৭. সত্তকনিপাতো

১. উত্তরাথেরীগাথাৰণ্ণনা

সত্তকনিপাতে মুসলানি গহেত্ৰানাতি উত্তরায থেরিযা গাথা. অযম্পি পুরিমবুদ্ধেসু কতাধিকারা তত্থ তত্থ ভৰে ৰিৰট্টূপনিস্সযং কুসলং উপচিনন্তী, অনুক্কমেন সম্ভাৰিতকুসলমূলা সমুপচিতৰিমোক্খসম্ভারা পরিপক্কৰিমুত্তিপরিপাচনীযধম্মা হুত্ৰা, ইমস্মিং বুদ্ধুপ্পাদে সাৰত্থিযং অঞ্ঞতরস্মিং কুলগেহে নিব্বত্তিত্ৰা উত্তরাতি লদ্ধনামা অনুক্কমেন ৰিঞ্ঞুতং পত্ৰা পটাচারায থেরিযা সন্তিকং উপসঙ্কমি. থেরী তস্সা ধম্মং কথেসি. সা ধম্মং সুত্ৰা সংসারে জাতসংৰেগা সাসনে অভিপ্পসন্না হুত্ৰা পব্বজি. পব্বজিত্ৰা চ কতপুব্বকিচ্চা পটাচারায থেরিযা সন্তিকে ৰিপস্সনং পট্ঠপেত্ৰা ভাৰনমনুযুঞ্জন্তী উপনিস্সযসম্পন্নতায ইন্দ্রিযানং পরিপাকং গতত্তা চ ন চিরস্সেৰ ৰিপস্সনং উস্সুক্কাপেত্ৰা সহ পটিসম্ভিদাহি অরহত্তং পাপুণি. অরহত্তং পন পত্ৰা অত্তনো পটিপত্তিং পচ্চৰেক্খিত্ৰা উদানৰসেন –

১৭৫. ‘‘মুসলানি গহেত্ৰান, ধঞ্ঞং কোট্টেন্তি মাণৰা;

পুত্তদারানি পোসেন্তা, ধনং ৰিন্দন্তি মাণৰা.

১৭৬. ‘‘ঘটেথ বুদ্ধসাসনে, যং কত্ৰা নানুতপ্পতি;

খিপ্পং পাদানি ধোৰিত্ৰা, একমন্তং নিসীদথ.

১৭৭. ‘‘চিত্তং উপট্ঠপেত্ৰান, একগ্গং সুসমাহিতং;

পচ্চৰেক্খথ সঙ্খারে, পরতো নো চ অত্ততো.

১৭৮. ‘‘তস্সাহং ৰচনং সুত্ৰা, পটাচারানুসাসনিং;

পাদে পক্খালযিত্ৰান, একমন্তে উপাৰিসিং.

১৭৯. ‘‘রত্তিযা পুরিমে যামে, পুব্বজাতিমনুস্সরিং;

রত্তিযা মজ্ঝিমে যামে, দিব্বচক্খুং ৰিসোধযিং.

১৮০. ‘‘রত্তিযা পচ্ছিমে যামে, তমোক্খন্ধং পদালযিং;

তেৰিজ্জা অথ ৰুট্ঠাসিং, কতা তে অনুসাসনী.

১৮১. ‘‘সক্কংৰ দেৰা তিদসা, সঙ্গামে অপরাজিতং;

পুরক্খত্ৰা ৰিহস্সামি, তেৰিজ্জাম্হি অনাসৰা’’তি. –

ইমা গাথা অভাসি.

