১০. পঠমনাগৰিমানৰণ্ণনা

সুসুক্কখন্ধং অভিরুয্হ নাগন্তি নাগৰিমানং. তস্স কা উপ্পত্তি? ভগৰা সাৰত্থিযং ৰিহরতি জেতৰনে. তেন সমযেন আযস্মা মহামোগ্গল্লানো হেট্ঠা ৰুত্তনযেনেৰ দেৰচারিকং চরন্তো তাৰতিংসভৰনং উপগতো. তত্থ অদ্দস অঞ্ঞতরং দেৰপুত্তং সব্বসেতং মহন্তং দিব্বনাগং অভিরুয্হ মহন্তেন পরিৰারেন মহতা দিব্বানুভাৰেন আকাসেন গচ্ছন্তং, সব্বা দিসা চন্দো ৰিয সূরিযো ৰিয চ ওভাসযমানং. দিস্ৰা যেন সো দেৰপুত্তো তেনুপসঙ্কমি. অথ সো দেৰপুত্তো ততো ওরুয্হ আযস্মন্তং মহামোগ্গল্লানং অভিৰাদেত্ৰা অঞ্জলিং পগ্গয্হ অট্ঠাসি. অথ থেরো –

৯৬১. ‘‘সুসুক্কখন্ধং অভিরুয্হ নাগং, অকাচিনং দন্তিং বলিং মহাজৰং;

অভিরুয্হ গজৰরং সুকপ্পিতং, ইধাগমা ৰেহাযসং অন্তলিক্খে.

৯৬২. ‘‘নাগস্স দন্তেসু দুৰেসু নিম্মিতা, অচ্ছোদকা পদুমিনিযো সুফুল্লা;

পদুমেসু চ তূরিযগণা পৰজ্জরে, ইমা চ নচ্চন্তি মনোহরাযো.

৯৬৩. ‘‘দেৰিদ্ধিপত্তোসি মহানুভাৰো, মনুস্সভূতো কিমকাসি পুঞ্ঞং;

কেনাসি এৰং জলিতানুভাৰো, ৰণ্ণো চ তে সব্বদিসা পভাসতী’’তি. –

তস্স সম্পত্তিকিত্তনমুখেন কতকম্মং পুচ্ছি.

৯৬১. তত্থ সুসুক্কখন্ধন্তি সুট্ঠু সেতখন্ধং. কিঞ্চাপি তস্স নাগস্স চত্তারো পাদা, ৰত্থিকোসং, মুখপ্পদেসো, উভো কণ্ণা, ৰালধীতি এত্তকং মুঞ্চিত্ৰা সব্বো কাযো সেতোৰ, খন্ধপ্পদেসস্স পন সাতিসযং ধৰলতরতায ৰুত্তং ‘‘সুসুক্কখন্ধ’’ন্তি. নাগন্তি দিব্বং হত্থিনাগং. অকাচিনন্তি নিদ্দোসং, সবললৰঙ্কতিলকাদিছৰিদোসৰিরহিতন্তি অত্থো. ‘‘আজানীয’’ন্তিপি পাল়ি, আজানীযলক্খণূপেতন্তি অত্থো. দন্তিন্তি ৰিপুলরুচিরদন্তৰন্তং. বলিন্তি বলৰন্তং মহাবলং. মহাজৰন্তি অতিজৰং সীঘগামিং. পুন অভিরুয্হাতি এত্থ অনুনাসিকলোপো দট্ঠব্বো, অভিরুয্হং আরোহনীযন্তি ৰুত্তং হোতি. সেসং ৰুত্তনযমেৰ.

এৰং পন থেরেন পুট্ঠো দেৰপুত্তো অত্তনা কতকম্মং কথেন্তো –

৯৬৫. ‘‘অট্ঠেৰ মুত্তপুপ্ফানি, কস্সপস্স মহেসিনো;

থূপস্মিং অভিরোপেসিং, পসন্নো সেহি পাণিভি.

