৪. পঠমউপস্সযদাযকৰিমানৰণ্ণনা

চন্দো যথা ৰিগতৰলাহকে নভেতি উপস্সযদাযকৰিমানং. তস্স কা উপ্পত্তি? ভগৰা রাজগহে ৰিহরতি ৰেল়ুৰনে. তেন সমযেন অঞ্ঞতরো ভিক্খু গামকাৰাসে ৰস্সং ৰসিত্ৰা ৰুত্থৰস্সো পৰারেত্ৰা ভগৰন্তং ৰন্দিতুং রাজগহং গচ্ছন্তো অন্তরামগ্গে সাযং অঞ্ঞতরং গামং পৰিসিত্ৰা ৰসনট্ঠানং পরিযেসন্তো অঞ্ঞতরং উপাসকং দিস্ৰা পুচ্ছি – ‘‘উপাসক, ইমস্মিং গামে অত্থি কিঞ্চি পব্বজিতানং ৰসনযোগ্গট্ঠান’’ন্তি. উপাসকো পসন্নচিত্তো গেহং গন্ত্ৰা ভরিযায সদ্ধিং মন্তেত্ৰা থেরস্স ৰসনযোগ্গং ঠানং পরিচ্ছিন্দিত্ৰা তত্থ আসনং পঞ্ঞাপেত্ৰা পাদোদকং পাদপীঠং উপট্ঠপেত্ৰা থেরং পৰেসেত্ৰা তস্মিং পাদে ধোৰন্তে পদীপং উজ্জালেত্ৰা মঞ্চে পচ্চত্থরণানি পঞ্ঞাপেত্ৰা অদাসি. স্ৰাতনায চ নিমন্তেত্ৰা থেরস্স দুতিযদিৰসে ভোজেত্ৰা পানকত্থায গুল়পিণ্ডঞ্চ দত্ৰা থেরং গচ্ছন্তং অনুগন্ত্ৰা নিৰত্তি. সো অপরেন সমযেন সহ ভরিযায কালং কত্ৰা তাৰতিংসভৰনে দ্ৰাদসযোজনিকে কনকৰিমানে নিব্বত্তি. তং আযস্মা মহামোগ্গল্লানো দ্ৰীহি গাথাহি পটিপুচ্ছি –

১০৬৯. ‘‘চন্দো যথা ৰিগতৰলাহকে নভে, ওভাসযং গচ্ছতি অন্তলিক্খে;

তথূপমং তুয্হমিদং ৰিমানং, ওভাসযং তিট্ঠতি অন্তলিক্খে.

১০৭০. ‘‘দেৰিদ্ধিপত্তোসি মহানুভাৰো, মনুস্সভূতো কিমকাসি পুঞ্ঞং;

কেনাসি এৰং জলিতানুভাৰো, ৰণ্ণো চ তে সব্বদিসা পভাসতী’’তি.

সো দেৰপুত্তো ইমাহি গাথাহি ব্যাকাসি –

১০৭১. ‘‘সো দেৰপুত্তো অত্তমনো…পে… যস্স কম্মস্সিদং ফলং’’.

১০৭২. ‘‘অহঞ্চ ভরিযা চ মনুস্সলোকে, উপস্সযং অরহতো অদম্হ;

অন্নঞ্চ পানঞ্চ পসন্নচিত্তা, সক্কচ্চ দানং ৰিপুলং অদম্হ.

১০৭৩. ‘‘তেন মেতাদিসো ৰণ্ণো…পে… ৰণ্ণো চ মে সব্বদিসা পভাসতী’’তি.

তত্থ গাথাসু যং ৰত্তব্বং, তং হেট্ঠা ৰুত্তনযমেৰ;

পঠমউপস্সযদাযকৰিমানৰণ্ণনা নিট্ঠিতা.