৬. পঠমনাৰাৰিমানৰণ্ণনা

সুৰণ্ণচ্ছদনং নাৰন্তি নাৰাৰিমানং. তস্স কা উপ্পত্তি? ভগৰতি সাৰত্থিযং ৰিহরন্তে সোল়সমত্তা ভিক্খূ অঞ্ঞতরস্মিং গামকাৰাসে ৰসিত্ৰা ৰুত্থৰস্সা ‘‘ভগৰন্তং পস্সিস্সাম, ধম্মঞ্চ সুণিস্সামা’’তি সাৰত্থিং উদ্দিস্স গিম্হসমযে অদ্ধানমগ্গং পটিপন্না, অন্তরামগ্গে চ নিরুদকো কন্তারো, তে চ তত্থ ঘম্মাভিতত্তা কিলন্তা তসিতা পানীযং অলভমানা অঞ্ঞতরস্স গামস্স অৰিদূরেন গচ্ছন্তি. তত্থ অঞ্ঞতরা ইত্থী উদকভাজনং গহেত্ৰা উদকত্থায উদপানাভিমুখী গচ্ছতি. অথ তে ভিক্খূ তং দিস্ৰা ‘‘যত্থাযং ইত্থী গচ্ছতি, তত্থ গতে পানীযং লদ্ধুং সক্কা’’তি পিপাসাপরেতা তংদিসাভিমুখা গন্ত্ৰা উদপানং দিস্ৰা তস্সা অৰিদূরে অট্ঠংসু. সা ইত্থী ততো উদকং গহেত্ৰা নিৰত্তিতুকামা তে ভিক্খূ দিস্ৰা ‘‘ইমে অয্যা উদকেন অত্থিকা পিপাসিতা’’তি ঞত্ৰা গরুচিত্তীকারং উপট্ঠপেত্ৰা উদকেন নিমন্তেসি. তে পত্তথৰিকতো পরিস্সাৰনং নীহরিত্ৰা পরিস্সাৰেত্ৰা যাৰদত্থং পানীযং পিৰিত্ৰা হত্থপাদে সীতলে কত্ৰা তস্সা ইত্থিযা পানীযদানে অনুমোদনং ৰত্ৰা অগমংসু.

সা তং পুঞ্ঞং হদযে ঠপেত্ৰা অন্তরন্তরা অনুস্সরন্তী অপরভাগে কালং কত্ৰা তাৰতিংসভৰনে নিব্বত্তি. তস্সা পুঞ্ঞানুভাৰেন কপ্পরুক্খোপসোভিতং মহন্তং ৰিমানং উপ্পজ্জি. তং ৰিমানং পরিক্খিপিত্ৰা মুত্তজালরজতৰিভূসিতা ৰিয সিকতাৰকিণ্ণপণ্ডরপুলিনতটা মণিক্খন্ধনিম্মলসলিলৰাহিনী সরিতা. তস্সা উভোসু তীরেসু উয্যানৰিমানদ্ৰারে চ মহতী পোক্খরণী পঞ্চৰণ্ণপদুমসণ্ডমণ্ডিতা সহ সুৰণ্ণনাৰায নিব্বত্তি. সা তত্থ দিব্বসম্পত্তিং অনুভৰন্তী নাৰায কীল়ন্তী লল়ন্তী ৰিচরতি. অথেকদিৰসং আযস্মা মহামোগ্গল্লানো দেৰচারিকং চরন্তো তং দেৰধীতরং নাৰায কীল়ন্তিং দিস্ৰা তায কতপুঞ্ঞকম্মং পুচ্ছন্তো –

৪৩. ‘‘সুৰণ্ণচ্ছদনং নাৰং, নারি আরুয্হ তিট্ঠসি;

ওগাহসি পোক্খরণিং, পদ্মং ছিন্দসি পাণিনা.

৪৪. ‘‘কেন তেতাদিসো ৰণ্ণো, কেন তে ইধ মিজ্ঝতি;

উপ্পজ্জন্তি চ তে ভোগা, যে কেচি মনসো পিযা.

৪৫. ‘‘পুচ্ছামি তং দেৰি মহানুভাৰে,

মনুস্সভূতা কিমকাসি পুঞ্ঞং;

কেনাসি এৰং জলিতানুভাৰা,

ৰণ্ণো চ তে সব্বদিসা পভাসতী’’তি. – আহ;

ততো থেরেন পুট্ঠায দেৰতায ৰিস্সজ্জিতাকারং দস্সেতুং সঙ্গীতিকারেহি –

৪৬. ‘‘সা দেৰতা অত্তমনা, মোগ্গল্লানেন পুচ্ছিতা;

পঞ্হং পুট্ঠা ৰিযাকাসি, যস্স কম্মস্সিদং ফল’’ন্তি. –

অযং গাথা ৰুত্তা.

৪৭. ‘‘অহং মনুস্সেসু মনুস্সভূতা, পুরিমায জাতিযা মনুস্সলোকে;

দিস্ৰান ভিক্খূ তসিতে কিলন্তে, উট্ঠায পাতুং উদকং অদাসিং.

৪৮. ‘‘যো ৰে কিলন্তান পিপাসিতানং, উট্ঠায পাতুং উদকং দদাতি;

সীতোদকা তস্স ভৰন্তি নজ্জো, পহূতমল্যা বহুপুণ্ডরীকা.

