৫. অনোপমাথেরীগাথাৰণ্ণনা

উচ্চে কুলেতিআদিকা অনোপমায থেরিযা গাথা. অযম্পি পুরিমবুদ্ধেসু কতাধিকারা তত্থ তত্থ ভৰে ৰিৰট্টূপনিস্সযং কুসলং উপচিনন্তী অনুক্কমেন ৰিমুত্তিপরিপাচনীযে ধম্মে পরিব্রূহিত্ৰা ইমস্মিং বুদ্ধুপ্পাদে সাকেতনগরে মজ্ঝস্স নাম সেট্ঠিনো ধীতা হুত্ৰা নিব্বত্তি. তস্সা রূপসম্পত্তিযা অনোপমাতি নামং অহোসি. তস্সা ৰযপ্পত্তকালে বহূ সেট্ঠিপুত্তা রাজমহামত্তা রাজানো চ পিতু দূতং পাহেসুং – ‘‘অত্তনো ধীতরং অনোপমং দেহি, ইদঞ্চিদঞ্চ তে দস্সামা’’তি. সা তং সুত্ৰা উপনিস্সযসম্পন্নতায ‘‘ঘরাৰাসেন ময্হং অত্থো নত্থী’’তি সত্থু সন্তিকং গন্ত্ৰা ধম্মং সুত্ৰা ঞাণস্স পরিপাকং গতত্তা দেসনানুসারেন ৰিপস্সনং আরভিত্ৰা তং উস্সুক্কাপেন্তী মগ্গপটিপাটিযা ততিযফলে পতিট্ঠাসি. সা সত্থারং পব্বজ্জং যাচিত্ৰা সত্থুআণায ভিক্খুনুপস্সযং উপগন্ত্ৰা ভিক্খুনীনং সন্তিকে পব্বজিত্ৰা সত্তমে দিৰসে অরহত্তং সচ্ছিকত্ৰা অত্তনো পটিপত্তিং পচ্চৰেক্খিত্ৰা উদানৰসেন –

১৫১. ‘‘উচ্চে কুলে অহং জাতা, বহুৰিত্তে মহদ্ধনে;

ৰণ্ণরূপেন সম্পন্না, ধীতা মজ্ঝস্স অত্রজা.

১৫২. ‘‘পত্থিতা রাজপুত্তেহি, সেট্ঠিপুত্তেহি গিজ্ঝিতা;

পিতু মে পেসযী দূতং, দেথ ময্হং অনোপমং.

১৫৩. ‘‘যত্তকং তুলিতা এসা, তুয্হং ধীতা অনোপমা;

ততো অট্ঠগুণং দস্সং, হিরঞ্ঞং রতনানি চ.

১৫৪. ‘‘সাহং দিস্ৰান সম্বুদ্ধং, লোকজেট্ঠং অনুত্তরং;

তস্স পাদানি ৰন্দিত্ৰা, একমন্তং উপাৰিসিং.

১৫৫. ‘‘সো মে ধম্মমদেসেসি, অনুকম্পায গোতমো;

নিসিন্না আসনে তস্মিং, ফুসযিং ততিযং ফলং.

১৫৬. ‘‘ততো কেসানি ছেত্ৰান, পব্বজিং অনগারিযং;

অজ্জ মে সত্তমী রত্তি, যতো তণ্হা ৰিসেসিতা’’তি. –

ইমা গাথা অভাসি.

তত্থ উচ্চে কুলেতি উল়ারতমে ৰেস্সকুলে. বহুৰিত্তেতি অলঙ্কারাদিপহূতৰিত্তূপকরণে. মহদ্ধনেতি নিধানগতস্সেৰ চত্তারীসকোটিপরিমাণস্স মহতো ধনস্স অত্থিভাৰেন মহদ্ধনে অহং জাতাতি যোজনা. ৰণ্ণরূপেন সম্পন্নাতি ৰণ্ণসম্পন্না চেৰ রূপসম্পন্না চ, সিনিদ্ধভাসুরায ছৰিসম্পত্তিযা ৰত্থাভরণাদিসরীরাৰযৰসম্পত্তিযা চ সমন্নাগতাতি অত্থো. ধীতা মজ্ঝস্স অত্রজাতি মজ্ঝনামস্স সেট্ঠিনো ওরসা ধীতা.

পত্থিতা রাজপুত্তেহীতি ‘‘কথং নু খো তং লভেয্যামা’’তি রাজকুমারেহি অভিপত্থিতা. সেট্ঠিপুত্তেহি গিজ্ঝিতাতি তথা সেট্ঠিকুমারেহিপি অভিগিজ্ঝিতা পচ্চাসীসিতা. দেথ ময্হং অনোপমন্তি রাজপুত্তাদযো ‘‘দেথ ময্হং অনোপমং দেথ ময্হ’’ন্তি পিতু সন্তিকে দূতং পেসযিংসু.

যত্তকং তুলিতা এসাতি ‘‘তুয্হং ধীতা অনোপমা যত্তকং ধনং অগ্ঘতী’’তি তুলিতা লক্খণঞ্ঞূহি পরিচ্ছিন্না, ‘‘ততো অট্ঠগুণং দস্সামী’’তি পিতু মে পেসযি দূতন্তি যোজনা. সেসং হেট্ঠা ৰুত্তনযমেৰ.

অনোপমাথেরীগাথাৰণ্ণনা নিট্ঠিতা.