দস্সেতুং ‘‘অঞ্ঞত্র পংসূহী’’তিআদি ৰুত্তং.
১২৩২. উজ্জঙ্গলন্তি জঙ্গলং ৰুচ্চতি লূখধূসরো অনুদকো ভূমিপ্পদেসো, তং পন ঠানং জঙ্গলতোপি উক্কংসেন জঙ্গলন্তি আহ ‘‘উজ্জঙ্গল’’ন্তি. তেনাহ ‘‘তত্তমিৰং কপাল’’ন্তি, তত্তং অযোকপালসদিসন্তি অত্থো. গাথাসুখত্থঞ্চেত্থ সানুনাসিকং কত্ৰা ৰুত্তং, তত্তমিৰইচ্চেৰ দট্ঠব্বং. অনাযসন্তি নত্থি এত্থ আযো সুখন্তি অনাযং, ততো এৰ জীৰিতং সীযতি ৰিনাসেতীতি অনাযসং. অথ ৰা ন আযসন্তি অনাযসং. পরলোকেনাতি নরকেন তুল্যং. নরকঞ্হি সত্তানং একন্তানত্থতায পরভূতো পটিসত্তুভূতো লোকোতি ৰিসেসতো ‘‘পরলোকো’’তি ৰুচ্চতি, সমন্ততো অযোমযত্তা আযসঞ্চ, ইদং পন তদভাৰতো অনাযসং, মহতো দুক্খস্স উপ্পত্তিট্ঠানতায পরলোকসদিসন্তি দস্সেতি, ‘‘অনস্সয’’ন্তি চ কেচি পঠন্তি, সুখস্স অপ্পতিট্ঠানভূতন্তি অত্থো. লুদ্দানমাৰাসমিদং পুরাণন্তি ইদং ঠানং চিরকালতো পট্ঠায লুদ্দানং দারুণানং পিসাচাদীনং আৰাসভূতং. অভিসত্তরূপোতি ‘‘এৰং লূখো ঘোরাকারো হোতূ’’তি পোরাণেহি ইসীহি সপিতসদিসো, দিন্নসপো ৰিযাতি অত্থো.
১২৩৩. কেন ৰণ্ণেনাতি কেন কারণেন. কিমাসমানাতি কিং পচ্চাসীসন্তা. হীতি নিপাতমত্তং. ‘‘পদেসম্পী’’তি চ পঠন্তি, ইমম্পি নাম পদেসন্তি অত্থো. সহসা সমেচ্চাতি সহসা আদীনৰানিসংসে অৰিচারেত্ৰা সমৰাযেন অনুপৰিট্ঠা সপ্পৰিট্ঠা. লোভা ভযা অথ ৰা কেনচি অনত্থকামেন পলোভিতা লোভতো কেনচি অমনুস্সাদিনা পরিপাতিতা ভযা ৰা. অথ ৰা সম্পমূল়্হাতি মগ্গৰিপ্পনট্ঠা ইমং পদেসং অনুপৰিট্ঠাতি যোজনা.
ইদানি ৰাণিজা আহংসু –
১২৩৪. ‘‘মগধেসু অঙ্গেসু চ সত্থৰাহা, আরোপযিত্ৰা পণিযং পুথুত্তং;
তে যামসে সিন্ধুসোৰীরভূমিং, ধনত্থিকা উদ্দযং পত্থযানা.
১২৩৫. ‘‘দিৰা পিপাসংনধিৰাসযন্তা, যোগ্গানুকম্পঞ্চ সমেক্খমানা;
এতেন ৰেগেন আযাম সব্বে, রত্তিং মগ্গং পটিপন্না ৰিকালে.
১২৩৬. ‘‘তে দুপ্পযাতা অপরদ্ধমগ্গা, অন্ধাকুলা ৰিপ্পনট্ঠা অরঞ্ঞে;
সুদুগ্গমে ৰণ্ণুপথস্স মজ্ঝে, দিসং ন জানাম পমূল়্হচিত্তা.
১২৩৭. ‘‘ইদঞ্চ দিস্ৰান অদিট্ঠপুব্বং, ৰিমানসেট্ঠঞ্চ তৰঞ্চ যক্খ;
ততুত্তরিং জীৰিতমাসমানা, দিস্ৰা পতীতা সুমনা উদগ্গা’’তি.
