৭. দুতিযনাৰাৰিমানৰণ্ণনা

সুৰণ্ণচ্ছদনং নাৰন্তি দুতিযনাৰাৰিমানং. তস্স কা উপ্পত্তি? ভগৰতি সাৰত্থিযং ৰিহরন্তে অঞ্ঞতরো খীণাসৰত্থেরো উপকট্ঠায ৰস্সূপনাযিকায গামকাৰাসে ৰস্সং উপগন্তুকামো সাৰত্থিতো তং গামং উদ্দিস্স পচ্ছাভত্তং অদ্ধানমগ্গপটিপন্নো, মগ্গপরিস্সমেন কিলন্তো তসিতো অন্তরামগ্গে অঞ্ঞতরং গামং সম্পত্তো, বহিগামে তাদিসং ছাযূদকসম্পন্নট্ঠানং অপস্সন্তো পরিস্সমেন চ অভিভুয্যমানো চীৰরং পারুপিত্ৰা গামং পৰিসিত্ৰা ধুরগেহস্সেৰ দ্ৰারে অট্ঠাসি. তত্থ অঞ্ঞতরা ইত্থী থেরং পস্সিত্ৰা ‘‘কুতো, ভন্তে, আগতত্থা’’তি পুচ্ছিত্ৰা মগ্গপরিস্সমং পিপাসিতভাৰঞ্চ ঞত্ৰা ‘‘এথ, ভন্তে’’তি গেহং পৰেসেত্ৰা ‘‘ইধ নিসীদথা’’তি আসনং পঞ্ঞাপেত্ৰা অদাসি. তত্থ নিসিন্নে পাদোদকং পাদব্ভঞ্জনতেলঞ্চ দত্ৰা তালৰণ্টং গহেত্ৰা বীজি. পরিল়াহে ৰূপসন্তে মধুরং সীতলং সুগন্ধং পানকং যোজেত্ৰা অদাসি. থেরো তং পিৰিত্ৰা পটিপ্পস্সদ্ধকিলমথো অনুমোদনং কত্ৰা পক্কামি. সা অপরভাগে কালং কত্ৰা তাৰতিংসভৰনে নিব্বত্তীতি সব্বং অনন্তরৰিমানসদিসন্তি ৰেদিতব্বং. গাথাসুপি অপুব্বং নত্থি. তেন ৰুত্তং –

৫৩. ‘‘সুৰণ্ণচ্ছদনং নাৰং, নারি আরুয্হ তিট্ঠসি;

ওগাহসি পোক্খরণিং, পদ্মং ছিন্দসি পাণিনা.

৫৪. ‘‘কেন তেতাদিসো ৰণ্ণো, কেন তে ইধ মিজ্ঝতি;

উপ্পজ্জন্তি চ তে ভোগা, যে কেচি মনসো পিযা.

৫৫. ‘‘পুচ্ছামি তং দেৰি মহানুভাৰে, মনুস্সভূতা কিমকাসি পুঞ্ঞং;

কেনাসি এৰং জলিতানুভাৰা, ৰণ্ণো চ তে সব্বদিসা পভাসতী’’তি.

৫৬. ‘‘সা দেৰতা অত্তমনা, মোগ্গল্লানেন পুচ্ছিতা;

পঞ্হং পুট্ঠা ৰিযাকাসি, যস্স কম্মস্সিদং ফলং’’.

৫৭. ‘‘অহং মনুস্সেসু মনুস্সভূতা, পুরিমায জাতিযা মনুস্সলোকে;

দিস্ৰান ভিক্খুং তসিতং কিলন্তং, উট্ঠায পাতুং উদকং অদাসিং.

৫৮. ‘‘যো ৰে কিলন্তস্স পিপাসিতস্স, ট্ঠায পাতুং উদকং দদাতি;

সীতোদকা তস্স ভৰন্তি নজ্জো, পহূতমল্যা বহুপুণ্ডরীকা.

৫৯. ‘‘তং আপগা অনুপরিযন্তি সব্বদা, সীতোদকা ৰালুকসন্থতা নদী;

অম্বা চ সালা তিলকা চ জম্বুযো, উদ্দালকা পাটলিযো চ ফুল্লা.

৬০. ‘‘তংভূমিভাগেহি উপেতরূপং, ৰিমানসেট্ঠং ভুস সোভমানং;

তস্সীধ কম্মস্স অযং ৰিপাকো, এতাদিসং পুঞ্ঞকতা লভন্তি.

৬১. ‘‘তেন মেতাদিসো ৰণ্ণো, তেন মে ইধ মিজ্ঝতি;

উপ্পজ্জন্তি চ মে ভোগা, যে কেচি মনসো পিযা.

৬২. ‘‘অক্খামি তে ভিক্খু মহানুভাৰ, মনুস্সভূতা যমকাসি পুঞ্ঞং;

তেনম্হি এৰং জলিতানুভাৰা, ৰণ্ণো চ মে সব্বদিসা পভাসতী’’তি.

অত্থৰণ্ণনাসুপি ইধ একোৰ থেরোতি অপুব্বং নত্থি.

দুতিযনাৰাৰিমানৰণ্ণনা নিট্ঠিতা.