১১. তিংসমত্তাথেরীগাথাৰণ্ণনা

মুসলানি গহেত্ৰানাতিআদিকা তিংসমত্তানং থেরীনং গাথা. তাপি পুরিমবুদ্ধেসু কতাধিকারা তত্থ তত্থ ভৰে ৰিৰট্টূপনিস্সযং কুসলং উপচিনন্তিযো অনুক্কমেন উপচিতৰিমোক্খসম্ভারা ইমস্মিং বুদ্ধুপ্পাদে সককম্মসঞ্চোদিতা তত্থ তত্থ কুলগেহে নিব্বত্তিত্ৰা ৰিঞ্ঞুতং পত্ৰা পটাচারায থেরিযা সন্তিকে ধম্মং সুত্ৰা পটিলদ্ধসদ্ধা পব্বজিত্ৰা পরিসুদ্ধসীলা ৰত্তপটিৰত্তং পরিপূরেন্তিযো ৰিহরন্তি. অথেকদিৰসং পটাচারাথেরী তাসং ওৰাদং দেন্তী –

১১৭. ‘‘মুসলানি গহেত্ৰান, ধঞ্ঞং কোট্টেন্তি মাণৰা;

পুত্তদারানি পোসেন্তা, ধনং ৰিন্দন্তি মাণৰা.

১১৮. ‘‘করোথ বুদ্ধসাসনং, যং কত্ৰা নানুতপ্পতি;

খিপ্পং পাদানি ধোৰিত্ৰা, একমন্তে নিসীদথ;

চেতোসমথমনুযুত্তা, করোথ বুদ্ধসাসন’’ন্তি. – ইমা দ্ৰে গাথা অভাসি;

তত্থাযং সঙ্খেপত্থো – ইমে সত্তা জীৰিতহেতু মুসলানি গহেত্ৰা পরেসং ধঞ্ঞং কোট্টেন্তি, উদুক্খলকম্মং করোন্তি. অঞ্ঞম্পি এদিসং নিহীনকম্মং কত্ৰা পুত্তদারং পোসেন্তা যথারহং ধনম্পি সংহরন্তি. তং পন নেসং কম্মং নিহীনং গম্মং পোথুজ্জনিকং দুক্খং অনত্থসঞ্হিতঞ্চ. তস্মা এদিসং সংকিলেসিকপপঞ্চং ৰজ্জেত্ৰা করোথ বুদ্ধসাসনং সিক্খত্তযসঙ্খাতং সম্মাসম্বুদ্ধসাসনং করোথ সম্পাদেথ অত্তনো সন্তানে নিব্বত্তেথ. তত্থ কারণমাহ – ‘‘যং কত্ৰা নানুতপ্পতী’’তি, যস্স করণহেতু এতরহি আযতিঞ্চ অনুতাপং নাপজ্জতি. ইদানি তস্স করণে পুব্বকিচ্চং অনুযোগৰিধিঞ্চ দস্সেতুং, ‘‘খিপ্পং পাদানি ধোৰিত্ৰা’’তিআদি ৰুত্তং. তত্থ যস্মা অধোৰিতপাদস্স অৰিক্খালিতমুখস্স চ নিসজ্জসুখং উতুসপ্পাযলাভো চ ন হোতি, পাদে পন ধোৰিত্ৰা মুখঞ্চ ৰিক্খালেত্ৰা একমন্তে নিসিন্নস্স তদুভযং লভতি, তস্মা খিপ্পং ইমং যথালদ্ধং খণং অৰিরাধেন্তিযো পাদানি অত্তনো পাদে ধোৰিত্ৰা একমন্তে ৰিৰিত্তে ওকাসে নিসীদথ নিসজ্জথ. অট্ঠতিংসায আরম্মণেসু যত্থ কত্থচি চিত্তরুচিকে আরম্মণে অত্তনো চিত্তং উপনিবন্ধিত্ৰা চেতোসমথমনুযুত্তা সমাহিতেন চিত্তেন চতুসচ্চকম্মট্ঠানভাৰনাৰসেন বুদ্ধস্স ভগৰতো সাসনং ওৰাদং অনুসিট্ঠিং করোথ সম্পাদেথাতি.

