৯. ভদ্দাকুণ্ডলকেসাথেরীগাথাৰণ্ণনা

লূনকেসীতিআদিকা ভদ্দায কুণ্ডলকেসায থেরিযা গাথা. অযম্পি পদুমুত্তরস্স ভগৰতো কালে হংসৰতীনগরে কুলগেহে নিব্বত্তিত্ৰা ৰিঞ্ঞুতং পত্ৰা একদিৰসং সত্থু সন্তিকে ধম্মং সুণন্তী সত্থারং একং ভিক্খুনিং খিপ্পাভিঞ্ঞানং অগ্গট্ঠানে ঠপেন্তং দিস্ৰা, অধিকারকম্মং কত্ৰা তং ঠানন্তরং পত্থেত্ৰা যাৰজীৰং পুঞ্ঞানি কত্ৰা কপ্পসতসহস্সং দেৰমনুস্সেসু সংসরিত্ৰা কস্সপবুদ্ধকালে কিকিস্স কাসিরঞ্ঞো গেহে সত্তন্নং ভগিনীনং অব্ভন্তরা হুত্ৰা, ৰীসতি ৰস্সসহস্সানি দস সীলানি সমাদায কোমারিব্রহ্মচরিযং চরন্তী সঙ্ঘস্স ৰসনপরিৰেণং কারেত্ৰা, একং বুদ্ধন্তরং সুগতীসুযেৰ সংসরিত্ৰা ইমস্মিং বুদ্ধুপ্পাদে রাজগহে সেট্ঠিকুলে নিব্বত্তি. ভদ্দাতিস্সা নামং অহোসি. সা মহতা পরিৰারেন ৰড্ঢমানা ৰযপ্পত্তা, তস্মিংযেৰ নগরে পুরোহিতস্স পুত্তং সত্তুকং নাম চোরং সহোড্ঢং গহেত্ৰা রাজাণায নগরগুত্তিকেন মারেতুং আঘাতনং নিয্যমানং, সীহপঞ্জরেন ওলোকেন্তী দিস্ৰা পটিবদ্ধচিত্তা হুত্ৰা সচে তং লভামি, জীৰিস্সামি; নো চে, মরিস্সামীতি সযনে অধোমুখী নিপজ্জি.

অথস্সা পিতা তং পৰত্তিং সুত্ৰা একধীতুতায বলৰসিনেহো সহস্সলঞ্জং দত্ৰা উপাযেনেৰ চোরং ৰিস্সজ্জাপেত্ৰা গন্ধোদকেন ন্হাপেত্ৰা সব্বাভরণপটিমণ্ডিতং কারেত্ৰা পাসাদং পেসেসি. ভদ্দাপি পরিপুণ্ণমনোরথা অতিরেকালঙ্কারেন অলঙ্করিত্ৰা তং পরিচরতি. সত্তুকো কতিপাহং ৰীতিনামেত্ৰা তস্সা আভরণেসু উপ্পন্নলোভো ভদ্দে, অহং নগরগুত্তিকেন গহিতমত্তোৰ চোরপপাতে অধিৰত্থায দেৰতায ‘‘সচাহং জীৰিতং লভামি, তুয্হং বলিকম্মং উপসংহরিস্সামী’’তি পত্থনং আযাচিং, তস্মা বলিকম্মং সজ্জাপেহীতি. সা ‘‘তস্স মনং পূরেস্সামী’’তি বলিকম্মং সজ্জাপেত্ৰা সব্বাভরণৰিভূসিতা সামিকেন সদ্ধিং একং যানং অভিরুয্হ ‘‘দেৰতায বলিকম্মং করিস্সামী’’তি চোরপপাতং অভিরুহিতুং আরদ্ধা.