৪৯. ‘‘তং আপগা অনুপরিযন্তি সব্বদা, সীতোদকা ৰালুকসন্থতা নদী;

অম্বা চ সালা তিলকা চ জম্বুযো, উদ্দালকা পাটলিযো চ ফুল্লা.

৫০. ‘‘তংভূমিভাগেহি উপেতরূপং, ৰিমানসেট্ঠং ভুস সোভমানং;

তস্সীধ কম্মস্স অযং ৰিপাকো, এতাদিসং পুঞ্ঞকতা লভন্তি.

৫১. ‘‘তেন মেতাদিসো ৰণ্ণো, তেন মে ইধ মিজ্ঝতি;

উপ্পজ্জন্তি চ মে ভোগা, যে কেচি মনসো পিযা.

৫২. ‘‘অক্খামি তে ভিক্খু মহানুভাৰ, মনুস্সভূতা যমকাসি পুঞ্ঞং;

তেনম্হি এৰং জলিতানুভাৰা, ৰণ্ণো চ মে সব্বদিসা পভাসতী’’তি. –

অযং দেৰতায ৰিস্সজ্জিতাকারো.

৪৩. তত্থ সুৰণ্ণচ্ছদনন্তি ৰিচিত্তভিত্তিৰিরচনেহি রত্তসুৰণ্ণমযেহি উভোহি পস্সেহি পটিচ্ছাদিতব্ভন্তরতায চেৰ নানারতনসমুজ্জলিতেন কনকমযালঙ্কারেন উপরি ছাদিততায চ সুৰণ্ণচ্ছদনং. নাৰন্তি পোতং. সো হি ওরতো পারং পৰতি গচ্ছতীতি পোতো, সত্তে নেতীতি নাৰাতি চ ৰুচ্চতি. নারীতি তস্সা দেৰধীতায আলপনং. নরতি নেতীতি নরো, পুরিসো. যথা হি পঠমপকতিভূতো সত্তো ইতরায পকতিযা সেট্ঠত্থেন পুরি সেতীতি ‘‘পুরিসো’’তি ৰুচ্চতি, এৰং নযনট্ঠেন ‘‘নরো’’তি. পুত্তভাতুভূতোপি হি পুগ্গলো মাতুজেট্ঠভগিনীনং পিতুট্ঠানে তিট্ঠতি, পগেৰ ভত্তুভূতো. নরস্স এসাতি নারী, অযঞ্চ সমঞ্ঞা মনুস্সিত্থীসু পৰত্তা রুল়্হিৰসেন ইতরাসুপি তথা ৰুচ্চতি. ওগাহসি পোক্খরণিন্তি সতিপি রত্তুপ্পলনীলুপ্পলাদিকে বহুৰিধে রতনমযে জলজকুসুমে পোক্খরসঙ্খাতানং দিব্বপদুমানং তত্থ যেভুয্যেন অত্থিতায ‘‘পোক্খরণী’’তি লদ্ধনামং দিব্বসরং জলৰিহাররতিযা অনুপৰিসসি. পদ্মং ছিন্দসি পাণিনাতি রজতমযনাল়ং পদুমরাগরতনমযপত্তসঙ্ঘাতং কনকমযকণ্ণিকাকিঞ্জক্খকেসরং দিব্বকমলং লীলারৰিন্দং কত্তুকামতায তৰ হত্থেন ভঞ্জসি.

৪৭. তসিতেতি পিপাসিতে. কিলন্তেতি তায পিপাসায অদ্ধানপরিস্সমেন চ কিলন্তকাযে. উট্ঠাযাতি উট্ঠানৰীরিযং কত্ৰা, আলসিযং অনাপজ্জিত্ৰাতি অত্থো.

৪৮. যো ৰেতিআদিনা যথা অহং, এৰং অঞ্ঞেপি আযতনগতেন উদকদানপুঞ্ঞেন এতাদিসং ফলং পটিলভন্তীতি দিট্ঠেন অদিট্ঠস্স অনুমানৰিধিং দস্সেন্তী থেরেন পুট্ঠমত্থং সাধারণতো ৰিস্সজ্জেতি. তত্থ তস্সাতি তন্তি চ যথাৰুত্তপুঞ্ঞকারিনং পচ্চামসতি.

৪৯. অনুপরিযন্তীতি অনুরূপৰসেন পরিক্খিপন্তি. তস্স ৰসনট্ঠানপরিক্খিপনেন সোপি পরিক্খিত্তো নাম হোতি. তিলকাতি বন্ধুজীৰকপুপ্ফসদিসপুপ্ফা একা রুক্খজাতি. উদ্দালকাতি ৰাতঘাতকা, যে ‘‘রাজরুক্খা’’তিপি ৰুচ্চন্তি.

৫০. তংভূমিভাগেহীতি তাদিসেহি ভূমিভাগেহি, যথাৰুত্তপোক্খরণীনদীউয্যানৰন্তেহি ভূমিপদেসেহীতি অত্থো. উপেতরূপন্তি পাসংসিযভাৰেন উপেতং, তেসং পোক্খরণীআদীনং ৰসেন রমণীযসন্নিৰেসন্তি ৰুত্তং হোতি. ভুস সোভমানন্তি ভুসং অতিৰিয ৰিরোচমানং ৰিমানসেট্ঠং লভন্তীতি যোজনা. সেসং ৰুত্তনযমেৰাতি.

পঠমনাৰাৰিমানৰণ্ণনা নিট্ঠিতা.