৪. সুজাতাথেরীগাথাৰণ্ণনা

অলঙ্কতা সুৰসনাতিআদিকা সুজাতায থেরিযা গাথা. অযম্পি পুরিমবুদ্ধেসু কতাধিকারা তত্থ তত্থ ভৰে ৰিৰট্টূপনিস্সযং কুসলং উপচিনন্তী অনুক্কমেন সম্ভতৰিমোক্খসম্ভারা হুত্ৰা ইমস্মিং বুদ্ধুপ্পাদে সাকেতনগরে সেট্ঠিকুলে নিব্বত্তিত্ৰা ৰযপ্পত্তা মাতাপিতূহি সমানজাতিকস্স সেট্ঠিপুত্তস্স দিন্না হুত্ৰা পতিকুলং গতা. তত্থ তেন সদ্ধিং সুখসংৰাসং ৰসন্তী একদিৰসং উয্যানং গন্ত্ৰা নক্খত্তকীল়ং কীল়িত্ৰা পরিজনেন সদ্ধিং নগরং আগচ্ছন্তী অঞ্জনৰনে সত্থারং দিস্ৰা পসন্নমানসা উপসঙ্কমিত্ৰা ৰন্দিত্ৰা একমন্তং নিসীদি. সত্থা তস্সা অনুপুব্বিং কথং কথেত্ৰা কল্লচিত্ততং ঞত্ৰা উপরি সামুক্কংসিকং ধম্মদেসনং পকাসেসি. সা দেসনাৰসানে অত্তনো কতাধিকারতায ঞাণস্স পরিপাকং গতত্তা চ, সত্থু চ দেসনাৰিলাসেন যথানিসিন্নাৰ সহ পটিসম্ভিদাহি অরহত্তং পত্ৰা সত্থারং ৰন্দিত্ৰা গেহং গন্ত্ৰা সামিকঞ্চ মাতাপিতরো চ অনুজানাপেত্ৰা সত্থুআণায ভিক্খুনুপস্সযং গন্ত্ৰা ভিক্খুনীনং সন্তিকে পব্বজি. পব্বজিত্ৰা চ অত্তনো পটিপত্তিং পচ্চৰেক্খিত্ৰা উদানৰসেন –

১৪৫. ‘‘অলঙ্কতা সুৰসনা, মালিনী চন্দনোক্খিতা;

সব্বাভরণসঞ্ছন্না, দাসীগণপুরক্খতা.

১৪৬. ‘‘অন্নং পানঞ্চ আদায, খজ্জং ভোজ্জং অনপ্পকং;

গেহতো নিক্খমিত্ৰান, উয্যানমভিহারযিং.

১৪৭. ‘‘তত্থ রমিত্ৰা কীল়িত্ৰা, আগচ্ছন্তী সকং ঘরং;

ৰিহারং দট্ঠুং পাৰিসিং, সাকেতে অঞ্জনং ৰনং.

১৪৮. ‘‘দিস্ৰান লোকপজ্জোতং, ৰন্দিত্ৰান উপাৰিসিং;

সো মে ধম্মমদেসেসি, অনুকম্পায চক্খুমা.

১৪৯. ‘‘সুত্ৰা চ খো মহেসিস্স, সচ্চং সম্পটিৰিজ্ঝহং;

তত্থেৰ ৰিরজং ধম্মং, ফুসযিং অমতং পদং.

১৫০. ‘‘ততো ৰিঞ্ঞাতসদ্ধম্মা, পব্বজিং অনগারিযং;

তিস্সো ৰিজ্জা অনুপ্পত্তা, অমোঘং বুদ্ধসাসন’’ন্তি. –

ইমা গাথা অভাসি.

তত্থ অলঙ্কতাতি ৰিভূসিতা. তং পন অলঙ্কতাকারং দস্সেতুং ‘‘সুৰসনা মালিনী চন্দনোক্খিতা’’তি ৰুত্তং. তত্থ মালিনীতি মালাধারিনী. চন্দনোক্খিতাতি চন্দনানুলিত্তা. সব্বাভরণসঞ্ছন্নাতি হত্থূপগাদীহি সব্বেহি আভরণেহি অলঙ্কারৰসেন সঞ্ছাদিতসরীরা.

অন্নং পানঞ্চ আদায, খজ্জং ভোজ্জং অনপ্পকন্তি সালিওদনাদিঅন্নং, অম্বপানাদিপানং, পিট্ঠখাদনীযাদিখজ্জং, অৰসিট্ঠং আহারসঙ্খাতং ভোজ্জঞ্চ পহূতং গহেত্ৰা. উয্যানমভিহারযিন্তি নক্খত্তকীল়াৰসেন উয্যানং উপনেসিং. অন্নপানাদিং তত্থ আনেত্ৰা সহ পরিজনেন কীল়ন্তী রমন্তী পরিচারেসিন্তি অধিপ্পাযো.

সাকেতে অঞ্জনং ৰনন্তি সাকেতসমীপে অঞ্জনৰনে ৰিহারং পাৰিসিং.

লোকপজ্জোতন্তি ঞাণপজ্জোতেন লোকস্স পজ্জোতভূতং.

ফুসযিন্তি ফুসিং, অধিগচ্ছিন্তি অত্থো. সেসং ৰুত্তনযমেৰ.

সুজাতাথেরীগাথাৰণ্ণনা নিট্ঠিতা.