১২৩৪. তত্থ মগধেসু অঙ্গেসু চ সত্থৰাহাতি মগধরট্ঠে চ অঙ্গরট্ঠে চ জাতা সংৰড্ঢা তংনিৰাসিনো সত্থে সত্থস্স চ ৰাহনকা সত্থকা চেৰ সত্থসামিকা চ. পণিযন্তি ভণ্ডং. তেতি তে মযং. যামসেতি গচ্ছাম. সিন্ধুসোৰীরভূমিন্তি সিন্ধুদেসং সোৰীরদেসঞ্চ. উদ্দযন্তি আনিসংসং অতিরেকলাভং.
১২৩৫. অনধিৰাসযন্তাতি অধিৰাসেতুং অসক্কোন্তা. যোগ্গানুকম্পন্তি গোণাদীনং সত্তানং অনুগ্গহং. এতেন ৰেগেনাতি ইমিনা জৰেন, যেন তৰ দস্সনতো পুব্বে আযাম আগতম্হ. রত্তিং মগ্গং পটিপন্নাতি রত্তিযং মগ্গং পটিপন্না. ৰিকালেতি অকালে অৰেলাযং.
১২৩৬. দুপ্পযাতাতি দুট্ঠু পযাতা অপথে গতা, ততো এৰ অপরদ্ধমগ্গা. অন্ধাকুলাতি অন্ধা ৰিয আকুলা, মগ্গজাননসমত্থস্স পঞ্ঞাচক্খুনো অভাৰেন অন্ধা, ততো এৰ আকুলা, ৰিপ্পনট্ঠা চ মগ্গসম্মূল়্হতায. দিসন্তি গন্তব্বদিসং, যস্সং দিসাযং সিন্ধুসোৰীরদেসো, তং দিসং. পমূল়্হচিত্তাতি দিসাসংসযসুমূল়্হচিত্তা.
১২৩৭. তৰঞ্চাতি তুৰঞ্চ. যক্খাতি আলপনং. ততুত্তরিং জীৰিতমাসমানাতি যো ‘‘ইতো পরং অম্হাকং জীৰিতং নত্থী’’তি জীৰিতসংসযো উপ্পন্নো, ইদানি ততো উত্তরিম্পি জীৰিতং আসীসন্তা. দিস্ৰাতি দস্সনহেতু. পতীতাতি পহট্ঠা. সুমনাতি সোমনস্সপ্পত্তা. উদগ্গাতি উদগ্গায পীতিযা উদগ্গচিত্তা.
এৰং ৰাণিজেহি অত্তনো পৰত্তিযা পকাসিতায পুন দেৰপুত্তো দ্ৰীহি গাথাহি পুচ্ছি –
১২৩৮. ‘‘পারং সমুদ্দস্স ইমঞ্চ ৰণ্ণুং, ৰেত্তাচরং সঙ্কুপথঞ্চ মগ্গং;
নদিযো পন পব্বতানঞ্চ দুগ্গা, পুথুদ্দিসা গচ্ছথ ভোগহেতু.
১২৩৯. ‘‘পক্খন্দিযান ৰিজিতং পরেসং, ৰেরজ্জকে মানুসে পেক্খমানা;
যং ৰো সুতং ৰা অথ ৰাপি দিট্ঠং, অচ্ছেরকং তং ৰো সুণোম তাতা’’তি.
তস্সত্থো – পারং সমুদ্দস্সাতি সমুদ্দস্স পরতীরং, ইমঞ্চ ঈদিসং, ৰণ্ণুং ৰণ্ণুপথং ৰেত্তলতা বন্ধিত্ৰা আচরিতব্বতো ৰেত্তাচরং মগ্গং, সঙ্কুকে খাণুকে কোট্টেত্ৰা গন্তব্বতো সঙ্কুপথং মগ্গং, নদিযো পন চন্দভাগাদিকা, পব্বতানঞ্চ ৰিসমপ্পদেসাতি এৰং দুগ্গা পুথুদ্দিসা ভোগনিমিত্তং গচ্ছথ, এৰং গচ্ছন্তা চ পক্খন্দিযান পক্খন্দিত্ৰা অনুপৰিসিত্ৰা, পরেসং রাজূনং ৰিজিতং তত্থ ৰেরজ্জকে ৰিদেসৰাসিকে মনুস্সে পেক্খমানা গচ্ছথ, এৰংভূতেহি ৰো তুম্হেহি যং সুতং ৰা অথ ৰা দিট্ঠং ৰা অচ্ছেরকং অচ্ছরিযং, তং ৰো সন্তিকে তাতা ৰাণিজা সুণোমাতি অত্তনো ৰিমানস্স অচ্ছরিযভাৰং তেহি কথাপেতুকামো পুচ্ছতি.
