১১. ৰন্দনৰিমানৰণ্ণনা

অভিক্কন্তেন ৰণ্ণেনাতি ৰন্দনৰিমানং. তস্স কা উপ্পত্তি? ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে. তেন সমযেন সম্বহুলা ভিক্খূ অঞ্ঞতরস্মিং গামকাৰাসে ৰস্সং ৰসিত্ৰা ৰুত্থৰস্সা পৰারেত্ৰা সেনাসনং পটিসামেত্ৰা পত্তচীৰরমাদায সাৰত্থিং উদ্দিস্স ভগৰন্তং দস্সনত্থায গচ্ছন্তা অঞ্ঞতরস্স গামস্স মজ্ঝেন অতিক্কমন্তি. তত্থ অঞ্ঞতরা ইত্থী তে ভিক্খূ দিস্ৰা পসন্নচিত্তা সঞ্জাতগারৰবহুমানা পঞ্চপতিট্ঠিতেন ৰন্দিত্ৰা সিরস্মিং অঞ্জলিং পগ্গয্হ যাৰ দস্সনূপচারা পসাদসোম্মানি অক্খীনি উম্মীলেত্ৰা ওলোকেন্তী অট্ঠাসি. সা অপরেন সমযেন কালং কত্ৰা তাৰতিংসেসু নিব্বত্তি. অথ নং তত্থ দিব্বসম্পত্তিং অনুভৰন্তিং আযস্মা মহামোগ্গল্লানো ইমাহি গাথাহি পটিপুচ্ছি –

৮১৯. ‘‘অভিক্কন্তেন ৰণ্ণেন…পে…ৰণ্ণো চ তে সব্বদিসা পভাসতী’’তি.

৮২২. ‘‘সা দেৰতা অত্তমনা…পে… যস্স কম্মস্সিদং ফলং’’.

৮২৩. ‘‘অহং মনুস্সেসু মনুস্সভূতা, দিস্ৰান সমণে সীলৰন্তে;

পাদানি ৰন্দিত্ৰা মনং পসাদযিং, ৰিত্তা চহং অঞ্জলিকং অকাসিং.

৮২৪. ‘‘তেন মেতাদিসো ৰণ্ণো…পে…ৰণ্ণো চ মে সব্বদিসা পভাসতী’’তি. –

ইমাহি গাথাহি ব্যাকাসি.

৮২৩. তত্থ সমণেতি সমিতপাপে. সীলৰন্তেতি সীলগুণযুত্তে. মনং পসাদযিন্তি ‘‘সাধুরূপা ৰতিমে অয্যা ধম্মচারিনো সমচারিনো ব্রহ্মচারিনো’’তি তেসং গুণে আরব্ভ চিত্তং পসাদেসিং. ৰিত্তা চহং অঞ্জলিকং অকাসিন্তি তুট্ঠা সোমনস্সজাতা অহং ৰন্দিং. পেসলানং ভিক্খূনং পসাদৰিকসিতানি অক্খীনি উম্মীলেত্ৰা দস্সনমত্তম্পি ইমেসং সত্তানং বহূপকারং, পগেৰ ৰন্দনাতি. তেনাহ ‘‘তেন মেতাদিসো ৰণ্ণো’’তিআদি. সেসং ৰুত্তনযমেৰ.

ৰন্দনৰিমানৰণ্ণনা নিট্ঠিতা.