সত্তুকো চিন্তেসি – ‘‘সব্বেসু অভিরুহন্তেসু ইমিস্সা আভরণং গহেতুং ন সক্কা’’তি পরিৰারজনং তত্থেৰ ঠপেত্ৰা তমেৰ বলিভাজনং গাহাপেত্ৰা পব্বতং অভিরুহন্তো তায সদ্ধিং পিযকথং ন কথেসি. সা ইঙ্গিতেনেৰ তস্সাধিপ্পাযং অঞ্ঞাসি. সত্তুকো, ‘‘ভদ্দে, তৰ উত্তরসাটকং ওমুঞ্চিত্ৰা কাযারূল়্হপসাধনং ভণ্ডিকং করোহী’’তি. সা, ‘‘সামি, ময্হং কো অপরাধো’’তি? ‘‘কিং নু মং, বালে,‘বলিকম্মত্থং আগতো’তি সঞ্ঞং করোসি? বলিকম্মাপদেসেন পন তৰ আভরণং গহেতুং আগতো’’তি. ‘‘কস্স পন, অয্য, পসাধনং, কস্স অহ’’ন্তি? ‘‘নাহং এতং ৰিভাগং জানামী’’তি. ‘‘হোতু, অয্য, একং পন মে অধিপ্পাযং পূরেহি, অলঙ্কতনিযামেন চ আলিঙ্গিতুং দেহী’’তি. সো ‘‘সাধূ’’তি সম্পটিচ্ছি. সা তেন সম্পটিচ্ছিতভাৰং ঞত্ৰা পুরতো আলিঙ্গিত্ৰা পচ্ছতো আলিঙ্গন্তী ৰিয পব্বতপপাতে পাতেসি. সো পতিত্ৰা চুণ্ণৰিচুণ্ণং অহোসি. তায কতং অচ্ছরিযং দিস্ৰা পব্বতে অধিৰত্থা দেৰতা কোসল্লং ৰিভাৰেন্তী ইমা গাথা অভাসি –

‘‘ন হি সব্বেসু ঠানেসু, পুরিসো হোতি পণ্ডিতো;

ইত্থীপি পণ্ডিতা হোতি, তত্থ তত্থ ৰিচক্খণা.

‘‘ন হি সব্বেসু ঠানেসু, পুরিসো হোতি পণ্ডিতো;

ইত্থীপি পণ্ডিতা হোতি, লহুং অত্থৰিচিন্তিকা’’তি. (অপ. থেরী. ২.৩.৩১-৩২);

ততো ভদ্দা চিন্তেসি – ‘‘ন সক্কা মযা ইমিনা নিযামেন গেহং গন্তুং, ইতোৰ গন্ত্ৰা একং পব্বজ্জং পব্বজিস্সামী’’তি নিগণ্ঠারামং গন্ত্ৰা নিগণ্ঠে পব্বজ্জং যাচি. অথ নং তে আহংসু – ‘‘কেন নিযামেন পব্বজ্জা হোতূ’’তি? ‘‘যং তুম্হাকং পব্বজ্জায উত্তমং, তদেৰ করোথা’’তি. তে ‘‘সাধূ’’তি তস্সা তালট্ঠিনা কেসে লুঞ্চিত্ৰা পব্বাজেসুং. পুন কেসা ৰড্ঢন্তা কুণ্ডলাৰট্টা হুত্ৰা ৰড্ঢেসুং. ততো পট্ঠায সা কুণ্ডলকেসাতি নাম জাতা. সা তত্থ উগ্গহেতব্বং সমযং ৰাদমগ্গঞ্চ উগ্গহেত্ৰা ‘‘এত্তকং নাম ইমে জানন্তি, ইতো উত্তরি ৰিসেসো নত্থী’’তি ঞত্ৰা ততো অপক্কমিত্ৰা যত্থ যত্থ পণ্ডিতা অত্থি, তত্থ তত্থ গন্ত্ৰা তেসং জাননসিপ্পং উগ্গহেত্ৰা অত্তনা সদ্ধিং কথেতুং সমত্থং অদিস্ৰা যং যং গামং ৰা নিগমং ৰা পৰিসতি, তস্স দ্ৰারে ৰালুকারাসিং কত্ৰা তত্থ জম্বুসাখং ঠপেত্ৰা ‘‘যো মম ৰাদং আরোপেতুং সক্কোতি, সো ইমং সাখং মদ্দতূ’’তি সমীপে ঠিতদারকানং সঞ্ঞং দত্ৰা ৰসনট্ঠানং গচ্ছতি. সত্তাহম্পি জম্বুসাখায তথেৰ ঠিতায তং গহেত্ৰা পক্কমতি.