এৰং দেৰপুত্তেন পুট্ঠা ৰাণিজা আহংসু –
১২৪০. ‘‘ইতোপি অচ্ছেরতরং কুমার, ন নো সুতং ৰা অথ ৰাপি দিট্ঠং;
অতীতমানুসকমেৰ সব্বং, দিস্ৰা ন তপ্পাম অনোমৰণ্ণং.
১২৪১. ‘‘ৰেহাযসং পোক্খরঞ্ঞো সৰন্তি, পহূতমল্যা বহুপুণ্ডরীকা;
দুমা চিমে নিচ্চফলূপপন্না, অতীৰ গন্ধা সুরভিং পৰাযন্তি.
১২৪২. ‘‘ৰেল়ূরিযথম্ভা সতমুস্সিতাসে, সিলাপৰাল়স্স চ আযতংসা;
মসারগল্লা সহলোহিতঙ্গা, থম্ভা ইমে জোতিরসামযাসে.
১২৪৩. ‘‘সহস্সথম্ভং অতুলানুভাৰং, তেসূপরি সাধুমিদং ৰিমানং;
রতনন্তরং কঞ্চনৰেদিমিস্সং, তপনীযপট্টেহি চ সাধুছন্নং.
১২৪৪. ‘‘জম্বোনদুত্তত্তমিদং সুমট্ঠো, পাসাদসোপানফলূপপন্নো;
দল়্হো চ ৰগ্গু চ সুসঙ্গতো চ, অতীৰ নিজ্ঝানখমো মনুঞ্ঞো.
১২৪৫. ‘‘রতনন্তরস্মিং বহুঅন্নপানং, পরিৰারিতো অচ্ছরাসঙ্গণেন;
মুরজআলম্বরতূরিযঘুট্ঠো, অভিৰন্দিতোসি থুতিৰন্দনায.
১২৪৬. ‘‘সো মোদসি নারিগণপ্পবোধনো, ৰিমানপাসাদৰরে মনোরমে;
অচিন্তিযো সব্বগুণূপপন্নো, রাজা যথা ৰেস্সৰণো নল়িন্যা.
১২৪৭. ‘‘দেৰো নু আসি উদৰাসি যক্খো,
উদাহু দেৰিন্দো মনুস্সভূতো;
পুচ্ছন্তি তং ৰাণিজা সত্থৰাহা,
আচিক্খ কো নাম তুৰংসি যক্খো’’তি.
১২৪০-২. তত্থ কুমারাতি পঠমৰযে ঠিতত্তা দেৰপুত্তং আলপতি. সব্বন্তি দেৰপুত্তং তস্স ৰিমানপটিবদ্ধঞ্চ সন্ধায ৰদতি. পোক্খরঞ্ঞোতি পোক্খরণিযো. সতমুস্সিতাসেতি সতরতনুব্বেধা. সিলাপৰাল়স্সাতি সিলায পৰাল়স্স চ, সিলামযা পৰাল়মযাতি অত্থো. আযতংসাতি দীঘংসা. অথ ৰা আযতা হুত্ৰা অট্ঠসোল়সদ্ৰত্তিংসাদিঅংসৰন্তো.
১২৪২. তেসূপরীতি তেসং থম্ভানং উপরি. সাধুমিদন্তি সুন্দরং ইদং তৰ ৰিমানং. রতনন্তরন্তি রতনন্তরৰন্তং, ভিত্তিথম্ভসোপানাদীসু নানাৰিধেহি অঞ্ঞেহি রতনেহি যুত্তং. কঞ্চনৰেদিমিস্সন্তি সুৰণ্ণমযায ৰেদিকায সহিতং পরিক্খিত্তং. তপনীযপট্টেহি চ সাধুছন্নন্তি তপনীযমযেহি অনেকরতনমযেহি চ ছদনেহি তত্থ তত্থ সুট্ঠু ছাদিতং.
