১১. দুতিযনাগৰিমানৰণ্ণনা

মহন্তং নাগং অভিরুয্হাতি দুতিযনাগৰিমানং. তস্স কা উপ্পত্তি? ভগৰা রাজগহে ৰিহরতি ৰেল়ুৰনে. তেন সমযেন রাজগহে অঞ্ঞতরো উপাসকো সদ্ধো পসন্নো পঞ্চসু সীলেসু পতিট্ঠিতো উপোসথদিৰসেসু উপোসথসীলং সমাদিযিত্ৰা পুরেভত্তং অত্তনো ৰিভৰানুরূপং ভিক্খূনং দানানি দত্ৰা সযং ভুঞ্জিত্ৰা সুদ্ধৰত্থনিৰত্থো সুদ্ধুত্তরাসঙ্গো পচ্ছাভত্তং যেভুয্যেন অট্ঠ পানানি গাহাপেত্ৰা ৰিহারং গন্ত্ৰা ভিক্খুসঙ্ঘস্স নিয্যাদেত্ৰা ভগৰন্তং উপসঙ্কমিত্ৰা ধম্মং সুণাতি. এৰং সো সক্কচ্চং দানমযং সীলমযঞ্চ বহুং সুচরিতং উপচিনিত্ৰা ইতো চুতো তাৰতিংসেসু উপ্পজ্জি. তস্স পুঞ্ঞানুভাৰেন সব্বসেতো মহন্তো দিব্বো হত্থিনাগো পাতুরহোসি. সো তং অভিরুয্হ মহন্তেন পরিৰারেন মহন্তেন দিব্বানুভাৰেন কালেন কালং উয্যানকীল়ং গচ্ছতি.

অথেকদিৰসং কতঞ্ঞুতায চোদিযমানো অড্ঢরত্তিসমযে তং দিব্বনাগং অভিরুয্হ মহতা পরিৰারেন ‘‘ভগৰন্তং ৰন্দিস্সামী’’তি দেৰলোকতো আগন্ত্ৰা কেৰলকপ্পং ৰেল়ুৰনং ওভাসেত্ৰা হত্থিক্খন্ধতো ওরুয্হ ভগৰন্তং উপসঙ্কমিত্ৰা অভিৰাদেত্ৰা অঞ্জলিং পগ্গয্হ একমন্তং অট্ঠাসি. তং ভগৰতো সমীপে ঠিতো আযস্মা ৰঙ্গীসো ভগৰতো অনুঞ্ঞায ইমাহি গাথাহি পুচ্ছি –

৯৬৮. ‘‘মহন্তং নাগং অভিরুয্হ, সব্বসেতং গজুত্তমং;

ৰনা ৰনং অনুপরিযাসি, নারীগণপুরক্খতো;

ওভাসেন্তো দিসা সব্বা, ওসধী ৰিয তারকা.

৯৬৯. ‘‘কেন তেতাদিসো ৰণ্ণো…পে…

ৰণ্ণো চ তে সব্বদিসা পভাসতী’’তি.

তত্থা পুচ্ছিতো সোপি তস্স গাথাহি এৰ ব্যাকাসি.

৯৭১. ‘‘সো দেৰপুত্তো অত্তমনো, ৰঙ্গীসেনেৰ পুচ্ছিতো;

পঞ্হং পুট্ঠো ৰিযাকাসি, যস্স কম্মস্সিদং ফলং’’.

৯৭২. ‘‘অহং মনুস্সেসু মনুস্সভূতো, উপাসকো চক্খুমতো অহোসিং;

পাণাতিপাতা ৰিরতো অহোসিং, লোকে অদিন্নং পরিৰজ্জযিস্সং.

৯৭৩. ‘‘অমজ্জপো নো চ মুসা অভাণিং, সকেন দারেন চ তুট্ঠো অহোসিং;

অন্নঞ্চ পানঞ্চ পসন্নচিত্তো, সক্কচ্চ দানং ৰিপুলং অদাসিং.

৯৭৪. ‘‘তেন মেতাদিসো ৰণ্ণো…পে…

ৰণ্ণো চ মে সব্বদিসা পভাসতী’’তি.

তত্থ অপুব্বং নত্থি, সেসং হেট্ঠা ৰুত্তনযমেৰ.

দুতিযনাগৰিমানৰণ্ণনা নিট্ঠিতা.