৯৬৬. ‘‘তেন মেতাদিসো ৰণ্ণো…পে…

ৰণ্ণো চ মে সব্বদিসা পভাসতী’’তি. – ইমাহি গাথাহি ব্যাকাসি;

তস্সত্থো – অহং পুব্বে কস্সপসম্মাসম্বুদ্ধস্স যোজনিকে কনকথূপে ৰণ্টতো মুচ্চিত্ৰা গচ্ছমূলে পতিতানি অট্ঠ মুত্তপুপ্ফানি লভিত্ৰা তানি গহেত্ৰা পূজনৰসেন পসন্নচিত্তো হুত্ৰা অভিরোপেসিং পূজেসিং.

অতীতে কির কস্সপসম্মাসম্বুদ্ধে পরিনিব্বুতে যোজনিকে কনকথূপে চ কারিতে সপরিৰারো কিকী কাসিরাজা চ নাগরা চ নেগমা চ জানপদা চ দিৰসে দিৰসে পুপ্ফপূজং করোন্তি. তেসু তথা করোন্তেসু পুপ্ফানি মহগ্ঘানি দুল্লভানি চ অহেসুং. অথেকো উপাসকো মালাকারৰীথিযং ৰিচরিত্ৰা একমেকেন কহাপণেন একমেকম্পি পুপ্ফং অলভন্তো অট্ঠ কহাপণানি গহেত্ৰা পুপ্ফারামং গন্ত্ৰা মালাকারং আহ ‘‘ইমেহি অট্ঠহি কহাপণেহি অট্ঠ পুপ্ফানি দেহী’’তি. ‘‘নত্থয্যো পুপ্ফানি, সম্মদেৰ উপধারেত্ৰা ওচিনিত্ৰা দিন্নানী’’তি. ‘‘অহং ওলোকেত্ৰা গণ্হামী’’তি. ‘‘যদি এৰং, আরামং পৰিসিত্ৰা গৰেসাহী’’তি. সো পৰিসিত্ৰা গৰেসন্তো পতিতানি অট্ঠ পুপ্ফানি লভিত্ৰা মালাকারং আহ ‘‘গণ্হ, তাত, কহাপণানী’’তি. ‘‘তৰ পুঞ্ঞেন লদ্ধানি, নাহং কহাপণানি গণ্হামী’’তি আহ. ইতরো ‘‘নাহং মুধা পুপ্ফানি গহেত্ৰা ভগৰতো পূজং করিস্সামী’’তি কহাপণানি তস্স পুরতো ঠপেত্ৰা পুপ্ফানি গহেত্ৰা চেতিযঙ্গণং গন্ত্ৰা পসন্নচিত্তো পূজং অকাসি. সো অপরভাগে কালং কত্ৰা তাৰতিংসেসু উপ্পজ্জিত্ৰা তত্থ যাৰতাযুকং ঠত্ৰা পুনপি দেৰলোকে, পুনপি দেৰলোকেতি এৰং অপরাপরং দেৰেসুযেৰ সংসরন্তো তস্সেৰ কম্মস্স ৰিপাকাৰসেসেন ইমস্মিম্পি বুদ্ধুপ্পাদে তাৰতিংসেসুযেৰ উপ্পজ্জি. তং সন্ধায হেট্ঠা ৰুত্তং ‘‘তত্থ অদ্দস অঞ্ঞতরং দেৰপুত্ত’’ন্তিআদি.

তং পনেতং পৰত্তিং আযস্মা মহামোগ্গল্লানো মনুস্সলোকং আগন্ত্ৰা ভগৰতো আরোচেসি. ভগৰা তমত্থং অট্ঠুপ্পত্তিং কত্ৰা সম্পত্তপরিসায ৰিত্থারেন ধম্মং দেসেসি. সা দেসনা মহাজনস্স সাত্থিকা অহোসীতি.

নাগৰিমানৰণ্ণনা নিট্ঠিতা.