১২৪৪. জম্বোনদুত্তত্তমিদন্তি ইদং তৰ ৰিমানং যেভুয্যেন উত্তত্তজম্বুনদভাসুরং. সুমট্ঠো পাসাদসোপানফলূপপন্নোতি তস্স চ সো সো পদেসো সুমট্ঠো সুট্ঠু মজ্জিতো, তেহি তেহি অনন্তরপাসাদেহি সোপানৰিসেসেহি রমণীযেহি ফলকেহি চ যুত্তো. দল়্হোতি থিরো. ৰগ্গূতি অভিরূপো সমুগ্গতো. সুসঙ্গতোতি সুট্ঠু সঙ্গতাৰযৰো অঞ্ঞমঞ্ঞানুরূপপাসাদাৰযৰো. অতীৰ নিজ্ঝানখমোতি পভস্সরভাৰেপি অতিৰিয ওলোকনক্খমো. মনুঞ্ঞোতি মনোরমো.
১২৪৫. রতনন্তরস্মিন্তি রতনমযে, রতনভূতে ৰা সারভূতে ৰিমানস্স অব্ভন্তরে. বহুঅন্নপানন্তি পেসলং পহূতং অন্নঞ্চ পানঞ্চ ৰিজ্জতি, উপলব্ভতীতি অধিপ্পাযো. মুরজআলম্বরতূরিযঘুট্ঠোতি মুদিঙ্গানং আলম্বরানং অৰসিট্ঠতূরিযানঞ্চ সদ্দেহি নিচ্চঘোসিতো. অভিৰন্দিতোসীতি নমস্সিতো, থোমিতো ৰা অসি. তেনাহ ‘‘থূতিৰন্দনাযা’’তি.
১২৪৬. অচিন্তিযোতি অচিন্তেয্যানুভাৰো. নল়িন্যাতি এৰংনামকে কীল়নট্ঠানে যথা ৰেস্সৰণো মহারাজা, এৰং ত্ৰং মোদসীতি যোজনা.
১২৪৭. আসীতি অসি ভৰসি. দেৰিন্দোতি সক্কো দেৰরাজা. মনুস্সভূতোতি মনুস্সেসু ভূতো মনুস্সজাতিকো. যক্খোতি দেৰাদিভাৰং পুচ্ছিত্ৰাপি যক্খভাৰং আসঙ্কন্তা ৰদন্তি.
ইদানি সো দেৰপুত্তো অত্তানং জানাপেন্তো –
১২৪৮. ‘‘সেরীসকো নাম অহম্হি যক্খো, কন্তারিযো ৰণ্ণুপথম্হি গুত্তো;
ইমং পদেসং অভিপালযামি, ৰচনকরো ৰেস্সৰণস্স রঞ্ঞো’’তি. –
আহ. তত্থ অহম্হী যক্খোতি অহং যক্খো অম্হি. কন্তারিযোতি আরক্খণত্থং কন্তারে নিযুত্তো. গুত্তোতি গোপকো. তেনাহ ‘‘অভিপালযামী’’তি.
ইদানি ৰাণিজা তস্স কম্মাদীনি পুচ্ছন্তা আহংসু –
১২৪৯. ‘‘অধিচ্চলদ্ধং পরিণামজং তে, সযংকতং উদাহু দেৰেহি দিন্নং;
পুচ্ছন্তি তং ৰাণিজা সত্থৰাহা, কথং তযা লদ্ধমিদং মনুঞ্ঞ’’ন্তি.
তত্থ অধিচ্চলদ্ধন্তি অধিচ্চসমুপ্পত্তিকং, যদিচ্ছকং লদ্ধন্তি অত্থো. পরিণামজং তেতি নিযতিসঙ্গতিভাৰপরিণতং, কালপরিণতং ৰা. সযংকতন্তি তযা সযমেৰ কতং, দেৰিদ্ধিযা তযা সযমেৰ নিব্বত্তিতন্তি অত্থো. উদাহু দেৰেহি দিন্নন্তি তযা আরাধিতেহি দেৰেহি পসাদৰসেন নিস্সট্ঠং.
