৮. সোণাথেরীগাথাৰণ্ণনা

দস পুত্তে ৰিজাযিত্ৰাতিআদিকা সোণায থেরিযা গাথা. অযম্পি পদুমুত্তরস্স ভগৰতো কালে হংসৰতীনগরে কুলগেহে নিব্বত্তিত্ৰা ৰিঞ্ঞুতং পত্ৰা একদিৰসং সত্থু সন্তিকে ধম্মং সুণন্তী সত্থারং একং ভিক্খুনিং আরদ্ধৰীরিযানং ভিক্খুনীনং অগ্গট্ঠানে ঠপেন্তং দিস্ৰা, অধিকারকম্মং কত্ৰা সযম্পি তং ঠানন্তরং পত্থেত্ৰা যাৰজীৰং পুঞ্ঞানি কত্ৰা, ততো চুতা কপ্পসতসহস্সং দেৰমনুস্সেসু সংসরিত্ৰা ইমস্মিং বুদ্ধুপ্পাদে সাৰত্থিযং কুলগেহে নিব্বত্তিত্ৰা ৰযপ্পত্তা পতিকুলং গতা দস পুত্তধীতরো লভিত্ৰা বহুপুত্তিকাতি পঞ্ঞাযিত্থ. সা সামিকে পব্বজিতে ৰযপ্পত্তে পুত্তধীতরো ঘরাৰাসে পতিট্ঠাপেত্ৰা সব্বং ধনং পুত্তানং ৰিভজিত্ৰা অদাসি, ন কিঞ্চি অত্তনো ঠপেসি. তং পুত্তা চ ধীতরো চ কতিপাহমেৰ উপট্ঠহিত্ৰা পরিভৰং অকংসু. সা ‘‘কিং ময্হং ইমেহি পরিভৰায ঘরে ৰসন্তিযা’’তি ভিক্খুনিযো উপসঙ্কমিত্ৰা পব্বজ্জং যাচি. তং ভিক্খুনিযো পব্বাজেসুং. সা লদ্ধূপসম্পদা ‘‘অহং মহল্লিকাকালে পব্বজিত্ৰা অপ্পমত্তায ভৰিতব্ব’’ন্তি ভিক্খুনীনং ৰত্তপটিৰত্তং করোন্তী ‘‘সব্বরত্তিং সমণধম্মং করিস্সামী’’তি হেট্ঠাপাসাদে একথম্ভং হত্থেন গহেত্ৰা তং অৰিজহমানা সমণধম্মং করোন্তী চঙ্কমমানাপি ‘‘অন্ধকারে ঠানে রুক্খাদীসু যত্থ কত্থচি মে সীসং পটিহঞ্ঞেয্যা’’তি রুক্খং হত্থেন গহেত্ৰা তং অৰিজহমানাৰ সমণধম্মং করোতি. ততো পট্ঠায সা আরদ্ধৰীরিযতায পাকটা অহোসি. সত্থা তস্সা ঞাণপরিপাকং দিস্ৰা গন্ধকুটিযং নিসিন্নোৰ ওভাসং ফরিত্ৰা সম্মুখে নিসিন্নো ৰিয অত্তানং দস্সেত্ৰা –

‘‘যো চ ৰস্সসতং জীৰে, অপস্সং ধম্মমুত্তমং;

একাহং জীৰিতং সেয্যো, পস্সতো ধম্মমুত্তম’’ন্তি. (ধ. প. ১১৫) –

গাথং অভাসি. সা গাথাপরিযোসানে অরহত্তং পাপুণি. তেন ৰুত্তং অপদানে (অপ. থেরী ২.৩.২২০-২৪৩) –

‘‘পদুমুত্তরো নাম জিনো, সব্বধম্মান পারগূ;

ইতো সতসহস্সম্হি, কপ্পে উপ্পজ্জি নাযকো.

‘‘তদা সেট্ঠিকুলে জাতা, সুখিতা পূজিতা পিযা;

উপেত্ৰা তং মুনিৰরং, অস্সোসিং মধুরং ৰচং.

‘‘আরদ্ধৰীরিযানগ্গং, ৰণ্ণেসি ভিক্খুনিং জিনো;

তং সুত্ৰা মুদিতা হুত্ৰা, কারং কত্ৰান সত্থুনো.

‘‘অভিৰাদিয সম্বুদ্ধং, ঠানং তং পত্থযিং তদা;

অনুমোদি মহাৰীরো, সিজ্ঝতং পণিধী তৰ.

‘‘সতসহস্সিতো কপ্পে, ওক্কাককুলসম্ভৰো;

গোতমো নাম গোত্তেন, সত্থা লোকে ভৰিস্সতি.

‘‘তস্স ধম্মেসু দাযাদা, ওরসা ধম্মনিম্মিতা;

সোণাতি নাম নামেন, হেস্সতি সত্থু সাৰিকা.