তেন চ সমযেন অম্হাকং ভগৰা লোকে উপ্পজ্জিত্ৰা পৰত্তিতৰরধম্মচক্কো অনুপুব্বেন সাৰত্থিং উপনিস্সায জেতৰনে ৰিহরতি. কুণ্ডলকেসাপি ৰুত্তনযেন গামনিগমরাজধানীসু ৰিচরন্তী সাৰত্থিং পত্ৰা নগরদ্ৰারে ৰালুকারাসিম্হি জম্বুসাখং ঠপেত্ৰা দারকানং সঞ্ঞং দত্ৰা সাৰত্থিং পাৰিসি.

অথাযস্মা ধম্মসেনাপতি এককোৰ নগরং পৰিসন্তো তং সাখং দিস্ৰা তং দমেতুকামো দারকে পুচ্ছি – ‘‘কস্মাযং সাখা এৰং ঠপিতা’’তি? দারকা তমত্থং আরোচেসুং. থেরো ‘‘যদি এৰং ইমং সাখং মদ্দথা’’তি আহ. দারকা তং মদ্দিংসু. কুণ্ডলকেসা কতভত্তকিচ্চা নগরতো নিক্খমন্তী তং সাখং মদ্দিতং দিস্ৰা ‘‘কেনিদং মদ্দিত’’ন্তি পুচ্ছিত্ৰা থেরেন মদ্দাপিতভাৰং ঞত্ৰা ‘‘অপক্খিকো ৰাদো ন সোভতী’’তি সাৰত্থিং পৰিসিত্ৰা ৰীথিতো ৰীথিং ৰিচরন্তী ‘‘পস্সেয্যাথ সমণেহি সক্যপুত্তিযেহি সদ্ধিং ময্হং ৰাদ’’ন্তি উগ্ঘোসেত্ৰা মহাজনপরিৰুতা অঞ্ঞতরস্মিং রুক্খমূলে নিসিন্নং ধম্মসেনাপতিং উপসঙ্কমিত্ৰা পটিসন্থারং কত্ৰা একমন্তং ঠিতা ‘‘কিং তুম্হেহি মম জম্বুসাখা মদ্দাপিতা’’তি পুচ্ছি. ‘‘আম, মযা মদ্দাপিতা’’তি. ‘‘এৰং সন্তে তুম্হেহি সদ্ধিং ময্হং ৰাদো হোতূ’’তি. ‘‘হোতু, ভদ্দে’’তি. ‘‘কস্স পুচ্ছা, কস্স ৰিস্সজ্জনা’’তি? ‘‘পুচ্ছা নাম অম্হাকং পত্তা, ত্ৰং যং অত্তনো জাননকং পুচ্ছা’’তি. সা সব্বমেৰ অত্তনো জাননকং ৰাদং পুচ্ছি. থেরো তং সব্বং ৰিস্সজ্জেসি. সা উপরি পুচ্ছিতব্বং অজানন্তী তুণ্হী অহোসি. অথ নং থেরো আহ – ‘‘তযা বহুং পুচ্ছিতং, মযম্পি তং একং পঞ্হং পুচ্ছামা’’তি. ‘‘পুচ্ছথ, ভন্তে’’তি. থেরো ‘‘একং নাম কি’’ন্তি ইমং পঞ্হং পুচ্ছি. কুণ্ডলকেসা নেৰ অন্তং ন কোটিং পস্সন্তী অন্ধকারং পৰিট্ঠা ৰিয হুত্ৰা ‘‘ন জানামি, ভন্তে’’তি আহ. ‘‘ত্ৰং এত্তকম্পি অজানন্তী অঞ্ঞং কিং জানিস্সসী’’তি ৰত্ৰা ধম্মং দেসেসি. সা থেরস্স পাদেসু পতিত্ৰা, ‘‘ভন্তে, তুম্হে সরণং গচ্ছামী’’তি আহ. ‘‘মা মং ত্ৰং, ভদ্দে, সরণং গচ্ছ, সদেৰকে লোকে অগ্গপুগ্গলং ভগৰন্তমেৰ সরণং গচ্ছা’’তি. ‘‘এৰং করিস্সামি, ভন্তে’’তি সা সাযন্হসমযে ধম্মদেসনাৰেলাযং সত্থু সন্তিকং গন্ত্ৰা পঞ্চপতিট্ঠিতেন ৰন্দিত্ৰা একমন্তং অট্ঠাসি. সত্থা তস্সা ঞাণপরিপাকং ঞত্ৰা –

