৩. ফলদাযকৰিমানৰণ্ণনা

উচ্চমিদং মণিথূণন্তি ফলদাযকৰিমানং. তস্স কা উপ্পত্তি? ভগৰা রাজগহে ৰিহরতি ৰেল়ুৰনে. তেন সমযেন রঞ্ঞো বিম্বিসারস্স অকালে অম্বফলানি পরিভুঞ্জিতুং ইচ্ছা উপ্পজ্জি. সো আরামপালং আহ – ‘‘ময্হং খো, ভণে, অম্বফলেসু ইচ্ছা উপ্পন্না, তস্মা অম্বানি মে আনেত্ৰা দেহী’’তি. ‘‘দেৰ, নত্থি অম্বেসু অম্বফলং, অপিচাহং তথা করোমি, সচে দেৰো কিঞ্চি কালং আগমেতি, যথা অম্বা ন চিরস্সেৰ ফলং গণ্হন্তী’’তি. ‘‘সাধু, ভণে, তথা করোহী’’তি. আরামপালো আরামং গন্ত্ৰা অম্বরুক্খমূলেসু পংসুং অপনেত্ৰা তাদিসং পংসুং আকিরি, তাদিসঞ্চ উদকং আসিঞ্চি, যথা ন চিরস্সেৰ অম্বরুক্খা সচ্ছিন্নপত্তা অহেসুং. অথ নং পংসুং অপনেত্ৰা ফারুসককসটমিস্সকং পাকতিকং পংসুং আকিরিত্ৰা সাধুকং উদকং অদাসি. তদা অম্বরুক্খা ন চিরেনেৰ কোরকিতা পল্লৰিতা কুটমলকজাতা হুত্ৰা পুপ্ফিংসু, অথ সলাটুকজাতা হুত্ৰা ফলানি গণ্হিংসু. তত্থেকস্মিং অম্বরুক্খে পঠমতরং চত্তারি ফলানি মনোসিলাচুণ্ণপিঞ্জরৰণ্ণানি সম্পন্নগন্ধরসানি পরিণতানি অহেসুং.

সো তানি গহেত্ৰা ‘‘রঞ্ঞো দস্সামী’’তি গচ্ছন্তো অন্তরামগ্গে আযস্মন্তং মহামোগ্গল্লানং পিণ্ডায চরমানং দিস্ৰা চিন্তেসি ‘‘ইমানি অম্বানি অগ্গফলভূতানি ইমস্স অয্যস্স দস্সামি, কামং মং রাজা হনতু ৰা পব্বাজেতু ৰা, রঞ্ঞো হি দিন্নে দিট্ঠধম্মে পূজামত্তং অপ্পমত্তকং ফলং, অয্যস্স দিন্নে পন দিট্ঠধম্মিকম্পি সম্পরাযিকম্পি অপরিমাণং ফলং ভৰিস্সতী’’তি. এৰং পন চিন্তেত্ৰা তানি ফলানি থেরস্স দত্ৰা রাজানং উপসঙ্কমিত্ৰা রঞ্ঞো তমত্থং আরোচেসি. তং সুত্ৰা রাজা রাজপুরিসে আণাপেসি ‘‘ৰীমংসথ তাৰ, ভণে, যথাযং আহা’’তি. থেরো পন তানি ফলানি ভগৰতো উপনামেসি. ভগৰা তেসু একং সারিপুত্তত্থেরস্স, একং মহামোগ্গল্লানত্থেরস্স, একং মহাকস্সপত্থেরস্স দত্ৰা একং অত্তনা পরিভুঞ্জি. পুরিসা তং পৰত্তিং রঞ্ঞো আরোচেসুং.