‘‘তং সুত্ৰা মুদিতা হুত্ৰা, যাৰজীৰং তদা জিনং;

মেত্তচিত্তা পরিচরিং, পচ্চযেহি ৰিনাযকং.

‘‘তেন কম্মেন সুকতেন, চেতনাপণিধীহি চ;

জহিত্ৰা মানুসং দেহং, তাৰতিংসমগচ্ছহং.

‘‘পচ্ছিমে চ ভৰে দানি, জাতা সেট্ঠিকুলে অহং;

সাৰত্থিযং পুরৰরে, ইদ্ধে ফীতে মহদ্ধনে.

‘‘যদা চ যোব্বনপ্পত্তা, গন্ত্ৰা পতিকুলং অহং;

দস পুত্তানি অজনিং, সুরূপানি ৰিসেসতো.

‘‘সুখেধিতা চ তে সব্বে, জননেত্তমনোহরা;

অমিত্তানম্পি রুচিতা, মম পগেৰ তে সিযা.

‘‘ততো ময্হং অকামায, দসপুত্তপুরক্খতো;

পব্বজিত্থ স মে ভত্তা, দেৰদেৰস্স সাসনে.

‘‘তদেকিকা ৰিচিন্তেসিং, জীৰিতেনালমত্থু মে;

চত্তায পতিপুত্তেহি, ৰুড্ঢায চ ৰরাকিযা.

‘‘অহম্পি তত্থ গচ্ছিস্সং, সম্পত্তো যত্থ মে পতি;

এৰাহং চিন্তযিত্ৰান, পব্বজিং অনগারিযং.

‘‘ততো চ মং ভিক্খুনিযো, একং ভিক্খুনুপস্সযে;

ৰিহায গচ্ছুমোৰাদং, তাপেহি উদকং ইতি.

‘‘তদা উদকমাহিত্ৰা, ওকিরিত্ৰান কুম্ভিযা;

চুল্লে ঠপেত্ৰা আসীনা, ততো চিত্তং সমাদহিং.

‘‘খন্ধে অনিচ্চতো দিস্ৰা, দুক্খতো চ অনত্ততো;

খেপেত্ৰা আসৰে সব্বে, অরহত্তমপাপুণিং.

‘‘তদাগন্ত্ৰা ভিক্খুনিযো, উণ্হোদকমপুচ্ছিসুং;

তেজোধাতুমধিট্ঠায, খিপ্পং সন্তাপযিং জলং.

‘‘ৰিম্হিতা তা জিনৰরং, এতমত্থমসাৰযুং;

তং সুত্ৰা মুদিতো নাথো, ইমং গাথং অভাসথ.

‘‘যো চ ৰস্সসতং জীৰে, কুসীতো হীনৰীরিযো;

একাহং জীৰিতং সেয্যো, ৰীরিযমারভতো দল়্হং.

‘‘আরাধিতো মহাৰীরো, মযা সুপ্পটিপত্তিযা;

আরদ্ধৰীরিযানগ্গং, মমাহ স মহামুনি.

‘‘কিলেসা ঝাপিতা ময্হং…পে… কতং বুদ্ধস্স সাসন’’ন্তি.

অথ নং ভগৰা ভিক্খুনিযো পটিপাটিযা ঠানন্তরে ঠপেন্তো আরদ্ধৰীরিযানং অগ্গট্ঠানে ঠপেসি. সা একদিৰসং অত্তনো পটিপত্তিং পচ্চৰেক্খিত্ৰা উদানৰসেন –

১০২. ‘‘দস পুত্তে ৰিজাযিত্ৰা, অস্মিং রূপসমুস্সযে;

ততোহং দুব্বলা জিণ্ণা, ভিক্খুনিং উপসঙ্কমিং.

১০৩. ‘‘সা মে ধম্মমদেসেসি, খন্ধাযতনধাতুযো;

তস্সা ধম্মং সুণিত্ৰান, কেসে ছেত্ৰান পব্বজিং.

১০৪. ‘‘তস্সা মে সিক্খমানায, দিব্বচক্খু ৰিসোধিতং;

পুব্বেনিৰাসং জানামি, যত্থ মে ৰুসিতং পুরে.

১০৫. ‘‘অনিমিত্তঞ্চ ভাৰেমি, একগ্গা সুসমাহিতা;

অনন্তরাৰিমোক্খাসিং, অনুপাদায নিব্বুতা.

