৯. ৰিসালক্খিৰিমানৰণ্ণনা

কা নাম ত্ৰং ৰিসালক্খীতি ৰিসালক্খিৰিমানং. তস্স কা উপ্পত্তি? ভগৰতি পরিনিব্বুতে রঞ্ঞা অজাতসত্তুনা অত্তনা পটিলদ্ধা ভগৰতা সরীরধাতুযো গহেত্ৰা রাজগহে থূপে চ মহে চ কতে রাজগহৰাসিনী একা মালাকারধীতা সুনন্দা নাম উপাসিকা অরিযসাৰিকা সোতাপন্না পিতুং গেহতো পেসিতং বহুং মালঞ্চ গন্ধঞ্চ পেসেত্ৰা দেৰসিকং চেতিযে পূজং কারেসি, উপোসথদিৰসেসু পন সযমেৰ গন্ত্ৰা পূজং অকাসি. সা অপরভাগে অঞ্ঞতরেন রোগেন ফুট্ঠা কালং কত্ৰা সক্কস্স দেৰরঞ্ঞো পরিচারিকা হুত্ৰা নিব্বত্তি. অথেকদিৰসং সা সক্কেন দেৰানমিন্দেন সহ চিত্তলতাৰনং পাৰিসি. তত্থ চ অঞ্ঞাসং দেৰতানং পভা পুপ্ফাদীনং পভাহি পটিহতা হুত্ৰা ৰিচিত্তৰণ্ণা হোতি, সুনন্দায পন পভা তাহি অনভিভূতা সভাৰেনেৰ অট্ঠাসি. তং দিস্ৰা সক্কো দেৰরাজা তায কতসুচরিতং ঞাতুকামো ইমাহি গাথাহি পুচ্ছি –

৬৬৬. ‘‘কা নাম ত্ৰং ৰিসালক্খি, রম্মে চিত্তলতাৰনে;

সমন্তা অনুপরিযাসি, নারীগণপুরক্খতা.

৬৬৭. ‘‘যদা দেৰা তাৰতিংসা, পৰিসন্তি ইমং ৰনং;

সযোগ্গা সরথা সব্বে, চিত্রা হোন্তি ইধাগতা.

৬৬৮. ‘‘তুয্হঞ্চ ইধ পত্তায, উয্যানে ৰিচরন্তিযা;

কাযে ন দিস্সতী চিত্তং, কেন রূপং তৰেদিসং;

দেৰতে পুচ্ছিতাচিক্খ, কিস্স কম্মস্সিদং ফল’’ন্তি.

৬৬৬. তত্থ কা নাম ত্ৰন্তি পুরিমত্তভাৰে কা নাম কীদিসী নাম ত্ৰং, যত্থ কতেন সুচরিতেন অযং তে ঈদিসী আনুভাৰসম্পত্তি অহোসীতি অধিপ্পাযো. ৰিসালক্খীতি ৰিপুললোচনে.

৬৬৭. যদাতি যস্মিং কালে. ইমং ৰনন্তি ইমং চিত্তলতানামকং উপৰনং. চিত্রা হোন্তীতি ইমস্মিং চিত্তলতাৰনে ৰিচিত্তপভাসংসগ্গেন অত্তনো সরীরৰত্থালঙ্কারাদীনং পকতিওভাসতোপি ৰিসিট্ঠভাৰপ্পত্তিযা ৰিচিত্রাকারা হোন্তি. ইধাগতাতি ইধ আগতা সম্পত্তা, ইধ ৰা আগমনহেতু.

৬৬৮. ইধ পত্তাযাতি ইমং ঠানং সম্পত্তায উপগতায. কেন রূপং তৰেদিসন্তি কেন কারণেন তৰ রূপং সরীরং এদিসং এৰরূপং, চিত্তলতাৰনস্স পভং অভিভৰন্তং তিট্ঠতীতি অধিপ্পাযো.

এৰং সক্কেন পুট্ঠা সা দেৰতা ইমাহি গাথাহি ব্যাকাসি –

৬৬৯. ‘‘যেন কম্মেন দেৰিন্দ, রূপং ময্হং গতী চ মে;

ইদ্ধি চ আনুভাৰো চ, তং সুণোহি পুরিন্দদ.

৬৭০. ‘‘অহং রাজগহে রম্মে, সুনন্দা নামুপাসিকা;

সদ্ধা সীলেন সম্পন্না, সংৰিভাগরতা সদা.

৬৭১. ‘‘অচ্ছাদনঞ্চ ভত্তঞ্চ, সেনাসনং পদীপিযং;

অদাসিং উজুভূতেসু, ৰিপ্পসন্নেন চেতসা.

