৬. মিত্তাকাল়ীথেরীগাথাৰণ্ণনা

সদ্ধায পব্বজিত্ৰানাতিআদিকা মিত্তাকাল়িযা থেরিযা গাথা. অযম্পি পুরিমবুদ্ধেসু কতাধিকারা তত্থ তত্থ ভৰে ৰিৰট্টূপনিস্সযং কুসলং উপচিনন্তী ইমস্মিং বুদ্ধুপ্পাদে কুরুরট্ঠে কম্মাসধম্মনিগমে ব্রাহ্মণকুলে নিব্বত্তিত্ৰা ৰিঞ্ঞুতং পত্তা মহাসতিপট্ঠানদেসনায পটিলদ্ধসদ্ধা ভিক্খুনীসু পব্বজিত্ৰা সত্ত সংৰচ্ছরানি লাভসক্কারগিদ্ধিকা হুত্ৰা সমণধম্মং করোন্তী তত্থ তত্থ ৰিচরিত্ৰা অপরভাগে যোনিসো উম্মুজ্জন্তী সংৰেগজাতা হুত্ৰা ৰিপস্সনং পট্ঠপেত্ৰা ন চিরস্সেৰ সহ পটিসম্ভিদাহি অরহত্তং পত্ৰা অত্তনো পটিপত্তিং পচ্চৰেক্খিত্ৰা উদানৰসেন –

৯২. ‘‘সদ্ধায পব্বজিত্ৰান, অগারস্মানগারিযং;

ৰিচরিংহং তেন তেন, লাভসক্কারউস্সুকা.

৯৩. ‘‘রিঞ্চিত্ৰা পরমং অত্থং, হীনমত্থং অসেৰিহং;

কিলেসানং ৰসং গন্ত্ৰা, সামঞ্ঞত্থং ন বুজ্ঝিহং.

৯৪. ‘‘তস্সা মে অহু সংৰেগো, নিসিন্নায ৰিহারকে;

উম্মগ্গপটিপন্নাম্হি, তণ্হায ৰসমাগতা.

৯৫. ‘‘অপ্পকং জীৰিতং ময্হং, জরা ব্যাধি চ মদ্দতি;

পুরাযং ভিজ্জতি কাযো, ন মে কালো পমজ্জিতুং.

৯৬. ‘‘যথাভূতমৰেক্খন্তী, খন্ধানং উদযব্বযং;

ৰিমুত্তচিত্তা উট্ঠাসিং, কতং বুদ্ধস্স সাসন’’ন্তি. – ইমা গাথা অভাসি;

তত্থ ৰিচরিংহং তেন তেন, লাভসক্কারউস্সুকাতি লাভে চ সক্কারে চ উস্সুকা যুত্তপ্পযুত্তা হুত্ৰা তেন তেন বাহুসচ্চধম্মকথাদিনা লাভুপ্পাদহেতুনা ৰিচরিং অহং.

রিঞ্চিত্ৰা পরমং অত্থন্তি ঝানৰিপস্সনামগ্গফলাদিং উত্তমং অত্থং জহিত্ৰা ছড্ডেত্ৰা. হীনমত্থং অসেৰিহন্তি চতুপচ্চযসঙ্খাতআমিসভাৰতো হীনং লামকং অত্থং অযোনিসো পরিযেসনায পটিসেৰিং অহং. কিলেসানং ৰসং গন্ত্ৰাতি মানমদতণ্হাদীনং কিলেসানং ৰসং উপগন্ত্ৰা সামঞ্ঞত্থং সমণকিচ্চং ন বুজ্ঝিং ন জানিং অহং.

নিসিন্নায ৰিহারকেতি মম ৰসনকওৰরকে নিসিন্নায অহু সংৰেগো. কথন্তি চে, আহ ‘‘উম্মগ্গপটিপন্নাম্হী’’তি. তত্থ উম্মগ্গপটিপন্নাম্হীতি যাৰদেৰ অনুপাদায পরিনিব্বানত্থমিদং সাসনং, তত্থ সাসনে পব্বজিত্ৰা কম্মট্ঠানং অমনসিকরোন্তী তস্স উম্মগ্গপটিপন্না অম্হীতি. তণ্হায ৰসমাগতাতি পচ্চযুপ্পাদনতণ্হায ৰসং উপগতা.

অপ্পকং জীৰিতং ময্হন্তি পরিচ্ছিন্নকালা ৰজ্জিততো বহূপদ্দৰতো চ মম জীৰিতং অপ্পকং পরিত্তং লহুকং. জরা ব্যাধি চ মদ্দতীতি তঞ্চ সমন্ততো আপতিত্ৰা নিপ্পোথেন্তা পব্বতা ৰিয জরা ব্যাধি চ মদ্দতি নিম্মথতি. ‘‘মদ্দরে’’তিপি পাঠো. পুরাযং ভিজ্জতি কাযোতি অযং কাযো ভিজ্জতি পুরা. যস্মা তস্স একংসিকো ভেদো, তস্মা ন মে কালো পমজ্জিতুং অযং কালো অট্ঠক্খণৰজ্জিতো নৰমো খণো, সো পমজ্জিতুং ন যুত্তোতি তস্সাহুং সংৰেগোতি যোজনা.

যথাভূতমৰেক্খন্তীতি এৰং জাতসংৰেগা ৰিপস্সনং পট্ঠপেত্ৰা অনিচ্চাদিমনসিকারেন যথাভূতমৰেক্খন্তী. কিং অৰেক্খন্তীতি আহ ‘‘খন্ধানং উদযব্বয’’ন্তি. ‘‘অৰিজ্জাসমুদযা রূপসমুদযো’’তিআদিনা (পটি. ম. ১.৫০) সমপঞ্ঞাসপ্পভেদানং পঞ্চন্নং উপাদানক্খন্ধানং উপ্পাদনিরোধঞ্চ উদযব্বযানুপস্সনায অৰেক্খন্তী ৰিপস্সনং উস্সুক্কাপেত্ৰা মগ্গপটিপাটিযা সব্বসো কিলেসেহি চ ভৰেহি চ ৰিমুত্তচিত্তা উট্ঠাসিং, উভতো উট্ঠানেন মগ্গেন ভৰত্তযতো চাতি ৰুট্ঠিতা অহোসিং. সেসং ৰুত্তনযমেৰ.

মিত্তাকাল়ীথেরীগাথাৰণ্ণনা নিট্ঠিতা.