৮. ৰিজযাথেরীগাথাৰণ্ণনা

চতুক্খত্তুন্তিআদিকা ৰিজযায থেরিযা গাথা. অযম্পি পুরিমবুদ্ধেসু কতাধিকারা তত্থ তত্থ ভৰে ৰিৰট্টূপনিস্সযং কুসলং উপচিনন্তী, অনুক্কমেন পরিব্রূহিতকুসলমূলা দেৰমনুস্সেসু সংসরন্তী, ইমস্মিং বুদ্ধুপ্পাদে রাজগহে অঞ্ঞতরস্মিং কুলগেহে নিব্বত্তিত্ৰা ৰিঞ্ঞুতং পত্ৰা খেমায থেরিযা গিহিকালে সহাযিকা অহোসি. সা তস্সা পব্বজিতভাৰং সুত্ৰা ‘‘সাপি নাম রাজমহেসী পব্বজিস্সতি কিমঙ্গং পনাহ’’ন্তি পব্বজিতুকামাযেৰ হুত্ৰা খেমাথেরিযা সন্তিকং উপসঙ্কমি. থেরী তস্সা অজ্ঝাসযং ঞত্ৰা তথা ধম্মং দেসেসি, যথা সংসারে সংৰিগ্গমানসা সাসনে সা অভিপ্পসন্না ভৰিস্সতি. সা তং ধম্মং সুত্ৰা সংৰেগজাতা পটিলদ্ধসদ্ধা চ হুত্ৰা পব্বজ্জং যাচি. থেরী তং পব্বাজেসি. সা পব্বজিত্ৰা কতপুব্বকিচ্চা ৰিপস্সনং পট্ঠপেত্ৰা হেতুসম্পন্নতায, ন চিরস্সেৰ সহ পটিসম্ভিদাহি অরহত্তং পত্ৰা অত্তনো পটিপত্তিং পচ্চৰেক্খিত্ৰা উদানৰসেন –

১৬৯. ‘‘চতুক্খত্তুং পঞ্চক্খত্তুং, ৰিহারা উপনিক্খমিং;

অলদ্ধা চেতসো সন্তিং, চিত্তে অৰসৰত্তিনী.

১৭০. ‘‘ভিক্খুনিং উপসঙ্কম্ম, সক্কচ্চং পরিপুচ্ছহং;

সা মে ধম্মমদেসেসি, ধাতুআযতনানি চ.

১৭১. ‘‘চত্তারি অরিযসচ্চানি, ইন্দ্রিযানি বলানি চ;

বোজ্ঝঙ্গট্ঠঙ্গিকং মগ্গং, উত্তমত্থস্স পত্তিযা.

১৭২. ‘‘তস্সাহং ৰচনং সুত্ৰা, করোন্তী অনুসাসনিং;

রত্তিযা পুরিমে যামে, পুব্বজাতিমনুস্সরিং.

১৭৩. ‘‘রত্তিযা মজ্ঝিমে যামে, দিব্বচক্খুং ৰিসোধযিং;

রত্তিযা পচ্ছিমে যামে, তমোখন্ধং পদালযিং.

১৭৪. ‘‘পীতিসুখেন চ কাযং, ফরিত্ৰা ৰিহরিং তদা;

সত্তমিযা পাদে পসারেসিং, তমোখন্ধং পদালিযা’’তি. –

ইমা গাথা অভাসি.

তত্থ ভিক্খুনিন্তি খেমাথেরিং সন্ধায ৰদতি.

বোজ্ঝঙ্গট্ঠঙ্গিকং মগ্গন্তি সত্তবোজ্ঝঙ্গঞ্চ অট্ঠঙ্গিকঞ্চ অরিযমগ্গং. উত্তমত্থস্স পত্তিযাতি অরহত্তস্স নিব্বানস্সেৰ ৰা পত্তিযা অধিগমায.

পীতিসুখেনাতি ফলসমাপত্তিপরিযাপন্নায পীতিযা সুখেন চ. কাযন্তি তংসম্পযুত্তং নামকাযং তদনুসারেন রূপকাযঞ্চ. ফরিত্ৰাতি ফুসিত্ৰা ব্যাপেত্ৰা ৰা. সত্তমিযা পাদে পসারেসিন্তি ৰিপস্সনায আরদ্ধদিৰসতো সত্তমিযং পল্লঙ্কং ভিন্দিত্ৰা পাদে পসারেসিং. কথং? তমোখন্ধং পদালিয, অপ্পদালিতপুব্বং মোহক্খন্ধং অগ্গমগ্গঞাণাসিনা পদালেত্ৰা. সেসং হেট্ঠা ৰুত্তনযমেৰ.

ৰিজযাথেরীগাথাৰণ্ণনা নিট্ঠিতা.

ছক্কনিপাতৰণ্ণনা নিট্ঠিতা.