ইদানি দেৰপুত্তো চতুরোপি পকারে পটিক্খিপিত্ৰা পুঞ্ঞমেৰ অপদিসন্তো –
১২৫০. ‘‘নাধিচ্চলদ্ধং ন পরিণামজং মে, ন সযংকতং ন হি দেৰেহি দিন্নং;
সকেহি কম্মেহি অপাপকেহি, পুঞ্ঞেহি মে লদ্ধমিদং মনুঞ্ঞ’’ন্তি. –
গাথমাহ.
তং সুত্ৰা ৰাণিজা পুন ‘‘নাধিচ্চলদ্ধ’’ন্তি গাথাযং পুঞ্ঞাধিকমেৰ তে চতুরো পকারে আরোপেত্ৰা পুঞ্ঞস্স চ সরূপং পুচ্ছিংসু –
১২৫১. ‘‘কিং তে ৰতং কিং পন ব্রহ্মচরিযং, কিস্স সুচিণ্ণস্স অযং ৰিপাকো;
পুচ্ছন্তি তং ৰাণিজা সত্থৰাহা, কথং তযা লদ্ধমিদং ৰিমান’’ন্তি.
তত্থ ৰতন্তি ৰতসমাদানং. ব্রহ্মচরিযন্তি সেট্ঠচরিযং.
পুন দেৰপুত্তো তে পটিক্খিপিত্ৰা অত্তানং যথূপচিতং পুঞ্ঞঞ্চ দস্সেন্তো –
১২৫২. ‘‘মমং পাযাসীতি অহু সমঞ্ঞা, রজ্জং যদা কারযিং কোসলানং;
নত্থিকদিট্ঠি কদরিযো পাপধম্মো, উচ্ছেদৰাদী চ তদা অহোসিং.
১২৫৩. ‘‘সমণো চ খো আসি কুমারকস্সপো, বহুস্সুতো চিত্তকথী উল়ারো;
সো মে তদা ধম্মকথং অভাসি, দিট্ঠিৰিসূকানি ৰিনোদযী মে.
১২৫৪. ‘‘তাহং তস্স ধম্মকথং সুণিত্ৰা, উপাসকত্তং পটিৰেদযিস্সং;
পাণাতিপাতা ৰিরতো অহোসিং, লোকে অদিন্নং পরিৰজ্জযিস্সং;
অমজ্জপো নো চ মুসা অভাণিং, সকেন দারেন চ অহোসিং তুট্ঠো.
১২৫৫. ‘‘তং মে ৰতং তং পন ব্রহ্মচরিযং, তস্স সুচিণ্ণস্স অযং ৰিপাকো;
তেহেৰ কম্মেহি অপাপকেহি, পুঞ্ঞেহি মে লদ্ধমিদং ৰিমান’’ন্তি. –
আহ. তং সুৰিঞ্ঞেয্যমেৰ.
অথ ৰাণিজা দেৰপুত্তং ৰিমানঞ্চস্স পচ্চক্খতো দিস্ৰা কম্মফলং সদ্দহিত্ৰা অত্তনো কম্মফলে সদ্ধং পৰেদেন্তা –
১২৫৬. ‘‘সচ্চং কিরাহংসু নরা সপঞ্ঞা, অনঞ্ঞথা ৰচনং পণ্ডিতানং;
যহিং যহিং গচ্ছতি পুঞ্ঞকম্মো, তহিং তহিং মোদতি কামকামী.
১২৫৭. ‘‘যহিং যহিং সোকপরিদ্দৰো চ, ৰধো চ বন্ধো চ পরিক্কিলেসো;
তহিং তহিং গচ্ছতি পাপকম্মো, ন মুচ্চতি দুগ্গতিযা কদাচী’’তি. –
গাথাদ্ৰযং অৰোচুং. তত্থ সোকপরিদ্দৰোতি সোকো চ পরিদেৰো চ. পরিক্কিলেসোতি ৰুত্তা অনত্থুপ্পত্তি.
