৭. সকুলাথেরীগাথাৰণ্ণনা

অগারস্মিং ৰসন্তীতিআদিকা সকুলায থেরিযা গাথা. অযং কির পদুমুত্তরস্স ভগৰতো কালে হংসৰতীনগরে আনন্দস্স রঞ্ঞো ধীতা হুত্ৰা নিব্বত্তা, সত্থু ৰেমাতিকভগিনী নন্দাতি নামেন. সা ৰিঞ্ঞুতং পত্ৰা একদিৰসং সত্থু সন্তিকে ধম্মং সুণন্তী সত্থারা একং ভিক্খুনিং দিব্বচক্খুকানং অগ্গট্ঠানে ঠপেন্তং দিস্ৰা উস্সাহজাতা অধিকারকম্মং কত্ৰা সযম্পি তং ঠানন্তরং পত্থেন্তী পণিধানমকাসি. সা তত্থ যাৰজীৰং বহুং উল়ারং কুসলকম্মং কত্ৰা দেৰলোকে নিব্বত্তিত্ৰা অপরাপরং সুগতীসুযেৰ সংসরন্তী কস্সপস্স ভগৰতো কালে ব্রাহ্মণকুলে নিব্বত্তিত্ৰা পরিব্বাজকপব্বজ্জং পব্বজিত্ৰা একচারিনী ৰিচরন্তী একদিৰসং তেলভিক্খায আহিণ্ডিত্ৰা তেলং লভিত্ৰা তেন তেলেন সত্থু চেতিযে সব্বরত্তিং দীপপূজং অকাসি. সা ততো চুতা তাৰতিংসে নিব্বত্তিত্ৰা সুৰিসুদ্ধদিব্বচক্খুকা হুত্ৰা একং বুদ্ধন্তরং দেৰেসুযেৰ সংসরিত্ৰা ইমস্মিং বুদ্ধুপ্পাদে সাৰত্থিযং ব্রাহ্মণকুলে নিব্বত্তি. সকুলাতিস্সা নামং অহোসি. সা ৰিঞ্ঞুতং পত্তা সত্থু জেতৰনপটিগ্গহণে পটিলদ্ধসদ্ধা উপাসিকা হুত্ৰা অপরভাগে অঞ্ঞতরস্স খীণাসৰত্থেরস্স সন্তিকে ধম্মং সুত্ৰা সঞ্জাতসংৰেগা পব্বজিত্ৰা ৰিপস্সনং পট্ঠপেত্ৰা ঘটেন্তী ৰাযমন্তী ন চিরস্সেৰ অরহত্তং পাপুণি. তেন ৰুত্তং অপদানে (অপ. থেরী ২.৩.১৩১-১৬৫) –

‘‘পদুমুত্তরো নাম জিনো, সব্বধম্মান পারগূ;

ইতো সতসহস্সম্হি, কপ্পে উপ্পজ্জি নাযকো.

‘‘হিতায সব্বসত্তানং, সুখায ৰদতং ৰরো;

অত্থায পুরিসাজঞ্ঞো, পটিপন্নো সদেৰকে.

‘‘যসগ্গপত্তো সিরিমা, কিত্তিৰণ্ণগতো জিনো;

পূজিতো সব্বলোকস্স, দিসা সব্বাসু ৰিস্সুতো.

‘‘উত্তিণ্ণৰিচিকিচ্ছো সো, ৰীতিৰত্তকথংকথো;

সম্পুণ্ণমনসঙ্কপ্পো, পত্তো সম্বোধিমুত্তমং.

‘‘অনুপ্পন্নস্স মগ্গস্স, উপ্পাদেতা নরুত্তমো;

অনক্খাতঞ্চ অক্খাসি, অসঞ্জাতঞ্চ সঞ্জনী.

‘‘মগ্গঞ্ঞূ চ মগ্গৰিদূ, মগ্গক্খাযী নরাসভো;

মগ্গস্স কুসলো সত্থা, সারথীনং ৰরুত্তমো.

‘‘মহাকারুণিকো সত্থা, ধম্মং দেসেতি নাযকো;

নিমুগ্গে কামপঙ্কম্হি, সমুদ্ধরতি পাণিনে.

‘‘তদাহং হংসৰতিযং, জাতা খত্তিযনন্দনা;

সুরূপা সধনা চাপি, দযিতা চ সিরীমতী.

‘‘আনন্দস্স মহারঞ্ঞো, ধীতা পরমসোভনা;

ৰেমাতা ভগিনী চাপি, পদুমুত্তরনামিনো.