‘‘সহস্সমপি চে গাথা, অনত্থপদসংহিতা;

একং গাথাপদং সেয্যো, যং সুত্ৰা সুপসম্মতী’’তি. –

ইমং গাথমাহ. গাথাপরিযোসানে যথাঠিতাৰ সহ পটিসম্ভিদাহি অরহত্তং পাপুণি. তেন ৰুত্তং অপদানে (অপ. থেরী ২.৩.১-৫৪) –

‘‘পদুমুত্তরো নাম জিনো, সব্বধম্মান পারগূ;

ইতো সতসহস্সম্হি, কপ্পে উপ্পজ্জি নাযকো.

‘‘তদাহং হংসৰতিযং, জাতা সেট্ঠিকুলে অহুং;

নানারতনপজ্জোতে, মহাসুখসমপ্পিতা.

‘‘উপেত্ৰা তং মহাৰীরং, অস্সোসিং ধম্মদেসনং;

ততো জাতপ্পসাদাহং, উপেসিং সরণং জিনং.

‘‘তদা মহাকারুণিকো, পদুমুত্তরনামকো;

খিপ্পাভিঞ্ঞানমগ্গন্তি, ঠপেসি ভিক্খুনিং সুভং.

‘‘তং সুত্ৰা মুদিতা হুত্ৰা, দানং দত্ৰা মহেসিনো;

নিপচ্চ সিরসা পাদে, তং ঠানমভিপত্থযিং.

‘‘অনুমোদি মহাৰীরো, ভদ্দে যং তেভিপত্থিতং;

সমিজ্ঝিস্সতি তং সব্বং, সুখিনী হোহি নিব্বুতা.

‘‘সতসহস্সিতো কপ্পে, ওক্কাককুলসম্ভৰো;

গোতমো নাম গোত্তেন, সত্থা লোকে ভৰিস্সতি.

‘‘তস্স ধম্মেসু দাযাদা, ওরসা ধম্মনিম্মিতা;

ভদ্দাকুণ্ডলকেসাতি, হেস্সতি সত্থু সাৰিকা.

‘‘তেন কম্মেন সুকতেন, চেতনাপণিধীহি চ;

জহিত্ৰা মানুসং দেহং, তাৰতিংসমগচ্ছহং.

‘‘ততো চুতা যামমগং, ততোহং তুসিতং গতা;

ততো চ নিম্মানরতিং, ৰসৰত্তিপুরং ততো.

‘‘যত্থ যত্থূপপজ্জামি, তস্স কম্মস্স ৰাহসা;

তত্থ তত্থেৰ রাজূনং, মহেসিত্তমকারযিং.

‘‘ততো চুতা মনুস্সেসু, রাজূনং চক্কৰত্তিনং;

মণ্ডলীনঞ্চ রাজূনং, মহেসিত্তমকারযিং.

‘‘সম্পত্তিং অনুভোত্ৰান, দেৰেসু মানুসেসু চ;

সব্বত্থ সুখিতা হুত্ৰা, নেককপ্পেসু সংসরিং.

‘‘ইমম্হি ভদ্দকে কপ্পে, ব্রহ্মবন্ধু মহাযসো;

কস্সপো নাম গোত্তেন, উপ্পজ্জি ৰদতং ৰরো.

‘‘উপট্ঠাকো মহেসিস্স, তদা আসি নরিস্সরো;

কাসিরাজা কিকী নাম, বারাণসিপুরুত্তমে.

‘‘তস্স ধীতা চতুত্থাসিং, ভিক্খুদাযীতি ৰিস্সুতা;

ধম্মং সুত্ৰা জিনগ্গস্স, পব্বজ্জং সমরোচযিং.

‘‘অনুজানি ন নো তাতো, অগারেৰ তদা মযং;

ৰীসৰস্সসহস্সানি, ৰিচরিম্হ অতন্দিতা.

‘‘কোমারিব্রহ্মচরিযং, রাজকঞ্ঞা সুখেধিতা;

বুদ্ধোপট্ঠাননিরতা, মুদিতা সত্ত ধীতরো.