এৰং তেসু কথেন্তেসুযেৰ ৰিমানদ্ৰারে সিরীসরুক্খতো পরিপাকেন মুত্তবন্ধনা পরিপক্কা সিপাটিকা পতি, তেন দেৰপুত্তো সপরিজনো দোমনস্সপ্পত্তো অহোসি. তং দিস্ৰা ৰাণিজা –
১২৫৮. ‘‘সম্মূল়্হরূপোৰ জনো অহোসি, অস্মিং মুহুত্তে কললীকতোৰ;
জনস্সিমস্স তুয্হঞ্চ কুমার, অপ্পচ্চযো কেন নু খো অহোসী’’তি. –
গাথমাহংসু. তত্থ সম্মূল়্হরূপোৰাতি সোকৰসেন সব্বসো মূল়্হসভাৰো ৰিয. জনোতি দেৰজনো. অস্মিং মুহুত্তেতি ইমস্মিং মুহুত্তমত্তে. কললীকতোতি কললং ৰিয কতো, কললনিস্সিতউদকীভূতো ৰিয আৰিলোতি অধিপ্পাযো. জনস্সিমস্স তুয্হঞ্চাতি ইমস্স তৰ পরিজনস্স তুয্হঞ্চ. অপ্পচ্চযোতি দোমনস্সং.
তং সুত্ৰা দেৰপুত্তো –
১২৫৯. ‘‘ইমে চ সিরীসৰনা তাতা, দিব্বা গন্ধা সুরভী সম্পৰন্তি;
তে সম্পৰাযন্তি ইমং ৰিমানং, দিৰা চ রত্তো চ তমং নিহন্ত্ৰা.
১২৬০. ‘‘ইমেসঞ্চ খো ৰস্সসতচ্চযেন, সিপাটিকা ফলতি একমেকা;
মানুস্সকং ৰস্সসতং অতীতং, যদগ্গে কাযম্হি ইধূপপন্নো.
১২৬১. ‘‘দিস্ৰানহং ৰস্সসতানি পঞ্চ,
অস্মিং ৰিমানে ঠত্ৰান তাতা;
আযুক্খযা পুঞ্ঞক্খযা চৰিস্সং,
তেনেৰ সোকেন পমুচ্ছিতোস্মী’’তি. – আহ;
১২৫৬. তত্থ সিরীসৰনাতি সিরীসৰিপিনতো. তাতাতি ৰাণিজে আলপতি. ইমে তুম্হাকং ময্হঞ্চ পচ্চক্খভূতা দিব্বা গন্ধা সুরভী অতিৰিয সুগন্ধাযেৰ সমন্ততো পৰন্তি পৰাযন্তি. তে দিব্বা গন্ধা এৰং ৰাযন্তা ইমং ৰিমানং সম্পৰাযন্তি সম্মদেৰ গন্ধং গাহাপেন্তি, ন কেৰলং সম্পৰাযনমেৰ, অথ খো অত্তনো পভায তমম্পি নিহন্তি. তেনাহ ‘‘দিৰা চ রত্তো চ তমং নিহন্ত্ৰা’’তি.
১২৬০-৬১. ইমেসন্তি সিরীসানং. সিপাটিকাতি ফলকুট্ঠিলিকা. ফলতীতি পচ্চিত্ৰা ৰণ্টতো মুচ্চতি, পুটভেদং ৰা পত্ৰা সিস্সতি. মানুস্সকং ৰস্সসতং অতীতন্তি যস্মা ৰস্সসতস্স অচ্চযেন ইমস্স সিরীসস্স সিপাটিকা ফলতি, অযঞ্চ ফলিতা, তস্মা ময্হং মানুস্সকং ৰস্সসতং অতীতং. যদগ্গে যতো পট্ঠায, কাযম্হি ইধ ইমস্মিং দেৰনিকাযে উপপন্নো নিব্বত্তো. ময্হঞ্চ দেৰগণনায পঞ্চ ৰস্সসতানি আযু, তস্মা খীযতি মে আযূতি সোকৰসেন সম্পমূল়্হোতি দস্সেতি. তেনাহ ‘‘দিস্ৰানহং ৰস্সসতানি পঞ্চ…পে… তেনেৰ সোকেন পমুচ্ছিতোস্মী’’তি.
