১২. চন্দাথেরীগাথাৰণ্ণনা

দুগ্গতাহং পুরে আসিন্তিআদিকা চন্দায থেরিযা গাথা. অযম্পি পুরিমবুদ্ধেসু কতাধিকারা তত্থ তত্থ ভৰে ৰিৰট্টূপনিস্সযং কুসলং উপচিনন্তী অনুক্কমেন সম্ভতৰিমোক্খসম্ভারা পরিপক্কঞাণা ইমস্মিং বুদ্ধুপ্পাদে অঞ্ঞতরস্মিং ব্রাহ্মণগামে অপঞ্ঞাতস্স ব্রাহ্মণস্স গেহে পটিসন্ধিং গণ্হি. তস্সা নিব্বত্তিতো পট্ঠাযং তং কুলং ভোগেহি পরিক্খযং গতং. সা অনুক্কমেন ৰিঞ্ঞুতং পত্ৰা দুক্খেন জীৰতি. অথ তস্মিং গেহে অহিৰাতরোগো উপ্পজ্জি. তেনস্সা সব্বেপি ঞাতকা মরণব্যসনং পাপুণিংসু. সা ঞাতিক্খযে জাতে অঞ্ঞত্থ জীৰিতুং অসক্কোন্তী কপালহত্থা কুলে কুলে ৰিচরিত্ৰা লদ্ধলদ্ধেন ভিক্খাহারেন যাপেন্তী একদিৰসং পটাচারায থেরিযা ভত্তৰিস্সগ্গট্ঠানং অগমাসি. ভিক্খুনিযো তং দুক্খিতং খুদ্দাভিভূতং দিস্ৰান সঞ্জাতকারুঞ্ঞা পিযসমুদাচারেন সঙ্গহেত্ৰা তত্থ ৰিজ্জমানেন উপচারমনোহরেন আহারেন সন্তপ্পেসুং. সা তাসং আচারসীলে পসীদিত্ৰা থেরিযা সন্তিকং উপসঙ্কমিত্ৰা ৰন্দিত্ৰা একমন্তং নিসীদি. তস্সা থেরী ধম্মং কথেসি. সা তং ধম্মং সুত্ৰা সাসনে অভিপ্পসন্না সংসারে চ সঞ্জাতসংৰেগা পব্বজি. পব্বজিত্ৰা চ থেরিযা ওৰাদে ঠত্ৰা ৰিপস্সনং পট্ঠপেত্ৰা ভাৰনং অনুযুঞ্জন্তী কতাধিকারতায ঞাণস্স চ পরিপাকং গতত্তা ন চিরস্সেৰ সহ পটিসম্ভিদাহি অরহত্তং পত্ৰা অত্তনো পটিপত্তিং পচ্চৰেক্খিত্ৰা –

১২২. ‘‘দুগ্গতাহং পুরে আসিং, ৰিধৰা চ অপুত্তিকা;

ৰিনা মিত্তেহি ঞাতীহি, ভত্তচোল়স্স নাধিগং.

১২৩. ‘‘পত্তং দণ্ডঞ্চ গণ্হিত্ৰা, ভিক্খমানা কুলা কুলং;

সীতুণ্হেন চ ডয্হন্তী, সত্ত ৰস্সানি চারিহং.

১২৪. ‘‘ভিক্খুনিং পুন দিস্ৰান, অন্নপানস্স লাভিনিং;

উপসঙ্কম্মং অৰোচং, পব্বজ্জং অনগারিযং.

১২৫. ‘‘সা চ মং অনুকম্পায, পব্বাজেসি পটাচারা;

ততো মং ওৰদিত্ৰান, পরমত্থে নিযোজযি.

১২৬. ‘‘তস্সাহং ৰচনং সুত্ৰা, অকাসিং অনুসাসনিং;

অমোঘো অয্যাযোৰাদো, তেৰিজ্জাম্হি অনাসৰা’’তি. –

উদানৰসেন ইমা গাথা অভাসি.

তত্থ দুগ্গতাতি দলিদ্দা. পুরেতি পব্বজিততো পুব্বে. পব্বজিতকালতো পট্ঠায হি ইধ পুগ্গলো ভোগেহি অড্ঢো ৰা দলিদ্দো ৰাতি ন ৰত্তব্বো. গুণেহি পন অযং থেরী অড্ঢাযেৰ. তেনাহ ‘‘দুগ্গতাহং পুরে আসি’’ন্তি. ৰিধৰাতি ধৰো ৰুচ্চতি সামিকো, তদভাৰা ৰিধৰা, মতপতিকাতি অত্থো. অপুত্তিকাতি পুত্তরহিতা. ৰিনা মিত্তেহীতি মিত্তেহি বন্ধৰেহি চ পরিহীনা রহিতা. ভত্তচোল়স্স নাধিগন্তি ভত্তস্স চোল়স্স চ পারিপূরিং নাধিগচ্ছিং, কেৰলং পন ভিক্খাপিণ্ডস্স পিলোতিকাখণ্ডস্স চ ৰসেন ঘাসচ্ছাদনমত্তমেৰ অলত্থন্তি অধিপ্পাযো. তেনাহ ‘‘পত্তং দণ্ডঞ্চ গণ্হিত্ৰা’’তিআদি.

তত্থ পত্তন্তি মত্তিকাভাজনং. দণ্ডন্তি গোণসুনখাদিপরিহরণদণ্ডকং. কুলা কুলন্তি কুলতো কুলং. সীতুণ্হেন চ ডয্হন্তীতি ৰসনগেহাভাৰতো সীতেন চ উণ্হেন চ পীল়িযমানা.

ভিক্খুনিন্তি পটাচারাথেরিং সন্ধায ৰদতি. পুনাতি পচ্ছা, সত্তসংৰচ্ছরতো অপরভাগে.

পরমত্থেতি পরমে উত্তমে অত্থে, নিব্বানগামিনিযা পটিপদায নিব্বানে চ. নিযোজযীতি কম্মট্ঠানং আচিক্খন্তী নিযোজেসি. সেসং ৰুত্তনযমেৰ.

চন্দাথেরীগাথাৰণ্ণনা নিট্ঠিতা.

পঞ্চকনিপাতৰণ্ণনা নিট্ঠিতা.