তত্থ চিত্তং উপট্ঠপেত্ৰানাতি ভাৰনাচিত্তং কম্মট্ঠানে উপট্ঠপেত্ৰা. কথং? একগ্গং সুসমাহিতং পচ্চৰেক্খথাতি পটিপত্তিং অৰেক্খথ, সঙ্খারে অনিচ্চাতিপি, দুক্খাতিপি, অনত্তাতিপি লক্খণত্তযং ৰিপস্সথাতি অত্থো. ইদঞ্চ ওৰাদকালে অত্তনো অঞ্ঞেসঞ্চ ভিক্খুনীনং থেরিযাদীনং ওৰাদস্স অনুৰাদৰসেন ৰুত্তং. পটাচারানুসাসনিন্তি পটাচারায থেরিযা অনুসিট্ঠিং. ‘‘পটাচারায সাসন’’ন্তিপি ৰা পাঠো.

অথ ৰুট্ঠাসিন্তি তেৰিজ্জাভাৰপ্পত্তিতো পচ্ছা আসনতো ৰুট্ঠাসিং. অযম্পি থেরী একদিৰসং পটাচারায থেরিযা সন্তিকে কম্মট্ঠানং সোধেত্ৰা অত্তনো ৰসনট্ঠানং পৰিসিত্ৰা পল্লঙ্কং আভুজিত্ৰা নিসীদি. ‘‘ন তাৰিমং পল্লঙ্কং ভিন্দিস্সামি, যাৰ মে ন অনুপাদায আসৰেহি চিত্তং ৰিমুচ্চতী’’তি নিচ্ছযং কত্ৰা সম্মসনং আরভিত্ৰা, অনুক্কমেন ৰিপস্সনং উস্সুক্কাপেত্ৰা মগ্গপটিপাটিযা অভিঞ্ঞাপটিসম্ভিদাপরিৰারং অরহত্তং পত্ৰা একূনৰীসতিযা পচ্চৰেক্খণাঞাণায পৰত্তায ‘‘ইদানিম্হি কতকিচ্চা’’তি সোমনস্সজাতা ইমা গাথা উদানেত্ৰা পাদে পসারেসি অরুণুগ্গমনৰেলাযং. ততো সম্মদেৰ ৰিভাতায রত্তিযা থেরিযা সন্তিকং উপগন্ত্ৰা ইমা গাথা পচ্চুদাহাসি. তেন ৰুত্তং ‘‘কতা তে অনুসাসনী’’তিআদি. সেসং সব্বং হেট্ঠা ৰুত্তনযমেৰ.

উত্তরাথেরীগাথাৰণ্ণনা নিট্ঠিতা.

২. চালাথেরীগাথাৰণ্ণনা

সতিং উপট্ঠপেত্ৰানাতিআদিকা চালায থেরিযা গাথা. অযম্পি পুরিমবুদ্ধেসু কতাধিকারা তত্থ তত্থ ভৰে ৰিৰট্টূপনিস্সযং কুসলং উপচিনিত্ৰা ইমস্মিং বুদ্ধুপ্পাদে মগধেসু নালকগামে রূপসারিব্রাহ্মণিযা কুচ্ছিম্হি নিব্বত্তি. তস্সা নামগ্গহণদিৰসে চালাতি নামং অকংসু, তস্সা কনিট্ঠায উপচালাতি, অথ তস্সা কনিট্ঠায সীসূপচালাতি. ইমা তিস্সোপি ধম্মসেনাপতিস্স কনিট্ঠভগিনিযো, ইমাসং পুত্তানম্পি তিণ্ণং ইদমেৰ নামং. যে সন্ধায থেরগাথায ‘‘চালে উপচালে সীসূপচালে’’তি (থেরগা. ৪২) আগতং.

ইমা পন তিস্সোপি ভগিনিযো ‘‘ধম্মসেনাপতি পব্বজী’’তি সুত্ৰা ‘‘ন হি নূন সো ওরকো ধম্মৰিনযো, ন সা ওরিকা পব্বজ্জা, যত্থ অম্হাকং অয্যো পব্বজিতো’’তি উস্সাহজাতা তিব্বচ্ছন্দা অস্সুমুখং রুদমানং ঞাতিপরিজনং পহায পব্বজিংসু. পব্বজিত্ৰা চ ঘটেন্তিযো ৰাযমন্তিযো নচিরস্সেৰ অরহত্তং পাপুণিংসু. অরহত্তং পন পত্ৰা নিব্বানসুখেন ফলসুখেন ৰিহরন্তি.