অথ নং ৰাণিজা সমস্সাসেন্তো –
১২৬২. ‘‘কথং নু সোচেয্য তথাৰিধো সো, লদ্ধা ৰিমানং অতুলং চিরায;
যে চাপি খো ইত্তরমুপপন্না, তে নূন সোচেয্যুং পরিত্তপুঞ্ঞা’’তি. –
আহংসু. তত্থ যাদিসেহি অপ্পাযুকেহি মরণং পটিচ্চ সোচিতব্বং সিযা, তাদিসো পন এৰং দিব্বানুভাৰসম্পন্নো নৰুতিৰস্সসতসহস্সাযুকো কথং নু সোচেয্য, ন সোচিতব্বমেৰাতি অধিপ্পাযো.
দেৰপুত্তো তত্তকেনেৰ সমস্সাসেত্ৰা তেসং ৰচনং সম্পটিচ্ছন্তো তেসঞ্চ উপদেসং দেন্তো –
১২৬৩. ‘‘অনুচ্ছৰিং ওৰদিযঞ্চ মেতং, যং মং তুম্হে পেয্যৰাচং ৰদেথ;
তুম্হে চ খো তাতা মযানুগুত্তা, যেহিচ্ছকং তেন পলেথ সোত্থি’’ন্তি. –
গাথমাহ. তত্থ অনুচ্ছৰিন্তি অনুচ্ছৰিকং, তুম্হাকমেৰ তং যুত্তরূপং. ওৰদিযঞ্চ মেতন্তি মে ময্হং তুম্হেহি ওৰদিযং ওৰাদৰসেন ৰত্তব্বমেতং. যং যস্মা, মং ময্হং, তুম্হে ‘‘কথং নু সোচেয্য’’ন্তিআদিনা পেয্যৰাচং পিযৰচনং ৰদেথ. যং ৰা পেয্যৰাচায ৰদনং কথনং, তং তুম্হাকমেৰ অনুচ্ছৰিকন্তি যোজনা. অথ ৰা যং যস্মা তুম্হে পেয্যৰাচং ৰদেথ, তস্মা অনুচ্ছৰিকং ওৰদিযঞ্চ ওৰদিতব্বং ওৰাদানুরূপং কাতব্বঞ্চ মে মযা কতং, কিং পন তন্তি আহ ‘‘তুম্হে চ খো তাতা’’তিআদি. তত্থ মযানুগুত্তাতি ইমস্মিং অমনুস্সপরিগ্গহে মরুকন্তারে যাৰ কন্তারাতিক্কমা মযা অনুগুত্তা রক্খিতা, যেনিচ্ছকং যথারুচিতেন, সোত্থিং খেমেন, পলেথ গচ্ছথাতি অত্থো.
অথ ৰাণিজা কতঞ্ঞুভাৰং পকাসেন্তা –
১২৬৪. ‘‘গন্ত্ৰা মযং সিন্ধুসোৰীরভূমিং, ধনত্থিকা উদ্দযং পত্থযানা;
যথাপযোগা পরিপুণ্ণচাগা, কাহাম সেরীসমহং উল়ারন্তি. –
গাথমাহংসু. তত্থ যথাপযোগাতি ইদানি কতপটিঞ্ঞানুরূপপযোগা. পরিপুণ্ণচাগাতি সমত্তচাগা, উল়ারস্স মহস্স পরিযত্তপরিচ্চাগা. মহন্তি উস্সৰপূজং.
পুন দেৰপুত্তো মহকরণং পটিক্খিপন্তো কত্তব্বেসু চ তে নিযোজেন্তো –
১২৬৫. ‘‘মা চেৰ সেরীসমহং অকত্থ, সব্বঞ্চ ৰো ভৰিস্সতি যং ৰদেথ;
পাপানি কম্মানি ৰিৰজ্জযাথ, ধম্মানুযোগঞ্চ অধিট্ঠহাথা’’তি. –
গাথমাহ. তত্থ যং ৰদেথাতি যং তুম্হে খেমেন সিন্ধুসোৰীরদেসপত্তিং তত্থ চ ৰিপুলং উদ্দযং লাভং পচ্চাসীসন্তা ‘‘গন্ত্ৰা ময’’ন্তিআদীনি ৰদথ. সব্বং তং ৰো তুম্হাকং তথেৰ ভৰিস্সতি, তত্থ নিক্কঙ্খা হোথ, তুম্হে পন ইতো পট্ঠায পাপানি কম্মানি পাণাতিপাতাদীনি ৰিৰজ্জযাথ পরিৰজ্জেথ. ধম্মানুযোগন্তি দানাদিকুসলধম্মস্স অনুযুঞ্জনং. অধিট্ঠহাথাতি অনুসিক্খথ ইদং সেরীসকমহন্তি দস্সেতি.
