১০. উচ্ছুৰিমানৰণ্ণনা

ওভাসযিত্ৰা পথৰিং সদেৰকন্তি উচ্ছুৰিমানং. তং হেট্ঠা উচ্ছুৰিমানেন পাল়িতো চ অট্ঠুপ্পত্তিতো চ সদিসমেৰ. কেৰলং তত্থ সস্সু সুণিসং পীঠকেন পহরিত্ৰা মারেসি, ইধ পন লেড্ডুনাতি অযমেৰ ৰিসেসো. ৰত্থুনো পন ভিন্নত্তা উভযম্পি ৰিসুংযেৰ সঙ্গহং আরুল়্হন্তি ৰেদিতব্বং.

৮০৮. ‘‘ওভাসযিত্ৰা পথৰিং সদেৰকং, অতিরোচসি চন্দিমসূরিযা ৰিয;

সিরিযা চ ৰণ্ণেন যসেন তেজসা, ব্রহ্মাৰ দেৰে তিদসে সহিন্দকে.

৮০৯. ‘‘পুচ্ছামি তং উপ্পলমালধারিনী, আৰেল়িনী কঞ্চনসন্নিভত্তচে;

অলঙ্কতে উত্তমৰত্থধারিনী, কা ত্ৰং সুভে দেৰতে ৰন্দসে মমং.

৮১০. ‘‘কিং ত্ৰং পুরে কম্মমকাসি অত্তনা, মনুস্সভূতা পুরিমায জাতিযা;

দানং সুচিণ্ণং অথ সীলসঞ্ঞমং, কেনুপপন্না সুগতিং যসস্সিনী;

দেৰতে পুচ্ছিতাচিক্খ, কিস্স কম্মস্সিদং ফল’’ন্তি. –

আযস্মা মহামোগ্গল্লানত্থেরো পুচ্ছি. ততো দেৰতা ইমাহি গাথাহি ব্যাকাসি –

৮১১. ‘‘ইদানি ভন্তে ইমমেৰ গামং, পিণ্ডায অম্হাকং ঘরং উপাগমি;

ততো তে উচ্ছুস্স অদাসিং খণ্ডিকং, পসন্নচিত্তা অতুলায পীতিযা.

৮১২. ‘‘সস্সু চ পচ্ছা অনুযুঞ্জতে মমং, কহং নু উচ্ছুং ৰধুকে অৰাকিরি;

ন ছড্ডিতং নো পন খাদিতং মযা, সন্তস্স ভিক্খুস্স সযং অদাসহং.

৮১৩. ‘‘‘তুয্হং ন্ৰিদং ইস্সরিযং অথো মম’, ইতিস্সা সস্সু পরিভাসতে মমং;

লেড্ডুং গহেত্ৰা পহারং অদাসি মে, ততো চুতা কালকতাম্হি দেৰতা.

৮১৪. ‘‘তদেৰ কম্মং কুসলং কতং মযা, সুখঞ্চ কম্মং অনুভোমি অত্তনা;

দেৰেহি সদ্ধিং পরিচারযামহং, মোদামহং কামগুণেহি পঞ্চহি.

৮১৫. ‘‘তদেৰ কম্মং কুসলং কতং মযা, সুখঞ্চ কম্মং অনুভোমি অত্তনা;

দেৰিন্দগুত্তা তিদসেহি রক্খিতা, সমপ্পিতা কামগুণেহি পঞ্চহি.

৮১৬. ‘‘এতাদিসং পুঞ্ঞফলং অনপ্পকং, মহাৰিপাকা মম উচ্ছুদক্খিণা;

দেৰেহি সদ্ধিং পরিচারযামহং, মোদামহং কামগুণেহি পঞ্চহি.

৮১৭. ‘‘এতাদিসং পুঞ্ঞফলং অনপ্পকং, মহাজুতিকা মম উচ্ছুদক্খিণা;

দেৰিন্দগুত্তা তিদসেহি রক্খিতা, সহস্সনেত্তোরিৰ নন্দনে ৰনে.

৮১৮. ‘‘তুৰঞ্চ ভন্তে অনুকম্পকং ৰিদুং, উপেচ্চ ৰন্দিং কুসলঞ্চ পুচ্ছিসং;

ততো তে উচ্ছুস্স অদাসিং খণ্ডিকং, পসন্নচিত্তা অতুলায পীতিযা’’তি.

সেসং ৰুত্তসদিসমেৰাতি.

উচ্ছুৰিমানৰণ্ণনা নিট্ঠিতা.