৭. গুত্তাথেরীগাথাৰণ্ণনা

গুত্তে যদত্থং পব্বজ্জাতিআদিকা গুত্তায থেরিযা গাথা. অযম্পি পুরিমবুদ্ধেসু কতাধিকারা তত্থ তত্থ ভৰে ৰিৰট্টূপনিস্সযং কুসলং উপচিনন্তী অনুক্কমেন সম্ভতৰিমোক্খসম্ভারা হুত্ৰা, পরিপক্ককুসলমূলা সুগতীসুযেৰ সংসরন্তী ইমস্মিং বুদ্ধুপ্পাদে সাৰত্থিযং ব্রাহ্মণকুলে নিব্বত্তা, গুত্তাতিস্সা নামং অহোসি. সা ৰিঞ্ঞুতং পত্ৰা উপনিস্সযসম্পত্তিযা চোদিযমানা ঘরাৰাসং জিগুচ্ছন্তী মাতাপিতরো অনুজানাপেত্ৰা মহাপজাপতিগোতমিযা সন্তিকে পব্বজি. পব্বজিত্ৰা চ ৰিপস্সনং পট্ঠপেত্ৰা ভাৰনং অনুযুঞ্জন্তিযা তস্সা চিত্তং চিরকালপরিচযেন বহিদ্ধারম্মণে ৰিধাৰতি, একগ্গং নাহোসি. সত্থা দিস্ৰা তং অনুগ্গণ্হন্তো, গন্ধকুটিযং যথানিসিন্নোৰ ওভাসং ফরিত্ৰা তস্সা আসন্নে আকাসে নিসিন্নং ৰিয অত্তানং দস্সেত্ৰা ওৰদন্তো –

১৬৩. ‘‘গুত্তে যদত্থং পব্বজ্জা, হিত্ৰা পুত্তং ৰসুং পিযং;

তমেৰ অনুব্রূহেহি, মা চিত্তস্স ৰসং গমি.

১৬৪. ‘‘চিত্তেন ৰঞ্চিতা সত্তা, মারস্স ৰিসযে রতা;

অনেকজাতিসংসারং, সন্ধাৰন্তি অৰিদ্দসূ.

১৬৫. ‘‘কামাচ্ছন্দঞ্চ ব্যাপাদং, সক্কাযদিট্ঠিমেৰ চ;

সীলব্বতপরামাসং, ৰিচিকিচ্ছং চ পঞ্চমং.

১৬৬. ‘‘সংযোজনানি এতানি, পজহিত্ৰান ভিক্খুনী;

ওরম্ভাগমনীযানি, নযিদং পুনরেহিসি.

১৬৭. ‘‘রাগং মানং অৰিজ্জঞ্চ, উদ্ধচ্চঞ্চ ৰিৰজ্জিয;

সংযোজনানি ছেত্ৰান, দুক্খস্সন্তং করিস্সসি.

১৬৮. ‘‘খেপেত্ৰা জাতিসংসারং, পরিঞ্ঞায পুনব্ভৰং;

দিট্ঠেৰ ধম্মে নিচ্ছাতা, উপসন্তা চরিস্সসী’’তি. – ইমা গাথা আভাসি;

তত্থ তমেৰ অনুব্রূহেহীতি যদত্থং যস্স কিলেসপরিনিব্বানস্স খন্ধপরিনিব্বানস্স চ অত্থায. হিত্ৰা পুত্তং ৰসুং পিযন্তি পিযাযিতব্বং ঞাতিপরিৰট্টং ভোগক্খন্ধঞ্চ হিত্ৰা মম সাসনে পব্বজ্জা ব্রহ্মচরিযৰাসো ইচ্ছিতো, তমেৰ ৰড্ঢেয্যাসি সম্পাদেয্যাসি. মা চিত্তস্স ৰসং গমীতি দীঘরত্তং রূপাদিআরম্মণৰসেন ৰড্ঢিতস্স কূটচিত্তস্স ৰসং মা গচ্ছি.

যস্মা চিত্তং নামেতং মাযূপমং, যেন ৰঞ্চিতা অন্ধপুথুজ্জনা মারৰসানুগা সংসারং নাতিৰত্তন্তি. তেন ৰুত্তং ‘‘চিত্তেন ৰঞ্চিতা’’তিআদি.

সংযোজনানি এতানীতি এতানি ‘‘কামচ্ছন্দঞ্চ ব্যাপাদ’’ন্তিআদিনা যথাৰুত্তানি পঞ্চ বন্ধনট্ঠেন সংযোজনানি. পজহিত্ৰানাতি অনাগামিমগ্গেন সমুচ্ছিন্দিত্ৰা. ভিক্খুনীতি তস্সা আলপনং. ওরম্ভাগমনীযানীতি রূপারূপধাতুতো হেট্ঠাভাগে কামধাতুযং মনুস্সজীৰস্স হিতানি উপকারানি তত্থ পটিসন্ধিযা পচ্চযভাৰতো. ম-কারো পদসন্ধিকরো. ‘‘ওরমাগমনীযানী’’তি পাল়ি, সো এৰত্থো. নযিদং পুনরেহিসীতি ওরম্ভাগিযানং সংযোজনানং পহানেন ইদং কামট্ঠানং কামভৰং পটিসন্ধিৰসেন পুন নাগমিস্সসি. র-কারো পদসন্ধিকরো. ‘‘ইত্থ’’ন্তি ৰা পাল়ি, ইত্থত্তং কামভৰমিচ্চেৰ অত্থো.

রাগন্তি রূপরাগঞ্চ অরূপরাগঞ্চ. মানন্তি অগ্গমগ্গৰজ্ঝং মানং. অৰিজ্জঞ্চ উদ্ধচ্চঞ্চাতি এত্থাপি এসেৰ নযো. ৰিৰজ্জিযাতি ৰিপস্সনায ৰিক্খম্ভেত্ৰা. সংযোজনানি ছেত্ৰানাতি এতানি রূপরাগাদীনি পঞ্চুদ্ধম্ভাগিযানি সংযোজনানি অরহত্তমগ্গেন সমুচ্ছিন্দিত্ৰা. দুক্খস্সন্তং করিস্সসীতি সব্বস্সাপি ৰট্টদুক্খস্স পরিযন্তং পরিযোসানং পাপুণিস্সসি.

খেপেত্ৰা জাতিসংসারন্তি জাতি সমূলিকসংসারপৰত্তিং পরিযোসাপেত্ৰা. নিচ্ছাতাতি নিত্তণ্হা. উপসন্তাতি সব্বসো কিলেসানং ৰূপসমেন উপসন্তা. সেসং ৰুত্তনযমেৰ.

এৰং সত্থারা ইমাসু গাথাসু ভাসিতাসু গাথাপরিযোসানে থেরী সহ পটিসম্ভিদাহি অরহত্তং পত্ৰা উদানৰসেন ভগৰতা ভাসিতনিযামেনেৰ ইমা গাথা অভাসি. তেনেৰ তা থেরিযা গাথা নাম জাতা.

গুত্তাথেরীগাথাৰণ্ণনা নিট্ঠিতা.