অথ তা ভিক্খুনিযো তস্সা থেরিযা ওৰাদে ঠত্ৰা ৰিপস্সনং পট্ঠপেত্ৰা ভাৰনায কম্মং করোন্তিযো ঞাণস্স পরিপাকং গতত্তা হেতুসম্পন্নতায চ সহ পটিসম্ভিদাহি অরহত্তং পত্ৰা অত্তনো পটিপত্তিং পচ্চৰেক্খিত্ৰা ওৰাদগাথাহি সদ্ধিং –

১১৯. ‘‘তস্সা তা ৰচনং সুত্ৰা, পটাচারায সাসনং;

পাদে পক্খালযিত্ৰান, একমন্তং উপাৰিসুং;

চেতোসমথমনুযুত্তা, অকংসু বুদ্ধসাসনং.

১২০. ‘‘রত্তিযা পুরিমে যামে, পুব্বজাতিমনুস্সরুং;

রত্তিযা মজ্ঝিমে যামে, দিব্বচক্খুং ৰিসোধযুং;

রত্তিযা পচ্ছিমে যামে, তমোখন্ধং পদালযুং.

১২১. ‘‘উট্ঠায পাদে ৰন্দিংসু, কতা তে অনুসাসনী;

ইন্দংৰ দেৰা তিদসা, সঙ্গামে অপরাজিতং;

পুরক্খত্ৰা ৰিহস্সাম, তেৰিজ্জাম্হ অনাসৰা’’তি. –

ইমা গাথা অভাসিংসু.

তত্থ তস্সা তা ৰচনং সুত্ৰা, পটাচারায সাসনন্তি তস্সা পটাচারায থেরিযা কিলেসপটিসত্তুসাসনট্ঠেন সাসনভূতং ওৰাদৰচনং, তা তিংসমত্তা ভিক্খুনিযো সুত্ৰা পটিস্সুত্ৰা সিরসা সম্পটিচ্ছিত্ৰা.

উট্ঠায পাদে ৰন্দিংসু, কতা তে অনুসাসনীতি যথাসম্পটিচ্ছিতং তস্সা সাসনং অট্ঠিং কত্ৰা মনসি কত্ৰা যথাফাসুকট্ঠানে নিসীদিত্ৰা ভাৰেন্তিযো ভাৰনং মত্থকং পাপেত্ৰা অত্তনা অধিগতৰিসেসং আরোচেতুং নিসিন্নাসনতো উট্ঠায তস্সা সন্তিকং গন্ত্ৰা ‘‘মহাথেরি তৰানুসাসনী যথানুসিট্ঠং অম্হেহি কতা’’তি ৰত্ৰা তস্সা পাদে পঞ্চপতিট্ঠিতেন ৰন্দিংসু. ইন্দংৰ দেৰা তিদসা, সঙ্গামে অপরাজিতন্তি দেৰাসুরসঙ্গামে অপরাজিতং ৰিজিতাৰিং ইন্দং তাৰতিংসা দেৰা ৰিয মহাথেরি, মযং তং পুরক্খত্ৰা ৰিহরিস্সাম অঞ্ঞস্স কত্তব্বস্স অভাৰতো. তস্মা ‘‘তেৰিজ্জাম্হ অনাসৰা’’তি অত্তনো কতঞ্ঞুভাৰং পৰেদেন্তী ইদমেৰ তাসং অঞ্ঞাব্যাকরণং অহোসি. যং পনেত্থ অত্থতো অৰিভত্তং, তং হেট্ঠা ৰুত্তনযমেৰ.

তিংসমত্তাথেরীগাথাৰণ্ণনা নিট্ঠিতা.