তাসু চালা ভিক্খুনী একদিৰসং পচ্ছাভত্তং পিণ্ডপাতপটিক্কন্তা অন্ধৰনং পৰিসিত্ৰা দিৰাৰিহারং নিসীদি. অথ নং মারো উপসঙ্কমিত্ৰা কামেহি উপনেসি. যং সন্ধায সুত্তে ৰুত্তং –

‘‘অথ খো চালা ভিক্খুনী পুব্বণ্হসমযং নিৰাসেত্ৰা পত্তচীৰরং আদায সাৰত্থিং পিণ্ডায পাৰিসি. সাৰত্থিযং পিণ্ডায চরিত্ৰা পচ্ছাভত্তং পিণ্ডপাতপটিক্কন্তা যেন অন্ধৰনং, তেনুপসঙ্কমি দিৰাৰিহারায. অন্ধৰনং অজ্ঝোগাহেত্ৰা অঞ্ঞতরস্মিং রুক্খমূলে দিৰাৰিহারং নিসীদি. অথ খো মারো পাপিমা যেন চালা ভিক্খুনী, তেনুপসঙ্কমি, উপসঙ্কমিত্ৰা চালং ভিক্খুনিং এতদৰোচা’’তি (সং. নি. ১.১৬৭).

অন্ধৰনম্হি দিৰাৰিহারং নিসিন্নং মারো উপসঙ্কমিত্ৰা ব্রহ্মচরিযৰাসতো ৰিচ্ছিন্দিতুকামো ‘‘কং নু উদ্দিস্স মুণ্ডাসী’’তিআদিং পুচ্ছি. অথস্স সত্থু গুণে ধম্মস্স চ নিয্যানিকভাৰং পকাসেত্ৰা অত্তনো কতকিচ্চভাৰৰিভাৰনেন তস্স ৰিসযাতিক্কমং পৰেদেসি. তং সুত্ৰা মারো দুক্খী দুম্মনো তত্থেৰন্তরধাযি. অথ সা অত্তনা মারেন চ ভাসিতা গাথা উদানৰসেন কথেন্তী –

১৮২. ‘‘সতিং উপট্ঠপেত্ৰান, ভিক্খুনী ভাৰিতিন্দ্রিযা;

পটিৰিজ্ঝি পদং সন্তং, সঙ্খারূপসমং সুখং.

১৮৩. ‘‘কং নু উদ্দিস্স মুণ্ডাসি, সমণী ৰিয দিস্সতি;

ন চ রোচেসি পাসণ্ডে, কিমিদং চরসি মোমুহা.

১৮৪. ‘‘ইতো বহিদ্ধা পাসণ্ডা, দিট্ঠিযো উপনিস্সিতা;

ন তে ধম্মং ৰিজানন্তি, ন তে ধম্মস্স কোৰিদা.

১৮৫. ‘‘অত্থি সক্যকুলে জাতো, বুদ্ধো অপ্পটিপুগ্গলো;

সো মে ধম্মমদেসেসি, দিট্ঠীনং সমতিক্কমং.

১৮৬. ‘‘দুক্খং দুক্খসমুপ্পাদং, দুক্খস্স চ অতিক্কমং;

অরিযং চট্ঠঙ্গিকং মগ্গং, দুক্খূপসমগামিনং.

১৮৭. ‘‘তস্সাহং ৰচনং সুত্ৰা, ৰিহরিং সাসনে রতা;

তিস্সো ৰিজ্জা অনুপ্পত্তা, কতং বুদ্ধস্স সাসনং.

১৮৮. ‘‘সব্বত্থ ৰিহতা নন্দী, তমোক্খন্ধো পদালিতো;

এৰং জানাহি পাপিম, নিহতো ত্ৰমসি অন্তকা’’তি. –

ইমা গাথা অভাসি.