১০৬. ‘‘পঞ্চক্খন্ধা পরিঞ্ঞাতা, তিট্ঠন্তি ছিন্নমূলকা;

ধি তৰত্থু জরে জম্মে, নত্থি দানি পুনব্ভৰো’’তি. – ইমা গাথা অভাসি;

তত্থ রূপসমুস্সযেতি রূপসঙ্খাতে সমুস্সযে. অযঞ্হি রূপসদ্দো ‘‘চক্খুঞ্চ পটিচ্চ রূপে চ উপ্পজ্জতি চক্খুৰিঞ্ঞাণ’’ন্তিআদীসু (সং. নি. ৪.৬০) রূপাযতনে আগতো. ‘‘যংকিঞ্চি রূপং অতীতানাগতপচ্চুপ্পন্ন’’ন্তিআদীসু (অ. নি. ৪.১৮১) রূপক্খন্ধে. ‘‘পিযরূপে সাতরূপে রজ্জতী’’তিআদীসু (ম. নি. ১.৪০৯) সভাৰে. ‘‘বহিদ্ধা রূপানি পস্সতী’’তিআদীসু (দী. নি. ৩.৩৩৮; অ. নি. ১.৪২৭-৪৩৪) কসিণাযতনে. ‘‘রূপী রূপানি পস্সতী’’তিআদীসু (দী. নি. ৩.৩৩৯; অ. নি. ১.৪৩৫-৪৪২) রূপঝানে. ‘‘অট্ঠিঞ্চ পটিচ্চ ন্হারুঞ্চ পটিচ্চ মংসঞ্চ পটিচ্চ চম্মঞ্চ পটিচ্চ আকাসো পরিৰারিতো রূপন্ত্ৰেৰ সঙ্খং গচ্ছতী’’তিআদীসু (ম. নি. ১.৩০৬) রূপকাযে. ইধাপি রূপকাযেৰ দট্ঠব্বো. সমুস্সযসদ্দোপি অট্ঠীনং সরীরস্স পরিযাযো. ‘‘সতন্তি সমুস্সযা’’তিআদীসু অট্ঠিসরীরপরিযাযে. ‘‘আতুরং অসুচিং পূতিং, পস্স নন্দে সমুস্সয’’ন্তিআদীসু (থেরগা. ১৯) সরীরে. ইধাপি সরীরে এৰ দট্ঠব্বো. তেন ৰুত্তং – ‘‘রূপসমুস্সযে’’তি, রূপসঙ্খাতে সমুস্সযে সরীরেতি অত্থো. ঠত্ৰাতি ৰচনসেসো. অস্মিং রূপসমুস্সযেতি হি ইমস্মিং রূপসমুস্সযে ঠত্ৰা ইমং রূপকাযং নিস্সায দস পুত্তে ৰিজাযিত্ৰাতি যোজনা. ততোতি তস্মা দসপুত্তৰিজাযনহেতু. সা হি পঠমৰযং অতিক্কমিত্ৰা পুত্তকে ৰিজাযন্তী অনুক্কমেন দুব্বলসরীরা জরাজিণ্ণা চ অহোসি. তেন ৰুত্তং ‘‘ততোহং দুব্বলা জিণ্ণা’’তি.

তস্সাতি ততো, তস্সাতি ৰা তস্সা সন্তিকে. পুন তস্সাতি করণে সামিৰচনং, তাযাতি অত্থো. সিক্খমানাযাতি তিস্সোপি সিক্খা সিক্খমানা.

অনন্তরাৰিমোক্খাসিন্তি অগ্গমগ্গস্স অনন্তরা উপ্পন্নৰিমোক্খা আসিং. রূপী রূপানি পস্সতীতিআদযো হি অট্ঠপি ৰিমোক্খা অনন্তরৰিমোক্খা নাম ন হোন্তি. মগ্গানন্তরং অনুপ্পত্তা হি ফলৰিমোক্খা ফলসমাপত্তিকালে পৰত্তমানাপি পঠমমগ্গানন্তরমেৰ সমুপ্পত্তিতো তং উপাদায অনন্তরৰিমোক্খা নাম, যথা মগ্গসমাধি আনন্তরিকসমাধীতি ৰুচ্চতি. অনুপাদায নিব্বুতাতি রূপাদীসু কিঞ্চিপি অগ্গহেত্ৰা কিলেসপরিনিব্বানেন নিব্বুতা আসিং.

এৰং ৰিজ্জাত্তযং ৰিভাৰেত্ৰা অরহত্তফলেন কূটং গণ্হন্তী উদানেত্ৰা, ইদানি জরায চিরকালং উপদ্দুতসরীরং ৰিগরহন্তী সহ ৰত্থুনা তস্স সমতিক্কন্তভাৰং ৰিভাৰেতুং ‘‘পঞ্চক্খন্ধা পরিঞ্ঞাতা’’তি ওসানগাথমাহ. তত্থ ধি তৰত্থু জরে জম্মেতি অঙ্গানং সিথিলভাৰকরণাদিনা জরে জম্মে লামকে হীনে তৰ তুয্হং ধি অত্থু ধিকারো হোতু. নত্থি দানি পুনব্ভৰোতি তস্মা ত্ৰং মযা অতিক্কন্তা অভিভূতাসীতি অধিপ্পাযো.

সোণাথেরীগাথাৰণ্ণনা নিট্ঠিতা.