‘‘সমণী সমণগুত্তা চ, ভিক্খুনী ভিক্খুদাযিকা;

ধম্মা চেৰ সুধম্মা চ, সত্তমী সঙ্ঘদাযিকা.

‘‘খেমা উপ্পলৰণ্ণা চ, পটাচারা অহং তদা;

কিসাগোতমী ধম্মদিন্না, ৰিসাখা হোতি সত্তমী.

‘‘তেহি কম্মেহি সুকতেহি, চেতনাপণিধীহি চ;

জহিত্ৰা মানুসং দেহং, তাৰতিংসমগচ্ছহং.

‘‘পচ্ছিমে চ ভৰে দানি, গিরিব্বজপুরুত্তমে;

জাতা সেট্ঠিকুলে ফীতে, যদাহং যোব্বনে ঠিতা.

‘‘চোরং ৰধত্থং নীযন্তং, দিস্ৰা রত্তা তহিং অহং;

পিতা মে তং সহস্সেন, মোচযিত্ৰা ৰধা ততো.

‘‘অদাসি তস্স মং তাতো, ৰিদিত্ৰান মনং মম;

তস্সাহমাসিং ৰিসট্ঠা, অতীৰ দযিতা হিতা.

‘‘সো মে ভূসনলোভেন, বলিমজ্ঝাসযো দিসো;

চোরপ্পপাতং নেত্ৰান, পব্বতং চেতযী ৰধং.

‘‘তদাহং পণমিত্ৰান, সত্তুকং সুকতঞ্জলী;

রক্খন্তী অত্তনো পাণং, ইদং ৰচনমব্রৰিং.

‘‘ইদং সুৰণ্ণকেযূরং, মুত্তা ৰেল়ুরিযা বহূ;

সব্বং হরস্সু ভদ্দন্তে, মঞ্চ দাসীতি সাৰয.

‘‘ওরোপযস্সু কল্যাণী, মা বাল়্হং পরিদেৰসি;

ন চাহং অভিজানামি, অহন্ত্ৰা ধনমাভতং.

‘‘যতো সরামি অত্তানং, যতো পত্তোস্মি ৰিঞ্ঞুতং;

ন চাহং অভিজানামি, অঞ্ঞং পিযতরং তযা.

‘‘এহি তং উপগূহিস্সং, কত্ৰান তং পদক্খিণং;

ন চ দানি পুনো অত্থি, মম তুয্হঞ্চ সঙ্গমো.

‘‘ন হি সব্বেসু ঠানেসু, পুরিসো হোতি পণ্ডিতো;

ইত্থীপি পণ্ডিতা হোতি, তত্থ তত্থ ৰিচক্খণা.

‘‘ন হি সব্বেসু ঠানেসু, পুরিসো হোতি পণ্ডিতো;

ইত্থীপি পণ্ডিতা হোতি, লহুং অত্থৰিচিন্তিকা.

‘‘লহুঞ্চ ৰত খিপ্পঞ্চ, নিকট্ঠে সমচেতযিং;

মিগং উণ্ণা যথা এৰং, তদাহং সত্তুকং ৰধিং.

‘‘যো চ উপ্পতিতং অত্থং, ন খিপ্পমনুবুজ্ঝতি;

সো হঞ্ঞতে মন্দমতি, চোরোৰ গিরিগব্ভরে.

‘‘যো চ উপ্পতিতং অত্থং, খিপ্পমেৰ নিবোধতি;

মুচ্চতে সত্তুসম্বাধা, তদাহং সত্তুকা যথা.

‘‘তদাহং পাতযিত্ৰান, গিরিদুগ্গম্হি সত্তুকং;

সন্তিকং সেতৰত্থানং, উপেত্ৰা পব্বজিং অহং.

‘‘সণ্ডাসেন চ কেসে মে, লুঞ্চিত্ৰা সব্বসো তদা;

পব্বজিত্ৰান সমযং, আচিক্খিংসু নিরন্তরং.

‘‘ততো তং উগ্গহেত্ৰাহং, নিসীদিত্ৰান একিকা;

সমযং তং ৰিচিন্তেসিং, সুৰানো মানুসং করং.

‘‘ছিন্নং গয্হ সমীপে মে, পাতযিত্ৰা অপক্কমি;

দিস্ৰা নিমিত্তমলভিং, হত্থং তং পুল়ৰাকুলং.