৬৭২. ‘‘চাতুদ্দসিং পঞ্চদসিং, যা চ পক্খস্স অট্ঠমী;

পাটিহারিযপক্খঞ্চ, অট্ঠঙ্গসুসমাগতং.

৬৭৩. ‘‘উপোসথং উপৰসিস্সং, সদা সীলেসু সংৰুতা;

সঞ্ঞমা সংৰিভাগা চ, ৰিমানং আৰসামহং.

৬৭৪. ‘‘পাণাতিপাতা ৰিরতা, মুসাৰাদা চ সঞ্ঞতা;

থেয্যা চ অতিচারা চ, মজ্জপানা চ আরকা.

৬৭৫. ‘‘পঞ্চসিক্খাপদে রতা, অরিযসচ্চান কোৰিদা;

উপাসিকা চক্খুমতো, গোতমস্স যসস্সিনো.

৬৭৬. ‘‘তস্সা মে ঞাতিকুলা দাসী, সদা মালাভিহারতি;

তাহং ভগৰতো থূপে, সব্বমেৰাভিরোপযিং.

৬৭৭. ‘‘উপোসথে চহং গন্ত্ৰা, মালাগন্ধৰিলেপনং;

থূপস্মিং অভিরোপেসিং, পসন্না সেহি পাণিভি.

৬৭৮. ‘‘তেন কম্মেন দেৰিন্দ, রূপং ময্হং গতী চ মে;

ইদ্ধি চ আনুভাৰো চ, যং মালং অভিরোপযিং.

৬৭৯. ‘‘যঞ্চ সীলৰতী আসিং, ন তং তাৰ ৰিপচ্চতি;

আসা চ পন মে দেৰিন্দ, সকদাগামিনী সিয’’ন্তি.

৬৬৯. তত্থ গতীতি অযং দেৰগতি, নিব্বত্তি ৰা. ইদ্ধীতি অযং দেৰিদ্ধি, অধিপ্পাযসমিজ্ঝনং ৰা. আনুভাৰোতি পভাৰো. পুরিন্দদাতি সক্কং আলপতি. সো হি পুরে দানং অদাসীতি ‘‘পুরিন্দদো’’তি ৰুচ্চতি.

৬৭৬. ঞাতিকুলাতি পিতু গেহং সন্ধায ৰদতি. সদা মালাভিহারতীতি সদা সব্বকালং দিৰসে দিৰসে ঞাতিকুলতো দাসিযা পুপ্ফং ময্হং অভিহরীযতি. সব্বমেৰাভিরোপযিন্তি ময্হং পিল়ন্ধনত্থায পিতুগেহতো আহটং মালং অঞ্ঞঞ্চ গন্ধাদিং সব্বমেৰ অত্তনা অপরিভুঞ্জিত্ৰা ভগৰতো থূপে পূজনৰসেন অভিরোপযিং পূজং কারেসিং.

৬৭৭-৮. উপোসথে চহং গন্ত্ৰাতি উপোসথদিৰসে অহমেৰ থূপট্ঠানং গন্ত্ৰা. যং মালং অভিরোপযিন্তি যং তদা ভগৰতো থূপে মালাগন্ধাভিরোপনং কতং, তেন কম্মেনাতি যোজনা.

৬৭৯. ন তং তাৰ ৰিপচ্চতীতি যং সীলৰতী আসিং, তং সীলরক্খণং তং রক্খিতং সীলং পূজামযপুঞ্ঞস্স বলৰভাৰেন অলদ্ধোকাসং ন তাৰ ৰিপচ্চতি, ন ৰিপচ্চিতুং আরদ্ধং, অপরস্মিংযেৰ অত্তভাৰে তস্স ৰিপাকোতি অত্থো. আসা চ পন মে দেৰিন্দ, সকদাগামিনী সিযন্তি ‘‘কথং নু খো অহং সকদাগামিনী ভৰেয্য’’ন্তি পত্থনা চ মে দেৰিন্দ, অরিযধম্মৰিসযাৰ, ন ভৰৰিসেসৰিসযা. সা পন সপ্পিমণ্ডং ইচ্ছতো দধিতো পচিতং ৰিয অনিপ্ফাদিনীতি দস্সেতি. সেসং ৰুত্তনযমেৰ.

ইমং পন অত্থং সক্কো দেৰানমিন্দো অত্তনা চ তায দেৰধীতায চ ৰুত্তনিযামেনেৰ আযস্মতো ৰঙ্গীসত্থেরস্স আরোচেসি. আযস্মা ৰঙ্গীসো সঙ্গীতিকালে ধম্মসঙ্গাহকানং মহাথেরানং আরোচেসি, তে চ তং তথেৰ সঙ্গীতিং আরোপযিংসূতি.

ৰিসালক্খিৰিমানৰণ্ণনা নিট্ঠিতা.