তত্থ সতিং উপট্ঠপেত্ৰানাতি সতিপট্ঠানভাৰনাৰসেন কাযাদীসু অসুভদুক্খানিচ্চানত্তৰসেন সতিং সুট্ঠু উপট্ঠিতং কত্ৰা. ভিক্খুনীতি অত্তানং সন্ধায ৰদতি. ভাৰিতিন্দ্রিযাতি অরিযমগ্গভাৰনায ভাৰিতসদ্ধাদিপঞ্চিন্দ্রিযা. পটিৰিজ্ঝি পদং সন্তন্তি সন্তং পদং নিব্বানং সচ্ছিকিরিযাপটিৰেধেন পটিৰিজ্ঝি সচ্ছাকাসি. সঙ্খারূপসমন্তি সব্বসঙ্খারানং উপসমহেতুভূতং. সুখন্তি অচ্চন্তসুখং.

‘‘কং নু উদ্দিস্সা’’তি গাথা মারেন ৰুত্তা. তত্রাযং সঙ্খেপত্থো – ইমস্মিং লোকে বহূ সমযা তেসঞ্চ দেসেতারো বহূ এৰ তিত্থকরা, তেসু কং নু খো ত্ৰং উদ্দিস্স মুণ্ডাসি মুণ্ডিতকেসা অসি. ন কেৰলং মুণ্ডাৰ, অথ খো কাসাৰধারণেন চ সমণী ৰিয দিস্সতি. ন চ রোচেসি পাসণ্ডেতি তাপসপরিব্বাজকাদীনং আদাসভূতে পাসণ্ডে তে তে সমযন্তরে নেৰ রোচেসি. কিমিদং চরসি মোমুহাতি কিং নামিদং, যং পাসণ্ডৰিহিতং উজুং নিব্বানমগ্গং পহায অজ্জ কালিকং কুমগ্গং পটিপজ্জন্তী অতিৰিয মূল়্হা চরসি পরিব্ভমসীতি.

তং সুত্ৰা থেরী পটিৰচনদানমুখেন তং তজ্জেন্তী ‘‘ইতো বহিদ্ধা’’তিআদিমাহ. তত্থ ইতো বহিদ্ধা পাসণ্ডা নাম ইতো সম্মাসম্বুদ্ধস্স সাসনতো বহিদ্ধা কুটীসকবহুকারাদিকা. তে হি সত্তানং তণ্হাপাসং দিট্ঠিপাসঞ্চ ডেন্তি ওড্ডেন্তীতি পাসণ্ডাতি ৰুচ্চতি. তেনাহ – ‘‘দিট্ঠিযো উপনিস্সিতা’’তি সস্সতদিট্ঠিগতানি উপেচ্চ নিস্সিতা, দিট্ঠিগতানি আদিযিংসূতি অত্থো. যদগ্গেন চ দিট্ঠিসন্নিস্সিতা, তদগ্গেন পাসণ্ডসন্নিস্সিতা. ন তে ধম্মং ৰিজানন্তীতি যে পাসণ্ডিনো সস্সতদিট্ঠিগতসন্নিস্সিতা ‘‘অযং পৰত্তি এৰং পৰত্ততী’’তি পৰত্তিধম্মম্পি যথাভূতং ন ৰিজানন্তি. ন তে ধম্মস্স কোৰিদাতি ‘‘অযং নিৰত্তি এৰং নিৰত্ততী’’তি নিৰত্তিধম্মস্সাপি অকুসলা, পৰত্তিধম্মমগ্গেপি হি তে সংমূল়্হা, কিমঙ্গং পন নিৰত্তিধম্মেতি.