‘‘ততো উট্ঠায সংৰিগ্গা, অপুচ্ছিং সহধম্মিকে;

তে অৰোচুং ৰিজানন্তি, তং অত্থং সক্যভিক্খৰো.

‘‘সাহং তমত্থং পুচ্ছিস্সং, উপেত্ৰা বুদ্ধসাৰকে;

তে মমাদায গচ্ছিংসু, বুদ্ধসেট্ঠস্স সন্তিকং.

‘‘সো মে ধম্মমদেসেসি, খন্ধাযতনধাতুযো;

অসুভানিচ্চদুক্খাতি, অনত্তাতি চ নাযকো.

‘‘তস্স ধম্মং সুণিত্ৰাহং, ধম্মচক্খুং ৰিসোধযিং;

ততো ৰিঞ্ঞাতসদ্ধম্মা, পব্বজ্জং উপসম্পদং.

‘‘আযাচিতো তদা আহ, এহি ভদ্দেতি নাযকো;

তদাহং উপসম্পন্না, পরিত্তং তোযমদ্দসং.

‘‘পাদপক্খালনেনাহং, ঞত্ৰা সউদযব্বযং;

তথা সব্বেপি সঙ্খারে, ঈদিসং চিন্তযিং তদা.

‘‘ততো চিত্তং ৰিমুচ্চি মে, অনুপাদায সব্বসো;

খিপ্পাভিঞ্ঞানমগ্গং মে, তদা পঞ্ঞাপযী জিনো.

‘‘ইদ্ধীসু চ ৰসী হোমি, দিব্বায সোতধাতুযা;

পরচিত্তানি জানামি, সত্থুসাসনকারিকা.

‘‘পুব্বেনিৰাসং জানামি, দিব্বচক্খু ৰিসোধিতং;

খেপেত্ৰা আসৰে সব্বে, ৰিসুদ্ধাসিং সুনিম্মলা.

‘‘পরিচিণ্ণো মযা সত্থা, কতং বুদ্ধস্স সাসনং;

ওহিতো গরুকো ভারো, ভৰনেত্তি সমূহতা.

‘‘যস্সত্থায পব্বজিতা, অগারস্মানগারিযং;

সো মে অত্থো অনুপ্পত্তো, সব্বসংযোজনক্খযো.

‘‘অত্থধম্মনিরুত্তীসু, পটিভানে তথেৰ চ;

ঞাণং মে ৰিমলং সুদ্ধং, বুদ্ধসেট্ঠস্স সাসনে.

‘‘কিলেসা ঝাপিতা ময্হং…পে… কতং বুদ্ধস্স সাসন’’ন্তি.

অরহত্তং পন পত্ৰা তাৰদেৰ পব্বজ্জং যাচি. সত্থা তস্সা পব্বজ্জং অনুজানি. সা ভিক্খুনুপস্সযং গন্ত্ৰান পব্বজিত্ৰা ফলসুখেন নিব্বানসুখেন চ ৰীতিনামেন্তী অত্তনো পটিপত্তিং পচ্চৰেক্খিত্ৰা উদানৰসেন –

১০৭. ‘‘লূনকেসী পঙ্কধরী, একসাটী পুরে চরিং;

অৰজ্জে ৰজ্জমতিনী, ৰজ্জে চাৰজ্জদস্সিনী.

১০৮. ‘‘দিৰাৰিহারা নিক্খম্ম, গিজ্ঝকূটম্হি পব্বতে;

অদ্দসং ৰিরজং বুদ্ধং, ভিক্খুসঙ্ঘপুরক্খতং.

১০৯. ‘‘নিহচ্চ জাণুং ৰন্দিত্ৰা, সম্মুখা অঞ্জলিং অকং;

এহি ভদ্দেতি মং অৰচ, সা মে আসূপসম্পদা.

১১০. ‘‘চিণ্ণা অঙ্গা চ মগধা, ৰজ্জী কাসী চ কোসলা;

অনকা পণ্ণাস ৰস্সানি, রট্ঠপিণ্ডং অভুঞ্জহং.

১১১. ‘‘পুঞ্ঞং ৰত পসৰি বহুং, সপ্পঞ্ঞো ৰতাযং উপাসকো;

যো ভদ্দায চীৰরং অদাসি, ৰিপ্পমুত্তায সব্বগন্থেহী’’তি. –

ইমা গাথা অভাসি.

