২. ৰাসেট্ঠীথেরীগাথাৰণ্ণনা

পুত্তসোকেনহং অট্টাতিআদিকা ৰাসেট্ঠিযা থেরিযা গাথা. অযম্পি পুরিমবুদ্ধেসু কতাধিকারা তত্থ তত্থ ভৰে ৰিৰট্টূপনিস্সযং কুসলং উপচিনন্তী অনুক্কমেন সম্ভতৰিমোক্খসম্ভারা দেৰমনুস্সেসু সংসরন্তী ইমস্মিং বুদ্ধুপ্পাদে ৰেসালিযং কুলগেহে নিব্বত্তিত্ৰা ৰযপ্পত্তা মাতাপিতূহি সমানজাতিকস্স কুলপুত্তস্স দিন্না পতিকুলং গন্ত্ৰা তেন সদ্ধিং সুখসংৰাসং ৰসন্তী একং পুত্তং লভিত্ৰা তস্মিং আধাৰিত্ৰা পরিধাৰিত্ৰা ৰিচরণকালে কালং কতে পুত্তসোকেন অট্টিতা উম্মত্তিকা অহোসি. সা ঞাতকেসু সামিকে চ তিকিচ্ছং করোন্তেসু তেসং অজানন্তানংযেৰ পলাযিত্ৰা যতো ততো পরিব্ভমন্তী মিথিলানগরং সম্পত্তা তত্থদ্দস ভগৰন্তং অন্তরৰীথিযং গচ্ছন্তং দন্তং গুত্তং সংযতিন্দ্রিযং নাগং. দিস্ৰান সহ দস্সনেন বুদ্ধানুভাৰতো অপগতুম্মাদা পকতিচিত্তং পটিলভি. অথস্সা সত্থা সংখিত্তেন ধম্মং দেসেসি. সা তং ধম্মং সুত্ৰা পটিলদ্ধসংৰেগা সত্থারং পব্বজ্জং যাচিত্ৰা সত্থু আণায ভিক্খুনীসু পব্বজিত্ৰা কতপুব্বকিচ্চা ৰিপস্সনং পট্ঠপেত্ৰা ঘটেন্তী ৰাযমন্তী পরিপক্কঞাণতায ন চিরস্সেৰ সহ পটিসম্ভিদাহি অরহত্তং পত্ৰা অত্তনো পটিপত্তিং পচ্চৰেক্খিত্ৰা উদানৰসেন –

১৩৩. ‘‘পুত্তসোকেনহং অট্টা, খিত্তচিত্তা ৰিসঞ্ঞিনী;

নগ্গা পকিণ্ণকেসী চ, তেন তেন ৰিচারিহং.

১৩৪. ‘‘ৰীথিসঙ্কারকূটেসু, সুসানে রথিযাসু চ;

অচরিং তীণি ৰস্সানি, খুপ্পিপাসা সমপ্পিতা.

১৩৫. ‘‘অথদ্দসাসিং সুগতং, নগরং মিথিলং পতি;

অদন্তানং দমেতারং, সম্বুদ্ধমকুতোভযং.

১৩৬. ‘‘সচিত্তং পটিলদ্ধান, ৰন্দিত্ৰান উপাৰিসিং;

সো মে ধম্মমদেসেসি, অনুকম্পায গোতমো.

১৩৭. ‘‘তস্স ধম্মং সুণিত্ৰান, পব্বজিং অনগারিযং;

যুঞ্জন্তী সত্থুৰচনে, সচ্ছাকাসিং পদং সিৰং.

১৩৮. ‘‘সব্বে সোকা সমুচ্ছিন্না, পহীনা এতদন্তিকা;

পরিঞ্ঞাতা হি মে ৰত্থূ, যতো সোকান সম্ভৰো’’তি. –

ইমা গাথা অভাসি.

তত্থ অট্টাতি অট্টিতা. অযমেৰ ৰা পাঠো, অট্টিতা পীল়িতাতি অত্থো. খিত্তচিত্তাতি সোকুম্মাদেন খিত্তহদযা. ততো এৰ পকতিসঞ্ঞায ৰিগমেন ৰিসঞ্ঞিনী. হিরোত্তপ্পাভাৰতো অপগতৰত্থতায নগ্গা. ৰিধুতকেসতায পকিণ্ণকেসী. তেন তেনাতি গামেন গামং নগরেন নগরং ৰীথিযা ৰীথিং ৰিচরিং অহং.

অথাতি পচ্ছা উম্মাদসংৰত্তনিযস্স কম্মস্স পরিক্খযে. সুগতন্তি সোভনগমনত্তা সুন্দরং ঠানং গতত্তা সম্মা গদত্তা সম্মা চ গতত্তা সুগতং ভগৰন্তং. মিথিলং পতীতি মিথিলাভিমুখং, মিথিলানগরাভিমুখং গচ্ছন্তন্তি অত্থো.

সচিত্তং পটিলদ্ধানাতি বুদ্ধানুভাৰেন উম্মাদং পহায অত্তনো পকতিচিত্তং পটিলভিত্ৰা.

যুঞ্জন্তী সত্থুৰচনেতি সত্থু সম্মাসম্বুদ্ধস্স সাসনে যোগং করোন্তী ভাৰনং অনুযুঞ্জন্তী. সচ্ছাকাসিং পদং সিৰন্তি সিৰং খেমং চতূহি যোগেহি অনুপদ্দুতং নিব্বানং পদং সচ্ছিঅকাসিং.

এতদন্তিকাতি এতং ইদানি মযা অধিগতং অরহত্তং অন্তো পরিযোসানং এতেসন্তি এতদন্তিকা, সোকা. ন দানি তেসং সম্ভৰো অত্থীতি অত্থো. যতো সোকান সম্ভৰোতি যতো অন্তোনিজ্ঝানলক্খণানং সোকানং সম্ভৰো, তেসং সোকানং পঞ্চুপাদানক্খন্ধসঙ্খাতা ৰত্থূ অধিট্ঠানানি ঞাততীরণপহানপরিঞ্ঞাহি পরিঞ্ঞাতা. তস্মা সোকা এতদন্তিকাতি যোজনা.

ৰাসেট্ঠীথেরীগাথাৰণ্ণনা নিট্ঠিতা.