যং পন উপাসকং অনুগ্গণ্হন্তো তেসং রক্খাৰরণং কাতুকামো অহোসি, তস্স গুণং কিত্তেত্ৰা তং তেসং উদ্দিসন্তো ইমা গাথাযো আহ –
১২৬৬. ‘‘উপাসকো অত্থি ইমম্হি সঙ্ঘে, বহুস্সুতো সীলৰতূপপন্নো;
সদ্ধো চ চাগী চ সুপেসলো চ, ৰিচক্খণো সন্তুসিতো মুতীমা.
১২৬৭. ‘‘সঞ্জানমানো ন মুসা ভণেয্য, পরূপঘাতায ন চেতযেয্য;
ৰেভূতিকং পেসুণং নো করেয্য, সণ্হঞ্চ ৰাচং সখিলং ভণেয্য.
১২৬৮. ‘‘সগারৰো সপ্পতিস্সো ৰিনীতো, অপাপকো অধিসীলে ৰিসুদ্ধো;
সো মাতরং পিতরঞ্চাপি জন্তু, ধম্মেন পোসেতি অরিযৰুত্তি.
১২৬৯. ‘‘মঞ্ঞে সো মাতাপিতূনং কারণা, ভোগানি পরিযেসতি ন অত্তহেতু;
মাতাপিতূনঞ্চ যো অচ্চযেন, নেক্খম্মপোণো চরিস্সতি ব্রহ্মচরিযং.
১২৭০. ‘‘উজূ অৰঙ্কো অসঠো অমাযো, ন লেসকপ্পেন চ ৰোহরেয্য;
সো তাদিসো সুকতকম্মকারী, ধম্মে ঠিতো কিন্তি লভেথ দুক্খং.
১২৭১. ‘‘তংকারণা পাতুকতোম্হি অত্তনা, তস্মা ধম্মং পস্সথ ৰাণিজাসে;
অঞ্ঞত্র তেনিহ ভস্মী ভৰেথ, অন্ধাকুলা ৰিপ্পনট্ঠা অরঞ্ঞে;
তং খিপ্পমানেন লহুং পরেন, সুখো হৰে সপ্পুরিসেন সঙ্গমো’’তি.
১২৬৬. তত্থ সঙ্ঘেতি সত্তসমূহে. ৰিচক্খণোতি তত্থ তত্থ কত্তব্বতায কুসলো. সন্তুসিতোতি সন্তুট্ঠো. মুতীমাতি কম্মস্সকতঞাণাদিনা ইধলোকপরলোকহিতানং মুননতো মুতিমা.
১২৬৭. সঞ্জানমানো ন মুসা ভণেয্যাতি সম্পজানমুসা ন ভাসেয্য. ৰেভূতিকন্তি সহিতানং ৰিনাভাৰকরণতো ‘‘ৰেভূতিক’’ন্তি লদ্ধনামং পিসুণং, নো করেয্য ন ৰদেয্য.
১২৬৮. সপ্পতিস্সোতি পতিস্সযো গরুট্ঠানিযেসু নিৰাতৰুত্তিকত্তা সোরচ্চং, সহ পতিস্সেনাতি সপ্পতিস্সো. অধিসীলেতি উপাসকেন রক্খিতব্বঅধিসীলসিক্খায. অরিযৰুত্তীতি পরিসুদ্ধৰুত্তি.
১২৬৯. নেক্খম্মপোণোতি নিব্বাননিন্নো. চরিস্সতি ব্রহ্মচরিযন্তি পব্বজ্জং সাসনব্রহ্মচরিযং চরিস্সতি.
১২৭০. লেসকপ্পেনাতি কপ্পিযলেসেন. ন চ ৰোহরেয্যাতি মাযাসাঠেয্যৰসেন ৰচনং ন নিচ্ছারেয্য. ধম্মে ঠিতো কিন্তি লভেথ দুক্খন্তি এৰং ৰুত্তনযেন ধম্মে ঠিতো ধম্মচারী সমচারী কিন্তি কেন পকারেন দুক্খং লভেথ পাপুণেয্য.