এৰং পাসণ্ডৰাদানং অনিয্যানিকতং দস্সেত্ৰা ইদানি কং নু উদ্দিস্স মুণ্ডাসীতি পঞ্হং ৰিস্সজ্জেতুং ‘‘অত্থি সক্যকুলে জাতো’’তিআদি ৰুত্তং. তত্থ দিট্ঠীনং সমতিক্কমন্তি সব্বাসং দিট্ঠীনং সমতিক্কমনুপাযং দিট্ঠিজালৰিনিৰেঠনং. সেসং ৰুত্তনযমেৰ.

চালাথেরীগাথাৰণ্ণনা নিট্ঠিতা.

৩. উপচালাথেরীগাথাৰণ্ণনা

সতিমতীতিআদিকা উপচালায থেরিযা গাথা. তস্সা ৰত্থু চালায থেরিযা ৰত্থুম্হি ৰুত্তমেৰ. অযম্পি হি চালা ৰিয পব্বজিত্ৰা ৰিপস্সনং পট্ঠপেত্ৰা অরহত্তং পত্ৰা উদানেন্তী –

১৮৯. ‘‘সতিমতী চক্খুমতী, ভিক্খুনী ভাৰিতিন্দ্রিযা;

পটিৰিজ্ঝি পদং সন্তং, অকাপুরিসসেৰিত’’ন্তি. –

ইমং গাথং অভাসি.

তত্থ সতিমতীতি সতিসম্পন্না, পুব্বভাগে পরমেন সতিনেপক্কেন সমন্নাগতা হুত্ৰা পচ্ছা অরিযমগ্গস্স ভাৰিতত্তা সতিৰেপুল্লপ্পত্তিযা উত্তমায সতিযা সমন্নাগতাতি অত্থো. চক্খুমতীতি পঞ্ঞাচক্খুনা সমন্নাগতা, আদিতো উদযত্থগামিনিযা পঞ্ঞায অরিযায নিব্বেধিকায সমন্নাগতা হুত্ৰা পঞ্ঞাৰেপুল্লপ্পত্তিযা পরমেন পঞ্ঞাচক্খুনা সমন্নাগতাতি ৰুত্তং হোতি. অকাপুরিসসেৰিতন্তি অলামকপুরিসেহি উত্তমপুরিসেহি অরিযেহি বুদ্ধাদীহি সেৰিতং.

‘‘কিন্নু জাতিং ন রোচেসী’’তি গাথা থেরিং কামেসু উপহারেতুকামেন মারেন ৰুত্তা. ‘‘কিং নু ত্ৰং ভিক্খুনি ন রোচেসী’’তি (সং. নি. ১.১৬৭) হি মারেন পুট্ঠা থেরী আহ – ‘‘জাতিং খ্ৰাহং, আৰুসো, ন রোচেমী’’তি. অথ নং মারো জাতস্স কামা পরিভোগা, তস্মা জাতিপি ইচ্ছিতব্বা, কামাপি পরিভুঞ্জিতব্বাতি দস্সেন্তো –

১৯০. ‘‘কিন্নু জাতিং ন রোচেসি, জাতো কামানি ভুঞ্জতি;

ভুঞ্জাহি কামরতিযো, মাহু পচ্ছানুতাপিনী’’তি. –

গাথমাহ.

তস্সত্থো – কিং নু তং কারণং, যেন ত্ৰং উপচালে জাতিং ন রোচেসি ন রোচেয্যাসি, ন তং কারণং অত্থি. যস্মা জাতো কামানি ভুঞ্জতি ইধ জাতো কামগুণসংহিতানি রূপাদীনি পটিসেৰন্তো কামসুখং পরিভুঞ্জতি. ন হি অজাতস্স তং অত্থি, তস্মা ভুঞ্জাহি কামরতিযো কামখিড্ডারতিযো অনুভৰ. মাহু পচ্ছানুতাপিনী ‘‘যোব্বঞ্ঞে সতি ৰিজ্জমানেসু ভোগেসু ন মযা কামসুখমনুভূত’’ন্তি পচ্ছানুতাপিনী মা অহোসি. ইমস্মিং লোকে ধম্মা নাম যাৰদেৰ অত্থাধিগমত্থো অত্থো চ কামসুখত্থোতি পাকটোযমত্থোতি অধিপ্পাযো.

