৮. অম্বৰিমানৰণ্ণনা

দিব্বং তে অম্বৰনং রম্মন্তি অম্বৰিমানং. তস্স কা উপ্পত্তি? ভগৰা সাৰত্থিযং ৰিহরতি জেতৰনে. তেন সমযেন সাৰত্থিযং অঞ্ঞতরা উপাসিকা আৰাসদানস্স মহপ্ফলতং মহানিসংসতঞ্চ সুত্ৰা ছন্দজাতা ভগৰন্তং অভিৰাদেত্ৰা এৰমাহ ‘‘অহং, ভন্তে, একং আৰাসং কারেতুকামা, ইচ্ছামি তাদিসং ওকাসং, আচিক্খতূ’’তি. ভগৰা ভিক্খূ আণাপেসি, ভিক্খূ তস্সা ওকাসং দস্সেসুং. সা তত্থ রমণীযং আৰাসং কারেত্ৰা তস্স সমন্ততো অম্বরুক্খে রোপেসি. সো আৰাসো সমন্ততো অম্বপন্তীহি পরিক্খিত্তো ছাযূদকসম্পন্নো মুত্তাজালসদিসৰালুকাকিণ্ণপণ্ডরভূমিভাগো অতিৰিয মনোহরো অহোসি. সা তং ৰিহারং নানাৰণ্ণেহি ৰত্থেহি পুপ্ফদামগন্ধদামাদীহি চ দেৰৰিমানং ৰিয অলঙ্করিত্ৰা তেলপদীপং আরোপেত্ৰা অম্বরুক্খে চ অহতেহি ৰত্থেহি ৰেঠেত্ৰা সঙ্ঘস্স নিয্যাদেসি.

সা অপরভাগে কালং কত্ৰা তাৰতিংসভৰনে নিব্বত্তি, তস্সা মহন্তং ৰিমানং পাতুরহোসি অম্বৰনপরিক্খিত্তং. সা তত্থ অচ্ছরাগণপরিৰারিতা দিব্বসম্পত্তিং অনুভৰতি. তং আযস্মা মহামোগ্গল্লানো উপগন্ত্ৰা ইমাহি গাথাহি পুচ্ছি –

৭৮৩. ‘‘দিব্বং তে অম্বৰনং রম্মং, পাসাদেত্থ মহল্লকো;

নানাতূরিযসঙ্ঘুট্ঠো, অচ্ছরাগণঘোসিতো.

৭৮৪. ‘‘পদীপো চেত্থ জলতি, নিচ্চং সোৰণ্ণযো মহা;

দুস্সফলেহি রুক্খেহি, সমন্তা পরিৰারিতো.

৭৮৫. ‘‘কেন তেতাদিসো ৰণ্ণো…পে…ৰণ্ণো চ তে সব্বদিসা পভাসতী’’তি.

৭৮৭. ‘‘সা দেৰতা অত্তমনা…পে… যস্স কম্মস্সিদং ফলং’’.

৭৮৮. ‘‘অহং মনুস্সেসু মনুস্সভূতা, পুরিমায জাতিযা মনুস্সলোকে;

ৰিহারং সঙ্ঘস্স কারেসিং, অম্বেহি পরিৰারিতং.

৭৮৯. ‘‘পরিযোসিতে ৰিহারে, কারেন্তে নিট্ঠিতে মহে;

অম্বেহি ছাদযিত্ৰান, কত্ৰা দুস্সমযে ফলে.

৭৯০. ‘‘পদীপং তত্থ জালেত্ৰা, ভোজযিত্ৰা গণুত্তমং;

নিয্যাদেসিং তং সঙ্ঘস্স, পসন্না সেহি পাণিভি.

৭৯১. ‘‘তেন মে অম্বৰনং রম্মং, পাসাদেত্থ মহল্লকো;

নানাতূরিযসঙ্ঘুট্ঠো, অচ্ছরাগণঘোসিতো.

৭৯২. ‘‘পদীপো চেত্থ জলতি, নিচ্চং সোৰণ্ণযো মহা;

দুস্সফলেহি রুক্খেহি, সমন্তা পরিৰারিতো.

৭৯৩. ‘‘তেন মেতাদিসো ৰণ্ণো…পে…ৰণ্ণো চ মে সব্বদিসা পভাসতী’’তি. –

সা দেৰতা ব্যাকাসি.

৭৮৩. তত্থ মহল্লকোতি মহন্তো আযামৰিত্থারেহি উব্বেধেন চ ৰিপুলো, উল়ারতমোতি অত্থো. অচ্ছরাগণঘোসিতোতি তং পমোদিতুং সঙ্গীতিৰসেন চেৰ পিযসল্লাপৰসেন চ অচ্ছরাসঙ্ঘেন সমুগ্ঘোসিতো.

৭৮৪. পদীপো চেত্থ জলতীতি সূরিযরস্মিসমুজ্জলকিরণৰিতানো রতনপ্পদীপো চ এত্থ এতস্মিং পাসাদে অভিজলতি. দুস্সফলেহীতি দুস্সানি ফলানি এতেসন্তি দুস্সফলা. তেহি সমুগ্গিরিযমানদিব্বৰত্থেহীতি অত্থো.

৭৮৯. কারেন্তে নিট্ঠিতে মহেতি কতপরিযোসিতস্স ৰিহারস্স মহে পূজায করীযমানায চ. কত্ৰা দুস্সমযে ফলেতি দুস্সেযেৰ তেসং অম্বানং ফলং কত্ৰা.

৭৯০. গণুত্তমন্তি গণানং উত্তমং ভগৰতো সাৰকসঙ্ঘং. নিয্যাদেসিন্তি সম্পটিচ্ছাপেসিং, অদাসিন্তি অত্থো. সেসং ৰুত্তনযমেৰ.

অম্বৰিমানৰণ্ণনা নিট্ঠিতা.