৬. ভিক্খাদাযকৰিমানৰণ্ণনা

উচ্চমিদং মণিথূণং ৰিমানন্তি ভিক্খাদাযকৰিমানং. তস্স কা উপ্পত্তি? ভগৰা রাজগহে ৰিহরতি ৰেল়ুৰনে. তেন সমযেন অঞ্ঞতরো ভিক্খু অদ্ধানমগ্গপটিপন্নো অঞ্ঞতরং গামং পিণ্ডায পৰিট্ঠো একস্স ঘরদ্ধারে অট্ঠাসি. তত্থ অঞ্ঞতরো পুরিসো ধোতহত্থপাদো ‘‘ভুঞ্জিস্সামী’’তি নিসিন্নো ভোজনং উপনেত্ৰা পাতিযা পক্খিত্তে তং ভিক্খুং দিস্ৰা পাতিযা ভত্তং তস্স ভিক্খুনো পত্তে আকিরন্তো তেন ‘‘একদেসমেৰ দেহী’’তি ৰুত্তোপি সব্বমেৰ আকিরি. সো ভিক্খু অনুমোদনং ৰত্ৰা পক্কামি. সো পুরিসো ‘‘ছাতজ্ঝত্তস্স ভিক্খুনো মযা অভুঞ্জিত্ৰা ভত্তং দিন্ন’’ন্তি অনুস্সরন্তো উল়ারং পীতিসোমনস্সং পটিলভি. সো অপরভাগে কালং কত্ৰা তাৰতিংসেসু দ্ৰাদসযোজনিকে কনকৰিমানে নিব্বত্তি. তং আযস্মা মহামোগ্গল্লানত্থেরো দেৰচারিকং চরন্তো মহতিযা দেৰিদ্ধিযা ৰিরোচমানং দিস্ৰা ইমাহি গাথাহি পটিপুচ্ছি –

১০৮১. ‘‘উচ্চমিদং মণিথূণং ৰিমানং, সমন্ততো দ্ৰাদস যোজনানি;

কূটাগারা সত্তসতা উল়ারা, ৰেল়ুরিযথম্ভা রুচকত্থতা সুভা.

১০৮২. ‘‘দেৰিদ্ধিপত্তোসি মহানুভাৰো…পে…

ৰণ্ণো চ তে সব্বদিসা পভাসতী’’তি.

সোপি তস্স ইমাহি গাথাহি ব্যাকাসি –

১০৮৩. ‘‘সো দেৰপুত্তো অত্তমনো…পে… যস্স কম্মস্সিদং ফলং’’.

১০৮৪. ‘‘অহং মনুস্সেসু মনুস্সভূতো, দিস্ৰান ভিক্খুং তসিতং কিলন্তং;

একাহং ভিক্খং পটিপাদযিস্সং, সমঙ্গি ভত্তেন তদা অকাসিং.

১০৮৫. ‘‘তেন মেতাদিসো ৰণ্ণো…পে… ৰণ্ণো চ মে সব্বদিসা পভাসতী’’তি.

১০৮৪. তত্থ একাহং ভিক্খন্তি একং অহং ভিক্খামত্তং, একং ভত্তৰড্ঢিতকন্তি অত্থো. পটিপাদযিস্সন্তি পটিপাদেসিং অদাসিং. সমঙ্গি ভত্তেনাতি ভত্তেন সমঙ্গীভূতং, লদ্ধভিক্খন্তি অত্থো. এৰং মহাথেরো তেন দেৰপুত্তেন অত্তনো সুচরিতকম্মে পকাসিতে সপরিৰারস্স তস্স ধম্মং দেসেত্ৰা মনুস্সলোকমাগতো, তং পৰত্তিং সম্মাসম্বুদ্ধস্স কথেসি. সত্থা তং অট্ঠুপ্পত্তিং কত্ৰা সম্পত্তমহাজনস্স ধম্মং দেসেসি. সা দেসনা মহাজনস্স সাত্থিকা অহোসীতি.

ভিক্খাদাযকৰিমানৰণ্ণনা নিট্ঠিতা.