রাজা তং সুত্ৰা ‘‘ধীরো ৰতাযং পুরিসো, যো অত্তনো জীৰিতম্পি পরিচ্চজিত্ৰা পুঞ্ঞপসুতো অহোসি, অত্তনো পরিস্সমঞ্চ ঠানগতমেৰ অকাসী’’তি তুট্ঠচিত্তো তস্স একং গামৰরং ৰত্থালঙ্কারাদীনি চ দত্ৰা ‘‘যং তযা ভণে অম্বফলদানেন পুঞ্ঞং পসুতং, ততো মে পত্তিং দেহী’’তি আহ. সো ‘‘দেমি, দেৰ, যথাসুখং পত্তিং গণ্হাহী’’তি অৰোচ. আরামপালো অপরভাগে কালং কত্ৰা তাৰতিংসেসু উপ্পজ্জি, তস্স সোল়সযোজনিকং কনকৰিমানং নিব্বত্তি সত্তসতকূটাগারপটিমণ্ডিতং. তং দিস্ৰা আযস্মা মহামোগ্গল্লানো পুচ্ছি –

১০৬০. ‘‘উচ্চমিদং মণিথূণং ৰিমানং, সমন্ততো সোল়স যোজনানি;

কূটাগারা সত্তসতা উল়ারা, ৰেল়ুরিযথম্ভা রুচকত্থতা সুভা.

১০৬১. ‘‘তত্থচ্ছসি পিৰসি খাদসি চ, দিব্বা চ ৰীণা পৰদন্তি ৰগ্গুং;

অট্ঠট্ঠকা সিক্খিতা সাধুরূপা, দিব্বা চ কঞ্ঞা তিদসচরা উল়ারা;

নচ্চন্তি গাযন্তি পমোদযন্তি.

১০৬২. ‘‘দেৰিদ্ধিপত্তোসি মহানুভাৰো…পে…

ৰণ্ণো চ তে সব্বদিসা পভাসতী’’তি.

১০৬৩. ‘‘সো দেৰপুত্তো অত্তমনো…পে… যস্স কম্মস্সিদং ফলং’’.

১০৬৪. ‘‘ফলদাযী ফলং ৰিপুলং লভতি, দদমুজুগতেসু পসন্নমানসো;

সো হি পমোদতি সগ্গগতো তিদিৰে, অনুভোতি চ পুঞ্ঞফলং ৰিপুলং.

১০৬৫. ‘‘তৰেৰাহং মহামুনি, অদাসিং চতুরো ফলে.

১০৬৬. ‘‘তস্মা হি ফলং অলমেৰ দাতুং, নিচ্চং মনুস্সেন সুখত্থিকেন;

দিব্বানি ৰা পত্থযতা সুখানি, মনুস্সসোভগ্গতমিচ্ছতা ৰা.

১০৬৭. ‘‘তেন মেতাদিসো ৰণ্ণো…পে…

ৰণ্ণো চ মে সব্বদিসা পভাসতী’’তি. – সোপিস্স ব্যাকাসি;

১০৬১. তত্থ অট্ঠট্ঠকাতি একেকস্মিং কূটাগারে অট্ঠট্ঠকা চতুসট্ঠিপরিমাণা. সাধুরূপাতি রূপসম্পত্তিযা চ সীলাচারসম্পত্তিযা চ সিক্খাসম্পত্তিযা চ সুন্দরসভাৰা. দিব্বা চ কঞ্ঞাতি দেৰচ্ছরাযো. তিদসচরাতি তিদসেসু সুখাচারা সুখৰিহারিনিযো. উল়ারাতি উল়ারৰিভৰা.

১০৬৪. ফলদাযীতি অত্তনা অম্বফলস্স দিন্নত্তা অত্তানং সন্ধায ৰদতি. ফলন্তি পুঞ্ঞফলং. ৰিপুলন্তি মহন্তং লভতি মনুস্সলোকে পতিট্ঠিতোতি অধিপ্পাযো. দদন্তি দদন্তো দানহেতু. উজুগতেসূতি উজুপটিপন্নেসু. সগ্গগতোতি উপ্পজ্জনৰসেন সগ্গং গতো, তত্থাপি তিদিৰে তাৰতিংসভৰনে অনুভোতি চ পুঞ্ঞফলং ৰিপুলং যথাহং, এৰং অঞ্ঞোপীতি অত্থো.

১০৬৬. তস্মাতি যস্মা চতুন্নং ফলানং দানমত্তেন ঈদিসী সম্পত্তি অধিগতা, তস্মা. অলমেৰ যুত্তমেৰ. নিচ্চন্তি সব্বকালং. দিব্বানীতি দেৰলোকপরিযাপন্নানি. মনুস্সসোভগ্গতন্তি মনুস্সেসু সুভগভাৰং. সেসং ৰুত্তনযমেৰ.

ফলদাযকৰিমানৰণ্ণনা নিট্ঠিতা.