৭. যৰপালকৰিমানৰণ্ণনা

উচ্চমিদং মণিথূণং ৰিমানন্তি যৰপালকৰিমানং. তস্স কা উপ্পত্তি? ভগৰা রাজগহে ৰিহরতি ৰেল়ুৰনে. তেন সমযেন রাজগহে অঞ্ঞতরো দুগ্গতদারকো যৰখেত্তং রক্খতি. সো একদিৰসং পাতরাসত্থায কুম্মাসং লভিত্ৰা ‘‘খেত্তং গন্ত্ৰা ভুঞ্জিস্সামী’’তি তং কুম্মাসং গহেত্ৰা যৰখেত্তং গন্ত্ৰা রুক্খমূলে নিসীদি. তস্মিং খণে অঞ্ঞতরো খীণাসৰত্থেরো মগ্গপ্পটিপন্নো উপকট্ঠে কালে তং ঠানং পত্ৰা যৰপালকেন নিসিন্নং রুক্খমূলং উপসঙ্কমি. যৰপালকো ৰেলং ওলোকেত্ৰা ‘‘কচ্চি, ভন্তে, আহারো লদ্ধো’’তি আহ. থেরো তুণ্হী অহোসি. সো অলদ্ধভাৰং ঞত্ৰা ‘‘ভন্তে, উপকট্ঠা ৰেলা, পিণ্ডায চরিত্ৰা ভুঞ্জিতুং ন সক্কা, ময্হং অনুকম্পায ইমং কুম্মাসং পরিভুঞ্জথা’’তি ৰত্ৰা থেরস্স তং কুম্মাসং অদাসি. থেরো তং অনুকম্পন্তো তস্স পস্সন্তস্সেৰ তং পরিভুঞ্জিত্ৰা অনুমোদনং ৰত্ৰা পক্কামি. সোপি দারকো ‘‘সুদিন্নং ৰত মযা ঈদিসস্স কুম্মাসদানং দদন্তেনা’’তি চিত্তং পসাদেত্ৰা অপরভাগে কালং কত্ৰা তাৰতিংসভৰনে ৰুত্তনযেনেৰ ৰিমানে নিব্বত্তি. তং আযস্মা মহামোগ্গল্লানত্থেরো ইমাহি গাথাহি পটিপুচ্ছি –

১০৮৭. ‘‘উচ্চমিদং মণিথূণং ৰিমানং…পে…

ৰণ্ণো চ তে সব্বদিসা পভাসতী’’তি.

সোপি তস্স ইমাহি গাথাহি ব্যাকাসি –

১০৮৯. ‘‘সো দেৰপুত্তো অত্তমনো…পে… যস্স কম্মস্সিদং ফলং’’.

১০৯০. ‘‘অহং মনুস্সেসু মনুস্সভূতো, অহোসিং যৰপালকো;

অদ্দসং ৰিরজং ভিক্খুং, ৰিপ্পসন্নমনাৰিলং.

১০৯১. ‘‘তস্স অদাসহং ভাগং, পসন্নো সেহি পাণিভি;

কুম্মাসপিণ্ডং দত্ৰান, মোদামি নন্দনে ৰনে.

১০৯২. ‘‘তেন মেতাদিসো ৰণ্ণো…পে…

ৰণ্ণো চ মে সব্বদিসা পভাসতী’’তি.

তত্থ গাথাসুপি অপুব্বং নত্থি.

যৰপালকৰিমানৰণ্ণনা নিট্ঠিতা.