তত্থ লূনকেসীতি লূনা লুঞ্চিতা কেসা ময্হন্তি লূনকেসী, নিগণ্ঠেসু পব্বজ্জায তালট্ঠিনা লুঞ্চিতকেসা, তং সন্ধায ৰদতি. পঙ্কধরীতি দন্তকট্ঠস্স অখাদনেন দন্তেসু মলপঙ্কধারণতো পঙ্কধরী. একসাটীতি নিগণ্ঠচারিত্তৰসেন একসাটিকা. পুরে চরিন্তি পুব্বে নিগণ্ঠী হুত্ৰা এৰং ৰিচরিং. অৰজ্জে ৰজ্জমতিনীতি ন্হানুচ্ছাদনদন্তকট্ঠখাদনাদিকে অনৰজ্জে সাৰজ্জসঞ্ঞী. ৰজ্জে চাৰজ্জদস্সিনীতি মানমক্খপলাসৰিপল্লাসাদিকে সাৰজ্জে অনৰজ্জদিট্ঠী.

দিৰাৰিহারা নিক্খম্মাতি অত্তনো দিৰাৰিহারট্ঠানতো নিক্খমিত্ৰা. অযম্পি ঠিতমজ্ঝন্হিকৰেলাযং থেরেন সমাগতা তস্স পঞ্হস্স ৰিস্সজ্জনেন ধম্মদেসনায চ নিহতমানদব্বা পসন্নমানসা হুত্ৰা সত্থু সন্তিকং উপসঙ্কমিতুকামাৰ অত্তনো ৰসনট্ঠানং গন্ত্ৰা দিৰাট্ঠানে নিসীদিত্ৰা সাযন্হসমযে সত্থু সন্তিকং উপসঙ্কমিত্ৰা.

নিহচ্চ জাণুং ৰন্দিত্ৰাতি জাণুদ্ৰযং পথৰিযং নিহন্ত্ৰা পতিট্ঠপেত্ৰা পঞ্চপতিট্ঠিতেন ৰন্দিত্ৰা. সম্মুখা অঞ্জলিং অকন্তি সত্থু সম্মুখা দসনখসমোধানসমুজ্জলং অঞ্জলিং অকাসিং. এহি, ভদ্দেতি মং অৰচ, সা মে আসূপসম্পদাতি যং মং ভগৰা অরহত্তং পত্ৰা পব্বজ্জঞ্চ উপসম্পদঞ্চ যাচিত্ৰা ঠিতং ‘‘এহি, ভদ্দে, ভিক্খুনুপস্সযং গন্ত্ৰা ভিক্খুনীনং সন্তিকে পব্বজ উপসম্পজ্জস্সূ’’তি অৰচ আণাপেসি. সা সত্থু আণা ময্হং উপসম্পদায কারণত্তা উপসম্পদা আসি অহোসি.

চিণ্ণাতিআদিকা দ্ৰে গাথা অঞ্ঞাব্যাকরণগাথা. তত্থ চিণ্ণা অঙ্গা চ মগধাতি যে ইমে অঙ্গা চ মগধা চ ৰজ্জী চ কাসী চ কোসলা চ জনপদা পুব্বে সাণায মযা রট্ঠপিণ্ডং ভুঞ্জন্তিযা চিণ্ণা চরিতা, তেসুযেৰ সত্থারা সমাগমতো পট্ঠায অনণা নিদ্দোসা অপগতকিলেসা হুত্ৰা পঞ্ঞাস সংৰচ্ছরানি রট্ঠপিণ্ডং অভুঞ্জিং অহং.

যেন অভিপ্পসন্নমানসেন উপাসকেন অত্তনো চীৰরং দিন্নং, তস্স পুঞ্ঞৰিসেসকিত্তনমুখেন অঞ্ঞং ব্যাকরোন্তী ‘‘পুঞ্ঞং ৰত পসৰী বহু’’ন্তি ওসানগাথমাহ. সা সুৰিঞ্ঞেয্যাৰ.

ভদ্দাকুণ্ডলকেসাথেরীগাথাৰণ্ণনা নিট্ঠিতা.