তং সুত্ৰা থেরী জাতিযা দুক্খনিমিত্ততং অত্তনো চ তস্স ৰিসযাতিক্কমং ৰিভাৰেত্ৰা তজ্জেন্তী –

১৯১. ‘‘জাতস্স মরণং হোতি, হত্থপাদান ছেদনং;

ৰধবন্ধপরিক্লেসং, জাতো দুক্খং নিগচ্ছতি.

১৯২. ‘‘অত্থি সক্যকুলে জাতো, সম্বুদ্ধো অপরাজিতো;

সো মে ধম্মমদেসেসি, জাতিযা সমতিক্কমং.

১৯৩. ‘‘দুক্খং দুক্খসমুপ্পাদং, দুক্খস্স চ অতিক্কমং;

অরিযং চট্ঠঙ্গিকং মগ্গং, দুক্খূপসমগামিনং.

১৯৪. ‘‘তস্সাহং ৰচনং সুত্ৰা, ৰিহরিং সাসনে রতা;

তিস্সো ৰিজ্জা অনুপ্পত্তা, কতং বুদ্ধস্স সাসনং.

১৯৫. ‘‘সব্বত্থ ৰিহতা নন্দী, তমোক্খন্ধো পদালিতো;

এৰং জানাহি পাপিম, নিহতো ত্ৰমসি অন্তকা’’তি. –

ইমা গাথা অভাসি.

তত্থ জাতস্স মরণং হোতীতি যস্মা জাতস্স সত্তস্স মরণং হোতি, ন অজাতস্স. ন কেৰলং মরণমেৰ, অথ খো জরারোগাদযো যত্তকানত্থা, সব্বেপি তে জাতস্স হোন্তি জাতিহেতুকা. তেনাহ ভগৰা – ‘‘জাতিপচ্চযা জরামরণং সোকপরিদেৰদুক্খদোমনস্সুপাযাসা সম্ভৰন্তী’’তি (মহাৰ. ১; ৰিভ. ২২৫; উদা. ১). তেনেৰাহ – ‘‘হত্থপাদান ছেদন’’ন্তি হত্থপাদানং ছেদনং জাতস্সেৰ হোতি, ন অজাতস্স. হত্থপাদছেদনাপদেসেন চেত্থ বাত্তিংস কম্মকারণাপি দস্সিতা এৰাতি দট্ঠব্বং. তেনেৰাহ – ‘‘ৰধবন্ধপরিক্লেসং, জাতো দুক্খং নিগচ্ছতী’’তি. জীৰিতৰিযোজনমুট্ঠিপ্পহারাদিসঙ্খাতং ৰধপরিক্লেসঞ্চেৰ অন্দুবন্ধনাদিসঙ্খাতং বন্ধপরিক্লেসং অঞ্ঞঞ্চ যংকিঞ্চি দুক্খং নাম তং সব্বং জাতো এৰ নিগচ্ছতি, ন অজাতো, তস্মা জাতিং ন রোচেমীতি.

ইদানি জাতিযা কামানঞ্চ অচ্চন্তমেৰ অত্তনা সমতিক্কন্তভাৰং মূলতো পট্ঠায দস্সেন্তী – ‘‘অত্থি সক্যকুলে জাতো’’তিআদিমাহ. তত্থ অপরাজিতোতি কিলেসমারাদিনা কেনচি ন পরাজিতো. সত্থা হি সব্বাভিভূ সদেৰকং লোকং অঞ্ঞদত্থু অভিভৰিত্ৰা ঠিতো, তস্মা অপরাজিতো. সেসং ৰুত্তনযত্তা উত্তানমেৰ.

উপচালাথেরীগাথাৰণ্ণনা নিট্ঠিতা.

সত্তকনিপাতৰণ্ণনা নিট্ঠিতা.