৫. নন্দুত্তরাথেরীগাথাৰণ্ণনা

অগ্গিং চন্দঞ্চাতিআদিকা নন্দুত্তরায থেরিযা গাথা. অযম্পি পুরিমবুদ্ধেসু কতাধিকারা তত্থ তত্থ ভৰে ৰিৰট্টূপনিস্সযং কুসলং উপচিনিত্ৰা ইমস্মিং বুদ্ধুপ্পাদে কুরুরট্ঠে কম্মাসধম্মনিগমে ব্রাহ্মণকুলে নিব্বত্তিত্ৰা, একচ্চানি ৰিজ্জাট্ঠানানি সিপ্পাযতনানি চ উগ্গহেত্ৰা নিগণ্ঠপব্বজ্জং উপগন্ত্ৰা, ৰাদপ্পসুতা জম্বুসাখং গহেত্ৰা ভদ্দাকুণ্ডলকেসা ৰিয জম্বুদীপতলে ৰিচরন্তী মহামোগ্গল্লানত্থেরং উপসঙ্কমিত্ৰা পঞ্হং পুচ্ছিত্ৰা পরাজযং পত্তা থেরস্স ওৰাদে ঠত্ৰা সাসনে পব্বজিত্ৰা সমণধম্মং করোন্তী ন চিরস্সেৰ সহ পটিসম্ভিদাহি অরহত্তং পত্ৰা অত্তনো পটিপত্তিং পচ্চৰেক্খিত্ৰা উদানৰসেন –

৮৭. ‘‘অগ্গিং চন্দঞ্চ সূরিযঞ্চ, দেৰতা চ নমস্সিহং;

নদীতিত্থানি গন্ত্ৰান, উদকং ওরুহামিহং.

৮৮. ‘‘বহূৰতসমাদানা, অড্ঢং সীসস্স ওলিখিং;

ছমায সেয্যং কপ্পেমি, রত্তিং ভত্তং ন ভুঞ্জহং.

৮৯. ‘‘ৰিভূসামণ্ডনরতা, ন্হাপনুচ্ছাদনেহি চ;

উপকাসিং ইমং কাযং, কামরাগেন অট্টিতা.

৯০. ‘‘ততো সদ্ধং লভিত্ৰান, পব্বজিং অনগারিযং;

দিস্ৰা কাযং যথাভূতং, কামরাগো সমূহতো.

৯১. ‘‘সব্বে ভৰা সমুচ্ছিন্না, ইচ্ছা চ পত্থনাপি চ;

সব্বযোগৰিসংযুত্তা, সন্তিং পাপুণি চেতসো’’তি. –

ইমা পঞ্চ গাথা অভাসি.

তত্থ অগ্গিং চন্দঞ্চ সূরিযঞ্চ, দেৰতা চ নমস্সিহন্তি অগ্গিপ্পমুখা দেৰাতি ইন্দানং দেৰানং আরাধনত্থং আহুতিং পগ্গহেত্ৰা অগ্গিঞ্চ, মাসে মাসে সুক্কপক্খস্স দুতিযায চন্দঞ্চ, দিৰসে দিৰসে সাযং পাতং সূরিযঞ্চ, অঞ্ঞা চ বাহিরা হিরঞ্ঞগব্ভাদযো দেৰতা চ, ৰিসুদ্ধিমগ্গং গৰেসন্তী নমস্সিহং নমক্কারং অহং অকাসিং. নদীতিত্থানি গন্ত্ৰান, উদকং ওরুহামিহন্তি গঙ্গাদীনং নদীনং পূজাতিত্থানি উপগন্ত্ৰা সাযং পাতং উদকং ওতরামি উদকে নিমুজ্জিত্ৰা অঙ্গসিঞ্চনং করোমি.

বহূৰতসমাদানাতি পঞ্চাতপতপ্পনাদি বহুৰিধৰতসমাদানা. গাথাসুখত্থং বহূতি দীঘকরণং. অড্ঢং সীসস্স ওলিখিন্তি ময্হং সীসস্স অড্ঢমেৰ মুণ্ডেমি. কেচি ‘‘অড্ঢং সীসস্স ওলিখিন্তি কেসকলাপস্স অড্ঢং জটাবন্ধনৰসেন বন্ধিত্ৰা অড্ঢং ৰিস্সজ্জেসি’’ন্তি অত্থং ৰদন্তি. ছমায সেয্যং কপ্পেমীতি থণ্ডিলসাযিনী হুত্ৰা অনন্তরহিতায ভূমিযা সযামি. রত্তিং ভত্তং ন ভুঞ্জহন্তি রত্তূপরতা হুত্ৰা রত্তিযং ভোজনং ন ভুঞ্জিং.

ৰিভূসামণ্ডনরতাতি চিরকালং অত্তকিলমথানুযোগেন কিলন্তকাযা ‘‘এৰং সরীরস্স কিলমনেন নত্থি পঞ্ঞাসুদ্ধি. সচে পন ইন্দ্রিযানং তোসনৰসেন সরীরস্স তপ্পনেন সুদ্ধি সিযা’’তি মন্ত্ৰা ইমং কাযং অনুগ্গণ্হন্তী ৰিভূসাযং মণ্ডনে চ রতা ৰত্থালঙ্কারেহি অলঙ্করণে গন্ধমালাদীহি মণ্ডনে চ অভিরতা. ন্হাপনুচ্ছাদনেহি চাতি সম্বাহনাদীনি কারেত্ৰা ন্হাপনেন উচ্ছাদনেন চ. উপকাসিং ইমং কাযন্তি ইমং মম কাযং অনুগ্গণ্হিং সন্তপ্পেসিং. কামরাগেন অট্টিতাতি এৰং কাযদল়্হীবহুলা হুত্ৰা অযোনিসোমনসিকারপচ্চযা পরিযুট্ঠিতেন কামরাগেন অট্টিতা অভিণ্হং উপদ্দুতা অহোসিং.

ততো সদ্ধং লভিত্ৰানাতি এৰং সমাদিন্নৰতানি ভিন্দিত্ৰা কাযদল়্হীবহুলা ৰাদপ্পসুতা হুত্ৰা তত্থ তত্থ ৰিচরন্তী ততো পচ্ছা অপরভাগে মহামোগ্গল্লানত্থেরস্স সন্তিকে লদ্ধোৰাদানুসাসনা সদ্ধং পটিলভিত্ৰা. দিস্ৰা কাযং যথাভূতন্তি সহ ৰিপস্সনায মগ্গপঞ্ঞায ইমং মম কাযং যথাভূতং দিস্ৰা অনাগামিমগ্গেন সব্বসো কামরাগো সমূহতো. ততো পরং অগ্গমগ্গেন সব্বে ভৰা সমুচ্ছিন্না, ইচ্ছা চ পত্থনাপি চাতি পচ্চুপ্পন্নৰিসযাভিলাসসঙ্খাতা ইচ্ছা চ আযতিভৰাভিলাসসঙ্খাতা পত্থনাপি সব্বে ভৰাপি সমুচ্ছিন্নাতি যোজনা. সন্তিং পাপুণি চেতসোতি অচ্চন্তং সন্তিং অরহত্তফলং পাপুণিং অধিগচ্ছিন্তি অত্থো.

নন্দুত্তরাথেরীগাথাৰণ্ণনা নিট্ঠিতা.