‘‘রাজকঞ্ঞাহি সহিতা, সব্বাভরণভূসিতা;

উপাগম্ম মহাৰীরং, অস্সোসিং ধম্মদেসনং.

‘‘তদা হি সো লোকগরু, ভিক্খুনিং দিব্বচক্খুকং;

কিত্তযং পরিসামজ্ঝে, অগ্গট্ঠানে ঠপেসি তং.

‘‘সুণিত্ৰা তমহং হট্ঠা, দানং দত্ৰান সত্থুনো;

পূজিত্ৰান চ সম্বুদ্ধং, দিব্বচক্খুং অপত্থযিং.

‘‘ততো অৰোচ মং সত্থা, নন্দে লচ্ছসি পত্থিতং;

পদীপধম্মদানানং, ফলমেতং সুনিচ্ছিতং.

‘‘সতসহস্সিতো কপ্পে, ওক্কাককুলসম্ভৰো;

গোতমো নাম গোত্তেন, সত্থা লোকে ভৰিস্সতি.

‘‘তস্স ধম্মেসু দাযাদা, ওরসা ধম্মনিম্মিতা;

সকুলা নাম নামেন, হেস্সতি সত্থু সাৰিকা.

‘‘তেন কম্মেন সুকতেন, চেতনাপণিধীহি চ;

জহিত্ৰা মানুসং দেহং, তাৰতিংসমগচ্ছহং.

‘‘ইমম্হি ভদ্দকে কপ্পে, ব্রহ্মবন্ধু মহাযসো;

কস্সপো নাম গোত্তেন, উপ্পজ্জি ৰদতং ৰরো.

‘‘পরিব্বাজকিনী আসিং, তদাহং একচারিনী;

ভিক্খায ৰিচরিত্ৰান, অলভিং তেলমত্তকং.

‘‘তেন দীপং পদীপেত্ৰা, উপট্ঠিং সব্বসংৰরিং;

চেতিযং দ্ৰিপদগ্গস্স, ৰিপ্পসন্নেন চেতসা.

‘‘তেন কম্মেন সুকতেন, চেতনাপণিধীহি চ;

জহিত্ৰা মানুসং দেহং, তাৰতিংসমগচ্ছহং.

‘‘যত্থ যত্থূপপজ্জামি, তস্স কম্মস্স ৰাহসা;

পজ্জলন্তি মহাদীপা, তত্থ তত্থ গতায মে.

‘‘তিরোকুট্টং তিরোসেলং, সমতিগ্গয্হ পব্বতং;

পস্সামহং যদিচ্ছামি, দীপদানস্সিদং ফলং.

‘‘ৰিসুদ্ধনযনা হোমি, যসসা চ জলামহং;

সদ্ধাপঞ্ঞাৰতী চেৰ, দীপদানস্সিদং ফলং.

‘‘পচ্ছিমে চ ভৰে দানি, জাতা ৰিপ্পকুলে অহং;

পহূতধনধঞ্ঞম্হি, মুদিতে রাজপূজিতে.

‘‘অহং সব্বঙ্গসম্পন্না, সব্বাভরণভূসিতা;

পুরপ্পৰেসে সুগতং, ৰাতপানে ঠিতা অহং.

‘‘দিস্ৰা জলন্তং যসসা, দেৰমনুস্সসক্কতং;

অনুব্যঞ্জনসম্পন্নং, লক্খণেহি ৰিভূসিতং.

‘‘উদগ্গচিত্তা সুমনা, পব্বজ্জং সমরোচযিং;

ন চিরেনেৰ কালেন, অরহত্তমপাপুণিং.

‘‘ইদ্ধীসু চ ৰসী হোমি, দিব্বায সোতধাতুযা;

পরচিত্তানি জানামি, সত্থুসাসনকারিকা.

‘‘পুব্বেনিৰাসং জানামি, দিব্বচক্খু ৰিসোধিতং;

খেপেত্ৰা আসৰে সব্বে, ৰিসুদ্ধাসিং সুনিম্মলা.

‘‘পরিচিণ্ণো মযা সত্থা, কতং বুদ্ধস্স সাসনং;

ওহিতো গরুকো ভারো, ভৰনেত্তিসমূহতা.

‘‘যস্সত্থায পব্বজিতা, অগারস্মানগারিযং;

সো মে অত্থো অনুপ্পত্তো, সব্বসংযোজনক্খযো.

‘‘ততো মহাকারুণিকো, এতদগ্গে ঠপেসি মং;

দিব্বচক্খুকানং অগ্গা, সকুলাতি নরুত্তমো.

‘‘কিলেসা ঝাপিতা ময্হং…পে… কতং বুদ্ধস্স সাসন’’ন্তি.

অরহত্তং পন পত্ৰা কতাধিকারতায দিব্বচক্খুঞাণে চিণ্ণৰসী অহোসি. তেন নং সত্থা দিব্বচক্খুকানং ভিক্খুনীনং অগ্গট্ঠানে ঠপেসি. সা অত্তনো পটিপত্তিং পচ্চৰেক্খিত্ৰা পীতিসোমনস্সজাতা উদানৰসেন –

৯৭. ‘‘অগারস্মিং ৰসন্তীহং, ধম্মং সুত্ৰান ভিক্খুনো;

অদ্দসং ৰিরজং ধম্মং, নিব্বানং পদমচ্চুতং.

৯৮. ‘‘সাহং পুত্তং ধীতরঞ্চ, ধনধঞ্ঞঞ্চ ছড্ডিয;

কেসে ছেদাপযিত্ৰান, পব্বজিং অনগারিযং.

৯৯. ‘‘সিক্খমানা অহং সন্তী, ভাৰেন্তী মগ্গমঞ্জসং;

পহাসিং রাগদোসঞ্চ, তদেকট্ঠে চ আসৰে.

১০০. ‘‘ভিক্খুনী উপসম্পজ্জ, পুব্বজাতিমনুস্সরিং;

দিব্বচক্খু ৰিসোধিতং, ৰিমলং সাধুভাৰিতং.

১০১. ‘‘সঙ্খারে পরতো দিস্ৰা, হেতুজাতে পলোকিতে;

পহাসিং আসৰে সব্বে, সীতিভূতাম্হি নিব্বুতা’’তি. –

ইমা গাথা অভাসি.

তত্থ অগারস্মিং ৰসন্তীহং, ধম্মং সুত্ৰান ভিক্খুনোতি অহং পুব্বে অগারমজ্ঝে ৰসমানা অঞ্ঞতরস্স ভিন্নকিলেসস্স ভিক্খুনো সন্তিকে চতুসচ্চগব্ভং ধম্মকথং সুত্ৰা. অদ্দসং ৰিরজং ধম্মং, নিব্বানং পদমচ্চুতন্তি রাগরজাদীনং অভাৰেন ৰিরজং, ৰানতো নিক্খন্তত্তা নিব্বানং, চৰনাভাৰতো অধিগতানং অচ্চুতিহেতুতায চ নিব্বানং অচ্চুতং, পদন্তি চ লদ্ধনামং অসঙ্খতধম্মং, সহস্সনযপটিমণ্ডিতেন দস্সনসঙ্খাতেন ধম্মচক্খুনা অদ্দসং পস্সিং.

সাহন্তি সা অহং ৰুত্তপ্পকারেন সোতাপন্না হোমি.

সিক্খমানা অহং সন্তীতি অহং সিক্খমানাৰ সমানা পব্বজিত্ৰা ৰস্সে অপরিপুণ্ণে এৰ. ভাৰেন্তী মগ্গমঞ্জসন্তি মজ্ঝিমপটিপত্তিভাৰতো অঞ্জসং উপরিমগ্গং উপ্পাদেন্তী. তদেকট্ঠে চ আসৰেতি রাগদোসেহি সহজেকট্ঠে পহানেকট্ঠে চ ততিযমগ্গৰজ্ঝে আসৰে পহাসিং সমুচ্ছিন্দিং.

ভিক্খুনী উপসম্পজ্জাতি ৰস্সে পরিপুণ্ণে উপসম্পজ্জিত্ৰা ভিক্খুনী হুত্ৰা. ৰিমলন্তি অৰিজ্জাদীহি উপক্কিলেসেহি ৰিমুত্ততায ৰিগতমলং, সাধু সক্কচ্চ সম্মদেৰ ভাৰিতং, সাধূহি ৰা বুদ্ধাদীহি ভাৰিতং উপ্পাদিতং দিব্বচক্খু ৰিসোধিতন্তি সম্বন্ধো.

সঙ্খারেতি তেভূমকসঙ্খারে. পরতোতি অনত্ততো. হেতুজাতেতি পচ্চযুপ্পন্নে. পলোকিতেতি পলুজ্জনসভাৰে পভঙ্গুনে পঞ্ঞাচক্খুনা দিস্ৰা. পহাসিং আসৰে সব্বেতি অগ্গমগ্গেন অৰসিট্ঠে সব্বেপি আসৰে পজহিং, খেপেসিন্তি অত্থো. সেসং ৰুত্তনযমেৰ.

সকুলাথেরীগাথাৰণ্ণনা নিট্ঠিতা.